1 Reyes 17 - Chayahuita (Shahui)

Piꞌimiatacaso Iniasë shaꞌhuirinsoꞌ

¹ Carata parti, Tisipi ninanoquë aꞌnara pënëntonaꞌpi yaꞌhuërin. Inasoꞌ, Iniasë itopi. Aꞌna tahuëri inasoꞌ, Acapo paaparahuaton itapon: “Sinioro chinotërëhuaso yaꞌhuërin niꞌton, caso inasáchin natërahuë. Ina camairinco niꞌton, noꞌtëquën shaꞌhuitaranquën. Ipora quëran huarëꞌ co huachi oꞌnanaponhuëꞌ. Co poroncayo tëranta yaꞌhuëaponhuëꞌ. Ca shaꞌhuiantaꞌhuarëꞌ yaꞌhuëantapon. Co Sinioro natëtonhuëꞌ oshahuananso marëꞌ ina pochin anaꞌintarinquën,” itërin.

² Ina quëran Siniorori Iniasë itapon:

³ “Cortaniiꞌ aquëtëran piꞌi pipirinso parti paꞌsahuaton, Quiriti iꞌshaquë naꞌpipon pochin yaꞌhuëconquëꞌ.

⁴ Ina iꞌsha oꞌosaran. Naporahuaton nani cari itatanoꞌsa camairahuë cosharo quëpatiinënquënsoꞌ,” itërin.

⁵ Napotohuachina, inaso ina inachachin ninin. Cortaniiꞌ aquëtëran piꞌi pipirinso parti paꞌsahuaton, Quiriti iꞌshaquë yaꞌhuëconin.

⁶ Inaquë itatanoꞌsari nani tashiramiachin nani iꞌhuaraya nosha, pan, inapita quëpatopi. Yamorohuachina iꞌsha oꞌorin.

⁷ Napoápirinhuëꞌ, huaꞌqui quëran ina iꞌshasoꞌ, yanirin. Co oꞌnaninhuëꞌ niꞌton, naporin.

Iniasë quëyoroni nocomarinsoꞌ

^8-9 Napohuachina Siniorori Iniasë itaantapon: “Iporasoꞌ, Saripita ninano itopiquë paꞌsahuaton yaꞌhuëconquëꞌ. Inaso ninanoꞌ, Siton parti yaꞌhuërin. Nani inaquë aꞌnara quëyoron camairahuë nocomainquënso marëꞌ,” itërin.

¹⁰ Napotohuachina, inaso Saripitaquë paꞌnin. Ninano yaꞌcoanaquë canconahuaton, aꞌnara quëyoron ihuë masarin quënanconin. Përasahuaton itapon: —Yosë marëꞌ canta imoya, piꞌpian iꞌsha quëshico oꞌoi, itërin.

¹¹ Inasoꞌ, iꞌsha matapon paꞌsapirinhuëꞌ, naquëranchin përantarin. Huëantahuachina itapon: —Yosë marëꞌ paonta quëshico topirahuë, itaantarin.

¹² Napotaantahuachina, inariso itapon: —Yoscoarëꞌ co anpipinan yaꞌhuëtërincohuëꞌ. Aꞌna sëꞌtamoíchin pochin orinanquë arina yaꞌhuëcharinco. Tomanta yonshaquë piꞌpisha yaꞌhuëtërinco. Inaíchin anpiato huaꞌhuahuë aꞌcaꞌhuaso marëꞌ ihuë masapirahuëꞌ: “Ina pëꞌyachinatoi tana tëpachinaꞌincoi,” taꞌto naporapirahuëꞌ, itërin.

¹³ —Ama imoya paꞌyanquësohuëꞌ. Paaton naporanso chachin anpiontaquëꞌ. Napoaponahuëꞌ, caꞌton anpitahuatonco quëshico caꞌi. Ina piquëran canpitantaꞌ, capamaso marëꞌ anpiantaquëꞌ.

¹⁴ Sinioro israiroꞌsacoi chinotëraisoꞌ, naporin: “Ca nohuanto arina orinanquë yaꞌhuërinsoꞌ, co nitiquiaponhuëꞌ. Tomanta yonshaquë yaꞌhuërinsoꞌ, napoarin. Ca nohuanton oꞌnanpachin, cosharo yaꞌhuëaquë huarëꞌ, yaꞌhuëápon,” tënin Sinioro, itërin.

¹⁵ Napotohuachina, inaso ina inachachin ninin. Napoaton quëyoron, huaꞌhuin, Iniasë, inapitaso huaꞌqui noya coshatopi.

¹⁶ Siniorori piyapinën quëran shaꞌhuitërinso chachin arina, tomaꞌ, inapita yaꞌhuërinsoꞌ, co nitiquirinhuëꞌ. Yaꞌhuërachinin.

¹⁷ Huaꞌqui quëran quëyoron huaꞌhuinsoꞌ, caniorin. Chiníquën caniorahuaton, chiminaquë huarëꞌ ninin.

¹⁸ Huaꞌhuin chiminpachina, inaso Iniasë itapon: —Quëmasoꞌ Yosë nohuanton pënëntëran. ¡Co carinquënsoꞌ, manta onpotëranquënhuëꞌ! Co Yosë natëtohuëꞌ oshahuanahuë. Napoaton ina ayonquiancoso marëꞌ huaꞌhuahuë tëpatëranco. ¡Inapotatonco anaꞌintëranco tënahuë! itërin.

¹⁹ Napotohuachina, inariso itapon: —Huaꞌhuan quëshico, itërin. Quëpatohuachina, matërin. Inapa pëꞌsatëquë huëꞌërinso patoana yaꞌhuërin niꞌton, inatohua quëpantarin. Quëpantarahuaton, huëꞌërinso pëꞌsaranënquë acoontarin.

²⁰ Ina quëran chiníquën Yosë nontërin: “¡Sinioro quëmasoꞌ, Yosënëhuënquën! Iso quëyoronsoꞌ naꞌcon nosororinco. Pëinënquë chachin ichiyaꞌhuërinco. Quëmariso napoaponahuëꞌ, huaꞌhuin tëpataton, paꞌpi asëtaran,” itërin.

^21-22 Napotahuaton chimipiaꞌhua cararo yaꞌquëtërin. Inapotapon pochin chiníquën Yosë nontaantarin: “¡Sinioro quëmasoꞌ, Yosënëhuënquën! ¡Quëma nohuanton iso huaꞌhuasha nanpiantaꞌin tënahuë!” itërin. Napotohuachina Siniorori aꞌpaniton, quëmapiaꞌhua ananpitaantarin.

^23-24 Naporoꞌ Iniasëri quëmapiaꞌhua maimirarahuaton, anohuaramarin. Inaquë aꞌshin quëtaton: —¡Niꞌquë imoya huaꞌhuan nanpirin! itërin. —Iporacha tëhuënchinsoꞌ Yosë piyapinën ninansoꞌ noya noya nitotërahuë huachi. Maꞌsona tëranta quëmasoꞌ topatan, Sinioro anitotërinquënso noꞌtëquën shaꞌhuiaran, itërin quëyoroni.