Romanos 5 - Kashibo-Kakataibo Biblia

Jesucristomi catamëcë cupía uni Nucën Papa Diosan iscëx upí ꞌaish xënibua ꞌaínbi abë ꞌiti bana

¹ Usai nux Nucën ꞌIbu Jesucristomi catamëcë ꞌicë, a cupí ca Nucën Papa Diosan nu upí isia. Usaquian iscëx cananuna abë upí ꞌain, Jesucristo cupí.

² Jesucristomi catamëcë cupíshi cananuna uisaira oquin cara Nucën Papa Diosan nu nuibaquin nu ainan ꞌinun ꞌimia quixun ꞌunanin. Usoquin ꞌunani cuëënquin cananuna, nux cananuna Nucën Papa Diosnan ꞌaish aín nëtënu abë ꞌiti ꞌai quixun ꞌunanin.

³ Usaquin sinánquin cananuna uisai cara ñu ꞌicëbëtanbi ami sinánti ëníma cuëënin. Cananuna ꞌunanin, tëmëraquinbi tanshiquin cananuna upiti Jesucristomi catamëti ꞌunánti ꞌai quixun.

⁴ Tëmëraíbi an ꞌimicëx masá nuitutima ami catamëcë ꞌaish cananuna Nucën Papa Diosan iscëx upí ꞌain. An iscëx upí ꞌixun cananuna ꞌunánti ꞌain, asérabi cananuna aín nëtënu abë ꞌiti ꞌai quixun.

⁵ An ca —asérabi camina ꞌëbë ꞌiti ꞌai —quixun caquin nu paraníma. An ca aín Bëru Ñunshin Upí nubë ꞌinun nu ꞌinánxa. Nubë ꞌixun ca nu ꞌunánmia uisaira oquin cara Nucën Papa Diosan nu nuibatia quixun. An ca asérabi nu nuibatia quixun ꞌunánquin cananuna, nux cananuna asérabi aín nëtënu abë ꞌiti ꞌai quixun ꞌunanin.

⁶ Nucën Papa Diosan nu nuibaquin mëníosabi oi ca, nuxbi nun ꞌucha tërëni ië́tima ꞌaínbi Cristo aín bamati nëtë ucëbë, unicaman ꞌucha tërë́nux bamacëxa.

⁷ Uinu ꞌicë uníxbi ca bëtsi uni cupí bamatima ꞌicën, ax upí uni ꞌaínbi. Usa ꞌaínbi sapi ca asérabi upí uni ꞌicë axa bamati rabanan cuni bëtsi uni bamati ꞌicën.

⁸ Usa ꞌaínbi ca Nucën Papa Diosan nuxnu ꞌuchañu ꞌicëbi nu nuibaquin nun ꞌucha tërë́nuxa Cristo bamanun mëníocëxa. Usaquian mënío sinánquin cananuna ꞌunanin, uisaira oquin cara nu nuibatia quixun.

⁹ Cristo bama cupí nun ꞌucha tërë́ncë ꞌaish cananuna Nucën Papa Diosan iscëx upí ꞌain. Usa ꞌaish cananuna anúan Nucën Papa Diosan camabi unin ñu ꞌacë isti nëtën an iscëx upí ꞌaish asérabi ꞌuchocëma ꞌiti ꞌain.

¹⁰ Nuxnu ꞌatimaquinshi sinani ami sináncëma ꞌicëbi ca aín Bëchicë bama cupí Nucën Papa Diosan nun ꞌucha tërë́nquin nu nuibaquin ainan ꞌimiaxa. Nu nuibaquin ainan ꞌimicë ꞌicë ca Jesucristo bamaxbi baísquicë ax nubë ꞌixun nuxnu asérabi upí ꞌinun nu ꞌimia.

¹¹ Usaquin ꞌimicëx cananuna —Nucën ꞌIbu Jesucristo a cupí cana Nucën Papa Diosnan ꞌaish abë upí ꞌai —quixun ꞌunani cuëëinra cuëënin.

Adán ꞌiá ꞌimainun Jesucristo usai ꞌiá bana

¹² Usa ꞌain ca an pain ñu ꞌatima ꞌá achúshi uni a cupíshi camabi unin ñu ꞌatima ꞌati ꞌunánquin ꞌaia. Aín ꞌucha cupí ca a uni bamacëxa. A uníxa ꞌatima ñu ꞌatancëx bama ꞌain ca camabi uni atun ꞌucha cupí aín bamati nëtë ucëbë Nucën Papa Diosbë ꞌitimoi bamaia.

¹³ Unían ax quicësa oquin ꞌati bana ꞌaíma pan ꞌaínbi ca unin ñu ꞌatima ꞌati ꞌunáncëxa. Usa ꞌaínbi ca ax quicësabi oquin ꞌati bana ꞌaíma ꞌain, anun uni ꞌuchoti bana ꞌaíma ꞌiacëxa.

¹⁴ Usa ꞌaínbi ca Moisés ꞌaíma pan ꞌain Adanën rëbúnquicama ꞌuchatancëx bamacëxa, Adanëxa Nucën Papa Diosan cacësa oi ꞌima ꞌuchásari ꞌimabi. Adán cupía camabi uni ꞌuchacë ꞌaínbi ca axa a caxu uti a cupíira camabi unin ꞌucha tërë́ncë ꞌiti ꞌicën.

¹⁵ Adán cupía unicama ꞌuchañu ꞌaínbi ca Nucën Papa Diosan a ꞌuchacama tërë́ncë ꞌinun mëníocëxa. Adanëxa Nucën Papa Diosmi ꞌuchacë cupí ca ꞌaisamaira uni Nucën Papa Diosbë ꞌitimoi bamaia. Usa ꞌaínbi ca achúshi uni, Jesucristo, a cupía ꞌaisamaira uni cupíoima abë nëtë́timoi ꞌinun Nucën Papa Diosan mëníocëxa.

¹⁶ Achúshi uníxa ꞌucha cupí ca camabi uni Nucën Papa Diosbë ꞌitimoi bamati ꞌiacëxa. Usa ꞌaínbi ca Nucën Papa Diosan atun ꞌuchacama ꞌitsaira ꞌicëbi acama tërë́nquin nëtë́timoi abë ꞌinun uni ië́mia, cupí ñucáquinmabi. Adanëxa ꞌuchatancëx bama ꞌaían camabi uni usaribiti ꞌucha ꞌaínbi ca Cristo cupíira, atun ꞌuchacama tërë́ncë ꞌaish, abë upí ꞌinun Nucën Papa Diosan uni ië́mia.

¹⁷ Achúshi unia ꞌuchá cupí ca camabi uni ꞌuchañu ꞌaish Nucën Papa Diosbë ꞌitimoi bamaia. Usa ꞌaínbi ca uicama cara Nucën Papa Diosan nuibaquin atun ꞌucha tërë́nquin upí isia, acamax Jesucristo cupí bëtsi sinánñu ꞌixun, upí ñu ꞌatancëx Nucën Papa Diosbë nëtë́timoi aín nëtënu ꞌiti ꞌicën.

¹⁸ Ënëx ca ësa ꞌicën. Adán cupía camabi uni ꞌuchocë ꞌaínbi ca Nucën ꞌIbu Jesucristonën bamaquin camabi uníxa ꞌuchocëma ꞌianan Nucën Papa Diosnan ꞌinun mëníocëxa.

¹⁹ Achúshi uni, Adán, axa Nucën Papa Dios quicësabi oi ꞌiáma cupí ca ꞌaisamaira uni ꞌuchañu ꞌicën. Usa ꞌaínbi ca bëtsi uni, Jesucristo, axira Nucën Papa Dios quicësabi oi ꞌiá cupí ꞌaisamaira uni Nucën Papa Diosan upí isia.

²⁰ Unían —nux cananuna ꞌuchañuira ꞌaish upíma ꞌai —quixun ꞌunánun ca Nucën Papa Diosan uisai cara uni ꞌiti ꞌicë quicë bana Moisés cuënëomiacëxa. ꞌUchañuira ꞌicëbi uni nuibairaquin ca Nucën Papa Diosan atun ꞌuchacama tërë́ncë ꞌinun mëníocëxa.

²¹ Usoquin mëníocëx ca camabi uni aín ꞌucha cupí Nucën Papa Diosbë ꞌitimoi bamati ꞌaíshbi Nucën ꞌIbu Jesucristo cupí aín ꞌucha tërë́ncë ꞌianan bëtsi sinánñu ꞌixun upí ñu ꞌatancëx Nucën Papa Diosan nëtënu abë xënibua ꞌaínbi ꞌiti ꞌicën.