1 Corintios 16 - Chayahuita (Shahui)

Pahuantërinsopita catahuacasoꞌ yaꞌhuërinsoꞌ

¹ Aꞌnantaꞌ shaꞌhuichinquëmaꞌ, yonquicoꞌ. Aꞌnaquën imapisopita maꞌsha pahuantarin niꞌton, parisitapi. Inapita catahuacaso marëꞌ coriqui yaaꞌparamaꞌ. Carasiaquë imapisopitantaꞌ coriqui aꞌparapi. Inapita nani shaꞌhuitërahuë coriqui yontonacaiso marëꞌ. Inapochachin canpitantaꞌ shaꞌhuitaranquëmaꞌ.

² Nani Tomio tahuëri niyontonpatamaꞌ, coriqui acocoꞌ. Nanitëramasoꞌ acocoꞌ. Naꞌcon canahuatamaꞌ, naꞌcon quëtocoꞌ. Piꞌpian canahuatamaꞌ, piꞌpian quëtocoꞌ. Nani simana inapohuatamaꞌ, nicaponquëmaꞌ paꞌpato, coriqui yontonamasoꞌ quënanconarahuë.

³ Aꞌnaquëmaꞌ noya niꞌnamasopita huayoncoꞌ coriqui quëpacaiso marëꞌ. Canconpato, quiricatarahuë huayonamasopita nohuitacaiso marëꞌ. Nani quiricatahuato, inarë chachin huayonamasopita aꞌpaarahuë. Quirosarinquë quëparapi pahuantërinsopita quëtacaiso marëꞌ.

⁴ Nanitohuato, cantaꞌ paꞌsamaraco. Paꞌpatosoꞌ, napopináchin paꞌsarai.

Nicapon yapaꞌninsoꞌ

⁵ Nicaponquëmaꞌ yapaꞌpirahuëꞌ, iporasoꞌ co nanitërahuëꞌ. Masitonia parti pacaꞌhuasoꞌ yaꞌhuërin. Nani niꞌtontahuato, yaꞌhuëramaquë paꞌsarahuë.

⁶ Canpitataquë huaꞌquimiáchin yacaparanquëmaꞌ. Oꞌnapi tahuëri inaquë naꞌhuëanatapo nimara. Ina quëran catahuaramaco aꞌna parti pacaꞌhuasoꞌ, topirahuëꞌ.

⁷ Co topinan niraponquëmahuëꞌ. Aꞌna tahuëri Yosë nohuantohuachin, huaꞌquiꞌ yacaparanquëmaꞌ.

⁸ Iporaso nipirinhuëꞌ Ipisoquë yaꞌhuato, aꞌchinárahuë. Pinticostisë tahuëri huarëꞌ isëquë yaꞌhuapo.

⁹ Yosë nohuanton, naꞌa piyapiꞌsaꞌ isëquë yaimapi niꞌton, aꞌchintárahuë. Aꞌnaquënsoꞌ noꞌhuipirinacohuëꞌ, pënëntárahuë. Naꞌamiachin imasapi.

¹⁰ Iya Timotio cantonpachinquëmaꞌ, noya nontocoꞌ noya cancanchin. Ca pochachin inantaꞌ Yosë nanamën aꞌchinarin.

¹¹ Huiꞌnapi nipirinhuëꞌ, ama nocancosohuëꞌ, noya natancoꞌ. Noya nontatomaꞌ, catahuacoꞌ isëquë huënantaꞌin. Ina ninarahuë. Aꞌnapita iyaroꞌsarëꞌ canquimapon, tënahuë.

¹² Iya Aporosëntaꞌ shaꞌhuitopirahuëꞌ. “Iyaroꞌsaꞌ paꞌpachinaꞌ, quëmantaꞌ paquëꞌ,” itopirahuëꞌ, co ipora nohuantërinhuëꞌ. Nanitohuachin, nicaponquëmaꞌ paꞌsarin.

Tiquiapon pochin pënëninsoꞌ

¹³ Ama huëꞌërëso pochin cancantatomarahuëꞌ, noya yonquicoꞌ. Yaꞌipi cancanëma quëran natëmiatocoꞌ. Maꞌsha onpoapomarahuëntaꞌ, chiníquën cancantocoꞌ. Niachinicancancoꞌ.

¹⁴ Maꞌsona tërantaꞌ nipatamaꞌ, noya ninosoroatomaꞌ, nicoꞌ.

¹⁵ Istipano saꞌinë chachin nohuitëramaꞌ. Iráca Acaya parti aꞌchinpatëra, inapitaꞌton Quisocristo imapi. Pëinënquë yaꞌhuëpisopitantaꞌ imasapi. Imatonaꞌ, naꞌcon catahuarinënquëmaꞌ. Yaꞌipi imapisopita catahuapi.

¹⁶ Inapitasoꞌ noya natëcoꞌ, tënahuë. Aꞌnapitantaꞌ chiníquën catahuarinquëmaꞌ noya imacamaso marëꞌ. Insosona ina pochin aꞌchintohuachinquëmaꞌ, noya niꞌcoꞌ.

¹⁷ Istipanasë, Portonato, Acaico, inapita isëquë cantihuachinacora, nóya cancantërahuë. Canpitasoꞌ aquë yaꞌhuatomaꞌ, co niꞌnamacohuëꞌ. Inapitasoꞌ yaꞌhuërama quëran huëcatonaꞌ, catahuarinaco.

¹⁸ Noya nontatonaco, achinicancaninaco. Canpitantaꞌ achinicancaninënquëmaꞌ, tënahuë. Cancoantahuachinaꞌ, noya nicatomaꞌ, natancoꞌ.

¹⁹ Yaꞌipi imapisopita Asia parti yaꞌhuëpisoꞌ yonquiatënquëmaꞌ, saludos aꞌpatarinënquëmaꞌ. Aquira saꞌinë chachin naꞌcon yonquiatënquëmaꞌ, saludos aꞌpatarinquëmaꞌ. Pëinënquë niyontonpisopitantaꞌ yonquirinënquëmaꞌ. Canpitantaꞌ Sinioro imaramaꞌ niꞌton, naꞌcon yonquirinënquëmaꞌ.

²⁰ Yaꞌipicoi saludos aꞌpatarainquëmaꞌ. Noya iyaroꞌsaꞌ yaꞌhuëcoꞌ, tënai. Noya ninosoroatomaꞌ, nisëꞌquëcoꞌ.

²¹ Ca Paonoco naꞌcon yonquiranquëmaꞌ. Caora imirahuë quëran isoíchin ninshitaranquëmaꞌ.

²² Insosona co Sinioro Quisocristo nosorohuachinhuëꞌ, Yosëri anaꞌinchin. ¡Aꞌnaroáchin Sinioro oꞌmantaquëꞌ! tënahuë.

²³ Inaora nohuanton, Sinioro Quisoso catahuainquëmaꞌ.

²⁴ Yaꞌipinquëmaꞌ Quisocristo imaramaꞌ niꞌton, nosororanquëmaꞌ. Nani ninshitëranquëma huachi. Paono