Romanos 7 - Kashibo-Kakataibo Biblia

Usai ca uni ꞌiti ꞌicë quicë bana

¹ ꞌËn xucë́antu, mitsúnribi a bana ꞌunáncë ꞌixun camina ꞌunanin, bamacëma pain ꞌixuinshi ca unin atúan ax quicësabi oquin ꞌati bana axa quicësabi oquin ꞌati ꞌicë quixun. Bamaxun cuni ca a bana quicësabi oquin ꞌatima ꞌicën.

² Ësa ca. Nun ax quicësabi oquin ꞌati bana ca quia, bënëñu xanun ca aín bënë bamacëma pain ꞌicë ëntima ꞌicën. Aín bënë bamacëbë cuni ca bënutisa tani bënuti ꞌicën.

³ Aín bënë bamacëma ꞌaían bëtsi unibë ꞌiti ca ꞌucha ꞌicën. Usa ꞌaínbi ca aín bënë bamacëbëtan ꞌaisa tanquin uni itsi bënëoti ꞌicën. Usaquian bënëoti ca ꞌuchama ꞌicën.

⁴ ꞌËn xucë́antu, usaribi camina mitsux ꞌain. Usai uni ꞌiti bana quicësa oíshi ꞌiá ꞌaíshbi camina bërí abë axa bamaxbi baísquicë Cristo ami catamëti, aín bana quicësabi oíshi ꞌin. Usa ꞌixun camina ax cuëëncësabi oi ꞌiquin Nucën Papa Dios cuëënmin.

⁵ Ainanma pain ꞌaish nux cuëëncësabi oi ꞌiquin cananuna, ñu ꞌatima ꞌati ca ꞌaisama ꞌicë quicë bana ꞌunánxunbi nun sinan upíma ꞌixun, usa ñu ꞌacën. Usa ñu ꞌacë ꞌaish cananuna Nucën Papa Diosbë ꞌitimoi bamati ꞌiacën.

⁶ Usai ꞌiá ꞌaíshbi cananuna nun, ax quicësabi oquin ꞌati bana axa quicësabi oquin ꞌacë cupíma, Cristomi catamëtishi ainan ꞌixun aín Bëru Ñunshin Upitan sinánmicëxun bëtsi oquin sinánquin Nucën Papa Dios cuëëncësabi oquinshi ꞌain.

Nun sinán upíma cupí cananuna ꞌatima ñu ꞌai quicë bana

⁷ A bana, uisa ñu cara ꞌati ꞌicë, uisa ñu cara ꞌatima ꞌicë quicë, a banacama ca asábi ꞌicën. A bana ꞌaíma ꞌain cananuna uisa ñuxira cara ꞌatima ꞌicë quixun ꞌunánma ꞌitsían. A bana “mix camina bëtsi unin ñu minan ꞌinun cuëëncë ꞌitima ꞌai” quicëma ꞌain cananuna usai ꞌiti ca ꞌaisama ꞌicë quixun ꞌunánma ꞌitsían.

⁸ A bana usai ca uni ꞌitima ꞌicë quicë, ax asábi ꞌaínbi cananuna nun sinan upíma ꞌaish, a bana ꞌunáncë ꞌaíshbi usai ꞌicë cupí ꞌuchoti ꞌiacën. A bana, usai ca uni ꞌitima ꞌicë quicë, ax ꞌaíma ꞌain ca anun nu ꞌuchoti bana ꞌaíma ꞌitsíanxa.

⁹ ꞌËn uisa ñu cara ꞌati ꞌicë, uisa ñu cara ꞌatima ꞌicë quicë bana ꞌunánma ꞌixun cana ñu ꞌaisama ꞌaquinbi usaquin ꞌati ca ꞌaisama ꞌicë quixun ꞌunánma ꞌain. Usai ꞌitancëxunbi cana a bana ꞌunáncën. ꞌUnánquin cana ñu ꞌatima ꞌati ax ca ꞌuchaira ꞌicë quixun ꞌunánxunbi ꞌacë ꞌaish ꞌën ꞌucha cupí Nucën Papa Diosbë ꞌitimoi bamati ꞌiacën.

¹⁰ Ësa ca. A isía ax cuëëncësabi oi, usai aín uni ꞌinuan Nucën Papa Diosan ꞌinan bana, ax quicësabi oi ꞌicëma cupí ꞌuchocë ꞌaish cana Nucën Papa Diosbë ꞌitimoi bamati ꞌiacën.

¹¹ A bana quicësabi oquin ꞌai cana ꞌuchatima ꞌai quixun sinaníbi a bana quicësabi oíira ꞌicëma ꞌixun cana, uisaira carana ꞌuchai quixun sinani bënë́acën. A bana asábi ꞌaínbi a bana cupí ꞌuchocë ꞌaish cana Nucën Papa Diosbë ꞌitimoi bamati ꞌiacën.

¹² Usa ꞌain cananuna ꞌunanin, nun ax quicësabi oquin ꞌati banax ca upí ꞌicën, a bana uisa ñu cara ꞌati ꞌicë, uisa ñu cara ꞌatima ꞌicë quicë, ax ca asérabi upí ꞌicën.

¹³ ¿A bana asérabi upí ꞌaínbi caranuna a bana cupí Nucën Papa Diosbë ꞌitimoi bamati ꞌain? Usama ca. Nun sinan upíma ꞌixun ñu ꞌatima ꞌai cananuna Nucën Papa Diosbë ꞌitimoi bamati ꞌiacën. Usai ꞌiquin cananuna ꞌunáncën, ꞌuchati ca ꞌaisama ꞌicë quixun. Usa ꞌixun cananuna uisa ñu cara upí ꞌicë, uisa ñu cara ꞌaisama ꞌicë quicë bana axa asérabi ꞌaínbi ax quicësabi oquin ꞌacëma ꞌaish cananuna ꞌaisama ꞌai quixun ꞌunáncën.

¹⁴ Cananuna ꞌunanin, a bana uisa ñu cara ꞌati ꞌicë, uisa ñu cara ꞌatima ꞌicë quicë, ax ca upí ꞌicë quixun. A bana asábi ꞌaínbi cananuna Jesucristonanma ꞌaish nun sinan ꞌaisama ꞌixun ñu ꞌatima ꞌatishi sináncën.

¹⁵ Upí ñu ꞌaisa tanquinbi cananuna nun sinan upíma ꞌixun ꞌaiman. A ꞌaquinma cananuna a nun ꞌaisama tancë ñu a ꞌain. Uisa ꞌixun carana ꞌën a ꞌaisa tancë ñu upí ꞌaquinma a ꞌën ꞌaisama tancë ñu ꞌatima a ꞌai quixun cana ꞌunaniman.

¹⁶ Ñu ꞌaisama ꞌacë ꞌixunbi, usaquin ñu ꞌati ca ꞌaisama ꞌicë quicë bana ꞌunánquin, ꞌën usa ñu ꞌaisama tania isquin ca unin ꞌunánti ꞌicën, ꞌën sináncëx ca a bana upí ꞌaish cuati ꞌicë quixun.

¹⁷ ꞌAisama tanquinbi cananuna ñu ꞌatima ꞌain, nun sinan upíma cupí.

¹⁸ Ënëx ca ësa ꞌicën. Cananuna ꞌunanin, nun sinan upíma ꞌixun cananuna ñu upí ꞌatima ꞌain. Ñu upíshi ꞌaisa tanquinbi cananuna nun sinan upíma ꞌixun ꞌaiman.

¹⁹ Nun ꞌaisa tancë ñu upí a cananuna ꞌaiman. Nun ꞌaisama tancë ñu ꞌatima a cananuna ꞌain.

²⁰ Nun ñu ꞌatima ꞌatëcëinsama tanquinbi ꞌacë ax ca nunbi cuëënquin ꞌacëma ꞌicën. Nun sinan upíma ꞌixun ꞌacë ca ax ꞌicën.

²¹ Nun ꞌunáncëx ca ësa ꞌicën: Ñu upíshi ꞌati sinánquinbi cananuna bënë́nquinshi ñu ꞌatima ꞌatëcënin.

²² Nun nuitu mëu cananuna asérabi Nucën Papa Dios cuëëncësabi oquin ꞌaisa tanin, axa usaínu ꞌinun quicë bana ca upí ꞌicë quixun ꞌunánquin.

²³ Usaquin ꞌunánquinbi cananuna nun sinan ꞌatima ꞌixun bëtsi oquin sinanin. Usaquin sinánquin cananuna ñu ꞌatima ꞌatëcënti sinanin. Sinántancëxun cananuna ꞌatëcënin.

²⁴ Usa ꞌaish cananuna masá nuituirai sináncasmain. ¿Nun sinan upíma ꞌaish Nucën Papa Diosbë ꞌitimoi bamaima ꞌinun cara uin nu ië́miti ꞌic?

²⁵ An nu ië́miti ax ca Nucën Papa Dios ꞌicën, Nucën ꞌIbu Jesucristo cupí. An ca nu ië́miti ꞌicë quixun ꞌunánquin cananuna —asábi ca —quixun cain. Usa ꞌain cananuna ꞌunanin, Nucën Papa Dios cuëëncësabi oquin ꞌati ꞌixunbi cananuna nun sinan upíma ꞌixun ñu ꞌatima ꞌain. Usaquin ꞌaxunma ꞌanun ca Nucën Papa Diosainshi nu ië́miti ꞌicën.