1 Corintios 6 - Chayahuita (Shahui)

Imarëhuasopita capini nanan anoyatacasoꞌ yaꞌhuërinsoꞌ

¹ Canpita capini nanan yaꞌhuëhuachin, ama ninoꞌhuicosohuëꞌ. Maꞌsha nionpotohuatamara, ¿onpoatomataꞌ coisëquë niquëparamaꞌ? Co inasoꞌ imarinhuëꞌ. Quisocristo imaramaꞌ niꞌton, niyontonpatamaꞌ, noꞌtëquën pënëncoꞌ nanan anoyachinaꞌ.

² Aꞌna tahuëri Quisocristo oꞌmahuachin, imarëhuasopita acoarinpoaꞌ inarëꞌquënpoaꞌ huaꞌanëntacaso marëꞌ. Coisë pochin nicatëhuaꞌ, yaꞌipi piyapiꞌsaꞌ noꞌtëquën shaꞌhuitarihuaꞌ. Nani ina nitotëramaꞌ. Ina nitotatomaꞌ, ipora nanan yaꞌhuëhuachin, anoyatacaso yaꞌhuërin.

³ Ayaroꞌ tahuëri anquëniroꞌsantaꞌ huaꞌanëntatëhuaꞌ, coisë pochin noꞌtëquën shaꞌhuitarihuaꞌ. Nani inantaꞌ nitotëramaꞌ. ¡Nanan isëquë co onpopinchin sacaihuëꞌ anoyatacasoꞌ!

⁴ Napoaton nanan yaꞌhuëhuachina, co coisëquë nishaꞌhuirapicamaso yaꞌhuërinhuëꞌ. Co inasoꞌ Yosë imanaꞌpihuëꞌ niꞌton, co canpoa pochin noꞌtëquën yonquirinhuëꞌ.

⁵ Tapanacamaso marëꞌ pënënaranquëmaꞌ. ¿Co aꞌnaya tërantaꞌ niyontonamaquë noya yonquinaꞌpi yaꞌhuërinhuëꞌ ti? ¡Yaꞌhuërin mini, tënahuë! Nanan yaꞌhuëhuachin, inari anoyachin.

⁶ Canpitaso nipirinhuëꞌ imaramaso capini nipinotomaꞌ, nishaꞌhuirapiramaꞌ. Naporahuaton, coisësoꞌ co Yosë natëpirinhuëꞌ, inaquë niquëpahuatamara, co noyahuëꞌ ninamaꞌ.

⁷ Nishaꞌhuirapihuatamara, co imapisopitahuë pochin niconamaꞌ. Maꞌsha onpotohuachinënquëmaꞌ, ¿onpoatontaꞌ co ahuantëramahuëꞌ? Maꞌshanëmaꞌ matohuachinënquëmaꞌ, tananpitëramaꞌ naporini, noya noya niitomahuëꞌ.

⁸ Canpitaso nipirinhuëꞌ co noyahuëꞌ cancantatomaꞌ, imaramasopita capini niihuaramaꞌ. Naporahuaton, ninonpinapitomaꞌ, niiꞌhuërëtëramaꞌ.

⁹ Co noyahuëꞌ nipisopita co Yosë huaꞌanëntërinquë yaꞌcoanpihuëꞌ. ¡Nani ina nitotëramaꞌ ipora! Ama ninonpintocosohuëꞌ. Aꞌnaquën co Yosë natëtonahuëꞌ, monshihuanapi. Mamanshi moshapi. Saꞌinaꞌ yaꞌhuëtopirinahuëꞌ, aꞌna sanapi sëꞌhuapi. Quëmapi capini nisëꞌhuapi. Taparosachin yonquipi. Inapita pochin nipisopitasoꞌ, co Yosëꞌpaꞌ paꞌsapihuëꞌ.

¹⁰ Aꞌnaquëontaꞌ maꞌsha ihuatopi, apirapi, noꞌpipi, pinotopi. Aꞌnaquën aꞌnapita ahuëatonaꞌ, maꞌshanënaꞌ matopi. Yaꞌipi co noyahuëꞌ nipisopita co Yosë huaꞌanëntërinquë yaꞌcoanpihuëꞌ.

¹¹ Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

Maꞌmarësona nonënpoaꞌ Yosë acotërinpoasoꞌ

¹² “Maꞌsona tërantaꞌ yanipatëhuaꞌ, noya nicacasoꞌ,” topi aꞌnaquën. Napoaponahuëꞌ, co yaꞌipi ninëhuasopita catahuarinpoahuëꞌ noya cancantacaso marëꞌ. Napoaton maꞌsona tërantaꞌ anishacancantohuachinco, co nisarahuëꞌ. Anoꞌquihuachinco.

¹³ Aꞌnaquën napopi: “Cosharoꞌ yaꞌhuërin anpopitë marëꞌ. Anpopitëntaꞌ yaꞌhuërin cosharo marëꞌ,” topi. Inaso nipirinhuëꞌ, aꞌna tahuëri Yosë nohuanton, cosharoꞌ, anpopitëꞌ, inapita taꞌhuantarin. Niꞌton, co coshatërëhuaso marëꞌ oshahuanëhuahuëꞌ. Napoaponahuëꞌ, monshihuanacasoꞌ paꞌpi co noyahuëꞌ. Co Yosë nohuantërinhuëꞌ monshihuanacasoꞌ. Co ina marëꞌ nonënpoaꞌ acotërinpoahuëꞌ. Sinioro natëcaso marëꞌ acotërinpoaꞌ. Nonënpoantaꞌ nichaꞌërin.

¹⁴ Yosë nohuanton, Sinioro Quisoso nanpiantarin. Inari chachin chiníquën nanantaton, nonënpoaꞌ ananpitaantarinpoaꞌ.

¹⁵ Quisocristo imapatëhuaꞌ, ina nonën pochin ninëhuaꞌ. Nani ina nitotëramaꞌ. Ina nitotapomarahuëꞌ, ¿noya ipora monshihuanaꞌpi monshitacasoꞌ to? ¡Co onporontaꞌ!

¹⁶ Yosë quiricanënquë naporin: “Quëmapiri sanapi mapachina, catoꞌ piyapi niponahuëꞌ, aꞌnaíchin pochin Yosëri niꞌnin,” tënin. Canpitasoꞌ monshihuanaꞌpi ichihuëꞌëpatamaꞌ, ina pochin cancantaramaꞌ. Inapohuatamaꞌ, co Quisocristo imamiataramahuëꞌ.

¹⁷ Quisocristoíchin imapatëhuaꞌ, ina pochin cancantarëhuaꞌ.

¹⁸ Napoaton ama piꞌpisha tërantaꞌ monshihuancosohuëꞌ. Ihuatacasoꞌ, noꞌpicasoꞌ, inapita nicacasoꞌ co noyahuëꞌ, nipirinhuëꞌ, co atapicancaninpoahuëꞌ. Monshihuanpatamaꞌ, nitapicancanaramaꞌ. Nonëmantaꞌ tapiaramaꞌ.

¹⁹ Quisocristo imapatëhuaꞌ, Ispirito Santo yaꞌcoancantërinpoaꞌ. Nani ina nitotëramaꞌ. Yosë aꞌpatimarinpoaꞌ niꞌton, cancanënpoaquë chachin yaꞌhuërarin. Napoaton co huachi canpoara nohuantërëhuasopita nicacasoꞌ yaꞌhuërinhuëꞌ. Yosë chachin huaꞌanëntërinpoaꞌ.

²⁰ Quisocristo chiníquën parisitaton, chiminin nichaꞌëinpoaso marëꞌ. Nichaꞌërinpoaꞌ niꞌton, yaꞌipi nonënpoa quëran huarëꞌ huaꞌanëntinpoasoꞌ yaꞌhuërin. Napoaton noyasáchin nicoꞌ aꞌnapitantaꞌ nicatënënquëmaꞌ Yosë chinochinaꞌ.