1 Corintios 10 - Chayahuita (Shahui)

Ama mamanshi moshacaiso marëhuëꞌ pënëninsoꞌ

¹ Iráca napopisopita iyaroꞌsaꞌ, yonquicoꞌ. Iráca cotio mashocoroꞌsaꞌ Iquipito quëran pipirahuatonaꞌ, Moisësë imapi. Yosë nohuanton, chitoroꞌ yaꞌnorin imacaiso marëꞌ. Naporahuatonaꞌ, Quëhuaiꞌ marë pëntonahuatonaꞌ, yaꞌipiya chaꞌëpi.

² Marë quëran chaꞌërahuatonaꞌ, Moisësë imapi. Chitorontaꞌ quëchitërarin. (Inapochachin iporasoꞌ Quisocristo natërëhuaꞌ niꞌton, aporihuanatëhuaꞌ, imarëhuaꞌ.)

³ Iráca inotëro parti paꞌpachinara, Yosë nohuanton, nani tahuëri noꞌpaquë cosharoꞌ yaꞌnohuachina, yaꞌipiya coshatopi.

⁴ Inaquësoꞌ co iꞌsha yaꞌhuëpirinhuëꞌ, Yosë nohuanton, naꞌpi quëran pipirin, yaꞌipiya oꞌopi. Quisocristosoꞌ ina naꞌpi pochin ninin. Paꞌpachinara, co quënanpirinahuëꞌ, inari naꞌcon catahuarin chaꞌëcaiso marëꞌ.

⁵ Inapotopirinhuëꞌ, cotioroꞌsasoꞌ co noyahuëꞌ cancantopi. Naꞌcon naꞌcon co natëpihuëꞌ niꞌton, Yosëri co noyahuëꞌ nicaton, anaꞌintërin. Ina nohuanton, inaquë chachin chiminpi.

⁶ Pënëinpoaso marëꞌ iráca ina ninshitërin. Inapitasoꞌ co noyahuëꞌ yonquipi. Nani maꞌsha noyapatopi. Ama inapita nonahuansohuëꞌ.

⁷ Inapitasoꞌ mamanshi moshapi. “Moshatacaiso marëꞌ pita nipi. Huënsërahuatonaꞌ, coshatopi, oꞌopi. Ina quëran nansarahuatonaꞌ, capa cancantopi,” tënin Yosë quiricanënquë. Canpitaso nipirinhuëꞌ ama inapita pochin nicosohuëꞌ.

⁸ Ina quëran aꞌnapita monshihuanpi. Ina marëꞌ Yosëri anaꞌintërin. Ina nohuanton, cato shonca cara huaranca piyapiꞌsaꞌ chiminpi. Aꞌna tahuëriíchin nipirinhuëꞌ, inanapo chiminpi. Ina yonquiatomaꞌ, ama mantaꞌ monshihuanacamasoꞌ yonquicosohuëꞌ.

⁹ Naporahuatonaꞌ Sinioronta tënipi: “Co nimara anaꞌintarinpoahuëꞌ,” taꞌtonaꞌ, co noyahuëꞌ nipi. Ina marëꞌ yaꞌhuanatonaꞌ, naꞌa chiminpi.

¹⁰ Ama Yosë noꞌhuitëhuaꞌ tarëtahuasohuëꞌ. “Co Yosë noya catahuarinpoahuëꞌ,” topi aꞌnaquën. Napoaton Yosëri anquëni aꞌpaimarin inapita tëpacaso marëꞌ.

¹¹ Yosë nohuanton, iráca napopisopita quiricanënquë ninshitopi pënëinpoaso marëꞌ. Inapita pochin nipatëhuaꞌ, anaꞌintarinpoaꞌ canpoantaꞌ. Nani anaꞌintacasoꞌ tahuëri naniriarin.

¹² Aꞌnaya aꞌnayanquëmaꞌ niꞌcona oshahuantamaꞌ. “Casoꞌ noya piyapico. Co onporontaꞌ Yosë aꞌpoarahuëꞌ,” ama tocosohuëꞌ.

¹³ Sopai yaꞌipi piyapinpoaꞌ shaꞌhuitërinpoaꞌ co noyahuëꞌ nicacaso marëꞌ. Yosëso nipirinhuëꞌ catahuarinpoaꞌ. Aꞌnaya aꞌnayanpoaꞌ co nanitërëhuasohuëꞌ nitotaton, niꞌsarinpoaꞌ. “Tananpitëquëꞌ,” itohuachina, co sopai nanitërinhuëꞌ aquëtëꞌ tëniinpoasoꞌ. Cancanënpoa quëran huarëꞌ Yosë natëhuatëhuaꞌ, co sopai minsëarinpoahuëꞌ. Maꞌsha onpopirëhuahuëntaꞌ, Yosë ananitarinpoaꞌ ahuantacasoꞌ. Yosë chachin catahuarinpoaꞌ sopai minsëcaso marëꞌ.

¹⁴ Napoaton iyaroꞌsaꞌ ama piꞌpisha tërantaꞌ mamanshi moshacosohuëꞌ. Nosororanquëmaꞌ niꞌton, pënënaranquëmaꞌ.

¹⁵ Canpitasoꞌ nitoyonquiramaꞌ. Shaꞌhuitëranquëmasoꞌ yonquicoꞌ noꞌtëquën nitotacamaso marëꞌ.

¹⁶ Niyontonpatëhuara, Quisocristo chimininsoꞌ yonquirëhuaꞌ. “Quiya marëꞌ Sinioro huënainën paꞌnin niꞌton, ‘Yosparinquën’ tënai,” itatëhuaꞌ, huënainën pochin nininsoꞌ oꞌorëhuaꞌ. Cancanënpoa quëran huarëꞌ yonquiatëhuaꞌ, oꞌopatëhuaꞌ, huënainën napopináchin yonquirëhuaꞌ. Ina quëran cosharoꞌ ina nonën pochin nininsoꞌ sëꞌpanahuatëhuaꞌ, caꞌnëhuaꞌ. “Tëhuënchachin canpoa marëꞌ Quisocristo nonën ohuanpi,” taꞌtëhuaꞌ, napopináchin yonquirëhuaꞌ.

¹⁷ Quisocristo yonquiatëhuaꞌ, ina cosharoꞌ caꞌnëhuaꞌ. Naꞌaquënpoaꞌ nirihuarahuëꞌ, Quisocristo imarëhuaꞌ niꞌton, aꞌna huëntona pochin ninëhuaꞌ. Napopináchin yonquirëhuaꞌ.

¹⁸ Israiroꞌsaꞌ napopisontaꞌ yonquicoꞌ. Maꞌsha Yosë chinotacaso marëꞌ tëparahuatonaꞌ, ahuiquitopi. Piꞌpian nosha acopisoꞌ caꞌpi. Yosë yonquiatonaꞌ, coshatopi. Inapoatonaꞌ, Yosë chinotopi.

¹⁹ Mamanshisoꞌ co nanpirinhuëꞌ. Co chinotacasohuëꞌ nipirinhuëꞌ, aꞌnaquëni moshapi. Maꞌsha inapita chinotacaso marëꞌ tëpahuachinara, topinan quëran napopirinahuëꞌ, co mamanshiri niꞌninhuëꞌ, co nataninhuëꞌ.

²⁰ Nisha piyapiꞌsaso nipirinhuëꞌ mamanshi moshacaiso marëꞌ maꞌsha tëpahuachinara, co Yosë yonquipihuëꞌ. Sopairoꞌsaꞌ yonquipi. Co casoꞌ nohuantërahuëꞌ canpitantaꞌ sopairoꞌsaꞌ yonquicamasoꞌ.

²¹ Aꞌnaquën mamanshi moshacaiso marëꞌ pita nipi. Sopairoꞌsaꞌ yonquiatonaꞌ, napopi. Sinioro yonquihuatamaꞌ, co sopairoꞌsaꞌ yonquicamasoꞌ yaꞌhuërinhuëꞌ. Napoaton amatohuachinënquëmaꞌ, ama pacosohuëꞌ. Quisocristo chimininsoꞌ yonquiatomaꞌ, coshatëramaꞌ, oꞌoramaꞌ. Napoaton ama sopairoꞌsaꞌ yonquiatomaꞌ, coshatocosohuëꞌ, oꞌocosohuëꞌ.

²² Sopairoꞌsaꞌ yonquihuatamaꞌ, Yosë aꞌpitatënquëmaꞌ, noꞌhuiarinquëmaꞌ. ¿Ina nohuantëramaꞌ ti? ¡Inasoꞌ chini chiníquën nanantërin! Canpoasoꞌ co ina pochin chiníquën nanantërëhuahuëꞌ.

Aꞌnapita nosorocasoꞌ yaꞌhuërinsoꞌ

²³ “Maꞌsona tërantaꞌ yanipatëhuaꞌ, noya nicacasoꞌ,” topi. Napoaponahuëꞌ, co yaꞌipi ninëhuasopita catahuarinpoahuëꞌ noya cancantacasoꞌ. Tëhuënchachin yaꞌipi noya nicacaso nipirinhuëꞌ, co yaꞌipi catahuarinpoahuëꞌ aꞌnapita achinicancanacasoꞌ.

²⁴ Napoaton aꞌnapitantaꞌ noya noya imacaiso marëꞌ catahuacoꞌ. Canpitaora costaramasoꞌ ama aquëtëꞌ yonquicosohuëꞌ. Aꞌnapita naꞌcon naꞌcon yonquicoꞌ.

²⁵ Nosha mircatoquë yaꞌhuëhuachin, paꞌanatomaꞌ, caꞌcoꞌ. Ama mantaꞌ natantapomarahuëꞌ, caꞌcoꞌ. “¿Mamanshi chinotopiso pëiquë maꞌpatëran?” ama itocosohuëꞌ. Ama nisha nisha yonquiapomarahuëꞌ, caꞌcoꞌ.

²⁶ Tata Yosëri yaꞌipiroꞌpaꞌ ninin. Yaꞌipi maꞌsharoꞌsantaꞌ noya ninin.

²⁷ Aꞌna tahuëri coshatapataramaꞌ. Co imarinsohuëꞌ amatohuachinquëmaꞌ, nohuantohuatamaꞌ pacoꞌ. Nosha acotohuachinënquëmaꞌ, “Mamanshi marëꞌ acopisoꞌ nimara,” ama tapomarahuëꞌ, caꞌcoꞌ.

²⁸ Nipirinhuëꞌ, aꞌna piyapi shaꞌhuitohuachinquëmaꞌ, “Iso nosha mamanshi chinotacaso marëꞌ acopisoꞌ,” itohuachinquëmaꞌ, ama caꞌcosohuëꞌ. Shaꞌhuitërinquëmasoꞌ nosoroatomaꞌ, ama caꞌcosohuëꞌ.

²⁹ Caꞌpatamaꞌ, co ina marëꞌ oshahuanaramahuëꞌ. Aꞌnaquënso nipirinhuëꞌ niꞌpachinënquëmaꞌ, nisha nisha yonquiamara. Ina nosoroatomaꞌ, ama caꞌcosohuëꞌ. Aꞌnaquëmaso nipirinhuëꞌ, itaramaco: “¿Maꞌmarëtaꞌ aꞌnapita yonquiato cosharoꞌ aꞌpocaꞌhuasoꞌ yaꞌhuërin?

³⁰ ‘Yosparinquën Sinioro,’ itahuato, noya casoꞌ caꞌnahuë. ¿Onpoatontaꞌ ina marëꞌ co noyahuëꞌ niꞌninaco?” topiramahuëꞌ.

³¹ Maꞌsona tërantaꞌ nipatamaꞌ, Yosë yonquiatomaꞌ, noya nicoꞌ aꞌnapitantaꞌ Yosë noya yonquicaiso marëꞌ. Napoaton coshatohuatamaꞌ, oꞌopatamaꞌ, maꞌsona tërantaꞌ nipatamaꞌ, ina yonquicoꞌ.

³² Ama insontaꞌ anishacancantocosohuëꞌ. Cotioroꞌsaꞌ, nisha piyapiꞌsaꞌ, Quisocristo imapisopita, yaꞌipiya nosorocasoꞌ yaꞌhuërin.

³³ Casoꞌ yaꞌipi piyapiꞌsaꞌ yonquirahuë. Catahuarahuë noya Yosë imacaiso marëꞌ. Co caora costarahuësoꞌ yonquirahuëꞌ. Aꞌnapitantaꞌ yacatahuarahuë inahuantaꞌ Quisocristori anoyacancantacaso marëꞌ.