Romanos 8 - Kashibo-Kakataibo Biblia

Aín Bëru Ñunshin Upitan ꞌimicë́xa Nucën Papa Diosan unicama bëtsi sinánñu ꞌiti bana

¹ Usa ꞌain ca uicamax cara Cristo Jesús abë ꞌicë, acama Nucën Papa Diosan ꞌuchoima. Usa unicamax ca Cristonanma uni ꞌicësai ax cuëëncësarishi ꞌima, Nucën Papa Diosan Bëru Ñunshin Upitan sinánmicësabi oi ꞌia.

² Nuxnu ami catamëcë ꞌaish Cristo Jesúsbë achúshisa ꞌicë ca aín Bëru Ñunshin Upí nubë ꞌixun ñu ꞌatima, a ꞌaia uni Nucën Papa Diosbë ꞌitimoi bamati, a ꞌatëcënxunma ꞌanun nu ꞌimiaxa.

³ Uisa ñux cara ꞌati ꞌicë, uisa ñux cara ꞌatima ꞌicë quicë bana a ꞌunánquinbi ca aín sinan upíma ꞌixun unin a bana quicësabi oquin ꞌatima ꞌicën. Usa ꞌaínbi ca unían a bana quicësabi oquin ꞌanun quixun Nucën Papa Diosan aín Bëchicë, nusaribi uni ꞌinun, xuacëxa. Xutancëxun ca aín Bëchicë, ꞌuchañuma ꞌaíshbia camabi unin ꞌucha cupí bamanun ꞌimiquin uni, aín ꞌuchacama tërë́anan ꞌuchatëcëanxma ꞌinun mëníocëxa.

⁴ Nuxnu uisa ñu ꞌati cara upí ꞌicë quicë banaxa quicësabi oquin ꞌanan, nunbi ꞌatima ñu ꞌati sinánquinbi tënëquin a ꞌaíma, Nucën Papa Diosan Bëru Ñunshin Upitan sinánmicësabi oi ꞌinun ca aín Bëchicë bamanun Nucën Papa Diosan ꞌimiacëxa.

⁵ An Jesucristomi sinánquinma aín cuëëncësa oquinshi ꞌati sináncë unin ca ënë nëtënu ꞌicë ñuishi ꞌati sinania. Usa ꞌaínbi ca axa Jesucristomi sináncë unin Nucën Papa Diosan Bëru Ñunshin Upitan sinánmicë ꞌixun an sinánmicësabi oíshi ꞌiti sinania.

⁶ An Nucën Papa Dios cuëëncësoi ꞌiti sinánquinma ënë nëtënu ꞌicë ñuishi sináncë uni, ax Nucën Papa Diosnanma ꞌaish abë ꞌitimoi bamati ꞌicën. Usa ꞌaínbi ca an Nucën Papa Diosan Bëru Ñunshin Upitan sinánmicësabi oíshi ꞌiti sináncë uni, ax Nucën Papa Diosbë upí ꞌaish abë nëtë́timoi tsóti sinani chuámarua tani cuëënia.

⁷ An ënë nëtënu ꞌicë ñuishi sináncë uni an ca Nucën Papa Dios cuëëncësabi oi ꞌiti sinanima. Usa ꞌixun ca asérabi aín bana ꞌunáncëma ꞌaish ami nishcësa ꞌixun añu ñu cara ꞌaisa tania a ñu ꞌaia. Usaquin ꞌaquin ca Nucën Papa Diosan bana cuaisama tanan a bana quicësabi oquin ꞌaima.

⁸ Usa ꞌain ca axa ënë nëtënu ꞌicë ñuishi sinani atun cuëëncësa oíshi ꞌicë unicama an Nucën Papa Dios cuëëmima.

⁹ Usa ꞌaínbi camina mitsux usama ꞌain. Nucën Papa Diosan Bëru Ñunshin Upí mitsubë ꞌain camina an ënë nëtënu ꞌicë ñuishi sináncë unin sináncësa oquin sinánquinma, Nucën Papa Diosan Bëru Ñunshin Upitan sinánmicësabi oquinshi sinanin. Uicamax cara aín Bëru Ñunshin Upíñuma ꞌicë, acamax ca Cristonanma ꞌicën.

¹⁰ Aín ꞌucha cupí ca camabi uni bamaia. Usa ꞌaínbi camina mitsux, Cristo mitsubë cupí, Nucën Papa Diosan iscëx upí ꞌain. Usa ꞌain ca mitsun namíxa bamacëbëbi mitsun bëru ñunshin bamatimoi Nucën Papa Diosbë ꞌiti ꞌicën.

¹¹ Nucën Papa Dios, an Jesús bamacëbi baísquimia, aín Bëru Ñunshin Upí mitsubë ꞌixun ca an Cristo Jesús bamacëbi baísquimia anbi mitsuribi bamacëbi Cristo utëcëncëbëtan baísquimiti ꞌicën, aín Bëru Ñunshin Upí mitsubë ꞌain.

¹² ꞌËn xucë́antu, mitsu cana cain, nux Jesucristonan ꞌaish aín Bëru Ñunshin Upí nubë ꞌain cananuna ënë nëtënu ꞌicë ñuishi sinani nux cuëëncësa oi ꞌitima ꞌain.

¹³ Axa ënë nëtënu ꞌicë ñuishi sinani aín cuëëncësa oíshi ꞌicë uni ax ca Nucën Papa Diosnanma ꞌaish abë ꞌitima ꞌicën. Usa ꞌaínbi ca an Nucën Papa Diosan Bëru Ñunshin Upitan sinánmicësabi oquin ñu ꞌatima ꞌati ëncë uni, ax cuni ainan ꞌaish Nucën Papa Diosbë ꞌiti ꞌicën.

¹⁴ Uicaman cara an sinánmicëxun Nucën Papa Diosan Bëru Ñunshin Upitan sinánmicësabi oquin ꞌaia, acamax ca asérabi Nucën Papa Diosan bëchicë ꞌicën.

¹⁵ Usa uni camina mitsux ꞌain. Mitsu aín bëchicë ꞌimiquin ca Nucën Papa Diosan mitsúxmi bëráma ꞌiásaribiti mitsun ꞌucha cupí ami racuë́tëcënun ꞌimicëma ꞌicën. Aín Bëru Ñunshin Upí an ca, ainan ꞌaish cuëënquinu Nucën Papa Dios, Paponun nu ꞌimia.

¹⁶ Aín Bëru Ñunshin Upitanbi ca nun nuitu mëúxun nu ꞌunánmia, nux cananuna asérabi Nucën Papa Diosan bëchicë ꞌai quixun.

¹⁷ Aín bëchicë ꞌicë ca Nucën Papa Diosan ax quicësabi oquin nu ꞌaquianan aín nëtënu abë ꞌinun nu ꞌimiti ꞌicën. Ainan ꞌicë ca Nucën Papa Diosan Cristosaribi nu ꞌimiti ꞌicën. Cristonan ꞌixúnu tëmëraquinbi ax cuëëncësabi oquin ꞌati ëncëma ꞌicë ca Nucën Papa Diosan nuribi aín quicësabi oquin aín nëtënu Cristobë ꞌinun nu ꞌimiti ꞌicën.

¹⁸ ꞌËn cana —asérabi ca usai ꞌiti ꞌicë —quixun ꞌunanin. Ënë nëtënuax Cristonan cupí tëmëracë ꞌixunbi cananuna Cristobë aín nëtënu ꞌaish cuëënquin —ꞌën tëmërati ca asábi ꞌiaxa —quixun sinánti ꞌain.

^19-20 Cristo utëcëntamainun ca axbi ꞌiti ꞌaíshmabi, usai ꞌitioquian Nucën Papa Diosan mëníosabi oi camabi ñu tëmëranan cëñutia. Unin ꞌucha cupí usai tëmëranan chëquiti ꞌixunbi ca camabi ñu ꞌimainun camabi unínribi anúinra ꞌaímai tëmëranan chëquiti nëtë cainia.

²¹ A nëtë ucëbëtan ca Nucën Papa Diosan aín bëchicëcama cuëëni Cristosaribi ꞌinun ꞌimiti ꞌicën. ꞌImianan ca camabi ñuxa chëquitëcënunma ió ꞌimiti ꞌicën. Uisairai cara Nucën Papa Diosan bëchicëcama Cristosaribi ꞌiti ꞌicë quixun ca camabi ñu, a Nucën Papa Diosan unio, an istisa tanquin Nucën Papa Diosan atu isminun quixun bënë́quin cainia.

²² Cananuna ꞌunanin, nëtë ióñu a pain uniocëxbi uni ꞌucha cupía camabi ñu, uniribi, tëmëranan chëquiti oquin Nucën Papa Diosan ꞌimiá ꞌaish ca bërí usai ꞌia quixun. Usa ꞌixunbi ca Nucën Papa Diosan ióotëcënun cainia, anun bacë́nti nëtë́an xanun tëmëraquin aín bacë́nti caíncë, usaribi oquin.

²³ Camabi ñun a Nucën Papa Diosan ióotëcënun caínmainun cananuna nunribi Nucën Papa Diosan nu ióotëcënun bënë́quin cainin. Nucën Papa Diosan nu aín Bëru Ñunshin Upí nubë ꞌinun ꞌináncë ꞌain cananuna ꞌunanin, an ca asérabi camabi aín bana quicësabi oquin nu ꞌimiti ꞌicë quixun. Usaquin ꞌunánquin cananuna nun aín bëchicë ꞌaish aín nëtënu bëtsi namiñu ꞌiti cainin.

²⁴ Nux Cristomi catamëti ainan ꞌaish abë nëtë́timoi tsónun ië́miquin ca Nucën Papa Diosan uisoquin cara nu ꞌimiti ꞌicë quixun isnuxun caínun nu ië́miacëxa. Nua camabi an cacësabi oquin ꞌimicë ꞌixun cananuna, bëtsi cananuna ꞌiti ꞌai quixun sinánquin caíntsianxma.

²⁵ Usa ꞌaínbi cananuna usaquin nu ꞌimicëma pain ꞌixun usai ꞌiti cainin. Cananuna —bëtsi cana ꞌiti ꞌai —quixun sinánquinbi uisa caranuna ꞌiti ꞌai quixun ꞌunánquinmabi a isnuxun —asérabi ca usai ꞌiti ꞌicë —quixun cuëënquin cainin.

²⁶ Uisa caranuna ꞌiti ꞌai quixun isnuxun cainia ca Nucën Papa Diosan Bëru Ñunshin Upí an nuxnu tëmëraiabi nu ꞌaquinia. An nu ꞌaquinun quixun caquinbi cananuna uisaquin cai carana Nucën Papa Diosbë banati ꞌai quixun upí oquin ꞌunaniman. Usa ꞌaínbi ca Nucën Papa Diosan Bëru Ñunshin Upí anbi nu Nucën Papa Dios ñucáxunia. Usoquin nu ꞌaquinquin ca nun nu a Nucën Papa Dios ñucácëma banacama a nu ñucáxunia.

²⁷ An ca Nucën Papa Dios cuëëncësabi oquin aín unicama a ñucáxunia. Usa ꞌain ca Nucën Papa Dios, an camabi unin nuitu mëu sináncë ñu ꞌunáncë, an uisa ñu cara aín Bëru Ñunshin Upitan nu ñucáxunia a cuatia.

Uisai cara ainan ꞌinun Nucën Papa Diosan caíscë unicama ꞌiti ꞌicë quicë bana

²⁸ Cananuna ꞌunanin, Nucën Papa Diosan ca uisa ñu cara ꞌia abi, ax ami sináncë unicamaxa an ꞌaquincëx, upí ꞌinun mëníoxunia, atúan ax cuëëncësabi oquin ñu ꞌamainun. A unicama ax cuëëncësabi oquin ainan ꞌinun sinánmicë ꞌixun ca Nucën Papa Diosan usoquin ꞌaia.

²⁹ Ui unicama cara ainan ꞌiti ꞌicë quixun ꞌunánquin ca Nucën Papa Diosan aín Bëchicënëxa aín unicaman cushi ꞌinun atux aín Bëchicë ꞌicësaribiti ꞌinun mëníocëxa.

³⁰ Uicamax cara usai ainan ꞌiti ꞌicë quixun ꞌunánquin ca Nucën Papa Diosan acama an sinánmicëxa ami catamëtia atun ꞌuchacama tërë́nquin ainan ꞌimiaxa. ꞌImiquin ca atux aín nëtënu abë ꞌiti ꞌimiaxa.

³¹ ¿A ñucama sinánquin cananuna ꞌunanin, Nucën Papa Diosan bërúancë ꞌicë ca an ëncëma ꞌicë uínbi uisashi cara oquinbi a nubë ënanamima.

³² An ca —ꞌën Bëchicë ca bamatima ꞌicë —quiquinma nun ꞌuchacama cupía bamanun ënë nëtënu aín Bëchicë xuacëxa. Usa ꞌixun ca aín Bëchicë cupínu nux upitax tsónun nu ꞌimianan anun nu upitax tsóti ñucamaribi nu ꞌinánti ꞌicën.

³³ ¿An ainan ꞌinun caíscë unicamaxa an iscëx upí ꞌain cara uin Nucën Papa Dios —min unix ca ꞌuchaxa —quixun cati ꞌic? Usaquin cacëxunbia an —ax ca ꞌuchañuma ꞌicë —quixun cati ca Nucën Papa Dios ꞌicën.

³⁴ ¿Uin cara nu ꞌuchoti ꞌic? Cristo bamacëbia Nucën Papa Diosan baísquimicë, an ca aín nëtënu abë ꞌApu ꞌaish aín mëqueu ꞌixun, nu Nucën Papa Dios ñucáxunia. Ñucáxuncë ꞌixun ca an asérabi nu ꞌuchotima ꞌicën.

³⁵ ¿Uinu ꞌicë unin cara Cristocëñun nu ënananmiti ꞌic? Ca ꞌatima ꞌicën. Nuxnu tëmëranan masá nuituanan bëtsi unin bëtsi bëtsi ocë ꞌianan ꞌacëñuma ꞌianan chupañuma ꞌianan bamatisa ꞌianan unin ꞌaisa tancë ꞌiti, a ñucamanribi ca Cristocëñun nu ënananmitima ꞌicën.

³⁶ Ësai ca Nucën Papa Diosan bana cuënëo quia: Nuxnu minan ꞌicë ca unin numi nishquin nuibaquinma nu bëtsi bëtsi oia. ꞌAracacë ñuinacama ꞌanuxun ꞌacësa oquin ca nu ꞌaisa tanquin bëtsi bëtsi oia.

³⁷ Usa ñu ꞌicëbëtanbia Cristonën nu nuibaquin cushiocëx cananuna ami catamëti ëníma amiira cushiin, tëmëracëma pain ꞌaíshnu ꞌicësamairai.

³⁸ Usa ꞌain cana asérabi ꞌunanin, Nucën Papa Dioscëñun an nu ënananmiti ñu ca ꞌaíma ꞌicën. Nux bamati ꞌimainun nun tsóti ꞌimainun ángelcama ꞌimainun ñunshin ꞌatimacama ꞌimainun uisa cushi cara, acama ꞌimainun axa bërí uisai cara ꞌicë uisa ñucama cara, ꞌimainun axa uisai cara ꞌiti, a ñucamanbi ca Nucën Papa Dioscëñun nu ënananmitima ꞌicën.

³⁹ Ñunshin ꞌatimanën ꞌapucama ꞌimainun, uisa ñunshin cara, acama ꞌimainun ënë nëtënu ꞌicë ꞌapucamaribi ꞌimainun axa naí manámi ꞌicëcama ꞌimainun axa naí meu ꞌicëcamaribi, ꞌimainun uisa ñucama cara Nucën Papa Diosan unio ꞌicë, acamanbi ca Nucën Papa Dioscëñun nu ënananmitima ꞌicën. Uisaira oquin cara an nu nuibatia quixun ca Nucën Papa Diosan Jesucristo ënë menu xuquin nu ismiacëxa.