1 Corintios 2 - Chayahuita (Shahui)

Quisocristo nanamën shaꞌhuirinsoꞌ

¹ Canpitataquë paꞌpatëra, Yosë nanamën aꞌchintëranquëmaꞌ. Co iyaroꞌsaꞌ míso nonaꞌpi pochin nontëranquëmahuëꞌ. Co naꞌcon naꞌcon nitotërinso pochin aꞌchintëranquëmahuëꞌ.

² Coꞌhuara paꞌshatërapohuëꞌ, yonquirahuë. “Quisocristo naporinsoáchin aꞌchinarahuë. Corosëquë oshanënpoa marëꞌ chimininsoꞌ aꞌchinchi,” taꞌto, inaíchin shaꞌhuitëranquëmaꞌ. Inasáchin imacamaso marëꞌ.

³ Canpitataquë yaꞌhuasoco, co chiníquën cancantërahuëꞌ. “Co caora nanitërahuëꞌ noya aꞌchinaꞌhuasoꞌ,” taꞌto, naporahuëꞌ.

⁴ Co naꞌcon nitotonaꞌpi pochin nontëranquëmahuëꞌ. Ispirito Santo chachin catahuarinco nanamën nóya aꞌchinaꞌhuaso marëꞌ. Inasoꞌ yaꞌipi nanitaparin. Natanpatamaꞌ, “Yosë nanamën chachin aꞌchintërinpoaꞌ,” taꞌtomaꞌ, natëramaꞌ.

⁵ Napoaton co piyapi yonquirinsoꞌ imaramahuëꞌ. “Yosëíchin yaꞌipi nanitaparin,” taꞌtomaꞌ, natëramaꞌ.

Yosë anitotërinpoasoꞌ

⁶ Napoaponahuëꞌ, chinoton pochin cancantopisopita aꞌchintohuatoi, yaꞌipi Yosë yonquirinpoasoꞌ aꞌchintërai. Co piyapiꞌsaꞌ yonquipisoꞌ aꞌchinaihuëꞌ. Co huaꞌanoꞌsaꞌ yonquipiso tëranta aꞌchinaihuëꞌ. Inapitasoꞌ inahuara yonquipisoáchin yonquiatonaꞌ, co Yosë pochin yonquipihuëꞌ niꞌton, taꞌhuantapi.

⁷ Co inapita pochin aꞌchinaihuëꞌ. Yosë yonquirinso chachin aꞌchinai. Iráca coꞌhuara isoroꞌpaꞌ yaꞌhuëyátërasohuëꞌ, Yosë ninotonpoaꞌ, yonquirinpoaꞌ anoyacancantinpoaso marëꞌ. Anoyacancantohuachinpoaꞌ, inarëꞌquënpoaꞌ yaꞌhuëmiatarihuaꞌ. Iráca co insontaꞌ nitotopirinahuëꞌ, iporaso huachi Yosë anitotërinpoaꞌ niꞌton, aꞌchintërainquëmaꞌ.

⁸ Huaꞌanoꞌsasoꞌ co nitotopihuëꞌ. Nitotopi naporini, co Quisocristo tëpaꞌitonahuëꞌ. Inasoꞌ Yosë chachin. Noya noya nipirinhuëꞌ, tëpapi.

⁹ Napoaponahuëꞌ, Yosë quiricanënquë naporin: “Yosë nosorohuatëhuaꞌ, noya noya catahuarinpoaꞌ. Noya nininsopita nani tapatërinpoaꞌ. Co inso tërantaꞌ ina pochin niꞌchininhuëꞌ. Co incari tërantaꞌ nataninhuëꞌ. Yosë noya yonquirinpoasoꞌ, co insontaꞌ inaora nitotërinhuëꞌ,” tënin quiricanënquë.

¹⁰ Imarëhuasopitaso nipirinhuëꞌ, nitotërëhuaꞌ. Yosë nohuanton, Ispirito Santo anitotërinpoaꞌ. Yaꞌipi Yosë yonquirinsopita Ispirito Santo nitotërin.

¹¹ Co insontaꞌ piyapi yonquirinsoꞌ nitotërinhuëꞌ. Ispiritonën tëhuënchinso nitotërin. Inapochachin Ispirito Santontaꞌ, Yosë ispiritonën niꞌton, yonquirinso chachin nitotërin.

¹² Imarëhuasopitasoꞌ co piyapi yonquipisoꞌ imarëhuahuëꞌ. Yosë nohuanton, Ispirito Santo yaꞌcoancantërinpoaꞌ. Aꞌchintinpoaso marëꞌ aꞌpatimarinpoaꞌ. Yaꞌcoancantohuachinpoara, Yosë yonquirinpoasoꞌ anitotërinpoaꞌ.

¹³ Quiyantaꞌ ina nitotatoi, aꞌnapita aꞌchintarai. Co quiyaora yonquinëhuëi quëran aꞌchinaihuëꞌ. Ispirito Santo ayonquirincoi noya aꞌchinaꞌhuaiso marëꞌ. Chinoton pochin cancantopisopita aꞌchintohuatoira, maꞌsona tapon naporinsopita aꞌchintarai.

¹⁴ Aꞌnaquënso nipirinhuëꞌ piyapi yonquirinsoráchin nitotatonaꞌ, co nohuantopihuëꞌ Yosë nanamën natanacaisoꞌ niꞌton, tëhuaconpi. Ispirito Santoráchin catahuarinpoaꞌ natëtacasoꞌ. Napoaton co imarinsopitasohuëꞌ natanaponaraihuëꞌ, co nanitopihuëꞌ noꞌtëquën yonquicaisoꞌ.

¹⁵ Ispirito Santo catahuahuachinpoaꞌ, noꞌtëquën yonquiarihuaꞌ. Aꞌnapitasoꞌ co canpoa pochin yonquipihuëꞌ. Co nitotatonaraihuëꞌ: “¿Onpoatomataꞌ ina pochin yonquiramaꞌ?” itërinënpoaꞌ.

¹⁶ Quiricanënquë naporin: “¡Co insontaꞌ Yosë yonquirinsoꞌ nitotërinhuëꞌ! ¡Co incari tërantaꞌ nanitërinhuëꞌ ina aꞌchintacasoꞌ!” tënin. Canpoaso nipirinhuëꞌ Quisocristo imapatëhuaꞌ, yonquirinso chachin ayonquiarinpoa huachi.