1 Pedro 5 - Chayahuita (Shahui)

Ansianoꞌsaꞌ pënëninsoꞌ

¹ Yaꞌipi ansianoꞌsanquëmantaꞌ pënënanquëmaꞌ. Cantaꞌ ansianoco niꞌto, achinicancainquëmaꞌ, tënahuë. Quisocristo isoroꞌpaquë nipon, nohuitërahuë. Corosëquë parisitohuachina, cari niꞌnahuë niꞌton, shaꞌhuirárahuë. Oꞌmantahuachin, canpoantaꞌ inarëꞌquënpoaꞌ huaꞌanëntarihuaꞌ. Napoaton iporasoꞌ pënënaranquëmaꞌ noya nicacamaso marëꞌ.

² Quisoso imapisopita iyaroꞌsaꞌ noya niꞌcoꞌ. Yosë acorinquëmaꞌ yaꞌhuëramaquë aꞌchinacamaso marëꞌ. Huaꞌanëni ohuicanënpita noya aꞌpairinso pochin noya aꞌpaicoꞌ imamiachinaꞌ. Aꞌnaya tërantaꞌ co noyahuëꞌ nipachin, sanoanan quëran pënëncoꞌ noya yonquiantaꞌin. Nani tahuëri catahuacoꞌ noya imainaꞌ. Ama chirotomahuëꞌ, aꞌchincoꞌ. Ina pochin nicacasoꞌ Yosë nohuantërin. Niꞌton, canpitantaꞌ noya nohuantatomaꞌ, aꞌchincoꞌ. Ama canacaso marëꞌ aꞌchincosohuëꞌ. Nóya cancantatomaꞌ, Yosë marëꞌ sacatocoꞌ.

³ Pënëntohuatamaꞌ, ama chiníquën nontocosohuëꞌ. Ama huaꞌan pochin cancantatomaꞌ, camaitocosohuëꞌ. Yosë acorinquëmaꞌ aꞌchintëramasopita catahuacamasoꞌ. Napoaton noya yonquiatomaꞌ, noya nicoꞌ inapitantaꞌ inachachin nonainquëmaso marëꞌ.

⁴ Quisocristo imarëhuaꞌ niꞌton, yaꞌipinpoaꞌ huaꞌanëntërinpoaꞌ. Aꞌna tahuëri oꞌmantararin. Noya ansianoꞌsaꞌ nipatamaꞌ, naporoꞌ noya canaaramaꞌ. Isoroꞌpaquë canatohuachinara, yancotëꞌ huëron quëran nipisoꞌ quëtopirinahuëꞌ, inasoꞌ aꞌnaroáchin ahuirin. Inapaquëso nipirinhuëꞌ canahuatamaꞌ, yaꞌhuëtomiatarinquëmaꞌ. Noya noya yaꞌhuëcontaramaꞌ.

Yosë catahuarinpoasoꞌ

⁵ Huiꞌnapiꞌsanquëmantaꞌ ansianoꞌsaꞌ natëcoꞌ. Yaꞌipinquëmaꞌ noya yonquiatomaꞌ, nicatahuacoꞌ. Quiricanën quëran itërinpoaꞌ: “Caora noya nisarahuë, taꞌtomaꞌ, nocantohuatamaꞌ, Yosë co noya niꞌsarinquëmahuëꞌ. Nipirinhuëꞌ, ‘Caora co nanitërahuëꞌ noya nicaꞌhuasoꞌ. Catahuaco,’ topatamaꞌ, inaora nohuanton, Yosë nóya catahuarinquëmaꞌ,” tënin.

⁶ Parisitapomarahuëꞌ, ama Yosë noꞌhuicosohuëꞌ. Chiníquën nanantaton, niꞌsárinquëma niꞌton, natëcoꞌ. Ina noya yonquihuatamaꞌ, tahuëri nanihuachin, noya noya acoarinquëmaꞌ.

⁷ Ama maꞌsha onpochináchin yonquicosohuëꞌ. Yaꞌipiya Yosë shaꞌhuitocoꞌ catahuainquëmaꞌ. Ina quëran: “Nosoroatonpoaꞌ, co naniantarinpoahuëꞌ,” taꞌtomaꞌ sano cancantocoꞌ.

Sopai yaminsërinpoasoꞌ

⁸ Sopaisoꞌ inimiconënpoaꞌ. Yacamairinpoaꞌ co noyahuëꞌ nicacaso marëꞌ. Paꞌpiniꞌ yamaninposo pochachin sopai paꞌsarin piyapiꞌsaꞌ minsëcaso marëꞌ. Napoaton noya yonquiatomaꞌ, niꞌsácoꞌ.

⁹ Ama piꞌpian tërantaꞌ ina tahuërëtocosohuëꞌ. Chiníquën cancantatomaꞌ, shaꞌhuitocoꞌ paꞌin. Yosëíchin natëcoꞌ. Co canpitaíchin parisitaramahuëꞌ. Yaꞌipi parti Yosë imarëhuasopita parisitarëhuaꞌ. Ina yonquiatomaꞌ, chiníquën cancantocoꞌ.

¹⁰ Yosë paꞌpi nosororinpoaꞌ. Quisocristo imarëhuaꞌ niꞌton, aꞌna tahuëri inápaquë quëpantarinpoaꞌ. Iporasoꞌ maꞌsha onpopirëhuahuëꞌ, catahuarinpoaꞌ. Co huaꞌquiꞌ parisitarihuahuëꞌ. Ina quëran nosoroatonpoaꞌ, anoyatarinpoaꞌ. Achinicancanarinpoaꞌ. Noya noya acoarinpoaꞌ.

¹¹ Yosë chini chiníquën nanantërin. Yaꞌipiya huaꞌanëntarin niꞌton, co onporontaꞌ pipiarinhuëꞌ. Inasáchin chinochinaꞌ. Amen.

Tiquiapon pochin ninshitërinsoꞌ

¹² Iya Siripano catahuarinco ninshitaꞌhuanquëmasoꞌ. Inasoꞌ noya niꞌnahuë. Noya imarin. Nani piꞌpian ninshitëranquëmaꞌ pënënaꞌhuanquëmaso marëꞌ. Yosë yonquirinpoaso chachin nani shaꞌhuitëranquëmaꞌ. Noya nosororinpoaꞌ, tënahuë. Ina yonquiatomaꞌ, ama aꞌpocosohuëꞌ.

¹³ Papironiaquëntaꞌ Yosëri huayoninsopita yaꞌhuëpi. Inapita saludos aꞌpatarinënquëmaꞌ. Marcontaꞌ saludos aꞌpatarinquëmaꞌ. Inasoꞌ huiꞌnahuë pochin niꞌnahuë.

¹⁴ Yaꞌipinquëmaꞌ noya ninosoroatomaꞌ, nisëꞌquëcoꞌ. Quisocristo imaramaꞌ niꞌton, Yosë catahuainquëmaꞌ sano cancantacamaso marëꞌ. Nani huachi. Pitro