Romanos 16 - Kashibo-Kakataibo Biblia

Bëtsi bëtsi uni camina ꞌë caxúnti ꞌai quixun Pablonën ca

¹ Nucën chirabacë, Febe, a ñuiquin cana mitsu cain, ax ca asérabi aín nuitu upí ꞌicën. An ca Cencrea ëmanuxun axa Jesucristomi catamëcë xanucama ꞌaquianxa.

² Usa ꞌicë camina mitsúxmi Nucën ꞌIbu Jesucristonan ꞌaish bëtsibë bëtsibë ꞌaquianancësabi oquin Feberibi upí oquin bixun ax cuëëncësabi oquin ꞌaquinti ꞌain, an ꞌitsa xanu ꞌaquianan ꞌëribi ꞌaquincë cupí.

³ Priscila ꞌimainun Aquila, an ꞌëbëtan Cristo Jesús ñuiquin bana ñuixuncë, a camina bërúanxa ꞌinun ꞌë caxunti ꞌain.

⁴ Atun ca, —Pablo ꞌaquini sapi cananuna bamati ꞌai —quixun ꞌunánquinbi ꞌë bamati ꞌicëbi ꞌaquinquin ië́miaxa. Usaquin ꞌë ꞌacë cupí cana —asábi ca —quixun cain. ꞌËinshima ca judíosma unicama a ꞌën bana ñuixuncë, acamanribi, Priscilabëtan Aquilanën ꞌë ꞌaquincë cupí, —asábi ca —quixun cai cuëënia.

⁵ Axa Jesucristomi catamëcë ꞌaish Priscila ꞌimainun Aquilanën xubunu timë́cëcamaribi camina bërúanxa ꞌinun ꞌë caxunti ꞌain. Acama ꞌimainun camina, ꞌën nuibacë Epeneto, ax paían Acaya menuax Cristomi catamëcë, aribi bërúanxa ꞌinun ꞌë caxunti ꞌain.

⁶ María an mitsu ꞌitsa oquin ꞌaquincë, aribi camina bërúanxa ꞌinu ꞌë caxunti ꞌain.

⁷ Adrónico ꞌimainun Junias, ꞌën aintsi rabë́, axa ꞌëcëñun sipuacë ꞌicë, a camina bërúanxa ꞌinun ꞌë caxunti ꞌain. —Atux ca asérabi upí uni rabë́ ꞌicë —quixun ca a Jesucristonën bana ñuixunun caíscë unicaman ñuia. ꞌËx Cristomi sináncëma pain ꞌain ca atux pain Cristomi sináncëxa.

⁸ Amplias axribi Nucën ꞌIbu Jesucristonan ꞌaish ꞌën nuibacë ꞌicë, a camina bërúanxa ꞌinun ꞌë caxunti ꞌain.

⁹ Urbano an nubëtan Cristo Jesús ñuiquin bana ñuixuncë, a ꞌimainun Estaquis, ꞌën nuibacë, aribi camina bërúanxa ꞌinun ꞌë caxunti ꞌain.

¹⁰ Apeles, camaxunbia asérabi Cristonan ꞌicë ꞌunáncancë, a ꞌimainun Aristóbulonën xubunu ꞌicëcamaribi camina bërúanxa ꞌinun ꞌë caxunti ꞌain.

¹¹ ꞌËn aintsi Herodión, a ꞌimainun Narcisonën xubunu ꞌicëcama, axa Nucën ꞌIbu Jesucristomi catamëcë, aribi camina bërúanxa ꞌinun ꞌë caxunti ꞌain.

¹² Trifena ꞌimainun Trifosa, a xanu rabë́ Nucën ꞌIbu Jesucristomi catamëcë ꞌixun tëmëraquinbi ax cuëëncësabi oquin ꞌacë, aribi camina bërúanxa ꞌinun ꞌë caxunti ꞌain. Nucën chirabacë Pérsida, a nun sináncë, anribi tëmëraquinbi upí oquin Nucën ꞌIbu Jesucristo cuëëncësabi oquin ñu ꞌacë, aribi camina bërúanxa ꞌinun ꞌë caxunti ꞌain.

¹³ Rufo, axa asérabi Nucën ꞌIbu Jesucristo cuëëncësabi oi ꞌicë uni, a ꞌimainun aín tita, a ꞌënribi titocë, a camina bërúanxa ꞌinun ꞌë caxunti ꞌain.

¹⁴ ꞌImainun camina Asíncrito, Flegonte, Hermas, Patrobas, Hermes ꞌimainun acamabë ꞌicëcama axa Jesucristomi catamëcë, acama bërúanxa ꞌinun ꞌë caxunti ꞌain.

¹⁵ ꞌImainun camina Filólogo, Julia, Nereo ꞌimainun aín chirabacë, ꞌimainun Olimpas, ꞌimainun acamabë ꞌicëcama axa Jesucristomi catamëcë, acama bërúanxa ꞌinun ꞌë caxunti ꞌain.

¹⁶ Jesucristo cupí mitsun nuitu upí ꞌaish camina bëtsibë bëtsibë nuibanani bërúanx ꞌinun cananti ꞌain. Camabi ëmanu ꞌicë axa Cristomi catamëcë unicamax timë́xun ca mitsu bërúanxmi ꞌicánun ꞌën mitsu canun ꞌë caxa.

¹⁷ ꞌËn xucë́antu, cana mitsu cain, bëtsi bëtsi unix Jesucristomi catamëcë ꞌaish mitsubë timë́cë ꞌixunbi ca an mitsu bana ñuixuncë unin ꞌunánmicësabi oquin ꞌaima. Usa unin ca uni raíri bëtsibë bëtsibë cuëbicanánmiquin ꞌatimaquin sinánun ꞌimia. Usai ꞌicë uni abë camina nitima ꞌain. Abë camina ënánanti ꞌain.

¹⁸ Usa unin ca Nucën ꞌIbu Jesucristo cuëëncësabi oquin ꞌaquinma aín cuëëncësa oquinshi ꞌaia. Atux ca an Nucën Papa Diosan bana upí oquin ꞌunáncëma unicamabë upiti banaibi cëmëia. Usaquin paránquin ca aín bana cuanun uni sinánmia.

¹⁹ Camabi unin ca mitsu, asérabi camina mitsux Jesucristo cuëëncësabi oi ꞌi quixun ꞌunania. Usaquian mitsu ñuicania cuati cana cuëënin. Usa ꞌain cana mitsúxmi ñu ꞌatima ꞌaquinma ñu upíshi ꞌanux upí sinánñu ꞌiti cuëënin.

²⁰ Usoquin mitsun ꞌacëbëtan ca Nucën Papa Dios, an aín unicama chuámarua ꞌimiti, an ñunshin ꞌatimanën ꞌapu mitsu ubíotëcënxunma ꞌanun bënë́nquinshi ñusmamiti ꞌicën. Nucën ꞌIbu Jesucristonën mitsu nuibaquin ꞌaquincëx mitsux upí ꞌiti cana cuëënin.

²¹ Timoteo, an ꞌëbëtan Cristo ñuiquin bana ñuixuncë, abëtan ca Lucio, Jasón, Sosípater, acamax ꞌën aintsi ꞌixun bërúanxmi ꞌinun mitsu canun quixun ꞌë caxa.

²² ꞌËx Tercio ꞌixun Pablonën ꞌamicëxun ënë quirica cuënëoquin cana ꞌëxribi Jesucristonan ꞌixun bërúanxmi ꞌinun mitsu cain.

²³ ꞌËx cana Gayonën xubunu ꞌin. Ënë xubunu ca axa Jesucristomi catamëcë unicama timëtia. Gayo, anribi Jesucristonan ꞌixun ca bërúanxmi ꞌinun mitsu canun quixun ꞌë caxa. Erasto, an ënë ëmanu ꞌicë curíqui anun uni cupíoti a bërúancë uni, a ꞌimainun nucën xucën, Cuarto, anribi ca mitsúxmi bërúanx ꞌinun quixun mitsu canun ꞌë caxa.

²⁴ Nucën ꞌIbu Jesucristonën nuibaquin ꞌaquincëxmi mitsux chuámarua ꞌiti cana cuëënin. Usai ca ꞌiti ꞌicën.

Pablonëan Nucën Papa Dios rabia bana

²⁵ Cananuna Nucën Papa Dios asérabi rabiti ꞌain. Mitsux ainan ꞌaish Jesucristomi catamëtia ca an mitsu upíira upiti ami sinánun mitsu cushioti ꞌicën. Usoquin ca ꞌati ꞌicë quixun ca aín unicaman mitsu ꞌunánmiaxa. ꞌËnribi cana usoquin unicama ñuixunin. Ënë mecama uniocëma pain ꞌixun ca Nucën Papa Diosan, usai ca Jesucristo ꞌiti ꞌicë quixun sináncëxa. A ñucama unin ꞌunánma ꞌaínbi ca bërí Jesucristo ucë cupí unin ꞌunánti ꞌicën.

²⁶ Nucën Papa Diosan sinánmicëxun ca aín unicaman, Cristo ca uti ꞌicë quixun cuënëocëxa. Usai ca ꞌiti ꞌicë quixun ca Nucën Papa Dios, axa bamatimoi tsócë, an mëníocëxa. A bana cuënëo ꞌicëbi ca uisai quicë cara ax ꞌicë quixun unin ꞌunánma ꞌicën. ꞌUnánma ꞌaínbi ca bërí camabi nëtënu ꞌicë unicaman Cristomi catamëquin aín cuëëncësabi oquin ꞌanuxun ꞌunánti ꞌicën.

²⁷ Nucën Papa Dios, ainshia camabi ñu ꞌunáncë, axëshi ca Dios ꞌicën. A cananuna asérabi cuëënquin nëtë́timoquin rabiti ꞌain, nux Jesucristo cupí ainan ꞌixun. Usoquin cananuna asérabi ꞌati ꞌain. Ashi, Pablo.