1 Corintios 3 - Chayahuita (Shahui)

Inpriatoroꞌsa pochin nipisoꞌ

¹ Yaꞌipi Yosë nanamën iyaroꞌsaꞌ yaaꞌchintopiranquëmahuëꞌ, co ipora nanitërahuëꞌ. Ispirito Santo cancanëma quëran huarëꞌ natëramaꞌ naporini, naꞌcon aꞌchinchitënquëmahuëꞌ. Co noyahuëꞌ yonquiramasopita co nanianchátëraramahuëꞌ. Quisocristo imapiramahuëꞌ, huaꞌhuishin pochin cancantëramaꞌ.

² Niꞌcoꞌ. Huaꞌhuishin shoꞌshoíchin nanpitërin. Co coshachatërarinhuëꞌ. Inapochachin canpitasoꞌ ninamaꞌ. Yaꞌnan aꞌchintaponquëmaꞌ, piꞌpian aꞌchintëranquëmaꞌ. Aquëtëꞌ yaaꞌchintopiranquëmahuëꞌ, co nanichátëraramahuëꞌ noꞌtëquën yonquicamasoꞌ. Iporahuantaꞌ co nanitëramahuëꞌ.

³ Co noyahuëꞌ yonquiramasopita co nanianchátëraramahuëꞌ. Canpita capini ninoyapatomaꞌ, ninoꞌhuiramaꞌ. ¿Onpoatontaꞌ canpitaora nohuantëramasoachin yonquiconamaꞌ? Nisha nisha yonquiatomaꞌ, co imapisopitahuë pochin cancantëramaꞌ.

⁴ “Paono imarai quiyasoꞌ,” tënamaꞌ aꞌnaquëmaꞌ. “Quiyasoꞌ Aporosë imarai,” tënamaꞌ aꞌnaquëmantaꞌ. Ina pochin nonatomaꞌ, co imapisopitahuë pochin yonquiramaꞌ.

⁵ Co ca imamacosoꞌ yaꞌhuërinhuëꞌ. Aporosëntaꞌ co imacaisoꞌ yaꞌhuërinhuëꞌ. Quiyantaꞌ topinan piyapicoi nipiraihuëꞌ, Yosë shaꞌhuitërincoi niꞌton, aꞌchintërainquëmaꞌ. Natanpatamaꞌ, Yosë imasaramaꞌ.

⁶ Niꞌcoꞌ. Iminpatëra, aꞌnasoꞌ shaꞌtërin. Ina quëran aꞌnantaꞌ pacarapiton, iꞌshaquë oporapitërin noya papotacaso marëꞌ. Nipirinhuëꞌ, Yosëriíchin apapotërin. Inapochachin carinquëmaꞌton aꞌchintëranquëmaꞌ. Ina quëran Aporosëntaꞌ aꞌchintantarinquëmaꞌ. Aꞌchintopirainquëmahuëꞌ, Yosësoꞌ anoyacancantërinquëmaꞌ.

⁷ Napoaton co ca imamacosoꞌ yaꞌhuërinhuëꞌ. Aporosëntaꞌ co imacaisoꞌ yaꞌhuërinhuëꞌ. Yosë anoyacancantërinquëmaꞌ niꞌton, inasáchin yonquicamasoꞌ yaꞌhuërin.

⁸ Shaꞌtërëso pochin carinquëmaꞌton aꞌchintëranquëmaꞌ. Aꞌnari iꞌshaquë oporapitërinso pochin Aporosëntaꞌ aꞌchintantarinquëmaꞌ. Catocoi chachin Yosë inpriatonën pochin ninai. Inpriatoroꞌsaꞌ sacatohuachinara, huaꞌanëni pahuërërin. Onpopinsona sacatohuachinara, noꞌtëquën pahuërërin. Inapochachin quiyasoꞌ Yosë marëꞌ sacatarai niꞌton, ina acanarincoi.

⁹ Quiyasoꞌ Yosë aꞌparincoi ina marëꞌ sacataꞌhuaisoꞌ. Canpitaso nipirinhuëꞌ Yosë shaꞌtërinso pochin ninamaꞌ. Naporahuaton, Quisocristo imaramaꞌ niꞌton, Yosë pëinën pochin ninamaꞌ.

¹⁰ Natëricho quëran yapëihuatëra, acopoꞌ ihuatahuatëꞌ, siminto acorëꞌ. Inaꞌton acorëso pochin carinquëmaꞌton aꞌchintëranquëmaꞌ. Yosë catahuarinco noꞌtëquën aꞌchinaꞌhuasoꞌ. Ina quëran aꞌnapitantaꞌ aꞌchintantarinënquëmaꞌ. Napoaponahuëꞌ, aꞌnaya aꞌnaya noya yonquiaton pëirinso pochin aꞌnapita noya aꞌchintacasoꞌ yaꞌhuërin.

¹¹ Quisocristosoꞌ ina siminto pochin ninin. Yosë nohuanton, yaꞌhuërin. Co aꞌna yaꞌhuërinhuëꞌ. Co ina imapatëhuahuëꞌ, co onporontaꞌ Yosë nohuitarihuahuëꞌ.

¹² Siminto nani acohuachina, nisha nisha quëran pëipi. Aꞌnaquën oro, prata, inapita quëran pëipi. Nisha nisha naꞌpiroꞌsaꞌ paꞌton nininsopita quëran pëipi. Aꞌnaquënso nipirinhuëꞌ nara, panpë, piquira, inapita quëran pëipi.

¹³ Tachiton nininso quëran pëipatëra, noya ninin, co huiquitërinhuëꞌ. Nipirinhuëꞌ, nara, panpë, piquira inapita quëran pëipatëra, aꞌnaroáchin huiquitërin. Inapochachin ayaroꞌ tahuëri Yosë yaꞌipinpoaꞌ ninëhuasopita pën quëran tëniarin. Naporoꞌ yaꞌipi piyapiꞌsaꞌ nitotapi.

¹⁴ Noya nipatëhuaꞌ, tachiton quëran pëirinso pochin nisarëhuaꞌ. Inasoꞌ co huiquitërinhuëꞌ niꞌton, Yosë noya niꞌsarinpoaꞌ. Aꞌnapita catahuarëhuaꞌ noya imacaiso marëꞌ. Napoaton inápaquë acanaarinpoaꞌ.

¹⁵ Aꞌnaquënso nipirinhuëꞌ Yosë imaponaraihuëꞌ, co yaꞌipi cancanëna quëran imapihuëꞌ. Co aꞌnapita catahuapihuëꞌ noya imacaiso marëꞌ. Napoaton pëiꞌ huiquitërinso pochin nisapi. Yosëꞌpaꞌ paponaraihuëꞌ, co ina marëꞌ sacatopihuëꞌ niꞌton, inápaquë co mantaꞌ canaapihuëꞌ.

¹⁶ Yosë imapatëhuaꞌ, ina pëinën pochin ninëhuaꞌ. Ispirito Santo yaꞌcoancantohuachinpoaꞌ, cancanënpoaquë yaꞌhuërarin. ¿Co ina nitotëramahuëꞌ ti?

¹⁷ Canpitasoꞌ Yosë pëinën pochin ninamaꞌ niꞌton, aꞌna piyapi atapicancanpachinquëmaꞌ, Yosëri chiníquën anaꞌintarin. Yosë pëinënquësoꞌ noyasáchin nicacasoꞌ yaꞌhuërin.

¹⁸ Ama inquëma tërantaꞌ isoroꞌparáchin yonquiatomaꞌ, ninonpintocosohuëꞌ. “Caora noya noya nitotërahuë,” co taꞌcasoꞌ yaꞌhuërinhuëꞌ. Ama ina pochin yonquicosohuëꞌ. “Caora co noꞌtëquën yonquirahuëꞌ. Catahuaco Sinioro noya yonquiꞌi,” topatamaꞌ, Yosë catahuarinquëmaꞌ noya noya yonquicasoꞌ.

¹⁹ Co imapisopitasohuëꞌ nani maꞌsha nitotaponaraihuëꞌ: “Co noꞌtëquën yonquipihuëꞌ,” tënin Yosë. Quiricanën quëran anitotërinpoaꞌ. “Naꞌcon nitotatonaꞌ, piyapiꞌsaꞌ nonpintopirinahuëꞌ, co nanitopihuëꞌ Yosësoꞌ nonpintacaisoꞌ. Inari naꞌcon naꞌcon nitotaton, minsëarin,” tënin.

²⁰ Yosësoꞌ yaꞌipi nitotërin. “Piyapiꞌsaꞌ naꞌcon yonquipirinahuëꞌ, napoonin yonquipi,” tënin antaꞌ. Quiricanën quëran naporin.

²¹ Napoaton ama piyapiꞌsaꞌ paꞌyatocosohuëꞌ. “Pasoꞌ quëmapi noya noya aꞌchintërincoi,” ama tocosohuëꞌ. Yosëíchin paꞌyatacasoꞌ yaꞌhuërin. Inari yaꞌipi acorin canpita marëꞌ.

²² Ina nohuanton, carinquëmaꞌ aꞌchintëranquëmaꞌ. Aporosë, Pitro, inapitantaꞌ Yosëri aꞌparin aꞌchintinquëmaso marëꞌ. Nani maꞌsha isoroꞌpaquë quëtërinpoaꞌ noya yaꞌhuëcaso marëꞌ. Anoyacancantërinpoaꞌ Yosë nohuitatëhuaꞌ noya noya nanpicaso marëꞌ. Chiminpatëhuaꞌ, yaꞌhuërinꞌpaꞌ noya noya yaꞌhuëcontarihuaꞌ. Ipora tahuëriꞌsaꞌ noya catahuarinpoaꞌ. Oꞌmantacasoꞌ tahuërintaꞌ co naniantarinpoahuëꞌ. Noyasáchin yonquirinpoaꞌ.

²³ Quisocristo anoyacancantërinpoaꞌ niꞌton, inasáchin imacasoꞌ yaꞌhuërin. Inasoꞌ huaꞌanëntërinpoaꞌ. Tata Yosëri chachin aꞌpaimarin.