1 Reyes 8 - Chayahuita (Shahui)

Yosë caposonën chinotacaso pëiquë quëpapisoꞌ

¹ Yosë chinotacaso pëiꞌ tënipiso piquëran, Saromonsoꞌ Quirosarinquë israiroꞌsa ayontonin. Ansianoꞌsa nipisopita aꞌnaya aꞌnaya huëntonënaquë, huaꞌan yaꞌconpisopita, aꞌnapitanta huaꞌanoꞌsa pochin chiníquën nanantopisopita, inapita ayontonin. Siniororëꞌ anoyatopiso caposonën paꞌpincori acorin quëran, Yosë chinotacaso pëiquë quëpacaiso marëꞌ naporin.

² Imënamëaꞌhuaroꞌsa pita itopiquë niyontonapi. Inasoꞌ pita, pascoa yoqui quëran canchisë yoquitahuasoꞌ, naꞌhuëpi.

³ Yaꞌipi Israiro ansianoꞌsa canquihuachinara, corto huaꞌanoꞌsari Yosë caposonën quëpacaiso marëꞌ naranënpita patorotopisoꞌ mapi.

⁴ Aꞌnapitantaꞌ, nëꞌmëtë pëinën soꞌnanapi. Soꞌnanahuatona inarë chachin quëpapi. Inaquë ohuaracaiso marëꞌ nisha nisha acopisontaꞌ, quëpapi. Iráca Yosë camaitërinso chachin nitopi.

⁵ Naporoꞌ Saromonsoꞌ, yaꞌipi niyontonpisopitarë chachin Yosë caposonën notënanquë maꞌsharoꞌsa ina marëꞌ tëpapi. Co pichinahuanhuëꞌ ohuicaroꞌsaꞌ, tororoꞌsaꞌ, inapita tëpapi.

⁶ Ina quëran corto huaꞌanoꞌsari Yosë chinotacaso pëi acoana poꞌmoontapi. Noya noya patoana itopiquë poꞌmorahuatonaꞌ, quiropinoꞌsa anpiantëna quëran anquipisoanaquë acoonpi.

⁷ Ina quiropinoꞌsasoꞌ anpiantëna quëran anquiápi. Inapoatona Yosë caposonën, naranënpita, inapita anaꞌitatë pochin nitopi.

⁸ Napoaponahuëꞌ, Yosë caposonën naranënpita patorotopisosoꞌ, naporopi acotopi. Ina niꞌton, noya noya patoana iꞌsohuatohuachinara, noya patoana itopi quëran huarëꞌ, piꞌpian yaꞌnorinso quënanpi. Inapo acopisoꞌ, iso quirica ninshitasoco huarënta inaquëranchin nisarin.

⁹ Yosë caposonënquësoꞌ, cato naꞌpitëaꞌhuaroꞌsa yaꞌhuërin. Inapitaquë israiroꞌsa Siniororë anoyatopisoꞌ, ninshitopi. Iquipito quëran pipipona Sinaiquë Moisësëri poꞌmorin.

¹⁰ Yosë chinotacaso pëi quëran corto huaꞌanoꞌsa pipipi. Nani pipihuachinara, chitorori mëntatërin.

¹¹ Ina aꞌpininso nicatona corto huaꞌanoꞌsasoꞌ, co huachi nanitopihuëꞌ acoana sacatacaisoꞌ. Yosë huënaratërinsoari noyá aꞌpintërin niꞌton, napopi.

Pëi Yosë marëꞌ acorinsoꞌ

¹² Ina quëran Saromonsoꞌ Yosë nontaton itapon: “Quëmasoꞌ Sinioro tashinanquë yaꞌhuëran.

¹³ Inaquë yaꞌhuëpiranhuëꞌ, carinquën pëi anitëranquën. Inaquë yaꞌhuëmiatamaso marëꞌ acotëranquën,” itërin.

¹⁴ Itahuaton, israiroꞌsa huanirantapaiso yaꞌhuërëꞌ, tahuërëtaantarin. Tahuërëtahuaton noya yaꞌhuëcaiso marëꞌ shaꞌhuitërin:

¹⁵ “¡Ma noyacha Sinioroso paya! Inasoꞌ, israiroꞌsanpoa chinotërëhuaꞌ. Tata Tapico shaꞌhuitërinso chachin nani acotërinpoaꞌ. Inari iráca shaꞌhuitërin:

¹⁶ ‘Israiroꞌsa Iquipito quëran ocoirahuë. Naporo quëran huarëꞌ co aꞌna ninano tërantaꞌ, noꞌpanëmaquë chinotamacoso pëi nitamacoso marëꞌ huayonahuë. Quëmaso napoaponahuëꞌ, cari chachin huayonanquën israiroꞌsa huaꞌanëntamaso marëꞌ,’ itërin.

¹⁷ Tatacosoꞌ mini nohuantopirinhuëꞌ Yosënënpoa pëinën nitacasoꞌ.

¹⁸ Siniorori itërin: ‘Chinotamacoso pëi yanitatonco, noya yonquiran.

¹⁹ Napoaponahuëꞌ, co quëma nitarancohuëꞌ. Huiꞌnan yaꞌhuërëtarinquën nininsoꞌ, ina nitarinco huachi,’ itërin.

²⁰ Napotërinso chachin, ina nohuanton cari tatahuë yaꞌhuërëtërahuë. Inapoato ina chinotacaso pëi anitërahuë.

²¹ Naporahuaton, shimashonënpoa Iquipito quëran pipipona Siniororëꞌ anoyatopi. Ina caposonën yaꞌhuëcaso marëꞌ aꞌnara patoana acotërahuë,” itërin.

^22-23 Ina quëran Saromonsoꞌ, artaro notënanquë paꞌnin. Inaquë Sinioro marëꞌ maꞌsharoꞌsa ahuiquitopisoꞌ. Niyontonpisopitanta pinën parti quëran huanirantapi. Naporoꞌ anquirahuaton Yosë nontërin: “Quëmasoꞌ Sinioronquën. Yaꞌipi israiroꞌsacoi chinotërainquën. Co aꞌna Yosë tëranta isoroꞌpaquë quëma pochin yaꞌhuërinhuëꞌ. Piꞌiroꞌtëquënta co yaꞌhuërinhuëꞌ. Inëꞌquën tëranta anoyatohuatan, shaꞌhuitëranso chachin ninan. Inso tëranta yaꞌipi cancanën quëran natëhuachinquën nosoromiatëran.

²⁴ Ina pochinquën niꞌton, tatahuërëꞌquën anoyatëran. Anoyataton shaꞌhuitëran: ‘Huiꞌnan yaꞌhuërëtarinquënsoꞌ, chinotamacoso pëi nitarinco,’ itëran. Inasoꞌ natërinquën niꞌton, shaꞌhuitëranso chachin nani nanirin.

^25-26 Naporahuaton, isonta tata Tapico nani shaꞌhuitëran: ‘Ca nohuanton quëmá quëran pipipisopitaráchin israiroꞌsa huaꞌanëntaponaꞌ. Quëma natërancoso pochachin inapitanta natëhuachinaco, inapoapi,’ itëran. Ina pochin shaꞌhuitëran niꞌton, ina inachachin nitëquëꞌ.

²⁷ Pëi mini nitopiranquënhuëꞌ, co quëmasoꞌ inaquë naniaranhuëꞌ. Co piꞌiroꞌtëquë tëranta naniranhuëꞌ nichinapon chachin, aquëtë huarëꞌ iso pëi nitëranquënquësoꞌ, co naniponhuëꞌ.

^28-29 Ina niponahuëꞌ, Sinioro quëmaso Yosënëhuëinquën. Canta piyapinënco niꞌton, apira nontaranquënsoꞌ natanco. Chinotiinënquënso marëꞌ iso pëiquë huëꞌpachinaꞌ, tahuëri tashirë chachin niꞌsáquëꞌ. Isëquë quëma nininën yaꞌhuëarin niꞌton, nontëranquënsoꞌ natanco.

³⁰ Quëmaso inápaquë yaꞌhuëran. Nipirinhuëꞌ Insëran tëranta iso pëi notërahuatoi nontohuatëinquën, noya natancoi. Inapoaton catahuacoi. Oshahuanpatointa nontarainquën. Nontohuatëinquën, oshanëhuëi inquitatoncoi nanan anoyatocoi.

³¹ Maꞌsha nionpotopisoꞌ nishaꞌhuirapihuachinaꞌ, insosona shaꞌhuirapipisoꞌ artaronën notënanquë paꞌsarin. Chinotatënën maꞌsha tëparahuatona ahuiquitopiquë paꞌsarin. Topinan quëran napotohuachinaꞌ: ‘Yoscoarëꞌ co naporahuëꞌ,’ tapon.

³² Naporinso natanahuaton, noꞌtëquën nonsahuachin paꞌpoyaquëꞌ. Insosona tëhuëhuachin, noꞌtëquën anaꞌintëquëꞌ.

^33-34 Tapona aꞌna tahuëri israiroꞌsa co natëtënënhuëꞌ, oshahuanaponaꞌ. Napohuachinasoꞌ, inimiconënapitari minsërahuatona quiquiaponaꞌ. Inapitaso napoaponahuëꞌ, chinotaantarinën. Iso pëinën yaꞌhuërinso parti notërahuatonaꞌ, nontapënën. Inapotohuachinën, yaꞌhuëran quëran natanaton, oshanëna inquitëquëꞌ. Nanan anoyatahuaton, shimashonëna noꞌpaꞌ quëtëranquë chachin quënantaquëꞌ.

^35-36 Aꞌna tahuëri israiroꞌsa co natëtënënhuëꞌ, oshahuaantapi. Inapopiso marëꞌ quëma nohuanton co huachi oꞌnan yaꞌhuëarinhuëꞌ. Napohuachina: ‘Co noyahuëꞌ ninëhuaso marëꞌ Yosë anaꞌintarinpoaꞌ,’ taꞌtonaꞌ, chinotaantarinën. Oshanëna aꞌporahuatona pëinën parti notëtopi quëran nontaantarinën. Inapotohuachinën, yaꞌhuëran quëran natanahuaton, piyapinënpita oshanën inquitëquëꞌ. Nanan anoyatahuaton aꞌchintëquë onpopinsona imainënsoꞌ. Naporahuaton quëma nohuanton oꞌnantaꞌin. Ama taquiatonaraihuëꞌ, noꞌpaꞌ huaꞌanëntopiso niyaꞌhuërëtápaiso marëꞌ.

³⁷ Piyapinënpita co natëtënënhuëꞌ oshahuaantahuachinaꞌ, quëmari anaꞌintaran. Quëma nohuanton shaꞌtopisopita co manta nitaponahuëꞌ. Piꞌi quëranhuë nipon, taquiapon. Sëquërërihuë nipon, chaꞌchorihuë nipon, pëꞌyapon. Pëtoratërin quëranhuë nipon, chanatapon. Aꞌna tahuëriso inimiconënpitarihuë nipon, ninanonëna tancapitahuatona ahuëaponaꞌ. Chiníquën caniohuë nipon yaꞌconaton, tiquiapon. Inapoatona parisitaponaꞌ.

³⁸ Ina marëꞌ aꞌnaya aꞌnayahuë nipon, yaꞌipi israiroꞌsahuë nipon: ‘Oshahuanëhua niꞌton, Yosë anaꞌintarinpoaꞌ,’ taponaꞌ. Inapohuachinaꞌ pëinën parti anquirahuatonaꞌ, nontapënën. Oshanën inquitacaso marëꞌ nontohuachinën, quëmari inquitëquëꞌ.

³⁹ Quëmasáchin aꞌnaya aꞌnayacoi yonquiraisoꞌ, nitotëran. Ina nitotaton aꞌnaya aꞌnayacoi noꞌtëquën aꞌpanicoi. Oshahuanpiso marëꞌ aparisitëran niꞌton, nirótëatona nontohuachinën, ina inquitaton nanan anoyatëquëꞌ.

⁴⁰ Inapotohuatan, shimashonëna noꞌpaꞌ quëtëranquë yaꞌhuëaponaꞌ. Inaquë yaꞌhuëapona pochin noya nicatënën chinotáponën.

^41-43 Nisha piyapiroꞌsanta niponaraihuëꞌ, noya nicaton nahuinanso natantapi. Chiníquën nanantëransontaꞌ, natantapi. Ina natantatonaꞌ, áquë yaꞌhuëaponaraihuëꞌ huëcapayarinën. Huëꞌpachinaꞌ, pëinën parti notëtahuatona nontaponën. Inapotohuachinën, yaꞌhuëran quëran natanahuaton, nataninënquënso chachin acotëquëꞌ. Yaꞌipi isoroꞌpaquë nisha nisha piyapiroꞌsa yaꞌhuëpi. Inapitantaꞌ, nohuitiinënquënso marëꞌ aꞌpaniquëꞌ. Nohuitohuachinën noya nicatënën quiya pochachin chinotarinën huachi. Inapoatonaꞌ: ‘Tëhuënchachin Saromon Yosë chinotacaso pëi anitërinquë, Sinioro yaꞌhuërin. Napoaton inaquë ina nontohuatëra, nataninpoaꞌ,’ taponaꞌ.

^44-45 Israiro sontaroꞌsa inimiconënpita ahuëcaiso marëꞌ intohuasoꞌ quëmari aꞌpahuatan, nontarinën. Intohuaran tëranta iso ninano huayonanso parti notëapi. Chinotiinënquënso marëꞌ pëi anitëranquënso parti notëtahuatonaꞌ, nontarinën. Napohuachinaꞌ, yaꞌhuëran quëran natanahuaton, catahuaquëꞌ.

⁴⁶ Quiyasoꞌ piyapicoi, yaꞌipicoi oshahuancoi. Co quëma natëtëinquënhuëꞌ naporai. Napoaton israiroꞌsa tëhuëtatënën oshahuanpachinaꞌ, quëmarisoꞌ chiníquën noꞌhuiton anaꞌintaran. Inimiconënpitari minsëatonaꞌ, yaꞌhuëpiso noꞌpaꞌpaꞌ quëpaponaꞌ. Aquëhuë nipon, yacariahuë nipon, quëpaponaꞌ.

⁴⁷ Tapona quëpapisoꞌ noꞌpaquë, chinotatënën: ‘Tëhuënchachin co noyahuëꞌ ninai. Ina nipirinhuëꞌ, oshanëhuëi inquitatoncoi catahuacoi,’ itapënën.

^48-49 Tapona quëpapisoꞌ noꞌpaquë quëmasáchin cancantatënën chinotërinën. Tapona shimashonënpita noꞌpaꞌ quëtëranso parti, Quirosarin ninano huayonanso parti, iso pëi anitëranquënso parti notëtahuatonaꞌ, nontarinën. Inapotohuachinën yaꞌhuëran quëran natanahuaton, catahuaquëꞌ.

⁵⁰ Co noyahuëꞌ nicatona oshahuanpisoꞌ, inquitëquëꞌ. Co natantochináchinhuëꞌ cancantopisonta inquitahuaton, catahuaquëꞌ. Quëpapisopitari nosorocaiso marëꞌ catahuaquëꞌ.

⁵¹ Israiroꞌsasoꞌ, quëma piyapinënpita. Quëmari huaꞌanëntëran. Shimashonënpita Iquipitoquë aparisitápirinahuëꞌ, ocoiran. Huaꞌna asoquipiso ornoquë pochin parisitapirinahuëꞌ, napotëran.

⁵² Canta piyapinënco niꞌto, nontaranquënsoꞌ natanco. Israiroꞌsanta piyapinënpita. Inapitanta nontarinën niꞌton, natanquëꞌ. ¡Co napion ancantatoi nontohuatëinquën natancoi!

⁵³ Nisha nisha piyapiroꞌsaꞌ, nisha nisha nacionquë yaꞌhuëpi. Yaꞌhuëpirinahuëꞌ, quëmaso huayonancoi. Piyapinën Moisësë itopisoꞌ, quëma nohuanton shimashonëhuëipita Iquipito quëran ocoirin. Naporoꞌ ina quëran anitotërancoi huaꞌanëntërancoisoꞌ,” itërin.

⁵⁴ Ina pochin Saromonsoꞌ, Yosë nontërin. Artaro notënanquë isonin quëran anquirahuaton nontërin.

⁵⁵ Ina quëran huanirahuaton, israiroꞌsa noya yaꞌhuëcaiso marëꞌ shaꞌhuitërin:

⁵⁶ “¡Ma noyacha Sinioroso paya! Shaꞌhuitërinpoaso chachin israiroꞌsanpoa noya yaꞌhuërëhuaꞌ. Moisësë quëran anitotërinpoaso chachin, noya catahuarinpoaꞌ.

^57-58 Sinioronënpoasoꞌ Yosë niꞌton, catahuainpoaꞌ. Shimashonënpoapita catahuarinso pochachin nichinpoaꞌ. Ama naniantatonpoarahuëꞌ, natëtochináchin cancantacaso marëꞌ catahuainpoaꞌ. Maꞌpitaso ninëhuaquë nohuantërinsoráchin nicatëhua pënëntërinsoꞌ natëahuaꞌ. Nohuantërinsopita, camaitërinsopita, inapitanta natëahuaꞌ. Yaꞌipi inapita natëcaiso marëꞌ shimashonënpoapita camairin.

⁵⁹ Ipora tahuëri Sinioro nontërahuësoꞌ, tahuëri tashirë chachin yonquiraꞌin. Noꞌtëquënáchin catahuainpoaso marëꞌ napoꞌin. Canpoaso ina piyapinënpita ninëhua niꞌton, nani tahuëri pahuantërinpoasopita acochinpoaꞌ.

⁶⁰ Inapotohuachinpoaꞌ, Sinioronënpoasáchin Yosë nininsoꞌ, yaꞌipi isoroꞌpaquë nitotapi. Nisha nisha piyapiroꞌsa yaꞌhuëpiso nohuitapi.

⁶¹ Napoaton canpitanta Sinioro noꞌtëquën imacoꞌ. Ina Yosënënpoa chinotërëhuasoꞌ. Pënëntërinsopita, camaitërinsopita, inapita ipora tahuëri natërëhuaso pochachin nisácoꞌ,” itërin.

^62-63 Ina piquëran Saromonsoꞌ, niyontonpisopitarë chachin Sinioro marëꞌ maꞌsharoꞌsa tëpapi. Naporoꞌ Saromonsoꞌ, cato shonca cato huaranca tororoꞌsa atëpatërin. Ohuicaroꞌsanta pasa cato shonca huaranca atëpatërin. Nanan anoyatërinso marëꞌ ina nápo atëpatërin. Inapoaton Saromonsoꞌ, aꞌnapitarë chachin Yosë chinotacaso pëi Sinioro marëꞌ acorin.

⁶⁴ Naporo tahuëri chachin copirnosoꞌ, iꞌiratë huáncana nininquë, Yosë marëꞌ acorin. Inaso iꞌiratëꞌ, Yosë chinotacaso pëi yaꞌcoananën notënanquë yaꞌhuërin. Inaquë oshanëna marëꞌ maꞌsha tëpapisopita, yaꞌipi ahuiquitopi. Trico pochin nipisopita quëshipisontaꞌ, Sinioro marëꞌ aꞌnopi. Nanan anoyatopiso marëꞌ maꞌsharoꞌsa tëpapisoꞌ tomaquëontaꞌ, Sinioro marëꞌ inaquë ahuiquitopi. Shaꞌpi huaꞌna artarosoꞌ, Yosë pëinën notënanquë acopirinahuëꞌ, huaꞌhuishin niꞌton, co inaquë inapita ahuiquitacaiso nanirinhuëꞌ. Napoaton iꞌiratë huáncana, inapotopi.

⁶⁵ Naporoꞌ Saromonso israiroꞌsapitarëꞌ, huaꞌhuayátërahuë niyontonpi. Amato ninano quëran huarëꞌ oꞌmapi. Inaso ninanoꞌ, pëtëtë parti yaꞌhuërin. Iquipito iꞌsha itopi quëraontaꞌ, huëntapi. Inasoꞌ iꞌsha pëꞌnatë parti yaꞌhuërin. Iquipitoroꞌsa noꞌpaꞌ mapisoꞌ nanirinquë yaꞌhuërin. Imënamëaꞌhuaroꞌsa pita itopiquë napopi. Sinioro chinotatona capa cancantacaiso marëꞌ napopi. Ina pita naꞌhuëhuachinara, Yosë pëinën Sinioro marëꞌ acoatonaꞌ, canchisë tahuëri chachin pita niantapi. Yaꞌipiya quëran shonca catapini tahuëri pita naꞌhuëpi.

⁶⁶ Tahuëririnquë Saromonsoꞌ, israiroꞌsa nontahuaton, yaꞌhuëpiꞌpaꞌ aꞌparin. Inahuarinta copirno nontahuatonaꞌ, yaꞌhuëpiꞌpaꞌ paantapi. Siniorori Tapi catahuarinsoꞌ yonquipi: “Ma noyacha Siniorori piyapinën catahuarin paya. Canpoantaꞌ, naꞌcon catahuarinpoaꞌ,” topi. Ina yonquiatona capa cancantërëꞌnachin yaꞌhuëpiꞌpaꞌ paantapi.