Romanos 9 - Kashibo-Kakataibo Biblia

Israelnën rëbúnqui ainan ꞌinun Nucën Papa Diosan caísa

¹ Cristonan ꞌixun cana cëmëquinma ënë banaribi mitsu cain. Nucën Papa Diosan Bëru Ñunshin Upitan ꞌë ꞌunánmicëxun cana ꞌën nuitu mëu ꞌunanin, ꞌën mitsu bërí caisa tancë bana ënëx ca asérabi ꞌicë quixun.

² Ësaquin cana mitsu cain, judíos unibu ꞌën aintsicama Jesucristonanma ꞌicë, imë́bi nëtë́nbi sinani cana ꞌaisamaira masá nuitutin.

³ Usai ꞌiti ꞌaínbi atúxa Cristonan ꞌinun ꞌëx ainanma ꞌaish Nucën Papa Diosan uisa cara oti ꞌicë usoquin ꞌacë ꞌiisa cana tanin.

⁴ ꞌËn aintsicama judíos unibu atux ca ꞌësaribi Israelnën rëbúnqui ꞌicën. Israelnën rëbúnqui, judíos unicama, ca Nucën Papa Diosan aín uni ꞌinun caísacëxa. Caístancëxun ca, asérabi ca ax Dios ꞌicë quixun ꞌunánun, Israel unicama aín cushi ismianan aín pëcacë aribi ismiacëxa. An ca atu ainan ꞌimiquin atúan uisai cara ainan ꞌaish ꞌiti ꞌicë quixun ꞌunánun aín banacama Moisés cuënëomiacëxa. Cuënëomiquin ca anuxun a rabiti xubu ꞌatancëxun cara uisoquin a rabiti ꞌicë quixun canan uisaira oquin cara an atu bërúanti ꞌicë quixun cacëxa.

⁵ Israel unicamax ca Abraham ꞌimainun Isaac ꞌimainun Jacob, Israelribi cacë, acaman rëbúnqui ꞌicën. Uni ꞌaish ca Cristonën ꞌunánpaparibi Israelnën rëbúnqui ꞌiacëxa. Ax Diosribi ꞌaish ca camabi uni, camabi ñun ꞌibu ꞌianan ángelcaman ꞌiburibi ꞌicën. A ca camabi unin xënibua ꞌaínbi rabiti ꞌicën. Usai ca ꞌiti ꞌicën.

⁶ Israelnën rëbúnqui judíos unicama camáxira Nucën Papa Diosnanma ꞌaínbi cananuna sinántima ꞌain, Nucën Papa Diosan ca aín quicësabi oquin Israel unicama ainan ꞌimiama ꞌicë quixun. Israelnën rëbúnqui ꞌaíshbi ca axa Nucën Papa Diosmi sináncëmacamax asérabi Nucën Papa Diosnanma ꞌicën.

⁷ Nucën Papa Diosan ca Abraham cacëxa: “Min bëchicë Isaac aín rëbúnquishi ca asérabi min rëbúnqui ꞌaish ꞌën unibu ꞌiti ꞌicë” quixun. —Min bëchicë itsi aín rëbúnquicamax ca ꞌën unibu ꞌiti ꞌicë —quixun ca Nucën Papa Diosan Abraham cáma ꞌicën. “Isaacnën rëbúnquinëxëshi ca ꞌënan ꞌiti ꞌicë” quixun ca cacëxa.

⁸ Usa ꞌain cananuna ꞌunanin, ui uníxbi ca aín chaiti cupíshi Nucën Papa Diosan uni ꞌitima ꞌicën. Nucën Papa Diosan aín bana quicësabi oquin usaquin ꞌimicë ꞌaish cuni ca uni ainan ꞌaish asérabi Abrahamnën rëbúnqui ꞌia.

⁹ Ënëx ca Nucën Papa Diosan, Isaac bëchitisama pain ꞌicë, Abraham cá bana a ꞌicën: “Achúshi baritia ꞌicëbëa Sara tuáñu ꞌain cana minu utëcënin”.

¹⁰ Ënëribi cananuna sinánti ꞌain: Rebecanën tuá rabë́ ax ca nucën rara Isaacnënbia bëchicë ꞌiacëxa.

^11-13 A tuá rabë́ bacë́ncëma pain ꞌixun ñu ꞌatima ꞌati ꞌunáncëma ꞌianan ñu upí ꞌati ꞌunáncëma pain ꞌain, ca Nucën Papa Diosan Rebeca cacëxa: “A paínmi bacë́ncë tuá an ca canitancëxun aín ꞌanáca ñu ꞌaxunuxun ꞌaia” quixun. A tuá rabë́ aín rëbúnqui ñui ca Nucën Papa Diosan bana cuënëo ësairibi quia: “Esaúnën rëbúnqui ꞌacësamaira oquin cana Jacobnën rëbúnqui nuibatin”. Usaquin sinánquin cananuna ꞌunanin, Nucën Papa Diosan ca aín cuëëncësabi oquinshi uni ainan ꞌinun caisia, aín ñu upí ꞌacë cupíma.

¹⁴ ¿Usaquian caíscë cupí caranuna —Nucën Papa Diosan ca ꞌatimaquin sinania —quiti ꞌain? Cananuna usai quitima ꞌain.

¹⁵ An ca Moisés ësoquin cacëxa: “Axa ꞌëx cuëëncësabi oi ꞌën uni ꞌiti unicama a cana ꞌënan ꞌimiti ꞌain. A ꞌëx cuëëncësabi oquin ꞌën nuibati unicama a cana nuibati ꞌain”.

¹⁶ Usa ꞌain cananuna ꞌunanin, Nucën Papa Diosan ca aín cuëëncësa oquinshi uni nuibaquin ainan ꞌinun caisia. —ꞌË ca an caísti ꞌicë —quicë cupíma ꞌimainun a cuëënminuxun ñu upí ꞌacë cupíma, aín cuëëncësa oquinshi ca Nucën Papa Diosan ainan ꞌinun uni caisia.

¹⁷ Usaribi oi ca Faraón ñui Nucën Papa Diosan bana cuënëo ësai quia: “Camabi unían ꞌën cushi ꞌunánun cana mi Egipto menu ꞌicë unicaman ꞌapu ꞌimin. Mixmi ꞌapu ꞌicëbëtan ꞌën min menuxun ñu ꞌaia chanioia cuaquin ca camabi menu ꞌicë unin ꞌëx cana asérabi cushi ꞌai quixun ꞌunánti ꞌicën”.

¹⁸ Nucën Papa Diosan ca aín cuëëncësabi oquin uni raíri nuibaquin ainan ꞌinun ꞌimia. ꞌImianan ca uni raíri axa ꞌaisama ꞌicë usabia ꞌinun ꞌimia.

¹⁹ Usaquian ꞌacë cupí sapi camina ꞌë cati ꞌain: —¿Usa ꞌain cara usabi ꞌinun ꞌimicë ꞌixunbi uisa cupí Nucën Papa Diosan uni ꞌuchoin? ¿Usashia ꞌinuan ꞌimicë uni an cara usai ꞌinuan Nucën Papa Diosan ꞌimicë a bëtsioti ꞌic? Ca ꞌatima ꞌicën.

²⁰ Mitsúnmi ꞌë usaquin cacëxunbi cana mitsu cain, ¿Mitsux unishi ꞌaíshbi caramina Nucën Papa Diosbë cuëbicanánti ꞌain? ¿Ñutë banati ꞌunan ꞌixun cara —¿uisoti caramina ësoquin ꞌë ꞌai? —quixun an ꞌacë xanu cati ꞌic? Ca catima ꞌicën.

²¹ An ñutë ocë xanu an ca ax cuëëncësa oquin ñutë ꞌati ꞌicën. ꞌAisa tanquin ca bëtsi ñutë anun ñu xëati ꞌati ꞌicën. ꞌAnan ca a mapúbi bëtsi ñutëribi anun ñu ꞌaruti ꞌati ꞌicën.

²² Nucën Papa Diosanribi ca aín cuëëncësa oquin ꞌaia. Unin ñu ꞌaisama ꞌati ca ax cuëëníma quixuan camabi unin ꞌunánun ca Nucën Papa Diosan an ꞌaisama ñu ꞌacë uni uisoquin cara ꞌati ꞌicë usoquin ꞌati ꞌixunbi caínpainia.

²³ Caínpainquin ca uisaira oquin cara an ꞌatima ñu ꞌacë ꞌicëbi uni nuibaquin aín sinan upí ꞌimiti ꞌicë quixun camabi unin ꞌunánun, ainan ꞌinun caísa ꞌixun nu usaquin ꞌimia.

²⁴ Raírinëxa judíos uni ꞌimainun raírinëxribi judíosma uni ꞌicëbi ca Nucën Papa Diosan ainan ꞌinun nu ꞌimiaxa.

²⁵ Usoquinribi ca an aín uni, Oseas cacë, a ësoquin aín bana cuënëomiacëxa: Axa bëráma ꞌën unima ꞌiá unibi cana —mitsux camina ꞌën unibu ꞌai —quixun cati ꞌain. ꞌËnanma ꞌicë nuibáma ꞌixunbi cana —mitsux camina ꞌën nuibacë uni ꞌai —quixun cati ꞌain.

²⁶ Anuxuan —mitsux camina ꞌën unima ꞌai —quixun cá anuxunbi ca Nucën Papa Dios, axa bamatimoi tsócë, an —mitsux camina asérabi ꞌën bëchicë ꞌai —quixun uni cati ꞌicën.

²⁷ Isaíasnënribi ca Nucën Papa Diosan ꞌamicëxun judíos unibu ñuiquin ësaquin cacëxa: “Israelnën rëbúnqui ꞌaisamaira, parúnpapa cuëbí ꞌicë masisa, ꞌaíshbi ca acama ꞌitsamanëxëshi asérabi Nucën Papa Diosnan ꞌinux ië́ti ꞌicën.

²⁸ Anúan usaquin ꞌati nëtë ucëbëtan ca Nucën ꞌIbu Diosan ënë menuxun unin ꞌacë ñucama istancëxun bënë́nquinshi camabi aín quiásabi oquin ꞌati ꞌicën”.

²⁹ Ësairibi ca Isaíasnën cuënëo bana quia: Nucën ꞌIbu Dios, ax ꞌApuira ꞌixun, Israelnën rëbúnquicama aín raíri ië́micëma ꞌain cananuna Sodoma ꞌimainun Gomorra anu ꞌicë unicama ꞌiásaribiti camáxbi ꞌaíma ꞌitsían.

Judíos unicamaxa Jesucristomi catamëcëma bana

³⁰ ¿Usa ꞌain caranuna uisai quiti ꞌain? Cananuna quiti ꞌain, judíosma unibunën ca, judíos unibu ca usai ꞌiti ꞌicë quicë bana ꞌunáncëma ꞌixun Nucën Papa Diosan aín nuitu upí isnun a bana ꞌati sinánma ꞌicën. Sinánma ꞌicëbi ca aín ꞌuchacama tërë́nun Jesucristomi catamëcë cupíshi Nucën Papa Diosan aín nuitu upí isia.

³¹ Judíosma unibu usa ꞌaínbi ca, judíos unibunëx ca aín nuitu upí ꞌicë quixuan Nucën Papa Diosan isnun Moisésnën cuënëo bana quicësabi oquin ꞌaquinbi a banacama quicësabi oquiinra ꞌacëma ꞌicën.

³² Nucën Papa Diosan ca aín cuëëncësabi oquin ꞌanun ꞌë ꞌaquinti ꞌicë quixun sinani ami catamëquinma —ꞌënbi ñu upí ꞌaia ca ꞌë upí isia —quixun sináncë cupí ca Nucën Papa Diosan atu upí isáma ꞌicën. Judíos unibunën ca —Nucën Papa Diosan ca Cristo ënë menu xuti ꞌicë —quixun ꞌunánquinbi —ami catamëtishi ca unicama Nucën Papa Dios cuëëncësabi oi ꞌiti ꞌicë quixun sinántisama tanxa. Bain cuanía uni bai nëbë́tsi racácë maxáxmi tatíqui chacácë usaribi ca usa uni ꞌicën. A maxáxsa ca Cristo ꞌicën. Judíos unicamax Nucën Papa Dios cuëëncësabi oi ꞌiti ꞌaíshbi ca Cristomi sinántisama tancë cupí ax cuëëncësabi oi ꞌima.

³³ Nucën Papa Diosan bana cuënëo ca maxax ñuicësa oquin Cristo ñui ësai quia: Camina ꞌunánti ꞌain, ꞌën cana Sión cacë ëmanua, maxax achúshi ꞌinun mëníoin. Ami ca uni raírinëx tatíquianan maxax cha ꞌain chacati nipacëti ꞌicën. Usa ꞌaínbi ca axa ami catamëcë unicaman ꞌunánti ꞌicën, an ca asérabi ax quicësabi oquin atu ꞌaquinia quixun.