1 Reyes 22 - Chayahuita (Shahui)

Acapo minsëcaisoꞌ, Micaiasëri shaꞌhuitërinsoꞌ

¹ Cara piꞌipi pochin israiroꞌsasoꞌ, siriaroꞌsarëꞌ co huachi niahuëpihuëꞌ.

² Naporoꞌ Cota huënton copirno Cosahuato itopisosoꞌ, Acapo nicapon paꞌnin.

³ Ninontërapi quëran Acaposoꞌ, sontaro huaꞌanoꞌsanënpita napotërin: —Carata parti Namoto ninano yaꞌhuërin. Inaso ninanoꞌ, canpoanquën. Napoaponahuëꞌ, Siria copirnori huaꞌanëntarin. ¡Paꞌahua osërëtahuaꞌ! itërin.

⁴ Napotahuaton, Cosahuatonta natanin: —Siria sontaroꞌsa Namotoquë yaꞌhuëapi. ¿Coꞌtama quëmanta inapita ahuëaꞌhuaiso catahuaponcoihuëꞌ to? itërin. —Quëma topatan, catahuainquën nipachin. Sontaronëhuëpita ira paꞌtopisoꞌ, cahuarioquë paꞌpisoꞌ, inapitanta quëma sontaronënpita catahuararin.

⁵ Napoaponahuëꞌ, coꞌhuara paꞌshátërasëhuahuëꞌ, Sinioro natahuan. Ina nohuantërinsoꞌ anitochinpoaꞌ, itërin inarintaꞌ.

^6-7 Napotohuachina Acaposoꞌ, pënëntonaꞌpiroꞌsa ayontonin. Catapini pasa ayontonahuaton natanin: —¿Sontaroꞌsaroco chachin paꞌsahuato, Namotoquë Siria sontaroꞌsa yaꞌhuëpisoꞌ, ahuëcoꞌin? itërin. Napotohuachina inahuari: —Noya paquëꞌ. Sinioro catahuararinquën niꞌton, inapita minsëaran, itopi. Napopirinahuëꞌ, Cosahuatoso Acapo natanin: —¿Coꞌtama aquëtë Sinioro marëꞌ pënëntërinso yaꞌhuërinhuë nica? inanta natanëhua naporini, noꞌtëquën anitochitonpoahuëꞌ, taantarin.

⁸ —Yaꞌhuërin mini aꞌnara. Inasoꞌ, Imiro huiꞌnin Micaiasë itopisoꞌ. Cariso napoaporahuëꞌ, co quëꞌyarahuëꞌ. Maꞌsha onpocaꞌhuasoráchin shaꞌhuitërinco niꞌton, naporahuë, tënin Acapo. Napopirinhuëꞌ: —Ama napoquësohuëꞌ, itërin Cosahuatori.

⁹ Naporoꞌ Acaposoꞌ, aꞌnara huaꞌan camairin: —Aꞌnaroáchin Micaiasë quëquëꞌ, itërin.

¹⁰ Cosahuato, Acapo, inapitaso shiranënaquë huënsërantapi. Ahuëtai marëꞌ nitapapiquëranchin Samaria ninano prasaꞌhuayanënquë huënsëapi. Inasoꞌ prasaaꞌhuaya yaꞌcoana pirayan yaꞌhuërin. Inaquë aꞌnapita pënëntonaꞌpiroꞌsasoꞌ, pënëntápi.

¹¹ Aꞌnaso pënëntonaꞌpi, Quinaana huiꞌnin Sitiquiasë itopi. Inasoꞌ pënëntacaso marëꞌ huaꞌna quëran pomonoꞌsa ninin. Ina aꞌnorahuaton, chiníquën pënëntarin: “¡Naporin Sinioro: ‘Iso pomonoꞌsa quëran ohuanëso pochin nitaton, Siria sontaroꞌsa minsëaran! Tiquiaquë huarëꞌ inapotaran,’ tënin,” tosárin.

¹² Aꞌnapita pënëntonaꞌpiroꞌsantaꞌ, inachachin copirno shaꞌhuitápi: “Siria sontaroꞌsa Namotoquë yaꞌhuëpisoꞌ, ahuëconquëꞌ. Napohuatan canataran. Sinioro catahuarinquën niꞌton, inapita minsërahuaton ninano osërëtaran,” itápi.

¹³ Micaiasë macapon paꞌninsoꞌ huaꞌani, quënanconahuaton itapon: “Naní quëran aꞌnapita pënëntonaꞌpiroꞌsasoꞌ, copirno nohuantërinso chachin shaꞌhuitapi. Napoaton quëmantaꞌ, inapita pochachin shaꞌhuiquë topirahuëꞌ,” itërin.

¹⁴ —Sinioro camairincosoráchin Yoscoarëꞌ caso shaꞌhuiarahuë, itërin Micaiasëri.

¹⁵ Acapotaquë canconpachina, inari itapon: —Micaiasë. ¿Noya ipora Namotoquë paato Siria sontaroꞌsa ahuëcaꞌhuasoꞌ to? itërin. —Paaton ahuëconquëꞌ. Canpita canataramaꞌ. Sinioro catahuarinquëma niꞌton, inimicoroꞌsa minsërahuatomaꞌ, ninano osërëtaramaꞌ, itërin Micaiasëri.

¹⁶ —“Sinioro niꞌsárinco noꞌtëquën shaꞌhuitaranquën,” taꞌton noꞌtëquën shaꞌhuitoco. Nani naꞌaro shaꞌhuitëranquën ina pochin nontancosoꞌ, itaantarin Acapori.

¹⁷ Naporoꞌ Micaiasë tapon: “Paꞌpatan maꞌsona onpocamasoꞌ nani ninorahuë. Ohuicaroꞌsa co huaꞌanëhuanhuë pochin Israiro sontaroꞌsa motopiroꞌsa yanquëëtopi. Napopi niꞌton, Sinioro shaꞌhuitërinco: ‘Inapitasoꞌ co huaꞌanëna yaꞌhuëtopihuëꞌ. Napoaton noya quëran yaꞌhuëpiꞌpaꞌ paantaꞌinaꞌ,’ tënin,” itërin.

¹⁸ Naporoꞌ Acaposoꞌ, Cosahuato itapon: —¡Niꞌnina huachi! ¡Napotëranquënso chachin maꞌsha onpocaꞌhuasoꞌ shaꞌhuitarinco! itërin.

¹⁹ Ina quëran Micaiasësoꞌ, taantapon: —Naporanso marëꞌ Sinioro aꞌnotërincoso shaꞌhuichinquën natanquëꞌ: Sinioro huaꞌanëntacaso shiranënquë huënsëarin niꞌnahuë. Sontaronënpitantaꞌ, ina yaꞌcari huaniápopi. Inchinan quëran, ahuënan quëran huaniápopi.

^20-21 Naporoꞌ Siniorori inapita natanin: Namoto ninanoquë Siria sontaroꞌsa yaꞌhuëapi. Inaquë paꞌsahuaton, chimina marëꞌ: ¿Incarita Acapo nonpintapon ipora? itërin. Napohuachina naꞌa anquëniroꞌsari nisha nisha shaꞌhuitopi. Napoaponahuëꞌ, aꞌna sopairi Sinioro yaꞌcarirahuaton: “Cari nonpintarahuë,” itërin. “¿Onpo nonpintapontaꞌ?” itërin Siniororintaꞌ.

²² “Yaꞌipi pënëntonaꞌpiroꞌsa Acapo camairinso nonpintarahuë. Inapitari shaꞌhuitohuachina, ahuëtapon paꞌsarin,” itërin sopairi. Ina natanaton, Siniorori itapon: “Naporinchi paya. Nonpintaran niꞌsora. Paꞌmaton inapotëquëꞌ,” itërin.

²³ Naporin niꞌton, nonpintarinënsoꞌ nani nitotëran. Sinioro tëpainquënsoꞌ yonquirin. Napoaton sopairi pënëntonaꞌpiroꞌsa camairansoꞌ, anonsarin, itërin.

²⁴ Naporoꞌ Sitiquiasëri, Miquiasë panpirayarin. Napotahuaton: —“Sinioro ispiritonëni Sitiquiasë anitotacaso tananpitërin. ¡Ina tananpitaton, ca yaꞌhuërë anitotërinco huachi,” topatan, ninonpintaran! itërin.

²⁵ —Co huaꞌquiya quëranhuëꞌ aꞌna patoanaquë aꞌna patoanaquë naꞌpicaso marëꞌ taꞌa taꞌarantapon. Naporoꞌ noꞌtëquën nonahuësoꞌ, nitotaran quëmantaꞌ, itërin Micaiasëri.

²⁶ Naporoꞌ Acaposoꞌ sontaronënpita camairin: —Micaiasë masahuatomaꞌ, Amon chirinchitaquë quëpacoꞌ. Huiꞌnahuë Coasë itërahuësoarinta niꞌin.

²⁷ Inapitaquë quëparahuatomaꞌ, shaꞌhuitoco tashinanpëiquëchinaꞌ. Naporahuaton piꞌpian piꞌpian aꞌcainaꞌ, oꞌshichinaꞌ, napochinaꞌ. Siria sontaroꞌsa minsëato huënantaꞌhuarëꞌ, inapochinaꞌ, itërin.

²⁸ Micaiasëso napoaponahuëꞌ, taantarin: “Noya huënantahuatansoꞌ, co tëhuënchachin Sinioro noninsoꞌ shaꞌhuirahuëꞌ,” tënin.

²⁹ Ina pochin Acapo, Cosahuato, inapitaso Namotoquë Siria sontaroꞌsa ahuëapona paꞌpi. Yaꞌipi sontaronënpitarë chachin paꞌpi.

³⁰ Inaquë nipachina Acaposoꞌ, Cosahuato itapon: —Quëmasoꞌ aꞌmoranquëranchin ahuëtapon paquëꞌ. Caso nipirinhuëꞌ, nisha aꞌmoto ahuëtarahuë, itërin. Napoaton inasoꞌ, nisha aꞌmorin quëran ahuëtapon yaꞌconin.

³¹ Siria copirnosoꞌ, cara shonca cato capitanoꞌsa camairin. Inapitasoꞌ ahuëtacaiso toronanoꞌsaquë sontaroꞌsa paꞌpisoꞌ huaꞌanënaꞌ. Inapita camaiaton itapon: “Israiro copirnoráchin cancantatoma ahuëcoꞌ,” itërin.

³² Napotohuachina inapitasoꞌ, Cosahuato quënanpi: “Iso mini Israiro copirno,” taꞌtona tancapitopi. Inapotohuachinara, inaso “yai,” tënin.

³³ Naporo inapitarisoꞌ, nohuitopi: “Co aso Israiro copirnohuëꞌ,” taꞌtona aꞌpopi.

³⁴ Napoaponahuëꞌ, aꞌnara Siria sontaro pëꞌchinanën quëran inantërin. Topinan aꞌpaponahuëꞌ, Acapo ohuanin. Huaꞌna cotonën nipachintërintaëchin pichinan ninopinën ohuantërin. Napotohuachina inasoꞌ, toronanën quëpanaꞌpi camairin: —¡Acorinacochi paya! ¡Aꞌpotahuaton chiꞌhuincaco! itërin.

³⁵ Naporo tahuëri paꞌpi chiníquën siriaroꞌsarëꞌ niahuëpi. Napoasoi copirnosoꞌ, aꞌnaquën sontaroꞌsari achinipi niꞌton, huanichináchin niiꞌhuarin. Napoaponahuëꞌ, iꞌhuaraya huarëꞌ chiminin. Toronaanaquë huënainën noquitërin niꞌton, naporin.

³⁶ Piꞌi yayaꞌconahuasoꞌ, Israiro sontaro huaꞌanoꞌsa chiníquën nanan shaꞌhuipi: “¡Yaꞌipinquëma yaꞌhuëramaquë pacoꞌ!

³⁷ Copirnonënpoa chiminin niꞌton, co huachi ahuëtacaso yaꞌhuërinhuëꞌ,” topi. Ninapotatona yanquëëpi. Aꞌnaquën huaꞌanoꞌsaso nipirinhuëꞌ, copirno nonën Samariaquë quëpapi. Inaquë quëmopinënpitari paꞌpitopi.

³⁸ Ina piquëran aꞌnaquën piyapinënpitari iꞌsha tapapiquë toronanën paꞌmotopi. Inaquë chachin monshihuantë sanapiꞌsanta amapi. Siniorori Iniasë quëran iráca shaꞌhuitërinso chachin, niꞌniraroꞌsarinta huënainën irotopi.

³⁹ Iso quiricaquë, co yaꞌipi Acapo naporinso ninshitërahuëꞌ. Aꞌna quëmapinta ninshitaton: “Acapo huaꞌanëntapon naporinsoꞌ,” taꞌton ninshitërin. Huaꞌanëntacaso pëinën anitaton, huiri pomon quëran acoana taparinso shaꞌhuirin. Ninanoroꞌsa apairatërinsontaꞌ, shaꞌhuirin.

⁴⁰ Inapochin Acapo chiminin. Ina chiminpachina, huiꞌnin Ocosiasë itërinso yaꞌhuërëꞌ, israiroꞌsa huaꞌanëntërin.

^41-53 (-)