1 Reyes 3 - Chayahuita (Shahui)

Saromon Iquipito copirno huiꞌnin maninsoꞌ

¹ Saromon copirno Iquipito copirnorëꞌ, noya niniꞌtona yaꞌhuëcaiso marëꞌ anoyatopi. Anoyatopiso yonquicaiso marëꞌ Saromonsoꞌ, Iquipito copirno huiꞌnin manin. Masahuaton, iracaya Quirosarin itopiquë ichiyaꞌhuëcaso marëꞌ quëparin. Sacatoroꞌsari, pëinën, Yosë pëinën, ninano paira, inapita tënicai huarëꞌ inaquë ichiyaꞌhuërin.

² Naporo tahuëriꞌsa Yosë pëinën co nishátërapihuëꞌ. Napoaton israiroꞌsaso Sinioro chinotacaso marëꞌ maꞌsha yatëpahuachinara, inahuara nohuanton artaro acopiquë tëpatona chinotopi.

Yonquínahuan nicacaso marëꞌ Saromoni Yosë nataninsoꞌ

³ Saromonsoꞌ Sinioro nosororin. Naporahuaton paꞌpincoꞌ pënëntërinsopita acorinsoꞌ, natërin. Napoaponahuëꞌ, inahuara nohuanton artaro acopiquë maꞌsharoꞌsa tëpaton, Sinioro chinotërin. Yonarin pochin nininsonta aꞌpëaton chinotërin.

⁴ Capaon ninanoquë huarënta paꞌsahuaton, Yosë chinotacaso marëꞌ maꞌsha tëparin. Inaquë yaꞌhuërinso artaro naꞌcon naꞌcon yamotopi niꞌton, inaquë huarëꞌ paꞌnin Yosë chinotapon. Aꞌna tahuëri ina marëꞌ huaranca maꞌsha atëpatërin. Inapotaton oshanën marëꞌ corto huaꞌanoꞌsari noyá ahuiquitopi.

⁵ Naporo tashi chachin Siniorori huëꞌënquë yaꞌnotahuaton itapon: “Maꞌsona nohuantëransoꞌ natanco acochinquën,” itërin.

^6-7 Natanahuaton inarisoꞌ: “Tatacosoꞌ quëma piyapinën. Inasoꞌ, noꞌtëquënáchin imamiatërinquën. Noyasáchin nicaton, co manta ihuatërinhuëꞌ. Ina marëꞌ quëmarisoꞌ noya nicaton catahuaran. Ina nosoroaton israiroꞌsa huaꞌanëntaꞌhuaso marëꞌ acoranco cantaꞌ. Quëma nohuanton huiꞌnapico niporahuëꞌ, ina yaꞌhuërënamën huaꞌanëntaꞌhuaso marëꞌ acoranco. Co manta camaitaꞌhuaso nitotopirahuëꞌ, napotëranco.

⁸ Napoaponahuëꞌ, piyapinënpita huayonanso huaꞌanëna yaꞌconahuë. Inahuaso notohuaroꞌ niꞌtonaꞌ, panca nacion ocoipi. Onposona yaꞌhuëpisoꞌ, co pichichináchinhuëꞌ.

⁹ Ina pochin nacionsoꞌ, co insonta nanitërinhuëꞌ inaora noya huaꞌanëntacasoꞌ. ¡Quëmari anitotohuatan tëhuënchinsoꞌ, noya camaitapon! Napoaton yonquínahuan nicaꞌhuaso marëꞌ catahuaco. Noya nininsoꞌ, co noyahuëꞌ, nininsoꞌ inapita nitochi. Inapita nitotohuato piyanënpita noya huaꞌanëntarahuë,” itërin.

¹⁰ Ina natanaton, Siniorosoꞌ noya cancantërin.

¹¹ Napoaton itapon: “Yonquínahuan nicaton piyapinëhuëpita noya huaꞌanëntacaso natanancoso marëꞌ noya cancantërahuë. Co huaꞌqui tahuëri nanpicamasoꞌ natanancohuëꞌ. Co maꞌhuanamasoꞌ, co inimiconënpita tëranta chiminacaisoꞌ, natanancohuëꞌ.

¹² Napoaton natanancosoꞌ, carinquën quëtaranquën. Ca nohuanton aꞌnapita quëran yonqui yonquínahuan nisaran. Iráca quëran huarëꞌ co insonta quëma pochin nininhuëꞌ. Aꞌna tahuërinta yaꞌhuëpirinahuëꞌ co quëma pochin nisapihuëꞌ.

¹³ Maꞌhuanacasoꞌ, paꞌyápiro nicacasoꞌ, inapitaso co natanancohuëꞌ. Co natanpirancohuëꞌ, inapitanta acotaranquën. Acotomiataranquën niꞌton, nanpisënquën co insonta isoroꞌpaquë quëma pochin copirno yaꞌhuëaponhuëꞌ.

¹⁴ Nohuantërahuësoráchin nicaton, pënëntërahuësopita, camaitërahuësopita, inapita natëquëꞌ. Tataco natërincoso pochin nipatan, huaꞌqui tahuëri niꞌcamasoꞌ catahuaranquën,” itërin.

¹⁵ Naporoꞌ Saromonso capayatahuaton, tapon: “Siniorochi huëꞌëhuëquë nontërinco paya,” tënin. Ina quëran Quirosarinquë canconpachina, Siniororë anoyatopiso caposonën yaꞌhuërinquë yaꞌconconin. Inaquë yaꞌconaton oshanën marëꞌ maꞌsharoꞌsa tëparin. Tëparahuaton yaꞌipi ahuiquitërin. Nanan anoyatërinso marëntaꞌ, maꞌsharoꞌsa tëparin. Inapotaton yaꞌipi catahuacaiso marëꞌ huaꞌanoꞌsa acorinsopita, ichicoshatërin.

Saromon yonquínahuan coisë nininsoꞌ

^16-17 Ina piquëran cato monshihuantë sanapiꞌsari copirno paapapi. Ina notënanquë nipachinara, aꞌnari itapon: —¡Maꞌcha sinioro copirno napotaranquën paya! Caso iso caisharoꞌco, ina pëiquëráchin yaꞌhuërai. Inanta pëiquë yaꞌhuëasoꞌ, caꞌton huairahuë.

¹⁸ Cara tahuëritapasoco inantaꞌ, huaiantarin. Ina pëiquësoꞌ, catocoíchin yaꞌhuërai.

^19-20 Aꞌna tashiso napoaponahuëꞌ, isoso huaꞌhuin yaꞌquëtaton tëparin. Yono tashi inasoꞌ, huëꞌësoco huënsëintarin. Huaꞌhuahuë matatonco chimipiaꞌhua acotërinco.

²¹ Tashiramiachin capayatahuato, huaꞌhuahuë ashoꞌshocaꞌhuaso marëꞌ mapirahuëꞌ, nani chiminin. Napoaponahuëꞌ, noya niꞌpatora, inaso co caquënhuëꞌ nininsoꞌ, nohuitërahuë, itërin.

²² Inaso napopirinhuëꞌ, aꞌnariso itapon: —¡Co naporinhuëꞌ! ¡Huaꞌhuan mini chimipiaꞌhuasoꞌ! Yaꞌhuërëꞌ nanpiaꞌhuasoꞌ caquën, itërin. —Chimipiaꞌhuaso quëmáquën. Nanpiaꞌhuasoꞌ caquën, itërin yaꞌnan noninsoari. Ninapotatonaꞌ, copirno niꞌtonënquë ninoꞌhuirápi.

^23-25 Naporápachinara, copirnoso yonquirin: “Yaꞌnan noninsosoꞌ: ‘Huaꞌhuahuëso nanpiárin. Chimipiaꞌhua aꞌnanquënsoꞌ,’ tënin. Yaꞌhuërëꞌ aꞌnantaꞌ: ‘Co naporinhuëꞌ. Nanpiaꞌhuasoꞌ caquën. Chimipiaꞌhua inanquën,’ tënin.” Ina pochin yonquiaton, piyapinënpita camairin: —¡Aꞌnara sahuëni quëshico! tënin. Napohuachina, quëpatopi. Ina quëran camaitaantarin: —Nanpiaꞌhua nisahuasoꞌ, huancánachin nichatocoꞌ. Inapotatoma aꞌnatëran aꞌnara quëtocoꞌ. Aꞌnantaꞌ, aꞌnatëran quëtocoꞌ, tënin.

²⁶ Napoaponahuëꞌ, huaꞌhuasha aꞌshin cháchinso co napion cancantërin. Inapoaton, huaꞌhuin marëꞌ copirno itapon: —Ama sinioro copirno nanpiaꞌhuaya tëpaquësohuëꞌ. Iso cai quëtëquë asoꞌsoin, itërin. Aꞌnariso napoaponahuëꞌ, itapon: —¡Nichachinaꞌ! Co quëmari tëranta macamaso yaꞌhuërinhuëꞌ, itërin.

²⁷ Naporoꞌ copirnosoꞌ, camaitaton tapon: —Ama tëpacosohuëꞌ. Nanpiaꞌhua masahuatomaꞌ, pasoꞌ sanapi quëtocoꞌ. Ina aꞌshin cháchinso niꞌton, quëtocoꞌ, itërin piyapinënpita.

²⁸ Naporinso yaꞌipi israiroꞌsa natantopi. Ina natantatonaꞌ, paꞌyanpi huachi: “Tëhuënchachin Yosëri catahuarin. Napoaton yonquínahuan pochin noꞌtëquën shaꞌhuirin,” topi.