Salmos 107 - Kashibo-Kakataibo Biblia

Nukën ꞌIbun aín unikama tëmëraia ënkinma ꞌakinkë bana

¹ Nun ꞌIbu kananuna axa upí ꞌikë asábi ka kakin rabiti ꞌain, usa ꞌain ka ax këñutima oi nuibanania.

² ꞌIanan ka an ië́mikë unikaman Dios kati ꞌikën, an ka ami nishkë unikaman ꞌati ꞌikëbi ië́miakëxa,

³ usa ꞌain ka atu bëtsi mekamanu ꞌiabia timëkin, aín tsipumia ꞌanan aín rëbumi ꞌikë akama ꞌianan, amiaxa bari urukë ꞌimainun, amia bari kuabúkë amiaxa timë́nun ꞌimiakëxa.

⁴ Nun xutakamax ka me ꞌunánxma bënuax ꞌikësai anu uni ꞌikëma masiñu me anun nikinbi, anun ëma achúshi anu tsónux kuanti bai mëraimabi niakëxa;

⁵ usai nitsi ka pananx nianan ꞌumpax a xëati ꞌaíma ꞌain shimax, nitsi bamatisa tankankëxa

⁶ Usa ꞌi bënë́kin ka Dios ñukákankëxa, ñukákëxun ka usai ꞌia bënë́kë a upí tani kuëëntanun atu ꞌakiankëxa.

⁷ Usokin pain ꞌatankëxun ka bai puntë ëma achúshi anu tsóti kuanti a mëramiakëxa.

⁸ Usa aín kananuna Nukën ꞌIbu Dios nu ꞌakinkëxun asabika kakin rabiti ꞌain, ¡an ka kamabi unikama upíokin ñu ꞌanun ꞌakinia!

⁹ An ka axa shiman bamatisa tankë unikama ꞌumpax xëanun ꞌinania ꞌinánan ka ax numin bamatisa unikama aribi aín piti ꞌitsaira ꞌinania.

¹⁰ Nun chaitiokëkamax ka bëánkibukënu sipuakë ꞌianan manë risin tëkërëkakë ꞌaish, masá nuitukinbi añu kara ꞌati ꞌikë ꞌunánan uinu kara kuanti ꞌikë kixunbi ꞌunánma ꞌikën,

¹¹ usai ka Diosan kakëxun kuaisama tankë kupín ꞌiakëxa, usai ka Dios manámi ꞌikë an kakësokin ꞌaisama tani atux ꞌiakëxa.

¹² Usai ꞌia ka Diosan tëmërakin ñu mëënun ꞌimikëxun ñu chaiirabu ꞌai; tatíki chakátiabi ka uínbi ꞌakianma ꞌikën.

¹³ Usai ꞌi bënë́kin ka Dios an ꞌakinun ñukákankëxa, ñukákëxun ka usai ꞌia bënë́kë a upí tani kuëëtanun atu ꞌakiankëxa;

¹⁴ ꞌakinkin ka bë́anbëan kikësanu ꞌikëbi chikíanan manë risin tëkërëkakësa ꞌinua atux tëmërakë anua chikíankëxa.

¹⁵ Usa ꞌain kananuna Nukën ꞌIbu Dios nu ꞌakinkëxun asabika kakin rabiti ꞌain, ¡an ka kamabi unikama ꞌupiokin ñu ꞌanun ꞌakinia!

¹⁶ ¡An ka anu uni xëpúkë a xëkuëkama tukibunun ꞌimianan! ¡Anun xëputi bëarati nankë manëkama aribi tëkëbunun ꞌimiakëxa!

¹⁷ Usa ꞌain ka nun xutakama ꞌitsaira ꞌinsíni tëmërai, atun bana kuakinma ꞌatima ñu ꞌai ꞌuchakë kupínbi usai ꞌikankëxa,

¹⁸ uisa pitibi pisama tani ka ami kuínsakëxa; ¡usai ꞌikë anunbi ñuti ꞌuramashi ꞌiakëxa!

¹⁹ Usai ꞌi bënë́kin ka Dios an ꞌakinun ñukákankëxa, ñukákëxun ka usai ꞌia bënë́kë a; upí tania kuëëntanun atu ꞌakiankëxa.

²⁰ Usakin ꞌakin ka aín banáinshi ñutisa ꞌikëbi pëxkútanun atu ꞌimiakëxa;

²¹ usa ꞌain kananuna Nukën ꞌIbu Dios nu ꞌakinkëxun asábi ka kakin rabiti ꞌain, ¡an ka kamabi unikama upíokin ñu ꞌanun ꞌakinia!

²² Usa ꞌain ka ñuina ꞌaxun xaroxuni an ꞌa ñukama, a sinani kuëënkin rabikanti ꞌikën.

²³ Nun chaitiokëkamax ka nunti chaiira marutankëx anun ain ñu marui parúmpapa bakan kuani niakëxa. Nitsi ka bëtsi ëmakamanu kuani niakëxa,

²⁴ usai nikin ka parúmpapanuxunbi, Diosan unio ñu ꞌupíirabu a iskankëxa.

²⁵ Usa ꞌain ka Dios kiakëxa suñúan kushiira bëkikin ka chaiirabu ꞌinun ain bëchun tukinun parúmpapa ꞌumpax ꞌimiakëxa;

²⁶ usakin ꞌamikëxa naíbëtan sënën nirukin anu ꞌikë unikama këñunbi; nunti chaiira parúmpapa bëchunan biruia tani ka atun upíokin sinánkë a nëtë́ti ratúkankëxa.

²⁷ Usai ꞌika ñu paë xëax paëanxa uni ꞌikësai anu ꞌikë unikama; ¡manë nuntinu ꞌikë uni ꞌikëmasa ꞌinun rakuë́tan bamai ꞌikankëxa!

²⁸ Usai bënë́kin ka Dios an ꞌakinun ñukákankëxa, ñukákëxun ka usai bënë́kë a upí tani kuëëntanun atu ꞌakiankëxa;

²⁹ usakin ꞌanan ka suñu kushiira ꞌikuatsinkëbëa parúmpapa bëchunkë aribi bukubunun ꞌimiakëxa.

³⁰ Usakin ꞌakëbëa bëchun bukubutia isi kuëënkania ka Diosan uinu ꞌikë butunnu kuanti kara sinania anubi buánkëxa.

³¹ Usa ꞌain kananuna Nun ꞌIbu Dios nu ꞌakinun asábi ka kakin rabiti ꞌain, an ka kamabi uni ñu ꞌupiokin ꞌanun ꞌakinia.

³² ¡Kamabi unin ka timë́xun rabiti ꞌikën! ¡ꞌAmainun ka kamabi ꞌapukamanribi timë́xun rabikanti ꞌikën!

³³ Nukën ꞌIbun ka bakakama ꞌimainun xëxákama anu uni ꞌikëma mesa ꞌia ñankáishi ëski me rakátanun ꞌimia;

³⁴ ꞌimianan ka mekama aribi anu ñu ꞌapátisama ꞌitánun; anu ꞌikë unikamaxa ñu ꞌatima ꞌai ꞌuchakë kupín ꞌimia;

³⁵ usokin ꞌanan ka anu uni ꞌikëma me akamaribi ꞌumpax anu ꞌinun ꞌimianan me anu ꞌumpax ꞌikëmakama anua xëxá ꞌumpax upíbu ꞌinun ꞌimia;

³⁶ anu ka axa panani tsóa unikama ëankëxa, ënkëxun ka atun ëma chaiirabu ꞌinun anu ꞌakankëxa.

³⁷ ꞌAnan ka atun naënu uvas ꞌapáxun, ꞌaisamaira ꞌitánun tuaia bikankëxa.

³⁸ Usakin ꞌaia ka Diosanbi bakë bëchipatia kaínu ꞌimianan atun ꞌarakakë ñuinakamaribi ꞌaisamaira kaínun ꞌimiakëxa.

³⁹ Usakin ꞌakinkëxa upiti tsótiabi ka amiribishi axa atumi nishkë unikaman ꞌitsaira, tëmëramikin usakin ꞌakëxa ꞌakëx ka ꞌitsama uniratsushi bërúakëxa.

⁴⁰ ꞌAínbi ka Diosan an bëtsi tëmëramikë unikama a timakin anu uni ꞌikëma menuaxa, ain bai nëtë́miax sinánkamanun ꞌimiakëxa.

⁴¹ Diosan ka uni ñuñukama a ꞌatimakin sinani masá nuitutiabi kuëënun ꞌimia; ¡ꞌimikin ka atun ꞌarakakë ñuinakama ꞌikësaribitia bëchipati ñuina ꞌarakakë ꞌikësai aín aintsikamabë ꞌinun ꞌimia!

⁴² Usakin ꞌaia isi ka uni upí sinánñukama ax kuëënia, usai ꞌia isi ka ꞌatima sinánñu unikama ax uisa bananbi kima tsotia.

⁴³ Uix kara sinánñu ꞌikë an kuni ka ënë bana kikësokin ꞌati ꞌikën, ꞌakin ka Diosan ka kamabi uni nuibatia kixun unánti ꞌikën.