Romanos 10 - Kashibo-Kakataibo Biblia

¹ ꞌËn xucë́antu, ësaquin cana mitsu cain, Israel uni judíos unicama Cristomi catamëtia ainan ꞌinun ië́miti cuëënquin cana Nucën Papa Dios ñucáxunin.

² Cana mitsu cain, atun ca asérabi Nucën Papa Dios cuëënmisa tania. Usa ꞌixunbi ca uisoquin cara atun a cuëënmiti ꞌicë quixun ꞌunaníma.

³ Uisai cara unicama Nucën Papa Diosan iscëx upí ꞌiti ꞌicë quixun ca ꞌunánma ꞌicën. —ꞌËnbi Moisésnën cuënëo bana quicësabi oquin ꞌacë cupíshi ca an ꞌën nuitu upí isia —quixun sinani ca Nucën Papa Dios cuëëncësabi oi Cristomi catamëti sinántisama tanxa.

⁴ Cristonëxa ucëbëtan judíos unibunën asérabi ami catamëti ꞌunánun quixun ca Nucën Papa Diosan aín bana Moisés cuënëomiacëxa. Ui unicamax cara Cristomi catamëtia a ca Nucën Papa Diosan upí isanan ainan ꞌimia quixuan ꞌunánun ca a bana judíos unibu ꞌináncëxa. Usa ꞌaínbi ca ax ucëbë judíos unicama ami sinántisama tanxa.

⁵ An usai ca uni ꞌiti ꞌicë quicë bana ꞌacë cupí Nucën Papa Diosan a ꞌuchañuma isti sináncë uni, a ñuiquin ca Moisésnën ësaquin cuënëocëxa: “Nucën Papa Diosbë upí ꞌinux Moisésnën cuënëo bana quicësabi oi ꞌiti sináncë unin ca asérabi a banacama quicësabi oquin ꞌati ꞌicën”.

⁶ Usa ꞌaínbi ca unin ami catamëtia ca Nucën Papa Diosan uni upí isia quixun ꞌunánan Cristo ca uti ꞌicë quixun ꞌunánun aín bana cuënëo ësai quia: “Min nuitu mëu sinani camina quitima ꞌain, ¿Uix cara naínu cuanti ꞌic?” Cristo ënë nëtënu bënux.

⁷ Ësairibi ca quia: “Min nuitu mëu sinani camina quitima ꞌain, ¿Uix cara anua uni bamacë ꞌicë anu cuanti ꞌic?” anua Cristo bënux.

⁸ Usai quianan ca ësairibi quia: “A bana Cristo ñui quicë, a ñuia camina cuatin. A ñui camina banain. Min nuitu mëu camina a bana sinanin”. Usai quicë ꞌimainun cananuna nunribi Cristomi catamëti ñuia quicë bana unicama ñuixunin.

⁹ A bana ca ësai quia: —Jesús ca ꞌën ꞌIbu ꞌicë —quianan bamacëbi ca Nucën Papa Diosan a baísquimiacëxa quixun min nuitunën sinania ca Nucën Papa Diosan ainan ꞌinun mi ië́miti ꞌicën.

¹⁰ Nun nuitu mëu, asérabi ca nun ꞌucha tërë́nti ꞌicë quixun sinani Jesucristomi catamëtia, ca Nucën Papa Diosan nun ꞌucha tërë́nquin nu upí isia. Usoquin an iscë́xnu —Jesucristo ax ca asérabi ꞌën ꞌIbu ꞌicë —quia ca Nucën Papa Diosan ainan ꞌinun nu ië́mia.

¹¹ Cristo ñuiquian Nucën Papa Diosan bana cuënëo ca ësairibi quia: “Axa ami catamëcë unicaman ca, an ca ax quicësabi oquin ꞌë ꞌaquinia quixun ꞌunania”.

¹² Judíos unicama ꞌimainun judíosma unicamaribi ꞌimainun uisa uni cara, axbi ca Cristomi catamëti ainan ꞌia. Cristo ax ca camabi uni axa ami catamëcë aín ꞌIbu ꞌicën. Usa ꞌixun ca an ñucácë unicama upí oquin ꞌaquianan ax cuëëncësamaira oquin ñu ꞌinania.

¹³ Nucën ꞌIbu Diosan bana cuënëo ca quia: “Uin cara an ië́minun ñucatia a ca Nucën ꞌIbu Diosan ainan ꞌinun ië́miti ꞌicën”.

¹⁴ ¿Usa ꞌaínbi cara an Nucën ꞌIbu Diosan ca a ië́miti ꞌicë quixun sináncëma unin a ñucáti ꞌic? Ca ñucátima ꞌicën. ¿Uisaxun cara uni itsin ñuia cuacëma ꞌixun, Nucën ꞌIbu Diosan ca ꞌë ië́miti ꞌicë quixun sinánti ꞌic? Ca sinántima ꞌicën. ¿Uisaxun cara uni itsin ñuixuncëxunma cuati ꞌic? Ca cuatima ꞌicën.

¹⁵ ¿Uisaxun cara unin uni itsin xucëma ꞌixun uni raíri bana ñuixunti ꞌic? Ca ꞌatima ꞌicën. An aín bana ñuixuncë unicama ñui ca Nucën Papa Diosan bana cuënëo ësai quia: “ꞌËn unibunëxa upí bana, —Nucën Papa Diosan ca aín ꞌucha tërë́nquin abëa upí ꞌinun uni ꞌimia —quicë, a ñui aia unin iscëx ca upíira upí ꞌicën”.

¹⁶ A bana cuënëo ꞌaínbi ca camabi uníinra a bana sináncëma ꞌicën. Ësai ca Isaíasnën cuënëo bana quia: “Camabi uniínrama, ꞌitsama unínshi ca nun ñuixuncë bana cuaquin —ca asérabi ꞌicë —quixun sinania”.

¹⁷ Usa ꞌain cananuna ꞌunanin, uni itsían Cristo sinánquin aín bana ñuixuncëxun ca unin cuatia. Cuaquin ca —a banax ca asérabi ꞌicë —quixun ꞌunani Cristomi catamëtia.

¹⁸ Unicaman cara a bana cuaxa quixun cana sinanin. Camaxunbi ca asérabi cuaxa, ësai Nucën Papa Diosan bana quicësabi oi: Aín unicamax ca camabi mënuxun bana ñuixuni cuanxa. Usa ꞌain ca camabi menu ꞌicë unicaman a bana ñuixunia cuaxa.

¹⁹ Ësaquinribi cana sinanin, ¿Judíos unicaman cara a bana Cristo ñuicë cuaquin, uisai quicë cara a bana ꞌicë quixun ꞌunánma ꞌic? ꞌUnántsinxunbia judíos unicaman a bana cuaisama tania oquin ca Nucën Papa Diosan judíos unibu caquin, Moisés ësaquin cuënëomiacëxa: Judíosma unibunëxa mitsun aintsima ꞌicëbi ꞌën ꞌënan ꞌimicëbë camina mitsux nutsi nishti ꞌain. Mitsúnmi a —sinánñuma ca —quixun ñuicë unicama ꞌën ꞌënan ꞌimicëbë camina mitsux ꞌëmi nishti ꞌain.

²⁰ Nucën Papa Diosan ca —judíosma unibunëx ca ꞌëmi sinánti ꞌicë —quixun ꞌunánquin Isaías ësaquin cuënëomiacëxa: Ax ꞌëmi sinánma unínbi ca ꞌë ꞌunánxa. ꞌËnan ꞌinuxuan an ꞌë ñucáma unibi cana ꞌëmi catamënun sinánmian.

²¹ Usai judíosma unibu ñui quianan ca Isaías judíos unibu ñuiribi ësai quiacëxa, Nucën Papa Dios quicësabi oi: ꞌËn bana cuaisama tanan ꞌëmi sinántisama taniabi cana judíos unibu ënquinma —ꞌën mitsu ꞌaquinun camina ꞌëmi sinánti ꞌai —quixun can. Cacëxbi ca ꞌën bana cuaisama tani ꞌëmi sinántisama tanxa”.