1 Juan 2 - Chayahuita (Shahui)

Nanan anoyatërinpoasoꞌ

¹ Quisocristo imaramaꞌ niꞌton, huiꞌnahuëpita pochin niꞌnanquëmaꞌ. Ninshitaranquëmaꞌ noyasáchin nicacamaso marëꞌ. Nipirinhuëꞌ, co noyahuëꞌ nipatëhuaꞌ, Quisocristo catahuarinpoaꞌ. Oshahuanëhuaꞌ niꞌton, anaꞌintinpoasoꞌ yaꞌhuëpirinhuëꞌ. Canpoa marëꞌ Yosë nontaton, nanan anoyatarinpoaꞌ. Inasoꞌ noꞌtëquënáchin yonquirin.

² Yaꞌhuërënamënpoaꞌ chiminin niꞌton, nontohuatëhuaꞌ, oshanënpoaꞌ inquitarinpoaꞌ. Oshanënpoaꞌ inquitatonpoaꞌ, nanan anoyatërinpoaꞌ. Yaꞌipi piyapi marëꞌ chiminin. Yaꞌipinpoaꞌ oshanënpoaꞌ inquitinpoasoꞌ nohuantopirinhuëꞌ.

³ Yosë nohuitohuatëhuaꞌ, pënëninpoasoꞌ natëarëhuaꞌ. Noꞌtëquën natëcasoꞌ nohuantarihuaꞌ. Ina natëhuatëhuaꞌ, tëhuënchachin Yosë nohuitërëhuaꞌ.

⁴ Aꞌnaquënso nipirinhuëꞌ “Nani Yosë nohuitërahuë,” topirinahuëꞌ, pënëninpoasoꞌ co natëtonahuëꞌ, nonpiánpi. Co noꞌtëquën yonquipihuëꞌ.

⁵ Yosë nanamën natëhuatëhuaꞌ, noya noya Yosë nosoroarihuaꞌ. Ina pochin cancantohuatëhuaꞌ, tëhuënchachin ina nohuitarihuaꞌ.

⁶ “Yosë imarahuë,” topatëhuaꞌ, Quisocristo pochachin cancantacasoꞌ yaꞌhuërin.

Nasha pochin pënëninpoasoꞌ

⁷ Co iyaroꞌsaꞌ nasha camaitërinsoꞌ ninshitaranquëmahuëꞌ. Iráca quëran huarëꞌ Yosë nanamën natanamaꞌ. “Yaꞌipinquëmaꞌ noya ninosorocoꞌ,” itërinpoaꞌ. Inachachin iporantaꞌ pënënaranquëmaꞌ.

⁸ Co nasha camaitërinsohuëꞌ niponahuëꞌ, nasha pochin ninshitaranquëmaꞌ cancanëma quëran huarëꞌ ninosorocamaso marëꞌ. Quisocristo yaꞌipi piyapi nosororin. Nosoroatonquëmaꞌ, aꞌpintërëso pochin anoyacancantërinquëmaꞌ tahuëri pochin cancantacamaso marëꞌ. Ninosorohuatamaꞌ, co huachi tashi pochin cancantaramahuëꞌ.

⁹ Aꞌna piyapi noꞌhuihuatamaꞌ, co Yosë imaramahuëꞌ. “Imarahuë,” tapomarahuëꞌ, co tahuëri pochin cancantëramahuëꞌ. Ipora huantaꞌ tashi pochin cancantaramaꞌ.

¹⁰ Imaramasopita capini ninosorohuatamaꞌ, tahuëri pochin cancantaramaꞌ. Ina pochin nipatamaꞌ, noꞌtëquën imaramaꞌ.

¹¹ Nipirinhuëꞌ ninoꞌhuihuatamaꞌ, tashi pochin cancantaramaꞌ. Co noyahuëꞌ cancantatomaꞌ, co mantaꞌ yonquiaramahuëꞌ. Co nanitaramahuëꞌ noꞌtëquën yonquicamasoꞌ. Sopai nohuanton, somaraya pochin cancantaramaꞌ. Napoaton iyaroꞌsaꞌ, cancanëma quëran huarëꞌ ninosorocoꞌ.

¹² Canpitasoꞌ imaramaꞌ niꞌton, ninshitaranquëmaꞌ. Huiꞌnahuëpita pochin nicatënquëmaꞌ, ninshitaranquëmaꞌ. Quisocristo canpoa marëꞌ chiminin. Imapatamaꞌ, oshanëmaꞌ inquitërinquëmaꞌ.

¹³ Aꞌnaquëmaꞌ nani huaꞌquiꞌ imatomaꞌ aꞌnapita catahuaramaꞌ niꞌton, Quisocristo noya nohuitëramaꞌ. Inasoꞌ iráca quëran huarëꞌ yaꞌhuërin. Noya imaramaꞌ niꞌton, ninshitaranquëmaꞌ. Canpitantaꞌ huiꞌnapiꞌsanquëmaꞌ, nani sopai minsëramaꞌ. Napoaton ninshitaranquëmaꞌ.

¹⁴ Yaꞌipi imaramasopita huiꞌnahuëpita pochin niꞌnanquëmaꞌ. Yosë nohuitëramaꞌ niꞌton, ninshitaranquëmaꞌ noya noya cancantacamaso marëꞌ. Quisocristo noya nohuitëramaꞌ niꞌton, iyaroꞌsaꞌ, ninshitaranquëmaꞌ. Inasoꞌ iráca quëran huarëꞌ yaꞌhuërin. Nani tahuëri, apiaꞌhuaroꞌsaꞌ, Yosë nanamën yonquiaramaꞌ. Napoaton chiníquën cancantaramaꞌ. Chiníquën cancantatomaꞌ, sopai nani minsëramaꞌ.

Isoroꞌparáchin paꞌyatopisopita

¹⁵ Naꞌa piyapiꞌsaꞌ co Yosë natëtonahuëꞌ nisha nisha yonquipi. Isoroꞌpaquë yaꞌhuërinsopitaráchin yonquipi. Ama inapita pochin cancantocosohuëꞌ. Ama nani maꞌsha nohuantapatocosohuëꞌ. Maꞌsha naꞌcon yonquihuatamaꞌ, co tëhuënchachin Tata Yosë nosororamahuëꞌ.

¹⁶ Isoroꞌpaquë nisha nisha yaꞌhuërin aoshahuainpoaso marëꞌ: Monshihuanacasoráchin cancantërëꞌ. Maꞌsha quënanpatëra, nohuantapatërëꞌ. Maꞌhuanpatëra, yanocantërëꞌ, naporëꞌ. Inapitasoꞌ co Tata Yosë nohuanton yaꞌhuërinhuëꞌ. Sopai nohuanton, yaꞌhuërin.

¹⁷ Isoroꞌpaꞌ taꞌhuantarin. Yaꞌipi maꞌshantaꞌ taꞌhuantarin. Inasáchin paꞌyatohuatëhuaꞌ, topinan quëran nanpiarihuaꞌ. Nipirinhuëꞌ, Yosë noya imapatëhuaꞌ, co onporontaꞌ taꞌhuantarihuahuëꞌ. Yaꞌhuëmiatarihuaꞌ.

Quisocristo inimiconën

¹⁸ Co huaꞌquiya quëranhuëꞌ, apiaꞌhuaroꞌsaꞌ, Quisocristo oꞌmantararin. “Cristo yaoꞌmahuachin, inimiconën huëꞌsarin,” itërinënpoaꞌ. Nani natantëramaꞌ canpitantaꞌ. Iporasoꞌ naꞌa piyapiꞌsari Cristo yainimicotopi. Napoaton oꞌmantacasoꞌ tahuëri naniriarin, tënëhuaꞌ.

¹⁹ “Quiyantaꞌ imarai,” topirinahuëꞌ, nani pipipi. Co tëhuënchachin Yosë huëntonënquë yaꞌconpihuëꞌ. Yaꞌconpi naporini, co pipiitonahuëꞌ. Pipipi quëran nitotërëhuaꞌ. “Co onporontaꞌ cancanëna quëran huarëꞌ imapihuëꞌ,” tënëhuaꞌ.

²⁰ Canpitaso nipirinhuëꞌ imaramaꞌ. Quisocristo nohuanton, Ispirito Santo yaꞌcoancantërinquëmaꞌ. Napoaton noꞌtëquën yonquiramaꞌ.

²¹ Nitotopiramahuëꞌ, naquëranchin pënëantaranquëmaꞌ yonquicamaso marëꞌ. Noꞌtën nanan imapatëhuaꞌ, co nonpin nanan natëarihuahuëꞌ.

²² Tëhuënchachin nonpin nanan shaꞌhuitarinënquëmaꞌ. “Quisososoꞌ co Cristohuëꞌ. Co Yosë huiꞌninhuëꞌ,” taꞌtonaꞌ, yanonpintërinënquëmaꞌ. Inapoatonaꞌ, Quisocristo inimicotapi. Tata Yosëntaꞌ aꞌpopi.

²³ Yosë huiꞌnin aꞌpohuachinaꞌ, co Tata Yosëntaꞌ nohuitapihuëꞌ. “Quisocristosoꞌ Yosë huiꞌnin chachin,” topachinaꞌ, Tata Yosëntaꞌ imasapi.

²⁴ Yaꞌnan imapomaꞌ, noꞌtëquën aꞌchintërainquëmaꞌ. Ina chachin imamiatocoꞌ. Ina imapatamaꞌ, cancanëma quëran Tata Yosë nohuitaramaꞌ. Huiꞌniontaꞌ noya nohuitarama huachi.

²⁵ Quisocristo chachin shaꞌhuitërinpoaꞌ: “Imamiatohuatamaco, Yosë nohuitatomaꞌ, nanpimiataramaꞌ,” itërinpoaꞌ.

²⁶ Aꞌnaquën yanonpintarinënquëmaꞌ niꞌton, ninshitaranquëmaꞌ.

²⁷ Canpitaso nipirinhuëꞌ Ispirito Santo yaꞌhuëtërinquëmaꞌ. Quisocristo imaramaꞌ niꞌton, ina nohuanton, yaꞌcoancantërinquëmaꞌ. Nani tahuëri aꞌchintarinquëmaꞌ. Cancanëmaquë Yosë nanamën aꞌchintarinquëmaꞌ. Co onporontaꞌ nonpintërinquëmahuëꞌ. Noꞌtëquën aꞌchintërinquëmaꞌ niꞌton, co aꞌnapita aꞌchintinquëmasoꞌ yaꞌhuërinhuëꞌ. Ina natëhuatamaꞌ, noꞌtëquën yonquiaramaꞌ. Shaꞌhuitërinquëmaso pochachin Quisocristo imamiatocoꞌ.

²⁸ Ipora quëran huarëꞌ, apiaꞌhuaroꞌsaꞌ, Quisocristo imamiatocoꞌ. Inapohuatamaꞌ, oꞌmantahuachin, co tapan yaꞌhuëtarinquëmahuëꞌ. Co paꞌyanaramahuëꞌ.

²⁹ Quisocristo noyasáchin ninin, nitotërëhuaꞌ. Napoaton Yosë huëntonënquë yaꞌconpatëhuaꞌ, noya nicarihuaꞌ. Inpitasona noya nipachinaꞌ, nani Yosëri anoyacancantërin niꞌton, huiꞌnin pochin niꞌsarin, tënëhuaꞌ.