Romanos 12 - Kashibo-Kakataibo Biblia

Aín unicamaxa asérabi Nucën Papa Dios ꞌinanmëcë ꞌiti bana

¹ Usa ꞌain cana ësaquin mitsu cain, ꞌën xucë́antu. Nucën Papa Diosan mitsu nuibaquin ainan ꞌinun caíscë ꞌixun camina ꞌatima ñu ꞌaquinma asérabi ax cuëëncësabi oquinshi ꞌanan, ainanshi ꞌiti ꞌain. Mitsúxmi usa ꞌiti ca Nucën Papa Dios cuëënia.

² An ënë nëtënu ꞌicë ñuishi sináncë unicaman sináncësa oquin camina sinántima ꞌain. Usaquin sinánquinma camina sinanaquin uisairaimi upí ꞌiti cara Nucën Papa Dios cuëënia, usai ꞌiti ꞌunánan an ꞌaquincëx usai ꞌiti ꞌain.

³ Cristo ñuiquin aín bana unicama ñuixunun Nucën Papa Diosan caíscë ꞌixun cana mitsu cain, camabi unia Cristomi cushicë ꞌinun ꞌaquinun mitsu caíscë ꞌixun camina ui unínbi —ꞌëx cana bëtsi unibëtan sënë́nmaira ꞌiti ꞌai —quixun sinántima ꞌain. Uisa cara Nucën Papa Diosan mi ꞌimia, usa ꞌixun camina —usaishi cana ꞌiti ꞌai —quixun sinánti ꞌain. Sinánñu ꞌixun camina rabíquinma —Nucën Papa Diosan a ꞌanun ꞌë ꞌináncëxuinshi cana ñu ꞌai —quixun sinánti ꞌain.

⁴ Ënëx ca ësa ꞌicën. Unix ca aín taë, aín mëcën, aín xo, aín bëru, aín pabí acamax ꞌitsa ꞌaínbi achúshi unishi ꞌicën. Unix ca aín taën nitsia, aín mëcën anun ca ñu mëëia, aín bëru anun ca isia. Camabi unin nami ca anúan an bëtsi bëtsi ñu ꞌati ꞌicën.

⁵ Usaribiti cananuna nux ꞌitsa ꞌaíshbi camáxbi Cristonan ꞌaish ax nubë ꞌain achúshi unisa ꞌain. An ꞌamicëxuan bëtsi bëtsi unin bana ñuixunmainun ca raírinën bëtsi bëtsi ñu ꞌaia. Usoquin bëtsi bëtsi ñu ꞌaíbi cananuna camáxbi Cristonan ꞌaish achúshisa ꞌain.

⁶ Nucën Papa Diosan nu bëtsi bëtsi ñu ꞌanun caíscë ꞌixun cananuna an ꞌimicësabi oquin upí oquin ꞌati ꞌain, usoquin nun ꞌati ca Nucën Papa Dios cuëënia quixun ꞌunánquin. An aín bana ñuixunun caíscë ꞌixun cananuna an sinánmicësabi oquin aín bana unicama upí oquin ñuixunti ꞌain.

⁷ Nun uni raíri ꞌaquinun an ꞌimicë ꞌixun cananuna upí oquin ꞌaquinti ꞌain. Aín bana unicama ꞌunánminun an ꞌimicë ꞌixun cananuna upí oquin unicama ꞌunánmiti ꞌain.

⁸ Axa upí ꞌinun uni raíri ꞌësënun quixun Nucën Papa Diosan ꞌimicë ꞌixun cananuna upí oquin ꞌësëti ꞌain. Nun uni raíri ñu ꞌinánun quixun ꞌimicë ꞌixun cananuna unin nu rabinun quixun sinánquinma cuëënquinshi ꞌinánti ꞌain. Nux unin cushi ꞌinun ꞌimicë ꞌixun cananuna nun unicama upí ꞌinun upí oquin bërúanti ꞌain. Usoquin ꞌanun Nucën Papa Diosan ꞌimicë ꞌixun cananuna uni ꞌaquinsa ꞌicë cuëënquin upí oquin ꞌaquinti ꞌain.

Usai Jesucristomi catamëti uni iti bana

⁹ Mitsux asérabi Jesucristomi catamëcë uni ꞌaish camina paránanima asérabi bëtsibë nuibananti ꞌain. Ñu ꞌatima ꞌati cuëënquinma usa ñu timai camina Nucën Papa Dios cuëëncësabi oíshi ꞌiti ꞌain.

¹⁰ Camina bëtsibë bëtsibë ꞌaquianani nuibananti ꞌain, mitsun xucë́nbë ꞌicësaribiti. Asamaira ꞌiisa tanquin ꞌatimoquinma camina bëtsi uni isquin upí oquin ꞌaquinti ꞌain.

¹¹ Nucën ꞌIbu Jesucristo cuëëncësabi oquin ꞌaquin camina ënquinma, chiquíshquinma cuëënquin upí oquin ꞌati ꞌain.

¹² Nucën Papa Diosan ca ax quicësabi oquin mitsu ꞌaquianan abë ꞌinun mitsu ꞌimiti ꞌicë quixun sinani camina chuáma tani cuëëni bucuti ꞌain. Tëmëraibi camina masá nuituti bënë́tima ꞌain. Ënima camina Nucën Papa Diosbë banati ꞌain.

¹³ Axa Cristomi catamëcë uni ñuñuma ꞌaish ꞌaquinsa ꞌicë camina min ñu raíri ꞌinánti ꞌain. ꞌInánan camina axa min xubunu bëbacë uniribi pimianan anua ꞌuxtiribi ꞌinánti ꞌain.

¹⁴ Axa mitsumi nishcë uni a camina ami nishquinma axribi upí ꞌinúan ꞌaquinun Nucën Papa Dios ñucáxunti ꞌain. Ami nishquin a ꞌatimonun quixun caquinma camina axa upí ꞌinúan ꞌaquinun Nucën Papa Dios a uni ñucáxunti ꞌain.

¹⁵ Axa chuámarua ꞌaish cuëëncë uni abë camina cuëënti ꞌain. Axa masá nuituti incë uni a camina abë masá nuituquin nuibati ꞌain.

¹⁶ Camina bëtsibë bëtsibë nishananíma nuibananishi upiti banati ꞌain. Usai ꞌi camina cërúananima, axa uni itsibëtan sënë́nmara unibë upí ꞌaish abë upiti banati ꞌain. Rabíquin camina —ꞌën cana uni itsin ꞌacësamaira oquin ñu ꞌunanin —quixun sinántima ꞌain.

¹⁷ An paían mimi nishquin ꞌatimocëxunbi camina uisa uni cara, abi mixribi ami nishquin aribi cupitima ꞌain. Mitsun camina usa ñu ꞌati ca upí ꞌicë quixuan camabi unin ꞌunáncë a ñucamaishi ꞌati ꞌain.

¹⁸ Mitsux camina ax paían mimi nishcëxma uni raírimi nishtima ꞌain. Usa ꞌaish camina atúxa mitsumi nishcëxbi mitsux abë nishanantima ꞌain.

¹⁹ ꞌËn xucë́antu, axa mimi nishcë uni camina mitsúnribi cupitima ꞌain, ësaía Nucën Papa Diosan bana cuënëo quicë cupí: “Uix cara ꞌuchaia a cana ꞌënbi usaribi oquin cupiti ꞌain”. Usa ꞌain camina unin mitsu ꞌatimocëxunbi, Nucën Papa Diosainshi ca cupiti ꞌicë quixun sinánti ꞌain.

²⁰ Mitsun a cupiima camina ënë bana cuënëo ësai quicësabi oi ꞌiti ꞌain: “Axa mimi nishcë uni ꞌacëñuma ꞌicë camina piti ꞌinánti ꞌain. Shimaia camina ꞌunpax ꞌinánti ꞌain. Usaquinmi ꞌacëxun ca ax mimi nishtancëxbi rabini sinanaquin upí oquin sinánti ꞌicën”.

²¹ Mitsúxribi ꞌuchatin rabanan camina mitsu unin ꞌatimocëxunbi usaribi oquin cupitima ꞌain. Usoquinmi nuibacëx ca ax sinanati ꞌicën.