Romanos 11 - Kashibo-Kakataibo Biblia

Judíos unicama raíri Nucën Papa Diosnan ꞌiti

¹ Usa ꞌain cana sinanin, ¿judíos unibu cara Nucën Papa Diosan aín bana cuaisama tania oquin ëanxa? quixun. Usama ca. ꞌËxribi judío uni, Abrahamnën xutan bëchicë, Benjamín, aín rëbúnqui ꞌicëbi ca Nucën Papa Diosan ꞌë manuquinma upí oquin sinánxunia. Usa ꞌain cana ꞌunanin, an ca judíos unicama ëncëma ꞌicë quixun.

² Bëráma ca Israelnën rëbúnqui judíos unibu ainan ꞌinun Nucën Papa Diosan caísacëxa. Usaquin ꞌá ꞌixun ca a unicama —ꞌën unima ca —quiax ami manúcëma ꞌicën. Nucën Papa Diosan bana cuënëo isquin camina ꞌunanin, Nucën Papa Diosbë banai ca Elías Israel unibumi manani ësai quiacëxa:

³ “ꞌËn ꞌIbu Dios, axa mimi sináncëma unicaman ca an min bana ñuixuncë unicama cëñuaxa. Cëñuanan ca mi rabitisama tanquin anuxun mi rabiquin ñuina xaroti acamaribi masóxa. ꞌËishi ca ꞌacëma ꞌicën. Usa ꞌixunbi ca ꞌëribi ꞌaisa tania”.

⁴ Usaquian cacëxunbi ca Nucën Papa Diosan Elías cacëxa: “Mishima, siete mil uníxribi ca ꞌën bërúancëx ꞌëmi sinania. Baal ax isa dios ꞌicë quixuan uni raírinën rabíabi ca atun a rabicëma ꞌicë” —quixun.

⁵ Usaía bëráma uni ꞌiásaribiti ca bëríribi judíos unicama aín patsan Nucën Papa Diosmi sináncëma ꞌaínbi raírinëx ainan ꞌinúan caíscë ꞌaish Nucën Papa Diosmi sinania.

⁶ A caíscëcama a ca atun ñu upí ꞌacë cupíma, nuibaquinshi Nucën Papa Diosan ainan ꞌinun caísaxa. Atun ñu ꞌacë cupía ainan ꞌinun caíscë ꞌaish ca acamax nuibaquinshia an caíscë ꞌitsíanma.

⁷ Usa ꞌain ca ësai ꞌiaxa: Judíos unibunëxa abë upí ꞌiisa taníbi ax quicësabi oi ꞌi Jesucristomi catamëcëma ꞌaish abë upíma ꞌaínbi ca raírinëxëshi Nucën Papa Diosan sinánmicëx Jesucristomi catamëcë ꞌaish abë upí ꞌia. Judíos unicama aín patsanëxa ami sinántisama tania oquin ca Nucën Papa Diosan atux cuëëncësa oía ꞌinun ëanxa.

⁸ Nucën Papa Diosan bana cuënëo ësai quicësabi oi ca ꞌiaxa: “Usa unicamax ca usabia ꞌinun ëncë ꞌaish Nucën Papa Diosmi sinaníma. An ꞌacë ñu isquinbi uisaíira cara aín cushi ꞌicë quixun sináncëma ꞌaish ca bëxuñu unisa ꞌicën. Aín pabitan aín bana cuaquinbi a bana quicësa oquin ꞌaisama tancë ꞌaish ca pabë unisa ꞌicën, Nucën Papa Diosan usaía ꞌinun ëncësabi oi. Bërí nëtë́nbi ca usai ꞌia”.

⁹ A banacama quicësaribi oquin ca Davitan usa unicama ñuiquin ënë bana cuënëocëxa: A unicama ca Nucën Papa Diosan ratuquinshi castícanuxun ꞌaia. Usa ꞌaish ca ñuina, trampanu —ënë ñun ca ꞌë maputi ꞌicë —quixun ꞌunanimaishi atsíncësaribi ꞌinun castícancë ꞌiti ꞌicën. Uisaíbi cana ꞌitima ꞌai quixun sinani bëtsi unin pi unun quixun camicëx cuëënibi ca usai ꞌiti ꞌicën. Usai atux ꞌiti cana cuëënin.

¹⁰ Bëxuñu unin ca aín bëru upíma ꞌixun uinu cara cuania quixun ꞌunaníma. Usaribiti ca uni catúbucë ax aín caxu ꞌaisama ꞌain tëmëraia. Usaribitia a unicama ꞌiti cana cuëënin. Usaquin ca Davitan cuëënëocëxa.

Judíosma unicama Nucën Papa Diosnan ꞌiti

¹¹ Usa ꞌain cana sinanin, ¿aín ꞌucha cupí cara Nucën Papa Diosan judíos unicamaira xënibua ꞌaínbia aín unima ꞌinun ëanxa? —quixun. Usama ca. Judíos unibu ami sináncëma ꞌain ca Nucën Papa Diosan judíosma unibu ami sinánun sinánmia. Judíosma unibunëxa ꞌëmi sinania isi ca judíos uniburibi usaribiti ꞌëmi sinánti ꞌicë quixun sinánquin ca Nucën Papa Diosan judíosma unibu ami sinánun sinánmia.

¹² Judíos unicamaxa Cristomi catamëcëma ꞌaish Nucën Papa Diosnanma ꞌain ca judíosma unicamax Cristomi catamëti Nucën Papa Diosnan ꞌia. A isi ca Nucën Papa Dios cuëënia. Usai cuëëncësamaira oi ca judíos uniburibi asérabi Cristomi catamëtia isi cuëënti ꞌicën.

¹³ Anu ꞌicë judíosma unicama, cana mitsu cain, ꞌën judíosma unicama aín bana ñuixunun Jesucristonën cacë ꞌixun cana usaquin chiquíshquinma cuëënquin ꞌain.

¹⁴ ꞌËn bana ñuixuncëxun judíosma unibunën cuatia isía ꞌën aintsi judíos unicamaxribi Cristomi catamëti ië́ti cana cuëënin.

¹⁵ Judíos unibunëx Cristomi catamëcëma ꞌaish Nucën Papa Diosnanma ꞌain ca judíosma unibu Cristomi catamëti Nucën Papa Diosnan ꞌia. Usa ꞌaínbi ca judíos unicamaxribi Cristomi catamëcë ꞌaish, uni bamacë ꞌaíshbi baísquicësa ꞌain, Nucën Papa Dios cuëëinra cuëënti ꞌicën.

¹⁶ Judíos unibunën ca aín ñu ꞌapácë an pain tancëma aín bimi anuxun a rabiti xubunu buáncëxa, Nucën Papa Diosan camabi aín bimi upí isnun quixun. Usaribi ca i aín tapun upí ꞌaish camabi aín pëñáncamaribi upí ꞌia. Usa ñu sinánquin cananuna ꞌunanin, judíos uni bëtsix bëtsíxa Nucën Papa Diosmi sináncë ꞌain ca atúxa ꞌicësaribiti judíos unicama camáxbi Cristomi catamëtia Nucën Papa Diosan upí isti ꞌicën.

¹⁷ Ësa ca. I aín pëñan achúshi tëatancëxun bëtsi i aín pëñan anu tëacë anubi tacáshcacëx ca a i aín tapúnuaxa aín baca cuancë cupí aín pëñánsabi ꞌinun coti ꞌicën. Usaribi camina mitsux ꞌain. Judíos unicama Nucën Papa Diosan bana ꞌunáncë ꞌaíshbi Cristomi catamëisama tancë ꞌaish ca i pëñan tëacësa ꞌicën. Usa ꞌimainun camina mitsux judíosma uni ꞌaíshbi Cristomi catamëcë ꞌaish bëtsi i aín pëñan anua tëacë anu tacáshcacësa ꞌain.

¹⁸ Usa ꞌaíshbi camina rabiti —ꞌëx cana judíos unicamasamaira ꞌai —qui cërútima ꞌain. Camina sinánti ꞌain, aín tapúnmi cushicë cupí ca in pëñan cania. Usaribiti cana ꞌëx judíosma ꞌaíshbi, judíos unibu cupí, Cristomi catamëti Nucën Papa Diosnan ꞌain.

¹⁹ Usa ꞌaínbi sapi camina ësaquin sinanin, —judíos unima ꞌaíshbi ꞌëx ainan ꞌinun ca Nucën Papa Diosan judíos unibu ainanma ꞌinun ëanxa —quixun.

²⁰ Usa ca. Usa ꞌaínbi camina ꞌunánti ꞌain, Jesucristomi catamëcëma cupí ca judíos unibu ainanma ꞌia. Mitsux ami catamëcë cupíshi camina ainan ꞌain. Usa ꞌain camina —ꞌëx cana judíos unibusamaira ꞌai —quiax cërútima ꞌain. Judíos unibu ꞌicësaribiti Jesucristomi catamëcëma ꞌitin rabanan camina bërúancati ꞌain.

²¹ Camina ꞌunánti ꞌain, Nucën Papa Diosan ca ainan ꞌinun caísa ꞌixunbi judíos unibu ami catamëtiama aín ꞌucha tërë́ncëma ꞌixun judíosma unibu ꞌaíshmi mitsux ami catamëcëxunma mitsun ꞌucharibi tërë́ntima ꞌicën.

²² Usa ꞌain camina ꞌunánti ꞌain, ax upí ꞌixun ca Nucën Papa Diosan unicama nuibaquin upí ꞌimianan axa aín ꞌucha ëni ami catamëcëma uni uisa cara oti ꞌicë usoquin ꞌati ꞌicën. Usa ꞌixun ca mitsúxmi a ëníma ax quicësabi oquin ꞌai, ami catamëtia oquin nuibaquin ꞌaquinia. Usai mitsux ꞌicësabi camina ꞌiti ꞌain. Usai ꞌima camina mitsúxribi judíos unibu ꞌicësaribiti ainanma ꞌiti ꞌain.

²³ Aín raracama ꞌiásaribiti ami sinántisama taníbia ami sinanatia ca Nucën Papa Diosan asérabi aín uni ꞌinun judíos uniburibi ꞌimiti ꞌicën, judíosma unibu ꞌimicësaribi oquin.

²⁴ Mitsux judíosma uni ꞌaish aín unima ꞌiá ꞌicëbi ainan ꞌinun ꞌimicë ꞌixun ca Nucën Papa Diosan ainan ꞌinun caísa judíos unicama, amia catamëtia, ainan ꞌinun ꞌimiti ꞌicën, i pëñan tëacë ꞌicëbi amiribishi aín raranu tacáshcatëcëncësa ꞌinun. Usa ꞌain ca i itsi tëaxun, bëtsi inu tacáshcacësamaira ꞌinun, aín pëñánbi aín raranu tacáshcatëcëncëx asérabi upíira ꞌiti ꞌicën. Usaribi oquin ca Nucën Papa Diosan judíos unibu ainan ꞌitëcënun ꞌimiti ꞌicën.

Asérabia judíos unicama Jesucristomi catamëti bana

²⁵ ꞌËn xucë́antu, mitsux judíosma uni ꞌixun —nux cananuna judíos unían ꞌacësamaira oquin Cristomi catamëquin Nucën Papa Diosan aín unicama ꞌunánmiti ñu ꞌunáncë ꞌai —qui rabíaxma ꞌinun quixun cana ësaquin unin ꞌunáncëma ñu a ñuiquin mitsu cain: Judíosma unibu uicama cara Cristomi catamëti ꞌicë acamax pain ami catamëtamainun ca Nucën Papa Diosan judíos unicama aín patsan Jesucristomi catamëcëma ꞌaish usabi ꞌinun ëanxa.

²⁶ Judíosma unibu ami catamëcëbë ca judíos unibunëxribi ami catamëti ꞌicën, Nucën Papa Diosan bana cuënëo ësai quicësabi oi: An unicama asérabi Nucën Papa Diosnan ꞌinun ië́miti ax ca Siónu ꞌicë judíos unicama achúshi ꞌiti ꞌicën. An ca Jacobnën rëbúnqui judíos unicama ami catamëcëxun atun ꞌucha tërë́nquin atun nuitu upí ꞌimiti ꞌicën.

²⁷ ꞌËmi catamëtia ꞌën atun ꞌuchacama tërë́ncëx ca judíos unibu asérabi ꞌënan ꞌiti ꞌicën, ꞌën cásabi oi.

²⁸ Nucën Papa Diosan ca unicamax Cristomi catamëtia ainan ꞌimiti ꞌicë quixun sinántisama tancë ꞌaish ca judíos unibunëx ami nishcësa ꞌicën, mitsux paínmi judíosma uni ꞌaíshbi ainan ꞌitámainun. Usa ꞌaínbi ca Nucën Papa Diosan atun rara —mitsun rëbúnqui ca ꞌënan ꞌiti ꞌicë —quixun cá ꞌixun a bana manuquinma judíos unibu nuibatia.

²⁹ Bëráma judíos unibu —ꞌënan ca mitsu ꞌimainun mitsun rëbúnqui ꞌiti ꞌicë —quixun Nucën Papa Diosan cá ꞌain ca a banacama usabi ꞌiti ꞌicën. Nucën Papa Diosan ca —mitsux camina ꞌënan ꞌiti ꞌai —quitancëxun bëtsioquin sinántëcënima.

³⁰ Mitsux judíosma unibu ꞌixun aín bana ꞌunanima camina Nucën Papa Dios cuëëncësoi ꞌiáma ꞌain. Usai ꞌiáma ꞌicëbi ca judíos unibu ami sinántisama tancë ꞌain Nucën Papa Diosan ainan ꞌinun mitsu ꞌimiaxa.

³¹ Judíos unima ꞌaíshmi ainanma ꞌicëbi ca Nucën Papa Diosan mitsu ainan ꞌimiaxa. Usaribi oquin ca judíos unicama ami sinántisama tania ainanma ꞌaíshbi ami sinania Nucën Papa Diosan ainan ꞌimiti ꞌicën.

³² Judíos unibu ainan ꞌinun caísa ꞌixunbi ca Nucën Papa Diosan judíos unibu ꞌicësaribitia ami catamëtiama judíosma uniburibi ainanma isia. Usaquin ꞌaquinbi ca an nuibaquin camabi uni Cristomi catamëtía ainan ꞌinun ꞌimia.

³³ Uiti cushiira cara aín sinan ꞌicë quixun cananuna ꞌunántima ꞌain. An ca camabi ñu ꞌunania. An ꞌunáncëma ñu ca ꞌaíma ꞌicën. Uisaira ꞌixun cara usoquin ñu ꞌaia quixun cananuna ꞌunaniman.

³⁴ Ësai ca aín bana cuënëo quia: “Uinu ꞌicë unínbi ca Nucën ꞌIbu Diosan sinan ꞌunaníma. Uínbi ca Nucën ꞌIbu Dios —ësaquin camina ꞌati ꞌai —quixun ꞌunánmima”.

^35-36 Nucën ꞌIbu Diosan ca camabi ñu ainan ꞌiti oquin uniocëxa. Usa ꞌain ca aín bana cuënëo ësairibi quia: “¿An aribi ꞌinánun quixun sinánquin cara unin Nucën ꞌIbu Dios ñu ꞌinánti ꞌic? Ca ꞌinántima ꞌicën”. A ca aín unicaman xënibua ꞌaínbi rabiti ꞌicën. Usaquin ca ꞌati ꞌicën.