1 Corintios 8 - Chayahuita (Shahui)

Cosharoꞌ mamanshi marëꞌ acopisoꞌ

¹ Aꞌnaquën maꞌsha tëparahuatonaꞌ, nosha acopi mamanshi chinotacaiso marëꞌ. “¿Noya ipora ina nosha paꞌanatëꞌ capacasoꞌ ti?” itëramaco niꞌton, shaꞌhuichinquëmaꞌ. Tëhuënchachin iyaroꞌsaꞌ co mamanshisoꞌ nanpirinhuëꞌ, nitotërëhuaꞌ. Nani naꞌcon nitotarihuarahuëꞌ, co aꞌnapita nosorohuatëhuahuëꞌ, topinan quëran nitotatëhuaꞌ, ninocanarihuaꞌ. Nipirinhuëꞌ, piyapi nosorohuatëhuaꞌ, catahuarëhuaꞌ noya noya Yosë imacaiso marëꞌ.

² Aꞌnaquënsoꞌ: “Yaꞌipi nitotërai” topirinahuëꞌ, naꞌcon pahuantarin noꞌtëquën yonquicaisoꞌ.

³ Napoaponahuëꞌ, Yosë nosorohuatëhuaꞌ, ina pochin cancantarihuaꞌ. Ina quëran Yosë nohuitatonpoaꞌ, noya niꞌsarinpoaꞌ.

⁴ Nosha mamanshi chinotacaiso marëꞌ acopisoꞌ aꞌchinchinquëmaꞌ nitotocoꞌ. Co mamanshi nanpirinhuëꞌ. Co ina chinotacasoꞌ yaꞌhuërinhuëꞌ. Tata Yosëíchin chinotacasoꞌ yaꞌhuërin, tënëhuaꞌ.

⁵ Aꞌnaquënso nipirinhuëꞌ nisha nisha maꞌsha isoroꞌpaquë yaꞌhuërinsopita moshapi. Inápaquë yaꞌhuërinsopitantaꞌ moshapi. Nisha nisha yaꞌhuërin, “yosë” taꞌtonaꞌ, moshapi. “Inapita natëcasoꞌ yaꞌhuërin,” topi.

⁶ Canpoaso nipirinhuëꞌ Tata Yosëíchin chinotërëhuaꞌ. Yaꞌipi maꞌsha ninin. Ina marëꞌ acorinpoaꞌ. Quisocristoíchin huaꞌanëntërinpoaꞌ. Ina nininpoaꞌ. Nani nichaꞌërinpoaꞌ ina nohuitatëhuaꞌ nanpicaso marëꞌ.

⁷ Napoaponahuëꞌ, aꞌnaquënsoꞌ co ina nitochátërapihuëꞌ. Iráca mamanshi chinotopirinahuëꞌ, Quisocristo imapachinara, mamanshi aꞌpopi. Aꞌpopirinahuëꞌ, ipora huantaꞌ co cancanëna quëran natëyátërapihuëꞌ. “Nosha mamanshi marëꞌ tëpapisoꞌ caꞌpatëhuaꞌ, mamanshi chachin chinotarëhuaꞌ,” taponaraihuëꞌ caꞌpachinaꞌ: “Oshahuanëhuaꞌ,” taꞌtonaꞌ, co huachi noyápiachin cancantopihuëꞌ.

⁸ Tëhuënchachin caꞌpatëhuaꞌ, co ina marëꞌ oshahuanëhuahuëꞌ. Aꞌpohuatëhuaꞌ, co ina marëꞌ Yosë noya noya niꞌninpoahuëꞌ. Co inasoꞌ cosharoꞌ yonquirinhuëꞌ. Cancanënpoa quëran noya yonquicasoꞌ naꞌcon naꞌcon nohuantërin.

⁹ Nipirinhuëꞌ, yaꞌipi nosha caꞌpatamaꞌ, niꞌcona aꞌnapita anishacancantotamaꞌ. Aꞌnaquën imasapirinahuëꞌ, co Quisocristoíchin natëyátërapihuëꞌ. Nisha nisha tëꞌhuatapi.

¹⁰ “Yaꞌipi nosha noya capacasoꞌ,” taꞌtomaꞌ, noya caꞌnamaꞌ. Aꞌna tahuëriso nipirinhuëꞌ mamanshi moshapisoꞌ pëiquë paꞌpatamaꞌ, inaquë coshataramaꞌ. Inaquë coshatasëmaꞌ, tëꞌhuatonaꞌpi nicatënquëmaꞌ: “Mamanshi marëꞌ acopisoꞌ noya capacasoꞌ,” tapon nimara. Ina quëran: “Cantaꞌ nipachin caꞌi,” taꞌton, ina nosha capon. Ina caꞌpachin, “Oshahuanahuë caso huachi,” taꞌton, co noyahuëꞌ cancantarin.

¹¹ Canpitasoꞌ nitotatomaꞌ, noya capomarahuëꞌ, tëꞌhuatonaꞌpi atapicancanaramaꞌ. Ina marëntaꞌ Quisocristo chiminin.

¹² Tëꞌhuatonaꞌpintaꞌ imaponahuëꞌ, co yaꞌipi cancanën quëran imarinhuëꞌ niꞌton, nisha nisha tëꞌhuatarin. Nonanatënquëmaꞌ, caꞌpachin, co noyahuëꞌ cancantapon. “Maꞌcha onpoꞌiya. Co noyahuëꞌ ninahuë,” tapon. Ina aoshahuanpatamaꞌ, Quisocristontaꞌ co noyahuëꞌ niꞌsarinquëmaꞌ. Ina marëꞌ canpitantaꞌ oshahuanaramaꞌ.

¹³ Yaꞌipi cosharoꞌ noya capacaso nipirinhuëꞌ, aꞌna tahuëri nosha capasoco iyahuë nicatonco nishacancantohuachin, co huachi ina nosha caꞌsarahuëꞌ. Iyahuë nosoroato, co piꞌpian tërantaꞌ nohuantërahuëꞌ anishacancantaꞌhuasoꞌ.