1 Corintios 13 - Chayahuita (Shahui)

¹ Nisha nananquë nonpiso pochin nitononarihuarahuëꞌ, co piyapiꞌsaꞌ nosorohuatëhuahuëꞌ, topinan quëran nonarihuaꞌ. Anquëni pochachin nonarihuarahuëntaꞌ, co nosorohuatëhuahuëꞌ, huaꞌna, canpana inapita irininso pochin Yosë nataninpoaꞌ.

² Aꞌnaquënpoaꞌ Yosë yonquirinso chachin nitotatëhuaꞌ, shaꞌhuitarëhuaꞌ. Yaꞌipi nitotarihuarahuëꞌ, co piyapiꞌsaꞌ nosorohuatëhuahuëꞌ, topinan quëran nitotarihuaꞌ, co Yosë noya niꞌsarinpoahuëꞌ. Yosë chiníquën natëtëhuaꞌ, nontohuatëhuaꞌ, motopi chiꞌhuincacaso pochin nanitapapirëhuahuëꞌ, co piyapiꞌsaꞌ nosorohuatëhuahuëꞌ, topinan quëran natërëhuaꞌ, co Yosë noya niꞌsarinpoahuëꞌ.

³ Yaꞌipi maꞌshanënpoaꞌ saꞌahuaroꞌsaꞌ quëtopirëhuahuëꞌ, co tëhuënchachin nosorohuatëhuahuëꞌ, topinan quëran quëtarihuaꞌ. “Pën quëran yatëpapirinacohuëntaꞌ, imamiatarahuë,” tarihuarahuëꞌ, co piyapiꞌsaꞌ nosorohuatëhuahuëꞌ, co mantaꞌ Yosëꞌpaꞌ canarihuahuëꞌ.

⁴ Piyapiꞌsaꞌ nosorohuatëhuaꞌ, co yanoꞌhuirihuahuëꞌ. Noya nontatëhuaꞌ, catahuarihuaꞌ. Piyapiꞌsaꞌ nosorohuatëhuaꞌ, co noyapatëhuaꞌ, noꞌhuiarihuahuëꞌ. Co nocantarihuahuëꞌ. “Casoꞌ noya noyaco,” co tarihuahuëꞌ.

⁵ Piyapiꞌsaꞌ nosorohuatëhuaꞌ, co piꞌpisha tërantaꞌ atapanarihuahuëꞌ. Co canpoara nohuantërëhuasoachin yonquiarihuahuëꞌ. Tëhuënchachin nosorohuatëhuaꞌ, noꞌhuipirinënpoahuëntaꞌ co noꞌhuirihuahuëꞌ. Pinopirinënpoahuëntaꞌ, co ina yonquiarihuahuëꞌ, naniantarihuaꞌ.

⁶ Piyapiꞌsaꞌ co noyahuëꞌ nipachinaꞌ, tëhuënchachin sëtarihuaꞌ. Noꞌtëquën yonquihuachinaꞌ, canpoantaꞌ noya cancantarihuaꞌ.

⁷ Co noyahuëꞌ nanan natantohuatëhuaꞌ, co aꞌnaroáchin natëtarihuahuëꞌ. Noya yonquiatëhuaꞌ, natëarihuaꞌ. “Yosë nohuanton, oshaquëran noya cancantapon,” taꞌtëhuaꞌ, ninarëhuaꞌ. Maꞌsha onpotopirinënpoahuëntaꞌ, yaꞌipi ahuantarihuaꞌ.

⁸ Ipora quëran huarëꞌ ninosoromiatacasoꞌ yaꞌhuërin. Aꞌnaquën ipora Yosë yonquirinso chachin piyapiꞌsaꞌ shaꞌhuitapirinahuëꞌ, aꞌna tahuërisoꞌ co huachi ina shaꞌhuitacasoꞌ yaꞌhuaponhuëꞌ. Aꞌnaquëontaꞌ nisha nananquë nonpiso pochin nonpi. Aꞌna tahuëriso nipirinhuëꞌ co huachi ina pochin nonacasoꞌ yaꞌhuaponhuëꞌ. Iporasoꞌ aꞌnaquën nitotërin aꞌchinacasoꞌ. Aꞌna tahuëri co huachi maꞌsha anitotacasoꞌ yaꞌhuaponhuëꞌ. Inapitasoꞌ co yaꞌhuëmiatarinhuëꞌ. Nipirinhuëꞌ, ninosorocasosoꞌ yaꞌhuëmiatarin.

⁹ Iporasoꞌ co yaꞌipi nitotërëhuahuëꞌ. Co inquënpoa tërantaꞌ noꞌtëquënáchin nitopënëntërëhuahuëꞌ.

¹⁰ Aꞌna tahuëriso nipirinhuëꞌ Yosëꞌpaꞌ yaꞌipi nitotarihuaꞌ. Naporoꞌ co aꞌchinacasoꞌ yaꞌhuaponhuëꞌ. Co huachi nipënënacasoꞌ yaꞌhuaponhuëꞌ. Yaꞌipi noya nisapi.

¹¹ Iráca huaꞌhuatarihuaꞌ, huaꞌhuasha pochin nonëhuaꞌ, huaꞌhuasha pochin yonquirëhuaꞌ. Iporaso nipirinhuëꞌ nani mashotërëhuaꞌ. Co huachi huaꞌhuasha pochin nonëhuahuëꞌ. Co huachi huaꞌhuasha pochin ninëhuahuëꞌ.

¹² Huaꞌna huënaratërinquë sacóshin huaꞌyanënpoꞌ quënanëꞌ. Inapochachin iporasoꞌ piꞌpisha Yosë nohuitërëhuaꞌ. Yosëꞌpaso nipirinhuëꞌ aꞌninquëchin Yosë nohuitarihuaꞌ. Iporasoꞌ co Yosë pochin yaꞌipi nitotarihuahuëꞌ. Inatohuaso nipirinhuëꞌ yaꞌipiya nitotarihuaꞌ. Yosë noyá nohuitërinpoaꞌ. Aꞌna tahuëri canpoantaꞌ inapochachin ina noya nohuitontarihuaꞌ.

¹³ Cancanënpoa quëran huarëꞌ Yosë natëcasoꞌ yaꞌhuërin. “Co onporontaꞌ nonpintarinpoahuëꞌ,” taꞌtëhuaꞌ, inasáchin ninacasoꞌ yaꞌhuërin. Ninosorocasontaꞌ yaꞌhuërin. Yosësoꞌ naꞌcon naꞌcon nohuantërin ninosorocasoꞌ.