1 Reyes 6 - Chayahuita (Shahui)

Saromon Yosë chinotacaso pëiꞌ anitërinsoꞌ

¹ Copirno yaꞌconin quëran huarëꞌ Saromonsoꞌ, nani catapini piꞌipitarin. Naporoꞌ Yosë chinotacaso pëiꞌ anitacaso caniaritarin. Pascoa yoqui quëran aꞌna yoqui niantarinquë caniaritarin. Naporoꞌ israiroꞌsa Iquipito quëran pipipisoꞌ, nani catapini pasa posa shonca piꞌipi nanirin.

² Yosë chinotacaso pëiꞌ nipachinara: Cato shonca canchisë mitro naporopitërinso acopi. Pancanatërinsonta iscon mitro acopi. Inaparinsoso nipirinhuëꞌ, shonca cara mitro miria acopi.

³ Yaꞌcoana parti quëran ishpanamën pochin nininsoꞌ yaꞌhuëtërin. Pëiꞌ pancanatërinsoꞌ nani chachin iscon mitro naporopitërin. Pancanatërinsosoꞌ catapini mitro miria yaꞌhuëtërin.

⁴ Naporahuaton huintanaroꞌsanta acotacaiso marëꞌ camaitërin. Huaꞌnanan quëran nipiquë paꞌshintëraꞌpiapi.

⁵ Corto huaꞌanoꞌsa maꞌsha tapacaiso marëntaꞌ, apëitaantarin. Pairaroꞌsa nanirinquë aipiran quëran, cara paꞌcotë yaꞌhuëcaso marëꞌ inapotërin. Cato parti quëran chachin, naporopitërin quëran inapotërin. Oncotënan parti quëraonta acorin.

⁶ Yaꞌnatomarinso paꞌcotësoꞌ, cato mitro miria pancanatërin. Huancanachinsoꞌ, cara mitro yaꞌhuëtërin. Yaꞌnatontarinsoso nipirinhuëꞌ, cara mitro miria yaꞌhuëtërin. Yosë chinotacaso pëi pairanën acohuachinara, co napopináchin tanónën acopihuëꞌ. Noꞌpa quëransoꞌ, tano tanónën acopi. Huancana paꞌcotë partisoꞌ, shimënën miachin acopi. Inapa paꞌcotë partisoꞌ, shimë shimënën acopi. Ama paꞌcotëroꞌsa huicanëna paira aquëtëran huarëꞌ naꞌhuëcaso marëhuëꞌ, ina pochin acopi.

⁷ Yosë pëinën acohuachinara, naꞌpiroꞌsa ocoipiquëranchin noyá tapapinan quëpi. Napoaton pëihuachinara co huachi martichoquë sacatopihuëꞌ. Co naꞌpi patëtopiquë tërantaꞌ, co maꞌsha huaꞌnaquë tëranta sacatopihuë niꞌton, tanahuantárin.

⁸ Yaꞌnatomarinso paꞌcotë yaꞌcoananën, inchinan parti quëran acotopi. Huancana paꞌcotëꞌ, inapa paꞌcotëꞌ, inaquëpita pantacaso marëꞌ tahuirantarin nanpënanquë pantapi.

⁹ Pëinaꞌpiroꞌsa Yosë chinotacaso pëi yaaꞌcanpachinara, huicaroꞌsa acoraꞌpiapi. Ina aipi nontëroꞌsa chiꞌnipipi. Huicaroꞌsaꞌ, nontëroꞌsaꞌ, inapitaso nonarasáchin acotopi.

¹⁰ Maꞌsha tapacaiso marëꞌ paꞌcotëroꞌsa huicanënpitantaꞌ, nonara quëran nitopi. Yaꞌipiana chachin inapotopi. Inapita paꞌcotëroꞌsasoꞌ, cato mitro miriasáchin inaparaꞌpiapi.

¹¹ Naporoꞌ Siniorori Saromon itapon:

¹² “Iporasoꞌ, chinotamacoso pëi nitaranco. Israiroꞌsanquëma yaꞌhuëramaquë yaꞌhuëcaꞌhuaso marëꞌ nitaranco. Yaꞌipi camaitërahuëso natëtonco noya niquëꞌ. Inapohuatan, carinta tataparinco shaꞌhuitërahuëso pochachin nitaranquën.

¹³ Canpita yaꞌhuëramaso huáncana yaꞌhuëato, catahuaráponquëmaꞌ. Co onporonta pataranquëmahuëꞌ. Iso pëiquë nontohuatamaco, natanaranquëmaꞌ,” itërin.

¹⁴ Inapoatona pëinaꞌpiroꞌsasoꞌ, Yosë chinotacaso pëi tënipi.

¹⁵ Nani tënihuachinara, Saromoni pëinaꞌpiroꞌsa acoana tapacaisoꞌ camairin. Acoana yaꞌipi paira nani chachin nonara nontëquë achinpitëraꞌpiacaisoꞌ, camairin. Napohuachina inapotopi. Iꞌnatacaisoso nipirinhuëꞌ, pino nontëquë inapotopi.

¹⁶ Yosë chinotacaso pëi acoana, patoana nitopi. Iscon mitro naporopitërinsoꞌ. (Pancanatërinsonta nápo chachin.) Noꞌpa quëran huarëꞌ huicaꞌpaꞌ icaninsoꞌ, nonara nontë quëran pairatopi. Noya noya patoana nicacaso marëꞌ inapotopi.

¹⁷ Yaꞌnatiirinsosoꞌ, panca panca patoana ninin. Inasoꞌ, shonca posa mitro naporopitërin.

¹⁸ Yaꞌipi acoana nontëroꞌsa achinpitopiquë, noyápiachin nonanpi. Nontëquë chachin patëtahuatonaꞌ, yancoroꞌsaꞌ, sharoꞌsa nitopisoꞌ, inapita nonanpi. Nonarasáchin yaꞌnorin. Co aꞌna naꞌpi tëranta yaꞌnorinhuëꞌ.

¹⁹ Ina quëran Saromonsoꞌ, noya noya patoana nininsoꞌ taparin. Inaquë Siniororëꞌ anoyatopiso caposonën acocaso marëꞌ taparin.

²⁰ Shaꞌhuitëranquëmaso chachin noya noya patoanasoꞌ, iscon mitro pancanatahuaton nápo chachin naporopitërin. Inaparinsontaꞌ, nápo chachin yaꞌhuëtërin. Patonpiso yaꞌcarintaꞌ, aꞌnara artaro acorin. Nonara nontë quëran anitahuaton, yaꞌipi chachin oro quëran pashitopi.

²¹ Ina quëran chachin yaꞌipi pëiana pashitopi. Noya noya patoananta inapotopi. Ina patoanasoꞌ, yaꞌcoananën aipi oro quëran catina nipiquë acotopi.

²² Inapotatonaꞌ, yaꞌipi acoana oro quëran pashitopi. Acoana artaro yaꞌhuërinsontaꞌ, inanpi quëran chachin pashitopi.

²³ Cato quiropinoꞌsantaꞌ, anitërin. Oripo nara quëran anitahuaton, noya noya patoana nininquë acorin. Aꞌnaya aꞌnaya catapini mitro miria naporopitërinso anitërin.

^24-25 Aꞌnaya aꞌnaya anpiantëna cato mitro miria pochin yaꞌhuëtërin. Napoaton cato quëransoꞌ, catapini mitro miria yaꞌhuëtopi. Inapitasoꞌ inanapapiráchin nipi. Naporahuaton napopináchin yaꞌnopi.

²⁶ Naporopitopisontaꞌ, napopináchin nipi.

²⁷ Inapitasoꞌ noya noya patoanaquë iso pochin acocaisoꞌ, Saromon camaitërin: Anpiantëna anquipi quëran acopi. Aꞌnasoꞌ, ahuënan anpiantën quëran aꞌnatëran paira caririn. Aꞌnantaꞌ, inchinan anpiantën quëran aꞌnatëran paira caririn. Yaꞌhuërëꞌ huancanachinsoꞌ, anpiantëna quëran nicaripi.

²⁸ Inapitanta oro quëran pashitacaisoꞌ, camaitërin. Camaitohuachina inapotopi.

²⁹ Yaꞌipi pairatopiquë, acoana quëran, aipiran quëran nontëquë chachin patëtahuatonaꞌ, quiropinoꞌsa nonanpi. Palmeraroꞌsaꞌ, yancoroꞌsaꞌ, inapitanta nonanpi.

^30-32 Acoana iꞌnatopisontaꞌ, yaꞌipiana chachin oro quëran pashitopi. Noya noya patoanaquëntaꞌ, inapotopi. Ina yaꞌcoananënsoꞌ, catotë huarëꞌ yaꞌhuëtërin. Inapitasoꞌ, oripo nontë quëran nitopi. Inapitaquënta patëtahuatonaꞌ, quiropinoꞌsaꞌ, palmeraroꞌsaꞌ, yancoroꞌsaꞌ, inapita nonanpi. Inapotahuatonaꞌ, oroquë pashitopi antaꞌ. Ina yaꞌcoanasoꞌ, aꞌnatërápo cachinën yaꞌhuëtërin. Noꞌpa parti quëran cato yaꞌhuëtërin. Inapa quëransoꞌ, cara cachinën yaꞌhuëtërin.

^33-34 Tëquën yaꞌcoananën chachinsoꞌ, catapini cachihuan acorin. Onconan chinpinanoꞌsasoꞌ, oripo nara quëran nitopi. Onconanoꞌsasoꞌ, pino nontë quëran nitopi. Iꞌsoahuahuachinara, tahuí chararin.

³⁵ Inapitaquënta patëtahuatonaꞌ, quiropinoꞌsaꞌ, palmeraroꞌsaꞌ, yancoroꞌsaꞌ, inapita nonanpi. Inapotahuatona oroquë pashitopi antaꞌ.

³⁶ Iꞌiratënta pairapirin. Cara panshin naꞌpi patëtopinan quëran acorin. Aꞌna panshinaꞌ nonara nontë tanónën nininsoꞌ quëran, acotopi.

^37-38 Saromon copirno yaꞌconinso nani catapini piꞌipitasoꞌ, Yosë chinotacaso pëiꞌ simintonën acotapi. Pascoa yoqui quëran, niantarinsoꞌ yoquiquë inapotapi. Nani shonca aꞌna piꞌi copirno yaꞌconinsoꞌ nanihuachina, tënirapi huachi. Pascoa yoqui quëran posa yoqui naꞌhuërahuasoꞌ, tënirapi. Yaꞌipi yonquirinso acocaiso marëꞌ Saromon piyapinënpitasoꞌ, canchisë piꞌi sacatopi.