1 Corintios 15 - Chayahuita (Shahui)

Quisocristo nanpiantarinsoꞌ

¹ Yosë nanamën iyaroꞌsaꞌ, nani aꞌchintëranquëmaꞌ. “Noꞌtëquën nontërincoi,” taꞌtomaꞌ natëramaꞌ. Natëtomaꞌ, imamiataramaꞌ. Ina nanan chachin shaꞌhuitaantaranquëmaꞌ yonquicamaso marëꞌ.

² Ina natëmiatohuatamaꞌ, Yosë nichaꞌësarinquëmaꞌ. Aꞌnaquënso nipirinhuëꞌ: “Imarahuë,” taponaraihuëꞌ, topinan quëran napopi. Co cancanëna quëran natëpihuëꞌ. Inapitasoꞌ co nichaꞌësarinhuëꞌ.

³ Yaꞌnan aꞌchintaponquëmaꞌ, Yosë anitotërincoso chachin shaꞌhuitëranquëmaꞌ: “Oshanënpoaꞌ inquitinpoaso marëꞌ Quisocristo chiminin,” itëranquëmaꞌ. Iráca Yosë quiricanën quëran ninorinso chachin chiminin.

⁴ “Chiminpachina, paꞌpitopi huachi. Paꞌpitopirinahuëꞌ, cara tahuëri quëran nanpiantarin,” itëranquëmaꞌ. Quiricanënquë ninorinso chachin nanpiantarin:

⁵ Nanpiantarahuaton, Pitro yaꞌnotërin. Caꞌtanoꞌsanënpitantaꞌ yaꞌnotërin.

⁶ Ina quëran naꞌa imapisopita niyontonasoiꞌ, yaꞌnotaantarin. Aꞌnatërápo pasa naꞌcon niꞌpi. Ipora huantaꞌ nanpirapi. Caraíchin nani chiminpi.

⁷ Santiacontaꞌ yaꞌnotërin. Naporahuaton, yaꞌipi aꞌchinacaso marëꞌ acorinsopita yaꞌnotaantarin. Ina quëran inápaquë panantarin.

⁸ Piquëran huarëꞌ cantaꞌ niꞌnahuë. Anaꞌhuaya pochin nipirahuëꞌ, inápa quëran yaꞌnotimarinco. Naporo huarëꞌ imarahuë.

⁹ Imapisopita aparisitërahuë niꞌton, co acoincosoꞌ yaꞌhuërinhuëꞌ, topirahuëꞌ. Paꞌpi co noyahuëꞌ cancantopirahuëꞌ, anoyacancantatonco, acorinco paato aꞌchinaꞌhuaso marëꞌ.

¹⁰ Inaora nohuanton, Yosë catahuarinco. Co catahuarincohuëꞌ naporini, co mantaꞌ nanichitohuëꞌ. Catahuahuachincora, paꞌnahuë nanamën aꞌchinapo. Co topinan quëran catahuarincohuëꞌ. Casoꞌ naꞌcon naꞌcon Yosë marëꞌ sacatërahuë. Co carisoꞌ piyapiꞌsaꞌ anoyacancantërahuëꞌ. Yosë achinicancaninco aꞌchinaꞌhuaso marëꞌ. Ina catahuarinco niꞌton, aꞌchinpatëra naꞌa piyapiꞌsaꞌ imasapi.

¹¹ Yosë nanamën aꞌchintëranquëmaꞌ. Quisocristo caꞌtanoꞌsanënpitantaꞌ aꞌchinpi. Ina nanansáchin aꞌchintërainquëmaꞌ, natëramaꞌ.

Quisocristo imarëhuasopita nanpiantacasoꞌ yaꞌhuërinsoꞌ

¹² “Quisocristo nanpiantarin huachi,” itërainquëmaꞌ niꞌton, ¿onpoatomataꞌ aꞌnaquëmasoꞌ co noꞌtëquën yonquiramahuëꞌ? “Co Yosë ananpitaantarinpoahuëꞌ,” toconamaꞌ.

¹³ Co nanpiantacasoꞌ yaꞌhuërinhuëꞌ naporini, co Quisocristo tërantaꞌ nanpiantaitonhuëꞌ.

¹⁴ Co nanpiantarinhuëꞌ naporini, topinan quëran aꞌchinchitënquëmahuëꞌ. Canpitantaꞌ topinan quëran natëitomahuëꞌ.

¹⁵ Co nanpiantarinhuëꞌ naporini, nani nonpinchitënquëmahuëꞌ. Nipirinhuëꞌ, co iyaroꞌsaꞌ nonpin nanan aꞌchintërainquëmahuëꞌ. “Yosëri chachin ananpitaantarin,” itohuatëinquëmara, noꞌtëquën nontërainquëmaꞌ.

¹⁶ Co ananpitaantainpoasoꞌ yaꞌhuërinhuëꞌ naporini, co Quisocristo tërantaꞌ nanpiantaitonhuëꞌ.

¹⁷ Co nanpiantarinhuëꞌ naporini, topinan quëran imaitërihuahuëꞌ, co oshanënpoaꞌ inquichitonpoahuëꞌ.

¹⁸ Co nanpiantarinhuë naporini, aꞌnaquën imapisopita nani chiminpi niꞌton, parisitopiquë paꞌitonahuëꞌ.

¹⁹ Isoroꞌpa marëáchin Quisocristo imarëhuaꞌ naporini, paꞌpi nosorochitërihuahuëꞌ.

²⁰ Nipirinhuëꞌ, Quisocristo tëhuënchachin nani nanpiantarin. Yaꞌnan cayarinsoꞌ sënarëso pochin inaꞌton nanpiantaton, nanpimiatarin. Ina quëran canpoantaꞌ chiminarihuarahuëꞌ, nanpiantarihuaꞌ.

²¹ Atanꞌton co Yosë natëtonhuëꞌ, chiminin niꞌton, canpoantaꞌ chiminëhuaꞌ. Inapochachin Quisocristosoꞌ chiminaponahuëꞌ, nanpiantarin niꞌton, canpoantaꞌ nanpiantarihuaꞌ.

²² Atan pochin cancantatëhuaꞌ, yaꞌipinpoaꞌ chiminëhuaꞌ. Napoaponahuëꞌ, Quisocristo imapatëhuaꞌ, yaꞌipinpoaꞌ ananpitaantarinpoaꞌ.

²³ Co napopináchin nanpiantarihuahuëꞌ. Quisocristoꞌton nanpiantarin. Aꞌna tahuëri oꞌmantahuachin, imarëhuasopitantaꞌ ananpitaantarinpoaꞌ.

²⁴ Ina quëran yaꞌipiya naniarin. Iporasoꞌ nisha nisha huaꞌanoꞌsaꞌ, copirnoroꞌsaꞌ, inapita chiníquën nanantatonaꞌ, camairinënpoaꞌ. Sopairoꞌsantaꞌ yacamairinënpoaꞌ. Quisocristo oꞌmantahuachin, yaꞌipiya minsëarin. Nani minsëhuachin, Tata Yosëíchin yaꞌipiya huaꞌanëntarinpoaꞌ.

²⁵ Ina nohuanton, Quisocristo chiníquën nanantarin. Yaꞌipi huaꞌanëntarin. Aꞌna tahuëri yaꞌipi inimicoroꞌsaꞌ minsëarin.

²⁶ Ina quëran huachi chimiriontaꞌ ayatarin. Ananpitaantahuachinpoaꞌ, chimirin minsëarin huachi. Co huachi chiminacasoꞌ yaꞌhuaponhuëꞌ.

²⁷ “Yosë nohuanton, yaꞌipiya minsëarin huachi,” tënin Yosë quiricanënquë. Napoaton Quisocristo yaꞌipiya huaꞌanëntarin. Tata Yosëíchin co huaꞌanëntarinhuëꞌ. Inari Quisocristo chiníquën nanan quëtërin.

²⁸ Ina nohuanton, Quisocristo yaꞌipiya minsëarin. Nani minsëhuachina, inantaꞌ Yosë huiꞌnin niꞌton, paꞌpin natëmiatarin. Naporo quëran huarëꞌ Yosëáchin yaꞌipiya huaꞌanëntomiatarin.

²⁹ ¿Onpoatomataꞌ ipora huantaꞌ aꞌnaquëmaꞌ co natëyátëraramahuëꞌ? “Co Yosë ananpitaantarinpoahuëꞌ,” toconamaꞌ. Co noꞌtëquën yonquiramahuëꞌ. Aꞌnaquën chiminpisopita yonquiatonaꞌ, inapita yaꞌhuërënamën aporihuanpi. Co nanpiantacasoꞌ yaꞌhuërinhuëꞌ naporini, ¿maꞌmarëtaꞌ inapitantaꞌ napoꞌitonahuëꞌ?

³⁰ ¿Maꞌmarëtaꞌ quiyantaꞌ parisitaporaihuëꞌ, aꞌchinárai? Nani tahuëri yaahuërinacoi. Co nanpiantahuatëhuahuëꞌ, topinan quëran parisitërai.

³¹ Aꞌnaquën yatëparinaco. Nani tahuëri “Chiminapo nimara,” tënahuë. Tëhuënchachin noꞌtëquën nontëranquëmaꞌ. Quisocristo catahuarinco niꞌton, aꞌchintohuatënquëmara, noya imaramaꞌ. Ina marëꞌ nóya cancantërahuë.

³² Ipisoquë aꞌchinahuëso marëꞌ chiníquën noꞌhuirinaco. Niꞌni pochin cancantatonaꞌ, yatëparinaco. Ahuantaporahuëꞌ, ¿maꞌtaꞌ ina marëꞌ canarahuë? Isoroꞌpaquëráchin yaꞌhuërëhuaꞌ naporini, co mantaꞌ canaitërihuahuëꞌ. Co nanpiantacasoꞌ yaꞌhuërinhuëꞌ naporini, co Yosë yonquicasoꞌ yaꞌhuëꞌitonhuëꞌ. “¡Huëcoꞌ coshatahuaꞌ. Huëcoꞌ oꞌoahuaꞌ. Co huaꞌquiya quëranhuëꞌ chiminarihuaꞌ niꞌton, capa cancantahuaꞌ!” topiso pochin nichitërihuahuëꞌ.

³³ Ama ina pochin yonquicosohuëꞌ. Niꞌcona aꞌnapita anishacancantochinënquëmaꞌ. “Co noyahuëꞌ nipisopitarëꞌquëmaꞌ nipayahuatamaꞌ, canpitantaꞌ nitapicancanaramaꞌ. Inapita nonanpatamaꞌ, co huachi noyápiachin cancantaramahuëꞌ,” topi iráca. Noꞌtëquën napopi.

³⁴ Noꞌtëquën yonquiatomaꞌ, noyasáchin nicoꞌ. Ama huachi tëhuëcosohuëꞌ. Aꞌnaquëmaꞌ co Yosë nohuichátëraramahuëꞌ. Ina yonquiatomaꞌ, tapanacamasoꞌ yaꞌhuërin, tënahuë.

Nasha nonënpoaꞌ quëtarinpoasoꞌ

³⁵ Aꞌnaquëmaꞌ yanitotëramaꞌ. “Chiminpatëhuaꞌ, ¿onporahuatëhuataꞌ nanpiantarihuaꞌ? ¿Onpopintaꞌ nonënpoaꞌ yaꞌhuëtaponpoasoꞌ?” tënamaꞌ.

³⁶ ¡Co canpitasoꞌ nitoyonquiramahuëꞌ! Niꞌcochi. Yaꞌpirin shaꞌpatëra, yaꞌpirin chachinsoꞌ chimininso pochin ninin. Acopoꞌ yaꞌpiraꞌhuainso nipirinhuëꞌ, noya papotërin.

³⁷ Tricoraya yonquiaꞌahuaꞌ. Ina shaꞌpatamara, aipi noshinënsoꞌ co papotërinhuëꞌ. Yaꞌpiraꞌhuain papotohuachina, nisha yaꞌnorin huachi.

³⁸ Yosë nohuanton, maꞌsha papotërin. Nisha nisha yaꞌpirin shaꞌpatëra, nisha nisha papotërin. Co napopináchin papotërinhuëꞌ. Yosë nohuanton, naporin.

³⁹ Maꞌsharoꞌsantaꞌ nisha nisha noshatopi. Piyapinpoantaꞌ nonënpoaꞌ nisha. Ohuacaroꞌsaꞌ, inairaroꞌsaꞌ, samiroꞌsaꞌ, inapitantaꞌ nisha nisha noshatopi. Co napopináchin noshatërëhuahuëꞌ. Nisha nisha acorinpoaꞌ.

⁴⁰ Nisha nisha maꞌsha isoroꞌpaquë yaꞌhuërin. Inápaquë yaꞌhuëpisopitantaꞌ nisha nisha yaꞌnopi. Co napopináchin noyápiachin yaꞌnopihuëꞌ.

⁴¹ Piꞌisoꞌ huënaráchin huënaráchin aꞌpinin. Yoquintaꞌ nisha aꞌpinin. Tayoraroꞌsantaꞌ nisha nisha aꞌpinpi. Co napopináchin aꞌpinpihuëꞌ.

⁴² Inapochachin canpoantaꞌ nanpiantahuatëhuaꞌ, nisha yaꞌnoarihuaꞌ. Chiminpatëhuara, nonënpoaꞌ chanatopirinhuëꞌ, nanpiantahuatëhuaꞌ, nasha nonënpoaꞌ yaꞌhuëtarinpoaꞌ. Co onporontaꞌ chanatarinhuëꞌ.

⁴³ Iporasoꞌ nonënpoaꞌ co onpopinchin noyahuëꞌ. Chiminpatëhuaꞌ, paꞌpitarinënpoaꞌ. Aꞌna tahuërisoꞌ nipirinhuëꞌ, noyápiachin nonënpoaꞌ yaꞌhuëtarinpoaꞌ. Iporasoꞌ co chinipirëhuahuëꞌ. Nanpiantahuatëhuaꞌ, chiniarihuaꞌ.

⁴⁴ Isoroꞌpa marëáchin nonënpoaꞌ yaꞌhuëtërinpoaꞌ niꞌton, chiminëhuaꞌ. Paꞌpitopirinënpoahuëꞌ, ananpitaantahuachinpoaꞌ, nisha nonënpoaꞌ quëtarinpoaꞌ Yosëꞌpaꞌ yaꞌhuëcaso marëꞌ. Iporasoꞌ nonënpoaꞌ Yosë acotërinpoaꞌ isoroꞌpaquë yaꞌhuëcaso marëꞌ. Aꞌna tahuëriso nipirinhuëꞌ noya noya nonënpoaꞌ quëtarinpoaꞌ inápaquë yaꞌhuëcontacaso marëꞌ.

⁴⁵ Yosë quiricanënquë tapon: “Iráca Yosëri yaꞌnan quëmapi nininsoꞌ Atan itërin. Inasoꞌ nonën quëtërin isoroꞌpaquë nanpicaso marëꞌ,” tënin. Iporasoꞌ Quisocristontaꞌ Atan pochin nicaponahuëꞌ, Yosë chachin niꞌton, catahuarinpoaꞌ canpoantaꞌ Yosë pochin nanpicaso marëꞌ.

⁴⁶ Napoaponahuëꞌ, yaꞌnan nipon, nonënpoaꞌ quëtërinpoaꞌ isoroꞌpaquë nanpicaso marëꞌ. Ina piquëran nasha nonënpoantaꞌ quëtarinpoaꞌ inápaquë nanpimiatacaso marëꞌ.

⁴⁷ Atansoꞌ noꞌpa quëran ninin isoroꞌpaquë nanpicaso marëꞌ. Quisocristoso nipirinhuëꞌ Yosë yaꞌhuërin quëran oꞌmarin niꞌton, noya noya ninin.

⁴⁸ Yaꞌipi piyapinpoaꞌ Atan pochin nicatëhuaꞌ, ina nonën pochin yaꞌhuëtërinpoaꞌ. Napoaponahuëꞌ, Quisocristo imapatëhuaꞌ, aꞌna tahuëri ina nonën pochachin yaꞌhuëtarinpoaꞌ.

⁴⁹ Iporasoꞌ Atan pochin yaꞌnorëhuaꞌ. Aꞌna tahuëriso nipirinhuëꞌ Quisocristo pochin yaꞌnoarihuaꞌ.

⁵⁰ Nonënpoaꞌ ipora yaꞌhuëtërinpoasoꞌ co nanitërinhuëꞌ Yosë huaꞌanëntërinquë paacasoꞌ. Chiminpatëhuaꞌ, nonënpoaꞌ chanatarin, co yaꞌhuëmiatarinhuëꞌ.

⁵¹ Noya natanco iyaroꞌsaꞌ. Naꞌa piyapiꞌsaꞌ co nitotopirinahuëꞌ, shaꞌhuitaranquëmaꞌ. Co yaꞌipi imarëhuasopita chiminarihuahuëꞌ. Napoaponahuëꞌ, Yosë nohuanton, yaꞌipi imarëhuasopita nisha yaꞌnoarihuaꞌ.

⁵² Aꞌnanaya nisha nonënpoaꞌ yaꞌhuëtarinpoaꞌ. Oꞌmantacasoꞌ tahuëri nanihuachin, tronpita pihuirarin. Pihuihuachin, chiminpisopita nanpiantarapi. Quisocristo imapi niꞌton, ananpitaantarin huachi. Naporoꞌ yaꞌipi imarëhuasopita nisha nonënpoaꞌ yaꞌhuëtarinpoaꞌ. Co huachi chiminarihuahuëꞌ.

⁵³ Nonënpoaꞌ ipora yaꞌhuëtërinpoasoꞌ chanatarin. Aꞌna tahuëriso nipirinhuëꞌ nisha nonënpoaꞌ yaꞌhuëtohuachinpoaꞌ, co chanatarinhuëꞌ. Nasha aꞌmorëso pochin nisarihuaꞌ. Co huachi chiminarihuahuëꞌ.

⁵⁴ Nisha nonënpoaꞌ quëtohuachinpoaꞌ, nanpiantarihuaꞌ. Yosë quiricanën quëran ninoton, naporin: “Aꞌna tahuëri Yosëri chimirin minsëarin. Co huachi chiminacasoꞌ yaꞌhuaponhuëꞌ.

⁵⁵ ¿Onporahuatontaꞌ chimirin minsëarinpoaꞌ? Co huachi nanitarinhuëꞌ. Yaꞌhuan quëtëhuachinpora chiminëso pochin chiminacasoꞌ yaꞌhuëpirinhuëꞌ, co huachi chiminacasoꞌ tëꞌhuatarihuahuëꞌ,” tënin.

⁵⁶ Yosë iráca pënëntërinsoꞌ co natëtatëhuahuëꞌ, oshahuanëhuaꞌ. Oshahuanëhuaꞌ niꞌton, chiminacasoꞌ yaꞌhuërin.

⁵⁷ Yaꞌhuëpirinhuëꞌ, ¡ma noyacha Tata Yosësoꞌ niꞌton, nichaꞌërinpoa paya! Ina nohuanton, Quisocristo yaꞌhuërëtërinpoaꞌ. Corosëquë chiminaton, sopai minsërin. Nanpiantarahuaton, chimiriontaꞌ minsërin. Ina marëꞌ: “Yosparinquën,” itahuaꞌ.

⁵⁸ Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.