Salmos 96 - Kashibo-Kakataibo Biblia

Nukën ꞌIbu ax ka ꞌapuira ꞌikë ki ami kantati bana

¹ Nukën ꞌIbumi kantai kananuna achúshi kanta ió ami kantati ꞌain; kamabi menu ꞌikë unikama;

² Diosmi kantakin kananuna ain anë upíokin sinánxunkin a rabiti ꞌain; usai ꞌikin kananuna nëtë kamabi an ië́mikin nu ꞌakinkë a kamabi ñuikin rabiti ꞌain.

³ Anan kananuna aín kushian unin iskëma ñu upíirabu ꞌa akamaribi kamina kamabi ëmanu ꞌikë, unikaman kuanun ñuixunti ꞌain,

⁴ Nukën ibu ax ka chaiira ꞌianan asérabi upíokin rabikë ꞌiti ꞌikën: ¡ax ka bëtsi dios kamasamaira, ami rakuë́ti a ꞌikën!

⁵ Bëtsi ëmanu ꞌikë unikaman rabikë dioskama ax ka kushiñuma ꞌaish ñuumara ꞌikën, ꞌaínbi ka anu rabikë Nukën ibu an kuni naíkamë ꞌëokama uniokëxa.

⁶ ¡Anua ax ꞌikë anu ka chaiira ꞌitánun upíokin pë́kakë ꞌikën! ¡Anua ꞌikë anu ka aín kushin ꞌikë usa ꞌaish ka upíira kakë ax upíokin pë́kakë ꞌikën!

⁷ Kamabi ëmanu ꞌikë unikama Nukën ꞌIbu Diosan aín kushin ñu ꞌakë, akamina ꞌunánkanti ꞌain, ꞌianan kamina usakin aín kushin ñu ꞌakë aribi ñuikanti ꞌain;

⁸ usa ꞌain kamina anuxun a rabiti xubu ꞌikënua me ëman mëníokë anu, ami ꞌinainshiti ñukama buanxuni kuanxun rabiti ꞌain,

⁹ anuxun kamina anua kata upíira ꞌikë, anuxun Dios rabikanti ꞌain. ¡Usakin ꞌakëbë ka kamabi menu ꞌikë unikama ami rakuë́ti bërëti ꞌikën!

¹⁰ Bëtsi bëtsi ëmanu ꞌikë unikama kamina kati ꞌain: “¡Dios ax ka ꞌapuira ꞌikën!” Usa ꞌixun ka ënë me shaíkisama okin uniokëxa; an ka kamabi ëmanu ꞌikë unikama bëtsi ꞌakësaribi okin sënë́nbi ꞌitánun ꞌakinia.

¹¹ ¡Me ꞌimainun naíkamë ꞌëo ax ka kuëënti ꞌikën! ¡ꞌImainun ka parúmpapa bëchuni anua ꞌikë ñukamabëbi banati ꞌikën!

¹² ¡Usai ka mekamaribi anua ꞌikë ñukamabëbi kuëëni kantati ꞌikën! ¡ꞌIanan ka kuëëni ninu ꞌikë ikama axribi sharati ꞌikën,

¹³ usai ꞌika Diosan ꞌismainun kantati ꞌikën! ¡Ax ukin ka ënë menu ꞌikë ꞌapu ꞌixun ꞌakinti ꞌikën, ꞌakianan ka kamabi menu ꞌikë ëmakamanu ꞌikë unikamaribi ꞌakinkin asérabi an ñu upíokin ꞌati ꞌikën!