1 Reyes 21 - Chayahuita (Shahui)

Napoto oparonën Acapori osërëtërinsoꞌ

¹ Huaꞌqui quëran pochin Acaposoꞌ, nanan ocoiantarin. Quisiriroquë chachin aꞌnanta quëmapi yaꞌhuërin. Napoto itopisoꞌ. Inasoꞌ, Acapo copirno huaꞌanëntërinso pëinën pirayan oparonën yaꞌhuëtërin.

² Aꞌna tahuëri Acaposoꞌ, Napoto itapon: —Oparonën paꞌantoco topirahuë. Ina marëꞌ noꞌtëquën pahuërëꞌinquën. Coꞌsoꞌ paꞌantancosoꞌ nohuantohuatanhuëꞌ, carinquën nipachin aꞌna oparo noya noya nininsoꞌ quëchinquën. Pëinëhuë pirayan yaꞌhuërin niꞌton, nisha nisha cosharo shacaꞌhuaso marëꞌ nohuantërahuë, itërin.

³ Napotopirinhuëꞌ, inariso itapon: —Isoso oparoꞌ, tatahuë yachiminaton, cari huaꞌanëntaꞌhuaso marëꞌ quëtërinco. Shimashonëhuëpitarinta ina chachin huaꞌanëntopi niꞌton, co quëtaꞌhuanquënsoꞌ Yosë nohuantërinhuëꞌ, itërin.

⁴ Napotërinso natanaton, inaso sëtërin, noꞌhuitërin, naporin. Pëinënquë quëhuënconahuaton, paira parti notëtërin quëran natantárin. Coshatacaso marëꞌ përapirinahuëꞌ, co nohuantërinhuëꞌ.

⁵ Napohuachina Quisapirari paaparahuaton itapon: —¿Onpoatonta paꞌpi sëtaton, co yacoshatëranhuëꞌ? itërin.

⁶ —Napoto oparonën nohuantato, iso pochin nontërahuë: “Ina marë pahuërëꞌinquën. Co ina nohuantohuatanhuëꞌ, aꞌna oparo ina yaꞌhuërënamën noya noya nininso quëchinquën,” itërahuë. Napotopirahuë, co nohuantërinhuëꞌ, itërin soꞌini.

⁷ —¿Macairata huaꞌanquënsoꞌ? Ama ina marëꞌ sëtatonhuëꞌ, coshatëquëꞌ. ¡Carinquën quëtaranquën Napoto oparonën! itërin saꞌini.

⁸ Napotahuaton Acapo nininën aꞌpitahuaton quiricaroꞌsa ninshitërin. Copirno sichonënquë chachin sichotahuaton, Quisiriro ansianoꞌsa aꞌpatërin.

^9-10 Quiricaroꞌsaquësoꞌ tapon: “Niyontonatoma ayono nicacamaso marëꞌ shaꞌhuicoꞌ. Niyontonpatamaꞌ, yaꞌnatiirinso huënsënanquë Napoto ahuënsëcoꞌ. Ina notënanquëntaꞌ, cato yaꞌpi ina nonpinapicaiso marëꞌ ahuënsëcoꞌ. Ina quëran yaꞌipi natantapaiquë nonpinapiinaꞌ: ‘Napoto Yosë noꞌhuiton, pinorin. Copirnontaꞌ, napotërin natanai,’ ichinaꞌ. Ina piquëran inasoꞌ, ninano quëran ocoicoꞌ. Inaquë naꞌpiquë tëꞌyaratoma tëpacoꞌ,” tënin.

^11-14 Napohuachina yaꞌhuëhuanoꞌsaꞌ, ansianoꞌsaꞌ, huaꞌanoꞌsaꞌ, inapitaso ina inachachin nipi. Inapoatonaꞌ, aꞌnara comision Quisapira shaꞌhuitacaso marëꞌ aꞌpapi. Cantonahuaton: “Napoto nani naꞌpiquë tëꞌyaratona tëpapi,” itërin.

¹⁵ Ina natanaton, Quisapirasoꞌ soꞌin shaꞌhuitërin: “Oparonën co yapaꞌantërinquënsohuëꞌ, nani chiminin. Paaton ina oparo quëmari maquëꞌ,” itërin.

¹⁶ Ina natanaton, Acaposo Napoto oparonën huaꞌanëntërin huachi.

¹⁷ Naporoꞌ Siniorori Iniasë nontaton itapon:

¹⁸ “Aꞌnaroáchin paꞌsahuaton, Acapo niꞌcontaquëꞌ. Apiramiachin inasoꞌ, Napotoco oparonënquë nisarin. Ayananpirin niꞌton, huaꞌanëntacaso marëꞌ paꞌnin.

¹⁹ Quënanconpatan napotëquëꞌ: ‘Naporin Sinioro: Napoto tëparahuaton oparonën matëran. Inapotëran niꞌton, niꞌniraroꞌsari huënainën irotërin. Ina marëꞌ quëmanta inaquë chachin niꞌniraroꞌsa huënainën irotapënën,’ itëquëꞌ,” itërin.

²⁰ Napotohuachina, paꞌsahuaton Siniorori napotërinsoꞌ Acapo shaꞌhuitonin. Napotohuachina Acapori itapon: —¡Quëmasoꞌ inimiconëhuënquën nipiranhuëꞌ, niquënanëchi paya! itërin. Napotohuachina Inari itapon: —Co Sinioro costarinsohuëráchin ninanso marëꞌ niquënanëꞌ.

²¹ Napoaton Sinioro napotërinquën: “Yaꞌipi quëmá quëran pipipisopita Israiro nacion quëran ataꞌhuantarahuë. Aꞌnaquën inaora marëꞌ sacataponaꞌ. Aꞌnaquënsoꞌ patrohuanaponaꞌ. Inapopirinahuë yaꞌipi inapita tiquiarahuë.

²² Quiropoamo, Paasa, inapita copirnoroꞌsa quëmopinënpita napotërahuëso pochachin quëmanta nitaranquën. Inapita pochachin quëmanta israiroꞌsa aoshahuanan. Inaporan niꞌton, paꞌpi noꞌhuitato napotaranquën.

²³ Quisapiranta yonquiaton, Siniorori itërin: ‘Quisapiranta chiminpachin, Quisiriro ninano pairanën pirayan, niꞌniraroꞌsari noshanën caponaꞌ.

²⁴ Insosona quëma quëmopinën ninanoquë chiminpachin, niꞌniraroꞌsari caꞌsarin. Áquësoꞌ chiminpachin, chanaro caꞌtëroꞌsari caponaꞌ,’ tënin,” itërin.

²⁵ (Co aꞌna tëranta Acapo copirno pochin yaꞌhuërinhuëꞌ. Inasoꞌ, yaꞌipiya quëran nápo naponin ninin. Saꞌini camairin niꞌton, co Sinioro nohuantërinsohuëꞌ, nisárin.

²⁶ Nisha nisha mamanshiroꞌsa mosharápaton, amororoꞌsa pochin niconin. Inapitasoꞌ Siniorori ocoirin. Israiroꞌsari yaꞌhuërëtacaiso marëꞌ napotërin.)

²⁷ Iniasëri napotërinsoꞌ natanahuaton, Acaposo paꞌpi sëtërin. Aꞌmorinso osharahuaton, saꞌcatën nininsoꞌ aꞌmorin. Naporahuaton co huachi coshatatonhuëꞌ, Yosë yonquirin. Huëꞌëpachinantaꞌ, inanpi aꞌmorinquëranchin huëꞌërin. Oshanën marëꞌ sëtërinsoꞌ nitotacaiso marëꞌ naporin.

^28-29 Napohuachina, Siniorori Iniasë itapon: “¡Niꞌquëꞌ! Acaponta co noyahuëꞌ nininso marëꞌ sëtërin. Napoaton inaporinso marëꞌ co nanpisoꞌ anaꞌintapohuëꞌ. Nani chiminpachin, huiꞌnini yaꞌhuërëtapon. Naporoꞌ quëmopinënpita anaꞌintarahuë,” itërin.