1 Samuel 1 - Chayahuita (Shahui)

Yosë nohuanton Ana huaꞌhuaninsoꞌ

¹ Iprain huënton motopiroꞌsaquë aꞌnara ninano yaꞌhuërin Nama itopisoꞌ. Inaquë aꞌnara quëmapi Iricana itopiso yaꞌhuërin. Inasoꞌ, Sohui itopisoꞌ shiin. Iricanasoꞌ, Iroamo itopisoꞌ huiꞌnin. Iroamonta paꞌpin, Irio itopi. Irionta paꞌpin, Too itopi. Toonta paꞌpin, Sohui itopi. Inasoꞌ, Iprain huënton quëmapi.

² Iricanasoꞌ cato saꞌahuan. Aꞌna saꞌinsoꞌ Ana itopi. Aꞌnantaꞌ, Pinina itopi. Pininasoꞌ huaꞌhuanaꞌpi. Yaꞌhuërëꞌ Anasoꞌ, co nito huaꞌhuaninhuëꞌ.

³ Nani piꞌiquë Iricanasoꞌ, Siro ninano itopiquë paꞌnin. Sinioro yaꞌipi nanitaparinsoꞌ chinotacaso marëꞌ paꞌnin. Inaquë nipachina maꞌsha tëparahuaton ina chinotërin. Inaquë Iri itopisoꞌ corto huaꞌan huiꞌninpita catoyaꞌpi sacatopi. Inapitasoꞌ Opini, Pinisë, inapita itopi. Inapitanta corto huaꞌanoꞌsa nicatona Sinioro marëꞌ sacatopi.

⁴ Iricana Sinioro marëꞌ maꞌsha tëparin. Inasoꞌ, nanan anoyatopiso marëꞌ itopisoꞌ. Inapohuachina, Pinina, huaꞌhuinpita, inapitaso napopináchin quëtërin.

⁵ Anaso nipirinhuëꞌ, panca panca quëtërin. Sinioro nohuanton co huaꞌhuanaꞌpihuë nipirinhuëꞌ, nosororin. Nosoroaton yánapotërin.

⁶ Napoaton Pininarisoꞌ co yainhuëꞌ nontërin. Naporahuaton Sinioro nohuanton co huaꞌhuanaꞌpihuë niꞌton, nocanaton tëhuarin. Noꞌhuiantërinsoꞌ nichinapon chachin napotërin.

⁷ Nani piꞌiquë Sinioro chinotacaso pëiquë paꞌpachinara, Anaso naꞌnëton co yacoshatërinhuëꞌ. Pininari noꞌhuirárin niꞌton, naporin.

⁸ Napohuachina, soꞌini itapon: “Ana. Ama sëtaton naꞌnëquësohuëꞌ. Noya coshatëquëꞌ. Carinquënso nosororanquën. Yaꞌipiya quëran naꞌcon naꞌcon nosororanquën. Shonca quëmapiaꞌhua huaꞌhuanan naporini, co onpopinchin noya cancanchitonhuëꞌ. Ca yaꞌhuëarahuë niꞌton, noya noya cancantëquëꞌ,” itërin.

⁹ Aꞌna tahuëri Siroquë paantapi. Inaquë nicasoiꞌ, nani coshatohuachina Anaso huanirin. Huanirahuaton Yosë chinotacaso nëꞌmëtë pëiquë paꞌnin. Iri corto huaꞌan yaꞌcoanaquë huënsëasoꞌ, yaꞌcoontarin.

¹⁰ Inaquë nipachina naꞌnërin. Parisitërinso marëꞌ co napion cancantaton naꞌnërin. Naꞌnëton Sinioro nontërin.

¹¹ “Sinioro quëmaso yaꞌipi nanitaparan. Piyapinënco niporahuëꞌ parisitërahuëso nicaton, aꞌnara quëmapiaꞌhua huaꞌhuanaꞌhuasoꞌ, quëtoco. Inapotëranco naporini, carinta ina huaꞌhuahuë quëma marëꞌ acoꞌitohuëꞌ. Ina anitotaꞌhuanquënso marëꞌ co onporonta yaꞌiapihuëꞌ,” itërin.

¹² Ina pochin huaꞌqui Sinioro nontërin. Iri corto huaꞌansoꞌ, Ana nanamën niꞌsárin.

¹³ Inaso napoaponahuëꞌ, yonquinën quëran Sinioro nontërin. Co manta noninso yaꞌcaninhuëꞌ, nanamënsáchin nahuë nahuëtárin. Napoaton Iririsoꞌ: “Isoso sanapi noꞌpirin,” tënin yonquinënquë.

¹⁴ Ina yonquiaton itapon: —¡Co noꞌpiquë huarëꞌ oꞌocaso yaꞌhuërinhuëꞌ! Tananpitëquë huachi huinosoꞌ, itërin.

¹⁵ —Co apiya noꞌpirahuëꞌ. Co huino oꞌorahuëꞌ. Co maꞌsha tëranta main nininsoꞌ oꞌoporahuëꞌ, co napion ancantato Yosë nontarahuë. Parisitërahuësoꞌ Sinioro shaꞌhuitarahuë.

¹⁶ Ama yonquirapitonco: “Isoso inpio sanapi,” itocosohuëꞌ. Parisitato co noyahuëꞌ cancantërahuë niꞌton, huaꞌqui Yosë nontërahuë, itërin Anari.

¹⁷ —Noyapaꞌ. Sano cancantaton paquë huachi. Israiroꞌsanpoa chinotërëhuaso Yosë chachin, maꞌsona natananso acochinquën, itërin corto huaꞌani.

¹⁸ —Maꞌcha inachachin aꞌna tahuërinta noya niantarancohuë paya, itaantarin Anari. Ina quëran inaso paantarahuaton, coshatoonin. Naporahuaton co huachi sëtërinhuëꞌ.

¹⁹ Tahuëririnquë aꞌcayan Yosë chinotahuatonaꞌ, yaꞌhuëpiꞌpaꞌ paantapi. Ina quëran Iricanasoꞌ, saꞌin ichihuëꞌërin. Naporoꞌ Siniorosoꞌ, Anari nontërinsoꞌ yonquiaton catahuarin.

²⁰ Ina nohuanton cayorin huachi. Tahuëri nanihuachina quëmapiaꞌhuaya huairin. Nininën nohuitaton Samoiro itërin. Sinioro natanaton huaꞌhuaninso marëꞌ ina pochin nohuitërin.

²¹ Ina piꞌi niantarinquë Iricanasoꞌ, Siroquë paantarin. Saꞌin, huiꞌninpita, inapitarë chachin paꞌsahuatonaꞌ, Sinioro shaꞌhuitërinsoꞌ quëpatërin. Naporahuaton nani piꞌiquë Sinioro marëꞌ maꞌsha tëpacasoꞌ nininsoꞌ quëpatërin.

^22-23 Anaso napoaponahuëꞌ, co paꞌninhuëꞌ. Coꞌhuara soꞌin paꞌshátëraponhuëꞌ: —Co caso inatohua paꞌshatërapohuëꞌ. Huaꞌhuasha aꞌpota huarëꞌ paꞌsarahuë. Nani aꞌpotohuachin, Sinioronquën nicacaso marëꞌ quëpatarahuë. Acoonpato, inaso inaquë yaꞌhuëapon, itërin. Napotohuachina, soꞌini itapon: —Inta nipachin. Maꞌsona nicacaso yonquiransoꞌ, niquëꞌ. Ina aꞌpota huarëꞌ, isëranchin yaꞌhuëtaquëꞌ. Sinioro chachin catahuainquën ina shaꞌhuitëransoꞌ nicacaso marëꞌ, itërin. Soꞌini napotohuachina, inaso quëparitaton inaquëranchin huaꞌhuin asoꞌsorin. Soꞌsohuachina aꞌpotërin.

²⁴ Siroquë Yosë chinotacaso nëꞌmëtë pëi yaꞌhuërin niꞌton, huaꞌhuin aꞌpotohuachina, inaquë quëparin. Huaꞌhua nipirinhuëꞌ quëparin. Cara toroaꞌhua, cato shonca cato quiro trico, inapitanta quëparin. Naporahuaton aꞌnara shaꞌhuëtë morsaquë huinonta quëparin.

²⁵ Nani inaquë nipachina aꞌnara toroaꞌhua Sinioro marëꞌ tëpapi. Inapotahuatona Iri corto huaꞌan huaꞌhuasha aꞌnotopi.

²⁶ Naporoꞌ Anari itapon: —Iꞌhuata apiya. ¿Yonquiran ipora iráca isëquë huëcato sacaroënquë Yosë nontërahuëso to?

²⁷ Iso huaꞌhuasha marëꞌ naporahuë. Niꞌquëchi. Nani quëtërinco.

²⁸ Napoaton carintaꞌ, ina piyanën nicacaso marëꞌ acorahuë, itërin. Ina natanaton, Iriso isonin. Isonin quëran noꞌpaquë huarëꞌ monshorahuaton Sinioro chinotërin.