1 Reyes 1 - Chayahuita (Shahui)

Tapi copirno mashotaton parisitërinsoꞌ

¹ Tapi copirno mashotërin. Napohuachina tëꞌnarin niꞌton, noyá aꞌmotopi. Inapotopirinahuë tërantaꞌ, co nanitërinhuëꞌ huënocatacasoꞌ.

² Napoaton aꞌnara catahuacaso marëꞌ huaꞌan acorinsoari itapon: “Aꞌnara nanon nocomatënquën nëhuëtiinquënso marëꞌ yonítiinënso yaꞌhuërin. Naporahuaton cahuainquënso marëꞌ quëmarë chachin huëꞌëin,” itërin.

³ Napotohuachina aꞌnara nanon noyápiroyanchin nininsoꞌ yaꞌipi Israiro noꞌpaquë yonípi. Yonipachinara, Sonin ninano itopiquë aꞌnara quënanpi. Inasoꞌ sanapi, Apisaca itopi. Ina quënanatona Copirnoquë quëpapi.

⁴ Ina sanapisoꞌ noyápiroyanchin. Inari copirno aꞌpaiaton nocomarárin. Inaso napoaponahuëꞌ, co onporonta copirnori tëcarichininhuëꞌ.

Atoniasë, copirno yayaꞌconinsoꞌ

⁵ Naporo tahuëriꞌsa copirno huiꞌnin Atoniasë itopisosoꞌ, paꞌpin yayaꞌhuërëtaton: “Ca copirno nisarahuë,” tënin. (Inasoꞌ, Aquita itopisoꞌ huaꞌhuin.) Ina pochin yonquiaton naꞌamiachin ahuëtacaiso toronanoꞌsa paꞌanin. Cahuarioquë paꞌpisopita sontaroꞌsanta yaꞌhuëtërin. Aꞌpairápaiso marëntaꞌ, aꞌnatërápo shonca sontaroꞌsa ina marëꞌ acorin.

⁶ Inaso huaꞌhuatapon quëran huarëꞌ co paꞌpini pënëninhuëꞌ niꞌton, co noyahuëꞌ cancantërin. Maꞌsona tëranta nisahuachina, co onporo tëranta paꞌpini: “Maꞌmarëta ina pochin nisaran,” co itërinhuëꞌ. Apësaronco piquëran inasoꞌ huaꞌhuatërin. Naporahuaton inantaꞌ, noyapin noyapin niꞌtërin.

⁷ Aꞌna tahuëri inasoꞌ, Coapo itapon: “Catahuaco cantaꞌ, copirno yaꞌcoin,” itërin. Itohuachina: “Noyapaꞌ, catahuainquën nipachin,” itërin inarintaꞌ. Apiataro corto huaꞌanta ina chachin natanpachina, inarinta aꞌpanirin.

⁸ Satoco corto huaꞌaniso napoaponahuëꞌ, co ina catahuarinhuëꞌ. Coiata huiꞌnin Pinaia itopisoꞌ, Natan pënëntonaꞌpi, inapitarinta co ina catahuapihuëꞌ. Tapi amiconën Simii itopisontaꞌ, co Atoniasë catahuarinhuëꞌ. Copirno aꞌpaipisopita sontaroꞌsantaꞌ, co ina catahuapihuëꞌ.

⁹ Aꞌna tahuëri Atoniasësoꞌ, Soiriti natëtë pirayan pita ninin. (Inaso natëtëꞌ, Noquiri itopiquë huinan yaꞌhuërinso yaꞌcari yaꞌhuërin.) Ina pitaquë capacaiso marëꞌ ohuicaroꞌsaꞌ, tororoꞌsaꞌ, toroaꞌhuaroꞌsa amoshin nipisopita, inapita atëpatërin. Inapoaton yaꞌipi pochin iinpita përarin. Yaꞌipi Cota huënton sacatoroꞌsa copirno marëꞌ sacatopisontaꞌ, përarin. Coshatasoi shaꞌhuirin: “Yaꞌipi israiroꞌsa copirnonën ca yaꞌcoanahuë,” itërin.

¹⁰ Napoaponahuëꞌ, Natan pënëntonaꞌpiso co përarinhuëꞌ. Paꞌpin aꞌpaipisopita sontaroꞌsaꞌ, Pinaia, iyaꞌhuain Saromon, inapitanta co përarinhuëꞌ.

¹¹ Natanso naporapiso nicaton, Saromon aꞌshin nontapon paꞌnin: —Atoniasë pita nisarin. Inaquë yaꞌipi përarinsopita natantonënquë naporin: “Israiroꞌsa copirnonën ca yaꞌcoanahuë,” tënin. Copirnosoꞌ, co manta nitotopirinhuëꞌ napoarin.

¹² Napoaton apira carinquën shaꞌhuichinquën maꞌsona noya nicamasoꞌ. Inapohuatan co tëpaponënhuëꞌ. Saromonta co tëpaponahuëꞌ.

¹³ Paaton copirno nontoonquëꞌ: “Quëmasoꞌ sinioro copirno chiníquën nanantëran. Nani iráca shaꞌhuitëranco: ‘Yoscoarëꞌ huiꞌnahuë Saromon itërahuësoꞌ yaꞌhuërëtaponco,’ itëranco. Napoaponahuëꞌ, nani Atoniasë yaꞌconaton huaꞌanëntacaso caniaritarin huachi,” itëquëꞌ.

¹⁴ Napotasën chachin canta yaꞌconato, ina chachin shaꞌhuitarahuë, itërin.

¹⁵ Napotohuachina Pitisapisoꞌ paꞌsahuaton, patoananënquë copirno niꞌconin. Inasoꞌ noyá mashoya niꞌton, Apisacari aꞌpairárin niꞌconin.

¹⁶ Naporoꞌ isonin quëran noꞌpaquë huarëꞌ monshorahuaton, copirno mosharin. Inapoasoꞌ copirnori itapon: —¿Maꞌta nohuantëran? itërin.

¹⁷ —Quëmasoꞌ sinioro copirno chiníquën nanantëran. Nani iráca shaꞌhuitëranco: “Yoscoarëꞌ huaꞌhuan Saromon itërësoꞌ yaꞌhuërëtaponco,” itëranco.

¹⁸ Napoaponahuëꞌ, nani Atoniasë yaꞌconaton huaꞌanëntacaso caniaritarin huachi. Naporinso quëmaso sinioro copirno, co nitochátëraranhuëꞌ.

¹⁹ Tororoꞌsaꞌ, toroaꞌhuaroꞌsa inapita atëpatërin. Naꞌa ohuicaroꞌsanta atëpatahuaton, pita nisarin. Huiꞌnanpita yaꞌipiya pochin përarin. Apiataro, Coapo, inapitanta përarin. Saromoánchin co përarinhuëꞌ.

²⁰ Inaso napopirinhuëꞌ, yaꞌipiyacoi ninárainquën insosona quëma yaꞌhuërënamën copirno acocasoꞌ.

²¹ Coꞌsoꞌ ina pochin Saromon acoyátërasënquënhuëꞌ, maꞌsha onpohuatan, Atoniasë quiyasoꞌ tëpaponcoi.

^22-23 Nontaso chachin Natan pënëntonaꞌpintaꞌ, copirno pëiquë canquirin. Canquirinso aꞌnari shaꞌhuitohuachina: “Yaꞌcointaꞌin,” tënin. Copirno notënanquë nipachina, inaso noya nicaton isonin. Isonin quëran noꞌpaquë huarëꞌ monshomarin. Naporoꞌ Pitisapisoꞌ pipirin.

²⁴ Natani copirno itapon: —¿Quëma chachin sinioro copirno camaitëran niꞌton, Atoniasë quëma yaꞌhuërënamën huaꞌanëntarin huachi?

²⁵ Ipora tahuëri chachin inaso pita nicaton, naꞌa ohuicaroꞌsaꞌ, tororoꞌsaꞌ, toroaꞌhuaroꞌsaꞌ, inapita atëpatërin. Inaporahuaton yaꞌipiya pochin huiꞌnanpita përarin. Sontaro capitanoꞌsanta përasahuaton, Apiataro corto huaꞌaonta përarin. Inaquë capatonaꞌ, oꞌotonaꞌ, chiníquën noncaroapi: “¡Atoniasë copirno, huaꞌqui tahuëri huaꞌanënchinpoaꞌ!” tosapi.

²⁶ Napoaponahuëꞌ, co caso shaꞌhuitërincohuëꞌ. Satoco corto huaꞌan, Pinaia, inapitanta co shaꞌhuitërinhuëꞌ. Co Saromon tëranta shaꞌhuitërinhuëꞌ.

²⁷ Insosona quëma yaꞌhuërënamën huaꞌanëntacaso co shaꞌhuitaponcorahuëꞌ acoran niꞌton, ¿ina pochin nisamarai ti? itërin.

Saromon copirno yaꞌconacasoꞌ, Tapi camaitërinsoꞌ

²⁸ Natani napotërinsoꞌ natanahuaton, Tapisoꞌ, Pitisapi apërátaantarin. Huëꞌsahuaton inasoꞌ, copirno notënanquë huanirin.

^29-30 Naporoꞌ copirnori itapon: —Siniorosoꞌ, nisha nisha maꞌsha onporahuësopita quëran nichaꞌërinco. Ina niꞌsárinco niꞌton, Yosë chinotërëhuaso yonquiato iráca Yoscoarëꞌ itëranquën. Napo nontëranquënso chachin, ipora tahuëri nisarahuë. Huaꞌhuan copirno yaꞌconaton, huaꞌanëntërahuëso shiranëhuëquë huënsapon huachi, itërin.

³¹ Napotohuachina Pitisapisoꞌ, copirno noya nicaton isonin. Isonin quëran noꞌpaquë huarëꞌ monshomarin. Napotahuaton chiníquën nonin: —¡Nanpimiataton sinioro copirno huaꞌanëntocoi! itërin.

^32-33 Ina quëran Tapisoꞌ piyapinënpita camairin Satoco corto huaꞌan përacaisoꞌ. Pinaia, Natan pënëntonaꞌpi, inapitanta amatërin. Huëꞌpachinara itapon: —Catahuainacoso marëꞌ huaꞌanoꞌsa acorahuëso quëparahuatomaꞌ, huiꞌnahuë Saromon itërahuëso moranëhuëquë aꞌmitocoꞌ. Inapotahuatomaꞌ, Quiyon huinanquë quëpacoꞌ.

³⁴ Inaquë Satoco, Natan, inapitari tomaquë opomototahuatonaꞌ, israiroꞌsa copirnonën nicacasoꞌ marëꞌ acoꞌinaꞌ. Nani acohuachinaꞌ, naní quëran chiníquën noinaꞌ: “¡Saromon copirno huaꞌqui tahuëri nanpiton, huaꞌanënchinpoaꞌ!” chinaꞌ.

³⁵ Ina quëran caꞌtanatomaꞌ, huaꞌanëntërahuësoꞌ shiranëhuëquë ahuënsëicoꞌ. Nani ina huayonahuë ca yaꞌhuërënamëhuë yaꞌipi israiroꞌsa huaꞌanëntacaso marëꞌ, itërin.

³⁶ Naporoꞌ Pinaiari copirno itapon: —¡Noyapaꞌ! Camaitëranso chachin mini nisarai. Ipora camaitëransoꞌ, Yosë nohuantërinso chachin niin.

³⁷ Naporahuaton quëma catahuarinquënso pochachin Saromonta Siniorori catahuain. Ina nohuanton quëma huaꞌanëntëran quëran noya noya inaso huaꞌanënchin, itërin.

³⁸ Ina quëran inapitasoꞌ, quiritoroꞌsaꞌ, piritoroꞌsaꞌ, inapitarë chachin Quiyon huinanquë paꞌpi. Copirno moranënquë Saronon aꞌmitëahuatona paꞌpi.

³⁹ Coꞌhuara inaquë paꞌshátëraponaraihuëꞌ, Satoco corto huaꞌansoꞌ, Yosë caposonën yaꞌhuërinquë paꞌnin. Ina quëran pomonquë Yosë marëꞌ toma tapapiso masahuaton paꞌnin. Canconpachina, inaquë Saromon opomototahuaton copirno nicacaso marëꞌ acorin. Ina piquëran aꞌnari carniro pomon pihuirin. Naporoꞌ yaꞌipi caꞌtanpisopitari chiníquën nonatonaꞌ: “¡Saromon copirno huaꞌqui tahuëri nanpiton, huaꞌanënchinpoaꞌ!” topi.

⁴⁰ Naporahuatona Quirosarinquë imaquipi. Capa cancantatona pirinanoꞌsa pihuiriapi. Inapoapona pochin chiníquën noncaropi niꞌton, noꞌpaꞌ nacontochináchin niriapi.

⁴¹ Atoniasësoꞌ, yaꞌipi përarinsopitarë chachin pëꞌinipi. Naporoꞌ aꞌnapita israiroꞌsa noncaropisoꞌ natanpi. Coaponta carniro pomon pihuipisoꞌ natanahuaton tapon: —Ninanoquë chiníquën noncarorapi. ¿Maꞌta ipora onpocai? tënin.

⁴² Napoaso chachin Apiataro corto huaꞌan huiꞌnin Conatan itopisosoꞌ canquirin. Canquihuachina Atoniasëri itapon: —Huëquëꞌ. Quëmasoꞌ chiníquën nanantëran. Noya nanan ipora quëshiarancoi, itërin.

⁴³ —Coꞌchi paya. Copirnonënpoa yaꞌhuërëtacaso marëꞌ nani Saromon acorin.

^44-45 Satoco, Natan, Pinaia, inapita copirnori camairin: “Quiritoroꞌsaꞌ, piritoroꞌsaꞌ, inapitarëꞌquëma chachin Saromon caꞌtanatomaꞌ, yaꞌhuërënamëhuë ina acocoꞌ. Ina marëꞌ moranëhuëquë aꞌmitëcoꞌ. Naporahuaton Satoco corto huaꞌan, Natan pënëntonaꞌpi, inapitari copirno nicacaso marëꞌ Quiyonquë acoꞌinaꞌ,” tënin. Ina pochin nicatonaꞌ, capa cancantërëꞌnachin huënantarapi. Inahua mini noncarorapiso natanama nisapasoꞌ.

^46-48 Inapoaton Saromon, huaꞌanëntacaso shiranënquë huënsërin. Catahuacaso marëꞌ copirno Tapiri acorinsopitanta paaparahuatonaꞌ: “Ma noya copirnonëhuëi nicacaso marëꞌ yaꞌconan. Yosë chachin catahuainquën tata quëran panca pancana huaꞌanëntamasoꞌ,” itopi. Copirno Tapi chachionta pëꞌsaranënquë mónsho tahuaton, iso pochin Yosë chinotërin: “Ma noyanquëncha quëmasoꞌ Sinioro ninan paya. Quëmaso Yosënquën, israiroꞌsacoi chinotërainquën. Quëma nohuanton aꞌnara huiꞌnahuë camaitacaso marëꞌ yaꞌconin niꞌnahuë,” tënin, itërin Conatani.

⁴⁹ Ina natanahuatonaꞌ, Atoniasëri përarinsopitasoꞌ, paꞌyanpi. Napoatona aꞌnaroáchin yanquëpi.

⁵⁰ Atoniasënta Saromon tëꞌhuataton, Yosë caposonën yaꞌhuërinso nëꞌmëtë pëiquë chaꞌëcaso marëꞌ paꞌnin. Inaquë paꞌsahuaton artaro pomonënpitaquë matonin.

⁵¹ Naporinso nicaton, aꞌnari Saromon shaꞌhuitapon paꞌnin: —Sinioro copirno. Atoniasë tëꞌhuatërinquën. Napoaton artaro pomonënpitaquë matërin. Nanan aꞌpatatënquën naporin: “Ama ipora tëpaꞌincoso marëhuëꞌ, ‘Yoscoarëꞌ,’ taꞌton shaꞌhuichinco,” tënin, itërin.

⁵² Napotohuachina Saromoni itapon: —Noya nipachinsoꞌ, co manta onpotarahuëꞌ. Napoaponahuëꞌ, co noyahuëꞌ nininsoꞌ nitotohuato, chiminapon, tënin.

⁵³ Napotahuaton caraya huaꞌanoꞌsa artaro quëran chiꞌhuincacaiso marëꞌ camairin. Ina quëran Atoniasësoꞌ, copirno pëinënquë paꞌnin. Inaquë nipachina, copirno Saromon notënanquë mónsho tahuaton mosharin. “Natëaranquën,” taꞌton naporin. Ina quëran copirnori yaꞌhuërinquë pacacaso camairin.