1 Corintios 11 - Chayahuita (Shahui)

¹ Casoꞌ Quisocristo noya nonanahuë. Canpitantaꞌ nonanatomaco, noya nicoꞌ.

Sanapiꞌsaꞌ Yosë imapisopita

² Ma noyanquëmaꞌ iyaroꞌsaꞌ niꞌton, naꞌcon yonquiramaco. Yosë nanamën aꞌchintohuatënquëmara, noya natëramaco.

³ Isontaꞌ iyaroꞌsaꞌ aꞌchinchinquëmaꞌ nitotocoꞌ. Co insontaꞌ inaora nohuanton yaꞌhuërinhuëꞌ. Tëhuënchachin natëcasoꞌ yaꞌhuërin, tënahuë. Sanapiꞌsasoꞌ soꞌinaꞌ natëinaꞌ. Quëmapiꞌsantaꞌ Quisocristo natëinaꞌ. Quisocristosoꞌ Tata Yosë natërin.

⁴ Quëmapinpoaꞌ niyontonëhuaquë Yosë nontohuatëhuaꞌ, ama motënpoaꞌ niimomototahuasohuëꞌ. Niimomotohuatëhuaꞌ, co Quisocristo natërëhuahuëꞌ. Inapochachin pënëntohuatëhuaꞌ, ama niimomototahuasohuëꞌ.

⁵ Canpitantaꞌ, imoyaroꞌsaꞌ, niyontonëhuaquë Yosë nontohuatamaꞌ, soꞌyamaꞌ natëtomaꞌ, niimomototocoꞌ. Yosë anitotërinquëmasoꞌ shaꞌhuihuatamantaꞌ, niimomototocoꞌ. Co niimomototohuatamahuëꞌ, noyá niyaꞌitopiso pochin yaꞌnoaramaꞌ. Ina pochin nipatamaꞌ, soꞌyamaꞌ atapanaramaꞌ.

⁶ Niꞌcoꞌ. Sanapiꞌsaꞌ co quëmapiꞌsa pochin niyaꞌitopihuëꞌ. Yaꞌipi noyá niyaꞌitopi naporini, tapaintonahuëꞌ. Napoaton imoyaroꞌsaꞌ niimomototocoꞌ.

⁷ Quëmapinpoaso nipirinhuëꞌ Yosë nontohuatëhuaꞌ, ama motënpoaꞌ niimomototahuasohuëꞌ. Yosë nininpoaꞌ ina pochin huaꞌanëntacaso marëꞌ. Inasáchin, iyaroꞌsaꞌ, natëhuatëhuaꞌ, nóya cancantarihuaꞌ. Ina marëꞌ acorinpoaꞌ. Inapochachin sanapiꞌsantaꞌ soꞌinaꞌ noya natëhuachinaꞌ, nóya cancantapi.

⁸ Quëmapiꞌton Yosëri ninin. Ina quëran ahuëꞌëtahuaton, aꞌna nininpitëracaꞌ ocoitërin. Ina ocoitahuaton, ina quëran chachin sanapi ninin.

⁹ Quëmapiꞌton ninin. Ina piquëran sanapi ninin soꞌin catahuacaso marëꞌ.

¹⁰ Napoaton quëmapiꞌsaꞌ chini chiníquën nanantopi. Sanapiꞌsasoꞌ soꞌinaꞌ natëinaꞌ. Natëtonaꞌ, motënaꞌ niimomotochinaꞌ. Napohuachinaꞌ, soꞌinaꞌ natëpi niꞌton, anquëniroꞌsarintaꞌ noya niꞌsapi.

¹¹ Napoaponahuëꞌ, Yosë napopináchin nosororinpoaꞌ. Co quëmapiꞌsaráchin nohuantërinhuëꞌ. Sanapiꞌsantaꞌ nohuantërin. Quisocristo imapatëhuaꞌ, napopináchin niꞌninpoaꞌ.

¹² Yaꞌipinpoaꞌ Yosë nininpoaꞌ. Quëmapiꞌton nisahuaton, quëmapi nininpitën quëran sanapi ninin. Naporo quëran huarëꞌ quëmapinpoantaꞌ sanapiꞌsa quëran nasitërëhuaꞌ. Yosë nohuanton naporin.

¹³ Iporasoꞌ iyaroꞌsaꞌ, imoyaroꞌsaꞌ, cancanëma quëran yonquicoꞌ noya nicacamaso marëꞌ. Niyontonpatamaꞌ, ¿noya ipora sanapiꞌsaꞌ co niimomototaponaraihuëꞌ Yosë nontacaisoꞌ to?

¹⁴ Niꞌcoꞌ. Quëmapinpoaꞌ niyaꞌitërëhuaꞌ. Co ain aꞌpamacasoꞌ nohuantërëhuahuëꞌ.

¹⁵ Sanapiꞌsaso nipirinhuëꞌ ainën aꞌpamapi. Aꞌpamahuachinara, noya yaꞌnopi. Yosëri naporopi ain quëtërin noyá niimomototacaiso marëꞌ.

¹⁶ Aꞌnaquëmaꞌ nisha yonquihuatamaꞌ, isoíchin shaꞌhuitaranquëmaꞌ: Quiyasoꞌ co nisha nisha aꞌchinaihuëꞌ. Yaꞌipi parti imapisopitantaꞌ inachintopi.

Niyontonpachinara, aꞌnaquën co noyahuëꞌ nipisoꞌ

¹⁷ Niyontonpatamaꞌ iyaroꞌsaꞌ, noya nicacasoꞌ yaꞌhuëpirinhuëꞌ, aꞌnaquëmaꞌ co noyahuëꞌ ninamaꞌ. Co ina marëꞌ noya niꞌnanquëmahuëꞌ. Napoaton pënënaranquëmaꞌ.

¹⁸ Yosë chinotacaso marëꞌ niyontonpatamara, aꞌna huënton aꞌna huënton nicatomaꞌ, ninoꞌhuiramaꞌ, natantërahuë. Noꞌtëquën shaꞌhuitërinaco, topirahuëꞌ.

¹⁹ Co yaꞌipi cancanëma quëran imapatamahuëꞌ, nisha nisha yonquiaramaꞌ. Co napopináchin yonquiaramahuëꞌ. Ina quëran Yosë cancanën manëhuasopita nohuitërinënpoaꞌ. Co yaꞌipinpoaꞌ nisha nisha yonquirëhuahuëꞌ. Aꞌnapitaso nipirinhuëꞌ co noya yonquiatonahuëꞌ, co noꞌtëquën imapihuëꞌ.

²⁰ Quisocristo yonquicaso marëꞌ niyontonatomaꞌ, coshatapomarahuëꞌ, co tëhuënchachin chimininsoꞌ yonquiramahuëꞌ.

²¹ Aꞌnaquëmaꞌ co ninosoroatomahuëꞌ, niapiratëramaꞌ. Aꞌnaroáchin canpitaora cosharonëmaꞌ caꞌnamaꞌ. Co nipatomatëramahuëꞌ. Inapotohuatamara, aꞌnaquën tanapi. Aꞌnaquënso nipirinhuëꞌ naꞌcon oꞌotonaꞌ, noꞌpipi. Napoatomaꞌ, co nanitëramahuëꞌ Quisocristo chimininsoꞌ yonquiatomaꞌ coshatacamasoꞌ.

²² ¿Coꞌna pëinëmaꞌ yaꞌhuëtërinquëmahuëꞌ inaquë coshatamasoꞌ, oꞌocamasoꞌ? ¿Onpoatontaꞌ corto pëiquë chachin pahuantërinsopita atapanaramaꞌ? ¿Maꞌtaꞌ ina marëꞌ ichinquëmaꞌ? Co ina marëꞌ noya niꞌnanquëmahuëꞌ.

Quisocristo chimininsoꞌ yonquiatëhuaꞌ, caꞌnëhuasoꞌ

²³ Sinioro shaꞌhuitërincoso chachin nani shaꞌhuitëranquëmaꞌ. Iráca Cotasëri Quisocristo shaꞌhuirapirin. Sontaroꞌsari yamapachinara, naporoꞌ tashiꞌ caꞌtanoꞌsanënpitarëꞌ coshatopi. Cosharoꞌ masahuaton,

²⁴ “Yosparinquën Tata Yosë,” itahuaton, sëꞌpanin. Sëꞌpanahuaton, aꞌnaya aꞌnaya quëtërin. “Ca nonëhuë pochin isoꞌ. Caꞌcoꞌ. Canpita marëꞌ chiminarahuë. Niyontonpatamaꞌ, chiminahuësoꞌ yonquiatomaco, piꞌpian cosharoꞌ caꞌcoꞌ,” itërin.

²⁵ Nani coshatohuachinara, minëaꞌhua manin. “Huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë niꞌton, anoyacancantaranquëmaꞌ. Ca yonquiatomaco, oꞌocoꞌ. Ipora quëran huarëꞌ inapoatomaꞌ, yonquico,” itërin Quisosori.

²⁶ Onporosona cosharoꞌ ina nonën pochin nininsoꞌ caꞌpatamaꞌ, huënainën pochin nininsontaꞌ oꞌopatamaꞌ, Quisoso chimininsoꞌ aꞌnapita anitotaramaꞌ. Sinioro oꞌmantaquë huarëꞌ inapoaramaꞌ.

Onpopinsona Quisoso chimininsoꞌ yonquicasoꞌ yaꞌhuërin

²⁷ Ina marëꞌ niyontonpatamaꞌ, ama topinan quëran caꞌcosohuëꞌ. Ama nisha nisha yonquiatomaꞌ, oꞌocosohuëꞌ. Co Sinioro nonën, huënainën inapita noya yonquihuatamahuëꞌ, oshahuanaramaꞌ.

²⁸ Napoaton canpitaora yonquinëma quëran noꞌtëquën yonquicoꞌ. Piꞌpisha tërantaꞌ co noyahuëꞌ yonquihuatamaꞌ, naniantocoꞌ. Noyapiachinsáchin cancantatomaꞌ, caꞌcoꞌ, oꞌocoꞌ.

²⁹ Quisoso chimininsoꞌ noꞌtëquën yonquicasoꞌ yaꞌhuërin. Topinan quëran caꞌpatamaꞌ, topinan quëran oꞌopatamaꞌ, naꞌcon oshahuanaramaꞌ. Ina marëꞌ Yosë anaꞌintarinquëmaꞌ.

³⁰ Napoaton naꞌanquëmaꞌ canioramaꞌ. Aꞌnaquëmantaꞌ co chiniramahuëꞌ. Aꞌnaquënsoꞌ ina marëꞌ chiminin.

³¹ Yaꞌipi cancanënpoa quëran huarëꞌ nitantiacasoꞌ yaꞌhuërin niꞌton, yonquiaꞌahuaꞌ. Co noyahuëꞌ yonquirëhuasopita naniantohuatëhuaꞌ, co Yosë anaꞌintarinpoahuëꞌ.

³² Aꞌna tahuëri oshahuanoꞌsaꞌ anaꞌintomiatarin. Imarëhuasopitaso nipirinhuëꞌ, ipora chachin piꞌpian anaꞌintarinpoaꞌ noya noya yonquicaso marëꞌ. Ina quëran ayaroꞌ tahuëri co anaꞌintomiatarinpoahuëꞌ.

³³ Napoaton iyaroꞌsaꞌ noyápiachin cancantatomaꞌ, Quisocristo chimininsoꞌ yonquicaso marëꞌ niyontoncoꞌ. Ina marëꞌ niyontonpatamaꞌ, ama aꞌnaroáchin caꞌcosohuëꞌ. Nininacoꞌ. Yaꞌipi nanihuatamaꞌ, napopináchin caꞌcoꞌ.

³⁴ Aꞌnaquën tanahuachinaꞌ, inahuara pëinënaquë coshachinaꞌ. Ina quëran noya niyontonpatamaꞌ, co Yosë anaꞌintarinquëmahuëꞌ. Aꞌna tahuëri paꞌsarahuë nicaponquëmaꞌ. Naporoꞌ naꞌcon naꞌcon aꞌchinchinquëmaꞌ.