1 Reyes 5 - Chayahuita (Shahui)

Tiro copirno Iran itopisorëꞌ, Saromon anoyatërinsoꞌ

¹ Tiro copirno Iran itopisosoꞌ, Saromon paꞌpincorëꞌ noya nipayapi. Saromoni huachi paꞌpin yaꞌhuërëtaton, israiroꞌsa huaꞌanëntarinso natantërin. Ina natantaton, catahuacaso marëꞌ huaꞌanoꞌsa acorinsopita aꞌpatërin. Noya cancantërinso shaꞌhuitacaiso marëꞌ naporin.

² Saromonsoꞌ shaꞌhuitohuachinara, inapita noya nontërin. Noya nontaton huaꞌanëna iso pochin taꞌcaiso nanan aꞌpatërin:

³ “Caquën tatacoꞌ, Yosë chinotacaso pëi nicacaso yonquipirinhuëꞌ, inimiconënpitarë niahuëápatonaꞌ, co nanitërinhuëꞌ. Napoin quëran huachi Siniorori catahuarin inimiconënpita minsërin.

⁴ Inapita minsëpirinhuëꞌ, Yosë pëinënsoꞌ co nitërinhuëꞌ. Iporaso nipirinhuëꞌ, Sinioro nohuanton co huachi niahuëatoiraihuëꞌ, sano yaꞌhuërai. Co huachi inimicoroꞌsa yaꞌhuërinhuëꞌ. Naporahuaton co maꞌsha tëranta tëꞌhuataꞌhuaiso yaꞌhuërinhuëꞌ.

⁵ Napoaton cari huachi yonquirahuë, Yosë chinotacaso pëi anitaꞌhuasoꞌ. Inari chachin iráca tataco nani shaꞌhuitërin: ‘Ca nohuanto huiꞌnan quëma yaꞌhuërënamën israiroꞌsa huaꞌanëntarin. Inari piyapinënpita camaiapon chinotiinacoso pëi nitiinacosoꞌ,’ itërin.

⁶ Napoaton catahuaco. Piyapinënpita camaiquë Nipano motopiroꞌsa quëran nonara ocoichinaco. Ina ocoicaiso marëꞌ piyapinëhuëpitantaꞌ, quëma piyapinënpita catahuaponaꞌ. Canpita noꞌpanëmaquë sitonoꞌsa yaꞌhuëpi. Inapitasoꞌ misotopi nontëquë sacatacaisoꞌ. Quiyasoꞌ israiroꞌsacoi co ina nitotëraihuëꞌ. Napoaponahuëꞌ piyapinënpita sacatërinso marësoꞌ, maꞌsona nohuantëransoꞌ natanco noꞌtëquën pahuërëꞌinquëmaꞌ,” itërin.

⁷ Iran piyapinënpitasoꞌ, paꞌsahuatona ina inachachin huaꞌanëna shaꞌhuitontapi. Natanaton, inaso capa cancantërin. Capa cancantaton tapon: “¡Ma noyacha Sinioroso paya! Ina nohuanton Tapico huiꞌnin, yonquínahuan ninin. Ina pochin niꞌton, israiroꞌsa nóya huaꞌanëntapon,” tënin.

^8-9 Ina tosahuaton Saromon shaꞌhuitacaiso marëꞌ piyapinënpita aꞌpataantarin: “Naporansoꞌ, nani piyapinëhuëpita shaꞌhuitërinaco. Natanancoso chachin nonara, pino nara, inapita aꞌpataranquën. Piyapinëhuëpitari Nipano motopiroꞌsa quëran marëꞌpaꞌ tëꞌyaitaponaꞌ. Inaquë nantënahuatonaꞌ, marë quëpatapi. Insëquësona nohuantëranquë quëꞌcamahuachinaꞌ, piyapinënpitari iꞌshiritahuatona quëpataponën. Ina marëꞌ quëmanta nisha nisha cosharo quëtaranco yaꞌhuërahuëquë piyapinëhuëpita capacaiso marëꞌ,” itërin.

¹⁰ Inapoaton Iransoꞌ, nonara, pino nara, inapita Saromon quëtërin. Onposona nohuantërinsoꞌ quëtërin.

¹¹ Yaꞌhuërëꞌ Saromonintaꞌ, nani piꞌipiquë Iran copirno cosharo quëtërin: Catapini michon catapini pasa huaranca quiro quëꞌninsoꞌ trico. Tomanta asitona quëran ocoipisoꞌ, catapini huaranca catapini pasa nitro.

¹² Inapoaton Siniorori Saromon catahuarin yonquínahuan nicacaso marëꞌ. Shaꞌhuitërinso chachin acotërin. Naporahuaton Saromonisoꞌ, Iran copirnorëꞌ noya ninicatona yaꞌhuëcaiso marëꞌ anoyatopi.

¹³ Naporo tahuëriꞌsa Saromonsoꞌ, israiroꞌsari catahuacaiso marëꞌ, sontaroꞌsa chiníquën nanan quëtërin piyapiꞌsa huayonacaisoꞌ. Inapoatonaꞌ, yaꞌipi israiroꞌsa noꞌpanënaquë cara shonca huaranca quëmapiꞌsa yontonpi.

¹⁴ Inapitasoꞌ, cara huënton acopi. Shonca huaranca shonca huaranca acopi. Aꞌna huëntonꞌton Nipano motopiroꞌsaquë aꞌna yoqui marëꞌ paꞌsapi. Huëantarahuatonaꞌ, cato yoqui yaꞌhuëpiquë yaꞌhuëantaponaꞌ. Inapitasoꞌ, co pahuërëaponaraihuëꞌ asacatopi. Isopita sacatoroꞌsa huaꞌanënasoꞌ, Atoniran itopi.

¹⁵ Naporahuaton pasa aꞌnatërápo shonca huaranca quëmapiꞌsaꞌ, Saromon marëꞌ sacatapi. Ina motopiroꞌsaquë chachin posa shonca huaranca yaꞌpi naꞌpiroꞌsaꞌ, pëicaiso marëꞌ patëtapi. Canchisë shonca huarancantaꞌ, pëꞌpëto camayoroꞌsa yaꞌconpi.

¹⁶ Camaitoroꞌsantaꞌ, cara huaranca yaꞌhuëpi.

¹⁷ Saromonsoꞌ naꞌpi patëtoroꞌsa pancaraꞌpisáchin patëtacaisoꞌ camaitërin. Yosë pëinën simintonën marëꞌ inapita nohuantërin. Ina naꞌpiroꞌsasoꞌ, naꞌcon naꞌcon paꞌtopi.

¹⁸ Inapoatona pëi camayoroꞌsasoꞌ, nara pëꞌshitëpi, naꞌpiroꞌsa patëtopi, napopi. Yosë pëinën nitacaiso marëꞌ inapita tapapi. Inapita pëi camayoroꞌsasoꞌ, Saromon, Iran, inapita piyapinënpita. Quiparo ninanoquë yaꞌhuëpisopitantaꞌ, catahuatopi.