Salmos 22 - Kashibo-Kakataibo Biblia

Dios tëmërakinbi rabi ami kantati bana

¹ ꞌËn ꞌIbu Dios, mix ꞌën ꞌIbu Dios ꞌixun kaina, ¿uisa kupín ꞌë ëan? ¿uisa kupín kaina ꞌë ië́mi aíma? ¿uisa kupín kaina ꞌëx tëmërai masá nuitukin kakëxunbi ꞌën bana kuatima?

² ꞌËn ꞌIbu Dios nëtë ꞌimainun ꞌimë́bi kana ꞌëmi ꞌakinun kixun mi kain, ꞌaínbi kamina ꞌën kakëxunbi kuatima; ¡ꞌëx anun tantiti nëtë ka ꞌaíma ꞌikën!

³ Usa ꞌain kamina mix bëtsi dios kamasamaira ꞌaish uisaibi ꞌikëma ꞌain; usa ꞌikë ka Israel unikaman mi rabiti ꞌikën.

⁴ Nun papakamax ka mimi katamëakëxa; usai ꞌia mimi katamëtia kamina min ië́mikin ꞌakiankën;

⁵ mia ꞌakinun kixun ñukákëxun kamina ax ami nishkë unikaman mëkënuabi; mimi katamëtia ꞌakinima ꞌikima ꞌakiankën.

⁶ Usa ꞌaínbi kana ꞌëx achúshi unisama achúshi xënasara ꞌain; ¡usa ꞌëx ꞌain ka ꞌëmi uni kuaia!

⁷ Uikaman kara ꞌë isia ax ka ꞌë isi ꞌëmi kuaia; ꞌianan ka ꞌëmi kuai ain kuëbí kuëñushi ain maxká shaíkai tënkëti,

⁸ ësai kikania: Ënë unix ka Diosmi katamëkë ꞌiakëxa; usa ꞌikë ka Diosan ië́mikin ꞌakinti ꞌikën. Ax ka Diosan ꞌakinti ꞌitsaira kuëënia kikania.

⁹ Usa ka: usa ꞌain kamina min ꞌën titan pukunuax bakënun ꞌë ꞌimiakën; ꞌimixun kamina ꞌain kisinu makaxun ꞌain xuma ꞌamikin ꞌë kanionun ꞌimiakën.

¹⁰ ꞌËn titan ꞌë bakënkëma pain ꞌikëbi, kamina ꞌë bërúankën; usa ꞌaish kamina ꞌën titan puku ꞌukëmëu, ꞌaínbi mix ꞌën Dios ꞌiakën.

¹¹ ꞌË ꞌura kamina ꞌitima ꞌain, anun ꞌëx tëmërati nëtë ka ꞌurama ꞌikën, ꞌimainun ka an ꞌë ꞌakinti uibi ꞌaíma ꞌikën.

¹² Axa ꞌëmi nishkë unikaman ka vaca bënëkama në́kë, Basánnu ꞌikë usaribi ꞌixun ꞌë bëarabuianxa;

¹³ usa ꞌaish ka paru ꞌinúan në́kë kamaxa kuëëti anchakë usaribiti ꞌëmi banai kikania.

¹⁴ ꞌËx kana ꞌumpax ampë́nkikë usaribi ꞌain; ꞌën xokama ëchikibutia tankësa kana tanin. ꞌËn nuitunëx ka charokëxa xara kuëxu charákësa usaribi ꞌikën.

¹⁵ ꞌËn kuëbitax ka mapú xuikëx ëski ꞌirukë usaribi ꞌikën; ꞌimainun ka ꞌën ana manxantanu takáshkikë usaribi ꞌikën. ¡Usa ꞌikë kamina bamax menu rakakësa ꞌitánun ꞌë ëan!

¹⁶ Kamun ꞌitsan, ꞌakësaira okin ka uni ꞌatimakaman ꞌë bëara buianxa; usakin ꞌakin ka ꞌën mëkënu ꞌanan ꞌën taënu ꞌinúanën uni raëxpakësa okin ꞌë ꞌaxa.

¹⁷ ¡Usa ꞌain ka ꞌën xokama mëratia iskin tupuntisa ꞌiaxa! Ax ꞌëmi nishkë unikaman ka ënkimaira ꞌë bërúaia;

¹⁸ usa ꞌixun ka atun ꞌën chupa, uin karaisa bitsia iskatsikixun ñuratsu nikin anun pain tanxun bikanxa.

¹⁹ Usa ꞌaínbi kamina mix Dios an ꞌë kushiokë a ꞌain, ¡usa ꞌain kamina ꞌë ëntima ꞌain!, ¡bëríbi kamina ꞌë ꞌakini ꞌëbë ꞌiti ꞌain!

²⁰ Aín manë xëtokën ꞌakin bamamiti ꞌikëbi kamina ꞌë ië́miti ꞌain, usa ꞌixun kamina kamunsa unikaman an ꞌë rëtënun ëntima ꞌain,

²¹ atux paru ꞌinúansa ꞌaínbi kamina anuabi ꞌë ië́miti ꞌain, ¡atúxa vaca bënëkama manchañusaribi ꞌaínbi kamina anua ꞌë ië́miti ꞌain!

²² ꞌËn kana mi ñuikin ꞌën aintsikama kanan, anuxun mi rabiti xubunuax mi rabi atubë kantati ꞌain.

²³ Mitsun kamina a ꞌunánkë ꞌixun Dios, rabikanti ꞌain. ¡Jacobnën rëbúnki Israel unikaman mitsun kamina aín kushi ꞌunánkin Dios rabikanti ꞌain!

²⁴ An ka ax Dios ꞌixun ñuñuma uni tëmërakin ñukákëxun kuakëmasa okinma ꞌakinia. ¡Usa ixun ka ꞌakinun kixun ñukákëxun kuakin ꞌakinia!

²⁵ Min kaisa min unikama ꞌuakamë ꞌëokë atun kuamainunbi kana mi rabiti ꞌain; an mi rabikë unikaman ismainunbi kana ꞌëx kikësabiokin mi ꞌaxunti ꞌain.

²⁶ Ñuñuma unikama mitsux kamina, puchákin pitankëx kuëënkanti ꞌain; ainan ꞌixun Dios rabi kamina mitsux, ꞌitsabaritia ꞌimi tsókanti ꞌain.

²⁷ Kamabi ñakánu ꞌikë Israel unibu ꞌimainun, bëtsi nëtënu tsókë unikamanribi ka ami sinánkin Dios rabiti ꞌikën; ¡usakin ꞌai ka an ismainunbi rantinpuruni tsóbukanti ꞌikën!

²⁸ Dios ax ka ꞌapuira ꞌikë usa ꞌain, usa ꞌixun ka kamabi me kuainakë anu ꞌikë ëmakamanu ꞌikë unikama ax kikësabiokin ꞌanun ꞌamia.

²⁹ Usa ꞌikë ka ami ñanati tëtúbukin ashi rabi kamabi uni axa ꞌuakamë ꞌëoi tsókë unikama ꞌimainun, axa ñuti ꞌurama unikama, atúnribi ka mimi ñanati ꞌikin mi rabikanti ꞌikën.

³⁰ ꞌËn rëbúnkikamax ka Dios ashi rabianan, a ñui xënibua ꞌaínbi tsóti ꞌikën;

³¹ ꞌimainun ka axa bërí bakënti tuákamax, kani min kamina ñu chaiirabu ꞌakë kiax kiti ꞌikën.