1 Pedro 4 - Chayahuita (Shahui)Iráca naporëhuasoꞌ naniantahuaꞌ 1 Quisocristo isoroꞌpaquë oꞌmaton, tëhuënchachin parisitërin. Napoaton canpitantaꞌ parisitohuatamaꞌ, ahuantocoꞌ. Quisocristo yonquiatëhuaꞌ, noya ahuantohuatëhuaꞌ, noya noya cancantarihuaꞌ. Co huachi oshahuanacasoꞌ paꞌyatarihuahuëꞌ. 2 Napoaton ama iráca naporamaso pochin yonquicosohuëꞌ. Ipora quëra huarëꞌ Yosë nohuantërinsoáchin natëcoꞌ. 3 Huaꞌquiꞌ co noyahuëꞌ ninamaꞌ. Monshihuanamaꞌ, nisha nisha sanapi noyaramaꞌ, noꞌpiramaꞌ. Pita nicacasoáchin yonquiramaꞌ. Mamanshi mosharamaꞌ, co inapita moshacasohuëꞌ nipirinhuëꞌ. Iráca co Yosë imatomahuëꞌ, inaporamaꞌ. Inapoatomaꞌ, tahuëri chiniaramaꞌ. 4 Iporaso nipirinhuëꞌ imaramaꞌ. Aꞌnapita yanoꞌpihuachinara, amatopirinënquëmahuëꞌ. Co yanoꞌpihuatamarahuëꞌ, noꞌhuirinënquëmaꞌ. “¿Onpoatomataꞌ pita nipatëira, co yaniꞌnamacoihuëꞌ?” itatënënquëmaꞌ, pinorinënquëmaꞌ. 5 Iporasoꞌ pinopirinënquëmahuëꞌ, ayaroꞌ tahuëri nanihuachin, Yosë shaꞌhuitiinpoasoꞌ yaꞌhuërin. Nanpirëhuasopita, chiminpisopita, yaꞌipinpoaꞌ coisë pochin nontarinpoaꞌ. Co noyahuëꞌ nipisopita noꞌtëquën anaꞌintarin. 6 Aꞌnaquën nohuitëramasopita nani chiminpi. Piyapi niꞌton, chiminpi. Chiminaponaraihuëꞌ, coꞌhuara chimiyantërasoihuëꞌ, Quisocristo nanamën aꞌchintopi. Natëpi niꞌton, huaꞌyanëna quëran Yosë pochin nanpimiatapi. Nisha nisha acorinpoasoꞌ 7 Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ. 8 Yaꞌipi cancanëma quëran noya ninosorocoꞌ. Ina naꞌcon naꞌcon Yosë nohuantërin. Piyapi nosorohuatamaꞌ, co noyahuëꞌ nipirinahuëntaꞌ, aꞌnaroáchin nanan anoyataramaꞌ. Co noyahuëꞌ nipisopita naniantatomaꞌ, co huachi yonquiaramahuëꞌ. 9 Ama apiracosohuëꞌ. Niꞌtoroꞌsaꞌ huëꞌpachinaꞌ, noya nontocoꞌ. Noya cancantatomaꞌ, aꞌcacoꞌ, ahuëꞌëtocoꞌ. 10 Yosë imarëhuasopita acorinpoaꞌ nisha nisha nicacasoꞌ. Inaora nohuanton, aꞌnaya aꞌnayanpoaꞌ catahuarinpoaꞌ maꞌsona nohuantërinsoꞌ nitotacasoꞌ. Napoaton ama topinan quëran yaꞌhuëcosohuëꞌ. Maꞌsona nitotohuatamaꞌ, noya nicoꞌ aꞌnapita catahuacaso marëꞌ. Noya noya imacamaso marëꞌ nicatahuacoꞌ. 11 Aꞌnaquën Yosë nohuanton, nitotopi pënëntacaisoꞌ. Nitotohuatamaꞌ, Yosë noninso chachin pënëntocoꞌ. Aꞌnaquëontaꞌ Yosë nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Yosë catahuarinquëmaꞌ niꞌton, ina yonquiatomaꞌ, aꞌnapita noya catahuacoꞌ. Maꞌsona tërantaꞌ nipatamaꞌ, yaꞌipi cancanëma quëran nicoꞌ. Piyapiꞌsaꞌ nicatënënquëmaꞌ Yosë noya noya yonquicaiso marëꞌ inapocoꞌ. Yosësoꞌ noya noya ninin. Chini chiníquën nanantërin. Yaꞌipi piyapiꞌsari ina chinochinaꞌ. Quisocristo catahuarinpoaꞌ ina pochin cancantacasoꞌ. Amen. Nisha nisha parisitërëhuasoꞌ 12 Naꞌcon iyaroꞌsaꞌ, imoyaroꞌsaꞌ, nosororanquëmaꞌ. Iporasoꞌ chiníquën parisitohuatamaꞌ, ama paꞌyancosohuëꞌ. Co topinan quëran maꞌsha onporamahuëꞌ. Imaramaꞌ niꞌton, ina pochin parisitacasoꞌ yaꞌhuërin. Yosë nohuanton, napoaramaꞌ noya noya imacamaso marëꞌ. 13 Quisocristo parisitërinso pochin parisitohuatamaꞌ, noya cancantocoꞌ. Ina quëran chiníquën nanantaton oꞌmantahuachin, noya noya cancantaramaꞌ. 14 Imaramaso marëꞌ pinopachinënquëmaꞌ, Yosë noya niꞌsarinquëmaꞌ. Ispirito Santo yaꞌcoancantatënquëmaꞌ achinicancanarinquëmaꞌ niꞌton, noya cancantocoꞌ. 15 Aꞌnaquën piyapiꞌsasoꞌ co noyahuëꞌ cancantopi. Tëpatopi, ihuatopi, nanan paꞌyatopi inapitasoꞌ anaꞌintacasoꞌ yaꞌhuërin. Ama inapita pochin yonquicosohuëꞌ. Ina marëꞌ parisitohuatëhuaꞌ, tapanacasoꞌ yaꞌhuërin. 16 Nipirinhuëꞌ, imaramaso marëꞌ aparisitohuachinënquëmaꞌ, ama tapancosohuëꞌ. “Quisocristo imarai mini. Ma noyacha Tata Yosëso paya,” topatamaꞌ, Yosë noya niꞌsarinquëmaꞌ. 17 Nani anaꞌintinpoasoꞌ naniriarin. Ipora chachin imarëhuasopita piꞌpian piꞌpian anaꞌintarinpoaꞌ. Co noyahuëꞌ nipatëhuaꞌ, tatanpoa pochin piꞌpian anaꞌintarinpoaꞌ noya noya yonquicaso marëꞌ. ¡Ayaroꞌ tahuëriso nipirinhuëꞌ co nanamën natëpisopitahuëꞌ chiníquën anaꞌintarin! Parisitopiquë aꞌpararin niꞌton, parisitomiatapi. 18 Yosë quiricanënquë shaꞌhuitërinpoaꞌ: “Noya piyapiꞌsantaꞌ parisi quëran chaꞌësapi. ¡Oshahuanoꞌsaso nipirinhuëꞌ co onporontaꞌ chaꞌësapihuëꞌ! Yaꞌipi co noyahuëꞌ nipisopita chiníquën parisitomiatapi,” tënin. 19 Napoaton Yosë nohuanton parisitohuatamaꞌ, noya nicoꞌ. “Catahuaco Sinioro chiníquën cancanchi,” itocoꞌ. Yosë chachin nininpoaꞌ. Inasoꞌ co onporontaꞌ naniantarinpoahuëꞌ. |
© 2011, Wycliffe Bible Translators, Inc. All rights reserved.
Wycliffe Bible Translators, Inc.