1 Corintios 9 - Chayahuita (Shahui)

Quisocristori acorinsopita

¹ Co inso piyapi tërantaꞌ camairincohuëꞌ. Quisocristo chachin acorinco nanamën aꞌchinaꞌhuaso marëꞌ. Inápaquë panantarinsoꞌ piquëran cari niꞌnahuë. Ina catahuarinco aꞌchinaꞌhuasoꞌ. Aꞌchintohuatënquëmara, canpitantaꞌ imaramaꞌ.

² “Co Quisocristo chachin acorinquënhuëꞌ,” itërinaco aꞌnaquën. Canpitaso nipirinhuëꞌ co napotaramacohuëꞌ. Aꞌchintohuatënquëmara, Quisocristo imaramaꞌ niꞌton, acorincosoꞌ nitotëramaꞌ.

³ Nocanpachinacora, noꞌtëquën iso pochin shaꞌhuitërahuë:

⁴ Aꞌchintohuatëinquëmara, aꞌcamacoisoꞌ yaꞌhuërin. Yamorohuatoi, oꞌshitamacoisontaꞌ yaꞌhuërin. Nohuantërai naporini, noya maꞌpaitëinquëmahuëꞌ.

⁵ Aꞌnapita Quisocristori acorinsopitasoꞌ, saꞌatonaꞌ saꞌinarëꞌ iratopi. Nanamën aꞌchinacaiso marëꞌ paꞌpachinara, saꞌinë chachin paꞌpi. Quisocristo iinpita, Pitro, inapitantaꞌ inapopi. Nohuantërai naporini, quiyantaꞌ Quisocristo imarinsoꞌ macatoi, inaroꞌcoi chachin irachitoihuëꞌ.

⁶ Pirnapirëꞌco aꞌchintarainquëmaꞌ niꞌton, aꞌcamacoisoꞌ yaꞌhuëpirinhuëꞌ. Quiyaora sacatatoi, coshatërai. Maꞌshantaꞌ pahuantohuachincoira, quiyaora paꞌanai. Aꞌnapitasoꞌ topinan maꞌparinënquëmaꞌ.

⁷ Niꞌcoꞌ, iyaroꞌsaꞌ. Sontaro yaꞌconpachinara, co cosharonën paꞌanacasoꞌ yaꞌhuërinhuëꞌ. Capacasoꞌ, aꞌmocasoꞌ, inapita topinan quëtopi. Inapochachin opa shaꞌpachina, huaꞌanëni inaora macaton, irorin. Co ina marëꞌ pahuërëtacasoꞌ yaꞌhuërinhuëꞌ. Ohuica pëꞌtahuanaꞌpintaꞌ nohuantohuachina, ohuica shoꞌshoiꞌ shiꞌshiaton, oꞌorin.

⁸ Co piyapiꞌsaráchin ina pochin yonquipihuëꞌ. Yosë quiricanënquëntaꞌ Moisësë naporin:

⁹ “Toro asacatohuatamaꞌ, aꞌcacoꞌ. Iꞌnataton toꞌnorayahuachin, ama tonpoanantocosohuëꞌ. Tananpitocoꞌ piꞌpian piꞌpian coshachin,” tënin iráca ninshitaton. Co toroáchin yonquiaton, Yosë naporinhuëꞌ.

¹⁰ Canpoantaꞌ yonquiatonpoaꞌ, quiricanënquë aninshitërin. Quëmapi iminpachina, co topinan shaꞌninhuëꞌ. “Nitohuachin, masarahuë,” taꞌton, shaꞌnin. Ina quëran shaꞌninsoꞌ cayahuachina, manin.

¹¹ Inapochachin quiyantaꞌ Yosë nanamën aꞌchintërainquëmaꞌ noya noya cancantacamaso marëꞌ. Ina marëꞌ maꞌsha pahuantohuachincoi, topinan quëtëramacoi naporini, noya niitonhuëꞌ.

¹² Aꞌnapitasoꞌ aꞌchintohuachinquëmara, maꞌsha topinan quëtëramaꞌ. Quiyasoꞌ naꞌcon naꞌcon aꞌchintërainquëmaꞌ niꞌton, naꞌcon naꞌcon quëtamacoisoꞌ yaꞌhuëpirinhuëꞌ. Napoaponahuëꞌ, co mantaꞌ topinan maꞌparainquëmahuëꞌ. Maꞌsha pahuantopirincoihuëntaꞌ, ahuantërai. Piyapiꞌsaꞌ noya noya Quisocristo nanamën natanacaiso marëꞌ co mantaꞌ maꞌpatëraihuëꞌ. Aꞌchinahuë quëran canarahuë naporini, co onpopinchin noya niꞌitonacoihuëꞌ nimara, tënahuë.

¹³ Iráca aꞌnaquën Yosë chinotopiso pëiquë sacatohuachinara, inaquë chachin coshatopi. Maꞌsha Yosë chinotacaiso marëꞌ tëpahuachinara, patoma caꞌpi. Topinan quëtohuachinara, noya caꞌpi. Nani ina nitotëramaꞌ.

¹⁴ Inapochachin Quisocristontaꞌ shaꞌhuitërinpoaꞌ. “Nani tahuëri nani tahuëri Yosë nanamën aꞌchinpachinaꞌ, natanpisopitari maꞌsha quëchinaꞌ nanpicaiso marëꞌ,” tënin.

¹⁵ Ina nipirinhuëꞌ, co mantaꞌ maꞌparanquëmahuëꞌ. Co ina marëꞌ ninshitëranquëmahuëꞌ. Co mantaꞌ nohuantërahuëꞌ. Caora sacatato, aꞌchinarahuë. Ina marëꞌ noya cancantërahuë. Aꞌchintëranquëmaso marëꞌ pahuërëamacosoꞌ yaꞌhuërin naporini, chiminaꞌhuasoꞌ noya noya niitonhuëꞌ. Topinan nohuantato, aꞌchintaranquëmaꞌ, tënahuë.

¹⁶ Aꞌnaquën: “Yosë nanamën aꞌchinahuëso marëꞌ casoꞌ noya noyaco,” topi. Caso nipirinhuëꞌ co caora nohuanto aꞌchinahuëꞌ. Co ina marëꞌ noya noyacohuëꞌ. Quisocristo acorinco nanamën aꞌchinaꞌhuaso marëꞌ. Coꞌsoꞌ aꞌchinpatohuëꞌ, ¡maꞌhuantacha nisarahuë paya!

¹⁷ Caora nohuanto, aꞌchinahuë naporini, ina marëꞌ canaitohuëꞌ. Nipirinhuëꞌ, ina shaꞌhuitërinco niꞌton, aꞌchinaꞌhuasoꞌ yaꞌhuërin.

¹⁸ Napoaton nanamën aꞌchinpatëra, co mantaꞌ ina marëꞌ maꞌpatërahuëꞌ. Cosharoꞌ, maꞌsha, inapita quëtinacosoꞌ yaꞌhuëpirinhuëꞌ, co mantaꞌ maꞌpatërahuëꞌ. Topinan aꞌchinahuë. Ina marëꞌ nóya cancantërahuë.

¹⁹ Co insontaꞌ pahuërërincohuëꞌ niꞌton, co insontaꞌ camaincosoꞌ yaꞌhuërinhuëꞌ. Nipirinhuëꞌ, caora nohuanto, yaꞌipi piyapiꞌsaꞌ catahuarahuë. Naꞌcon naꞌcon piyapiꞌsari Quisocristo imacaiso marëꞌ aꞌchinarahuë.

²⁰ Cotioroꞌsaꞌ aꞌchintohuatëra, inapita pochin ninahuë inapitantaꞌ imacaiso marëꞌ. Co Moisësë pënëntërinsoꞌ natëcaꞌhuasoꞌ yaꞌhuëtopirincohuëꞌ, cotioroꞌsa pochin ninahuë natainacoso marëꞌ. Inapitantaꞌ Quisocristo natëcaisoꞌ nohuantërahuë.

²¹ Nisha piyapiꞌsasoꞌ co Moisësë pënëntërinsoꞌ natëpihuëꞌ. Napoaton inapita aꞌchintohuatëra, co yaꞌipi Moisësë pënëntërinsoꞌ natërahuëꞌ. Co ina natëpirahuëꞌ, Quisocristo natëto, noya ninahuë. Nisha piyapiꞌsarintaꞌ imacaiso marëꞌ Quisocristo nanamënáchin aꞌchintërahuë.

²² Aꞌnaquëontaꞌ imaponahuëꞌ, co yaꞌipi cancanëna quëran natëyátërapihuëꞌ. Inapitantaꞌ co nocanahuëꞌ. “Casoꞌ noya noya imarahuë,” co itërahuëꞌ. Inapita pochin ninahuë natanatonaco, noya noya Quisocristo imacaiso marëꞌ. Yaꞌipi piyapiꞌsaꞌ nosoroato, sanoanan quëran aꞌchintarahuë caraya tërantaꞌ chaꞌëcaiso marëꞌ.

²³ Ina pochin Yosë nanamën aꞌchinpato, naꞌcon naꞌcon piyapiꞌsari ina nohuitapi antaꞌ. Ina marëꞌ cantaꞌ noya cancantërahuë.

²⁴ Quëmapiꞌsaꞌ nicanacaiso marëꞌ taꞌahuachinara, aꞌnaíchin canatërin. Nani ina nitotëramaꞌ. Aꞌnapitasoꞌ co chiníquën taꞌatonahuëꞌ, co canatopihuëꞌ. Canpitantaꞌ chiníquën taꞌapiso pochin cancantatomaꞌ, naꞌcon yonquicoꞌ noya noya cancantamaso marëꞌ.

²⁵ Quëmapiꞌsaꞌ yanicanahuachinara, nani tahuëri taꞌarápi noya noya noꞌquicaiso marëꞌ. Taꞌacaisoráchin yonquipi. Canatohuachinara, yancotëꞌ huëron quëran nipisoꞌ quëtopirinahuëꞌ, inasoꞌ aꞌnaroáchin ahuirin. Canpoaso nipirinhuëꞌ noya nipatëhuaꞌ, Yosëꞌpaꞌ acanarinpoaꞌ. Inatohuaꞌ co mantaꞌ mocasarinhuëꞌ.

²⁶ Casoꞌ co nisha nisha yonquirahuëꞌ. Noya niꞌtatëꞌ taꞌarëso pochin Yosë natëcaꞌhuasoráchin yonquirahuë. Co topinan yaꞌhuërahuëꞌ. Co papinanquë ahuëtërëso pochin ninahuëꞌ. Yosë nohuantërinsoráchin ninahuë.

²⁷ Co noyahuëꞌ yonquihuatëra, aꞌnaroáchin naniantërahuë. Co nohuantërahuëꞌ piꞌpian tërantaꞌ oshahuanacaꞌhuasoꞌ. Nohuantasoꞌ Yosë marëꞌ sacatarahuë. Aꞌnapita naꞌcon pënënpirahuëꞌ, co casoꞌ noya nipatohuëꞌ, co Yosë noya niꞌsarincohuëꞌ, co acanaarincohuëꞌ, tënahuë.