Romanos 13 - Kashibo-Kakataibo Biblia1 Camabi ꞌapux ca Nucën Papa Diosan ꞌimicë ꞌicën. An ꞌimicëma ꞌapu ca ꞌaíma ꞌicën. Usa ꞌain camina mitsun ꞌapucaman bana cuati ꞌain. 2 Usa ꞌain ca an aín ꞌapu quicësa oquin ꞌacëma uni an Nucën Papa Dios quicësa oquinribi ꞌaima. Usai ꞌicë uni ax ca Nucën Papa Diosan bana ꞌimainun aín ꞌapúnribi cacësa oquin ꞌacëma cupí axbi ꞌuchai castícancë ꞌiti ꞌicën. 3 An ñu upí ꞌacë uni ax ca aín ꞌapumi racuëtíma. An ñu ꞌatima ꞌacë uni ax cuni ca aín ꞌapumi racuëtia, ꞌë cara uisoti ꞌicë quixun sinani. ꞌApucaman ca an ñu upí ꞌacë unicama upíoia. Usa ꞌain camina mitsux ꞌapucamami racuë́cëma ꞌiisa tanquin ñu upíshi ꞌati ꞌain. 4 Nucën Papa Diosan ca ꞌapucaman camabi uníxa upiti bucunuan an ñu ꞌatima ꞌacë unicama, uisoquin cara ꞌati ꞌicë usoquin ꞌanun mëníocëxa. Usa ꞌaínbi camina ñu ꞌatima ꞌacë ꞌaish ꞌapumi racuë́ti ꞌain, uisa cara mi oti ꞌicë quixun sinani. Nucën Papa Diosan mëníosabi oquin ca ꞌapucaman an ñu ꞌatima ꞌacë unicama uisa cara oti ꞌicë usoquin ꞌaia. 5 Usa ꞌain camina ꞌapucaman bana cuati ꞌain. Mitsu castícanti sinanishi ami racuë́cë cupíma camina mitsux Cristonan ꞌixun ax cuëëncësabi oquin mitsun ꞌapun bana cuati ꞌain. 6 Usaribi oquin sinánquin camina ꞌapu buánmiti curíqui ꞌinánti ꞌain, ꞌapun mëníosabi oquin. Usa ꞌiti oquin ca Nucën Papa Diosan mëníocëxa. 7 Nucën Papa Dios cuëëncësabi oquin camina ꞌapu buánmiti curíqui buánmicë ꞌinun ꞌinánti ꞌain. Mitsun ëmanu ꞌicë uniribia ꞌapun anëcë ꞌain camina an cacësabi oquin ñu ꞌati ꞌain, mitsun ëmacamaxa upí ꞌinun. Mitsun cushibë cuëbicananquinma camina aín bana cuati ꞌain. 8 Uni camina ribíntima ꞌain. Usa ꞌixun camina a nuibacëma ꞌaish a ribíncësa ꞌitin rabanan, uni itsi upí oquinra nuibati ꞌain. Asérabi uni nuibacë ꞌixun ca unin uni itsi uisabi otima ꞌicën. 9 Nucën Papa Diosan bana cuënëo ca ësai quia: “Uni itsin xanubë camina ꞌitima ꞌain. Uni camina ꞌatima ꞌain. Unin ñu camina mëcamatima ꞌain. Minanma, bëtsi unin ñu minan ꞌiti camina cuëëntima ꞌain”. Ësai ënë banacama quicë ꞌaínbi ca bëtsi banaribi axa quicësa oquinra ꞌati ax ësai quia: “Mixmi bërúancacësaribi oquin camina min aintsicama nuibanan axa ꞌaquinsa ꞌicë ꞌaquinti ꞌain”. Ënë bana quicësa oquin ꞌaquin camina bëtsi banacamaribi quicësa oquin ꞌain. 10 Mitsun aintsicama nuibanan amanu ꞌicë uniribi nuibacë ꞌixun camina uisa unibi ꞌatimotima ꞌain. Usa ꞌain camina uni nuibacë ꞌixun Nucën Papa Diosan bana camabi quicësabi oquin ꞌain. 11 Ësoquinribi camina sinánti ꞌain, nux ami catamëtabaquin cananuna —Jesucristo ca utëcënti ꞌicë —quixun ꞌunáncën. Usaquin ꞌunan ꞌixun cananuna ꞌunanin, axa utëcënti nëtë ca ꞌuramatia quixun. Usa ꞌain cananuna unían ꞌuxnëti pëcaracëbë bësuquin, bari ca uruia quixun sinani bënëtishi aín ñu mëëti ꞌai cuancësaribi oquin, Nucën Papa Diosan a ꞌanun nu ꞌináncë ñu ꞌati ꞌain. 12 Jesucristo utëcëncëma pan ꞌain cananuna imë́ upí oquin isíma nicësa ꞌain. Usa ꞌaíshbi cananuna ax utëcëncëbë abë ꞌaish xabánu nicësa ꞌiti ꞌain. Usaquin sinani cananuna ñu ꞌatima ꞌati ëni ami cushicë ꞌaish xabánu nicësa ꞌiti ꞌain. 13 Ami cushicë ꞌaish cananuna upitaxëshi niti ꞌain. Paë́nti, paë́anx cuëëni sharáti, uni aín xanuma xanu itsibë ꞌiti, ñunshínquin ñu ꞌatima ꞌati, cuamianani nishananti, unimi nutsiti, a ñucama ënquin cananuna usa ñu ꞌatima ꞌain. 14 Usa ñucama ëni camina Nucën ꞌIbu Jesucristonën mitsu usai ꞌinun quixun sinánmicësabi oi ꞌiti ꞌain. Ënë nëtënu ꞌicë ñuishi sináncë uni an ñu ꞌatima ꞌacësaribi oquin ꞌati camina sinántima ꞌain. |
© 1978, 1995, 2008, 2022 Wycliffe Bible Translators, Inc. All rights reserved.
Wycliffe Bible Translators, Inc.