1 Reyes 11 - Chayahuita (Shahui)

Israiroꞌsa cato huënton ocoicaisoꞌ shaꞌhuirinsoꞌ

²⁶ Huaꞌqui quëran aꞌna huaꞌani Saromon chinitërin. Inari chachin huaꞌan acopirinhuëꞌ, naporin. Inasoꞌ huaꞌan Napato huiꞌnin Quiropoamo itopi. Inasoꞌ, Sirita ninano itopiquë yaꞌhuërin. Iprain israiroꞌsa noꞌpanënquë yaꞌhuërin. Paꞌpinsoꞌ nani chiminin. Aꞌshinsoꞌ, Sirohuia itopi. Inaso quëyoron.

²⁷ Onpoatonsona copirno chinitërinsoꞌ, shaꞌhuichinquëma nitotocoꞌ: Inanta Saromon marëꞌ sacatërin. Tapi ninanonën itopiquë noꞌpaꞌ amëntarotahuatonaꞌ, pairanën anoyataantapi.

²⁸ Saromoni chiníquën huiꞌnapi nicaton, sacato huaꞌan nicacaso marëꞌ acorin. Iprain, Manasisi, inapita huëntonoꞌsaquë sacatoroꞌsa yaꞌhuërinsoꞌ, camaicaso marëꞌ acorin. Inapitasoꞌ, Cosi shinpita.

²⁹ Aꞌna tahuëri Quiropoamosoꞌ, Quirosarin quëran niꞌtapon paꞌnin. Naporoꞌ iraquë, aꞌnara pënëntonaꞌpi nasha capaquë niimotopinan nacapirin. Inasoꞌ, Aiasi itopi. Siro ninanoquë yaꞌhuërin. Inahuaráchin inaquë nisapi.

³⁰ Naporoꞌ Aiasisoꞌ, nasha capa manin. Osharahuaton shonca cato osërarin.

³¹ Inaporahuaton, Quiropoamo itapon: “Shonca osharahuësoꞌ, quëmari maquëꞌ. Sinioro israiroꞌsanpoa chinotërëhuaso napotërinquën: ‘Saromon huaꞌanëntërinso osërëtahuato, shonca huënton quëmari huaꞌanëntacaso marëꞌ quëtaranquën.

³² Saromonsoꞌ aꞌna huëntoínchin huaꞌanëntapon. Piyapinëhuë Tapi itopisoꞌ noya nicato napotarahuë. Quirosarinta cari huayonahuë inaquë pëinëhuë yaꞌhuëcaso marëꞌ niꞌton, nosororahuë. Napoaton ina pochin nisarahuë.

³³ Saromonsoꞌ aꞌporahuatonco, mamanshiroꞌsa moshapatërin. Siton mamanshi paya Asotariti itopisoꞌ mosharin. Quimosi itopisonta mosharin. Inasoꞌ, moaporoꞌsari mosharinsoꞌ. Mircon itopisonta mosharin. Inanta amonoꞌsari mosharin. Inapoaton co costarincosohuëꞌ ninin. Pënëntërahuësopita, anitotërahuësopita, inapita co inaso paꞌpinco pochin natërinhuëꞌ niꞌton, napotarahuë.

³⁴ Napoaponahuëꞌ, yaꞌipi huaꞌanëntërinso co ipora osërëtarahuëꞌ. Paꞌpincoꞌ noya nicato, chiminaquë huarëꞌ huaꞌanëntacaso quëtarahuë. Tapisoꞌ iráca nanpipon, pënëntërahuësoꞌ, camaitërahuësoꞌ, inapita natërin niꞌton, napotarahuë.

³⁵ Huiꞌnini yaꞌhuërëtohuachin, naporo huarëꞌ huaꞌanëntërinso osërëtarahuë. Ina osërëtahuato, quëma huachi shonca huënton nininsoꞌ huaꞌanëtacaso marëꞌ quëtaranquën.

³⁶ Huiꞌninsoꞌ aꞌna huëntoínchin huaꞌanëntapon huachi. Tapi quëran pipirinsoꞌ Quirosarinquë huaꞌanëntacaso marëꞌ napoarin. Inaquë chinotiinacoso marëꞌ huayonahuë niꞌton, napoarahuë.

³⁷ Quëmaso nipirinhuëꞌ, acoaranquën naꞌcon naꞌcon israiroꞌsa huaꞌanëntacaso marëꞌ. Onposoꞌ noꞌpaꞌ huaꞌanëntamaso nohuantohuatan, huaꞌanëntaran.

³⁸ Yaꞌipi camairanquënsopita natëton noya nipatansoꞌ, noya niꞌsaranquën. Tapisoꞌ iráca nanpipon, pënëntërahuësoꞌ, camaitërahuësoꞌ, inapita natërin. Ina pochin quëmanta natëhuatanco, carinquën catahuaranquën niꞌton, quëmá quëran pipipisopitaráchin israiroꞌsa huaꞌanëntaponaꞌ. Tapi shaꞌhuitërahuëso chachin quëmanta nitaranquën.

³⁹ Tapi quëran pipipisopitasoꞌ, Saromon tëhuërinso marëꞌ anaꞌintarahuë. Napoaporahuëꞌ, co anaꞌintomiatapohuëꞌ,’ tënin Sinioro,” itërin.

⁴⁰ Napotërinso natantaton, Saromonso Quiropoamo yatëparin. Inaso napoaponahuëꞌ, Iquipitoquë taꞌarin. Saromon chiminaquë huarëꞌ inaquë yacapatërin. Naporoꞌ iquipitoroꞌsasoꞌ, Sisaco copirno itopisoari huaꞌanëntërin.

Saromon chimininsoꞌ

⁴¹ Saromon huaꞌanëntapon naporinsoꞌ, yonquínahuan nininsoꞌ, inapita aꞌna quëmapiri ninshitërin. “Saromon huaꞌanëntapon naporinsoꞌ,” taꞌton ninshitërin.

⁴² Saromonsoꞌ, Quirosarin quëran yaꞌipi israiroꞌsa huaꞌanëntërin. Catapini shonca piꞌipi huaꞌanëntërin.

⁴³ Ina quëran chiminpachina, Tapi ninanonën itopiquë paꞌpitopi. Ina piquëran huiꞌnin Nopoamo itopisori yaꞌhuërëtërin huachi.