1 Reyes 12 - Chayahuita (Shahui)

Israiroꞌsa cato huënton ocoipisoꞌ

^1-3 Nopoamosoꞌ, Siquimoquë paꞌnin. Inaquë israiroꞌsa nani niyontonpi: “Nopoamo copirnonënpoa yaꞌconin huachi,” taꞌcaiso marëꞌ niyontonpi. Naporoꞌ Quiropoamosoꞌ, Iquipitoquëranchin nisarin. Saromon taꞌananpiton paꞌninquëranchin yaꞌhuëarin. Aꞌnaquëni Nopoamori israiroꞌsa huaꞌanëntërinsoꞌ, shaꞌhuitopi. Napohuachina, Iquipito quëran pipirahuaton yaꞌhuërinquë chachin huënantarin. Israiro ansianoꞌsari amatohuachinara, yaꞌipi huaꞌanoꞌsapitarë chachin Nopoamo nontacaiso marëꞌ paapapi. Quënanconahuatona itaponaꞌ:

⁴ —Tatacosoꞌ, chini chiníquën asacatërincoi. Naporahuaton, copirno marëꞌ nininsoꞌ naꞌcon apahuërëtërincoi. Inapoatoi parisitërai. Quëmasoꞌ ipora sanoanan quëran camaicoi. Pahuërëtaꞌhuaisoꞌ nininsonta amashamiachin aꞌpamaquëꞌ. Inapohuatan, noya natëarainquën, itopi.

⁵ —Noyapaꞌ. Yonquiriꞌi nipachin. Iporaso paꞌsahuatomaꞌ, cara tahuëri quëran huëantacoꞌ. Naporoꞌ shaꞌhuitaranquëma yonquirahuësoꞌ, itërin. Napotohuachina, inahuaso paꞌpi.

^6-7 Nani paꞌpachinara, Nopoamoso paꞌpincoꞌ catahuarinsopita ansianoroꞌsa amatërin. Maꞌsona nicacaso natanpachina, inahuariso shaꞌhuitopi: —Tëhuënchachin israiroꞌsa natëinquënso nohuantohuatan, nataninënquënso chachin nitëquëꞌ. Ama huachi coꞌchachin asacatëquësohuëꞌ. Naporahuaton pahuërëtacaisoꞌ nininsontaꞌ, aꞌpamaquëꞌ, itopi.

^8-11 Napotopirinahuëꞌ, inariso co natërinhuëꞌ. Co natëtonhuëꞌ, aꞌnapita huaꞌanoꞌsa co masho nipisopitahuëꞌ amatërin. Huëꞌpachinara, inahuanta ina chachin natanin. Natanpachina, inahuariso itaponaꞌ: —Ama huachi coꞌchachin asacatocoisohuëꞌ. Naporahuaton pahuërëtaꞌhuaiso nininsontaꞌ, aꞌpamaquëꞌ, itërinën. Napotërinënsopita, iso pochin shaꞌhuitëquëꞌ: “Tatahuësoꞌ chiníquën asacatërinquëmaꞌ. Carimaso nipirinhuëꞌ, chini chiníquën asacataranquëmaꞌ. Naꞌcon pahuërëtacasoꞌ camairinquëmaꞌ. Caso nipirinhuëꞌ, naꞌcon naꞌcon pahuërëtamasoꞌ camaiaranquëmaꞌ. Inasoꞌ, sintoron quëran ahuihuitërinquëmaꞌ. Carimaso nipirinhuëꞌ, huaꞌnaraꞌhuaquë motoanpinan huihuitiinanquë, ahuihuitaranquëmaꞌ,” itëquëꞌ, itopi.

¹² Cara tahuëri quëran Quiropoamosoꞌ, aꞌnapitarë chachin Nopoamo paapantapi. Shaꞌhuitërinso chachin nipi.

¹³ Paapantapirinahuëꞌ, inariso co yainhuëꞌ nontërin. Co ansianoroꞌsari pënëninso pochin shaꞌhuitërinhuëꞌ.

¹⁴ Aꞌnapita huaꞌanoꞌsa co mashohuëꞌ nipisopitari pënëninsoꞌ shaꞌhuitërin: “Tatahuësoꞌ chiníquën asacatërinquëmaꞌ. Carimaso nipirinhuëꞌ, chini chiníquën asacataranquëmaꞌ. Copirno marëꞌ nininsoꞌ naꞌcon pahuërëtacasoꞌ camairinquëmaꞌ. Caso nipirinhuëꞌ, naꞌcon naꞌcon pahuërëtamasoꞌ camaiaranquëmaꞌ. Inasoꞌ, sintoron quëran ahuihuitërinquëmaꞌ. Carimaso nipirinhuëꞌ, huaꞌnaraꞌhuaquë motoanpinan huihuitiinanquë ahuihuitaranquëmaꞌ,” itërin.

¹⁵ Inapoaton Nopoamosoꞌ, Israiro huaꞌanoꞌsari natanpisoꞌ, co natërinhuëꞌ. Siniorori Aiasi quëran Quiropoamo shaꞌhuitërinsoꞌ nanicaso marëꞌ, naporin.

¹⁶ Copirnori napotërinsoꞌ Israiro huaꞌanoꞌsasoꞌ, natanpi. Ina natanatonaꞌ: “¡Coꞌchi natërinpoahuë paya!” topi. Napoatona copirno chiníquën nontopi: “Tapi quëran pipipisopita, co huachi huaꞌanëntiincoiso yaꞌhuërinhuëꞌ. Quisi chiminpachina maꞌshanënpita Tapiri manin. Co ina quëran canpoasoꞌ maꞌsha tëranta manëhuahuëꞌ. Ma topinanta shinpita natëráparihuaꞌ. Napoaton, ¡huëco patahua huachi! Sacataton inantaꞌ, huiꞌninpita nocomaꞌin,” itopi. Napotatonaꞌ, inapitaso yaꞌhuëpiꞌpaꞌ paꞌpi huachi.

¹⁷ Yaꞌhuërëꞌ Cota huënton israiroꞌsasoꞌ, Nopoamo copirno natëpi.

¹⁸ Israiro huaꞌanoꞌsasoꞌ, noꞌhuitatona paꞌpi. Paasoi chachin Nopoamosoꞌ, Sacato huaꞌan Atoramo itopisoꞌ aꞌparin. Noꞌhuitatona paꞌsapisopita noya nontaton asanocaso marëꞌ aꞌparin. Aꞌpapirinhuëꞌ, inapitariso naꞌpiquëtatona tëpapi. Ina nitotaton Nopoamosoꞌ, aꞌnaroáchin toronanënquë nanpëaton Quirosarinquë taꞌarin.

¹⁹ Ina pochin shonca huënton israiroꞌsasoꞌ, Tapi quëran pipirinsoꞌ copirno aꞌpopi. Napoaton iso quirica ninshitasoco huarënta ina chachin nisapi.

²⁰ Quiropoamo Iquipito quëran huënantarinsoꞌ, yaꞌipi israiroꞌsa natantopi. Ina quëran niyontonahuatonaꞌ, amatopi. Canquihuachina, shonca huënton israiroꞌsari, copirnonëna nicacaso marëꞌ acopi. Cota huënton israiroꞌsaráchin Tapi quëran pipirinsoꞌ copirno natëpi.

²¹ Nopoamosoꞌ Quirosarinquë canquirahuaton, pasa posa shonca huaranca sontaroꞌsa ayontonin. Cota, Mincamin, inapita huëntonoꞌsa quëran ina nápo ayontonin. Shonca huënton israiroꞌsa ahuëatona, naquëranchin huaꞌanëntaantacaso marëꞌ naporin.

²² Napopirinhuëꞌ, Yosëri Simaiasë itopiso nontaton camairin:

²³ —Paaton Nopoamo nontoonquëꞌ. Cota, Mincamin, inapita sontaro huëntonoꞌsanta nontoonquëꞌ:

²⁴ “Naporin Sinioro: ‘Carima camaiaranquëma ama iyamapitarëꞌquëma niahuëcamaso marëhuëꞌ. Ca nohuanton piyapinëhuëpita cato nacion yaꞌhuëapon. Napoaton yaꞌhuëramaquë panantacoꞌ,’ tënin Sinioro,” itëquëꞌ, itërin. Cantonahuaton, inaso Siniorori camairinso shaꞌhuitërin. Ina natanatonaꞌ, inahuaso camaitërinso chachin nipi. Co huachi ahuëtacaiso marëꞌ paꞌpihuëꞌ.

Quiropoamo mamanshi moshacaiso camaitërinsoꞌ

²⁵ Quiropoamosoꞌ copirno yaꞌconahuaton, Siquimo ninano noyá acorin. Inaso ninanoꞌ, Iprain israiroꞌsa noꞌpanënquë yaꞌhuërin. Noyá acorapiton inaquë yaꞌhuërin huachi. Ina piquëran Pinoiro ninano itopisonta noyá acorapirin.

^26-27 Oshaquëran yonquiaton tapon: “Israiroꞌsasoꞌ, Sinioro chinotacaiso marëꞌ maꞌsharoꞌsa Quirosarinquë tëpapi. Ina marëꞌ, paꞌsápachinaꞌ, maꞌshátërahuë Nopoamo noya niantaponaꞌ. Napohuachina tëparahuatonaco Nopoamo natëantaponaꞌ. Inapohuachina, Tapi quëran pipirinso chachin yaꞌipi israiroꞌsa huaꞌanëntaantapon,” tënin yonquiaton.

²⁸ Inapo yonquirinso huaꞌanoꞌsa shaꞌhuitërin. Inapitarë nonsahuaton, cato toroaꞌhua oro quëran anitërin. Tënihuachinara israiroꞌsa itapon: “Canpoaso israiroꞌsanpoaꞌ, nani naꞌaro Quirosarinquë paꞌnëhuaꞌ. Maꞌtana yosënënpoapita. Isopita mini Iquipito quëran ocoirinpoaꞌ,” itërin.

^29-30 Napotahuaton piyapinënpita camairin aꞌnara Pitiriquë acocaiso marëꞌ. Aꞌnaso nipirinhuëꞌ, Tano ninanoquë acopi. Napohuachina israiroꞌsasoꞌ, aꞌnaquën Pitiriquë paꞌpi. Aꞌnaquëontaꞌ, Tano ninanoquë pantapi. Toroaꞌhuaroꞌsa moshacaiso marëꞌ inaquëpita paꞌsápatonaꞌ, co huachi Yosë chinotacaiso marëꞌ Quirosarinquëso paꞌpihuëꞌ. Inapoatona israiroꞌsasoꞌ, oshahuanpi.

³¹ Naporahuaton Quiropoamosoꞌ, inahuara nohuanton artaroroꞌsa naꞌcon naꞌcon anitërin. Inaquëpita corto huaꞌanoꞌsa pochin sacatacaiso marëꞌ topinan israiroꞌsa acorin. Co Nihui huënton israiroꞌsa acorinhuëꞌ.

^32-33 Nasha pita naꞌhuëcaiso marëntaꞌ, inaora yonquinën quëran ocoirin. Ina pitasoꞌ, pascoa yoqui quëran canchisë yoqui nisahuaton shonca aꞌnatërápo tahuëritahuasoꞌ, naꞌhuëpi. Cota huënton israiroꞌsa Quirosarinquë niyontonatona pita naꞌhuëpiso pochin ninin. Quiropoamo chachintaꞌ, toroaꞌhua nonanpisoꞌ moshacaso marëꞌ Pitiriquë yápaꞌmarin. Inaquë maꞌsharoꞌsa tëparahuaton nonanpisoꞌ mosharin. Naporahuaton ina moshaton yonarin pochin nininsoꞌ aꞌpërin. Inaora nohuanton artaroroꞌsa acorinquë sacatacaiso marëntaꞌ, corto huaꞌanoꞌsa acoraꞌpiarin.