Romanos 14 - Kashibo-Kakataibo BibliaAxa nubë Jesucristomi catamëcë unicama ñuitima bana 1 Axa Jesucristomi catamëcë unin uisai cara Jesusan uni ꞌiti ꞌicë quixun upí oquin ꞌunáncëma ꞌicëbi camina mitsubë timë́tisa tania cuëënquin biti ꞌain. Uisai cara Jesusan uni ꞌiti ꞌicë qui camina abë cuëbicanántima ꞌain. 2 Bëtsi bëtsi unin ca uisa ñux cara piti ꞌicë, a cananuna ꞌaisa tanquin piti ꞌai quixun sinánquin usaquin piia. Bëtsi bëtsi unin ca camabi ñu piti ca asábi ꞌicë quixun ꞌunánquinma nami piquinma bëtsi ñuishi piia. 3 An camabi ñu picë unin ca bëtsi unían an picë ñu piamoquin ñuitima ꞌicën. Usaribi oquin ca an camabi ñu picëma uni an bëtsi unían piia isquin ñuiquin —min camina ñu ꞌatima ꞌai —quixun caquinma a uníxribi ca Nucën Papa Diosnan ꞌicë quixun sinánti ꞌicën. 4 Mitsux camina bëtsi unin ñu mëëmicë uni a ñui —an ca ꞌatima ñu ꞌaia —quitima ꞌain. Aín ꞌibúinshi ca ꞌunánti ꞌicën, cara upí oquin ꞌaia, cara upí oquin ꞌaima quixun. Usaribi oi camina mitsux Nucën ꞌIbu Diosan uni itsi ñui, —ñu aisama ca ꞌaia —quitima ꞌain. Aín ꞌIbúinshi ca ꞌunánti ꞌicën. Nucën ꞌIbu Diosan ca aín unicama ax cuëëncësabi oíshia ꞌinun ꞌimiti ꞌicën. 5 Ënëx ca ësaribi ꞌicën. Uni raírinën ca sinánti ꞌicën, ënë nëtëx ca bëtsi nëtësamaira ꞌaish anúan unin Nucën Papa Dios rabiti ꞌicë quixun. Sinánmainun ca uni raírinën —camabi nëtë ca sënën ꞌicë —quixun sinánti ꞌicën. Mitsun bëtsi bëtsi oquin sinanibi camina cuëbicanántima ꞌain. Micama achúshi achúshinën camina ꞌën uisoquin ꞌati cara Nucën Papa Dios cuëënti ꞌicë quixun sinántancëxun usoquinshi ꞌati ꞌain. 6 Axa Jesucristomi catamëcë unin ca Jesucristoa cuëënun aín ꞌati ñucama ꞌaia. An —ënë nëtëa bëtsi nëtësama ꞌain cana anun Nucën Papa Dios rabiti ꞌai —quixun sináncë unin ca a nëtën ami upiti sinánquin a rabia. Bëtsi unin ca —anun Nucën Papa Dios rabiti ca camabi nëtë sënën ꞌicë quixun sinánquin usaquin rabia. An camabi piti ñu picë unin ca Nucën Papa Dios —asábi ca —caquin a rabiquin piia. Usaribi oquin ca an bëtsi bëtsi ñu picëma uni anribi bëtsi bëtsi ñuishi piquin Nucën Papa Dios —asábi ca —caquin rabiquin piia. 7 Usa ꞌaish cananuna nux bamacëma pain ꞌaish Nucën ꞌIbu Jesucristonan ꞌain. ꞌIanan cananuna bamatancëxribi ainan ꞌain. 8 Usa ꞌaish cananuna nux bamacëma pain ꞌaish Nucën ꞌIbu Jesucristo cuëëncësabi oi ꞌin. ꞌIanan cananuna nux anun bamati nëtë ucëbë ax cuëëncësabi oi abë ꞌinux bamati ꞌain. Nuxnu tsotax ꞌicësaribiti cananuna bamatancëxribi aín uni ꞌain. 9 Aín unicamax bamacëma ꞌaish ꞌianan bamatancëxribi ainan ꞌinun ca Cristo bamaxbi baísquiacëxa. 10 Anúan ax uti nëtë sënë́ncëbëtan ca Cristonën uisai caranuna ꞌia, uisa ñu caranuna ꞌa quixun nu isti ꞌicën. ¿Usa ꞌain caramina uisacasquin Nucën Papa Diosan uni itsíxa miisaribi uni ꞌaínbi, a ñui manánti ꞌain? Camina ꞌitima ꞌain. ¿Uisacasquin caramina a ñuiti ꞌain? Camina ꞌatima ꞌain. 11 Nucën Papa Diosan bana cuënëo ca ësai quia: Nucën ꞌIbu Dios ca quia: ꞌËx bamatimoi tsócë ꞌicë ca camabi nëtënu ꞌicë unicaman asérabi rabiquin ꞌë cati ꞌicën, mix camina asérabi nun ꞌIbu ꞌai quixun. Canan ca camabi unían cuanun ꞌë rabiquin —mix camina asérabi Dios ꞌai —quixun cati ꞌicën. 12 Usoxun ca Nucën Papa Diosan nu achúshi achúshi uisa ñucama caranuna ꞌacën, uisai caranuna ꞌiacën, acama ꞌunánquin, uisa cara oti ꞌicë isti ꞌicën. Uni ꞌuchamitima bana 13 Usa ꞌain cananuna nux Cristonan ꞌaish raíri ñui —an ca ñu ꞌaisama ꞌaia —quiax manántima ꞌain. Usai ami manánquinma camina sinánti ꞌain, uni raírinëxa —usa ñu piti ca ꞌaisama ꞌicë —quixun sinánxbi ꞌën piia isquin anribi pi ꞌuchatin rabanan cana ꞌën a ñu pitima ꞌain. 14 Nucën ꞌIbu Jesúsnan ꞌixun cana ꞌunanin, camabi piti ñu piti ca asábi ꞌicë quixun. Usa ꞌaínbi ca a uni —Nucën Papa Diosan sinánëx ca a ñux pitima ꞌicë —quixun sinánquinbi picë ꞌaish ꞌuchati ꞌicën. 15 Usa ꞌain ca axa —ꞌën usa ñu pi cana ꞌuchati ꞌai —quixun sinánquinbi mitsúnmi ꞌaia isquin anribi usa ñu pi ꞌuchacë, ax ca min ꞌucha ꞌiti ꞌicën. Min a uni nuibacëma ꞌixun camina usaquin ꞌan. Usa ꞌain camina mitsun an picëma ñu piquin, anun rabanan Cristo bama ꞌicëbi, uni ꞌuchamitima ꞌain. 16 Usa ꞌain camina mitsúnmi a ñu piia oquian uni itsin —pitimabi ca a ñu piia —quixun mitsu ñuitin rabanan —pitima ca —quixuan an sináncë ñu a pitima ꞌain. 17 Aín ñu picë cupíma ꞌimainun aín ñu picëma cupíma ca uni Nucën Papa Diosbë upí ꞌicën. Aín Bëru Ñunshin Upitan sinánmicë cupíshi ca unin Nucën Papa Diosnan ꞌixun upí ñu ꞌanan, bëtsibë nishananíma nuibananan cuëëni upí oquin sinani tsotia. 18 Usai ꞌicë unicamax ca Cristo cuëëncësabi oquin ꞌacë ꞌaish Nucën Papa Diosan iscëx upí ꞌianan unínribia iscëx upí ꞌicën. 19 Usa uni ꞌixun cananuna camáxbia bëtsibë nuibananun uni raíri nuibaquin ꞌaquinti ꞌain. ꞌAquianan cananuna Cristomia upiti sinánun bëtsibë bëtsibë sinánmiananti ꞌain. 20 Usa ꞌain camina a Nucën Papa Diosan ainan ꞌimicë uni a mitsun ñu picë cupía ꞌuchanun ꞌimitima ꞌain. Asérabi camabi ñu piti asábi ꞌaínbi ca, mitsúnmi a ñu piia isía bëtsi uni ꞌuchati ñu a piti ꞌaisama ꞌicën. 21 —Usaquin ñu ꞌati ca ꞌaisama ꞌicë —quixun sinánquinbi usa ñu ꞌai ca uni ꞌuchanan Cristomi cushicëma ꞌia. Usa ꞌain camina nami piti, ñu xëati, uisa ñu ꞌati cara, a mitsun ꞌaia isía uni itsi ꞌuchati rabanan usa ñu ꞌatima ꞌain. Usaquinmi ꞌatima ca Nucën Papa Dios cuëënia. 22 A picëma ꞌixunbi a piía bëtsi uni ꞌuchati rabanan camina an picëma ñu pitima ꞌain. Usa ꞌixunbi camina min —usa ñu piti ca ꞌuchama ꞌicë —quixun min ꞌacësabi oquin sinánti ꞌain, usoquin sinánti ca Nucën Papa Diosan iscëx asábi ꞌicë quixun ꞌunánquin. Ui unin cara ñu ꞌaquin, —ꞌën ësa ñu ꞌati ca asábi ꞌicën, ꞌën ësaquin ꞌati ca Nucën Papa Dios cuëënia —quixun ꞌunania ax ca chuámarua tani cuëënia. 23 Usa ꞌaínbi ca a uni —ësa ñu ꞌati sapi ca Nucën Papa Diosan iscëx asábima ꞌicë —quixun sinánquinbi a ñu ꞌai ꞌuchaia. Usaribiti ca an ñu piquin —ësa ñu piti sapi ca Nucën Papa Diosan iscëx ꞌaisama ꞌicë —quixun sinánquinbi picë uni ax ꞌuchaia. |
© 1978, 1995, 2008, 2022 Wycliffe Bible Translators, Inc. All rights reserved.
Wycliffe Bible Translators, Inc.