Proverbios 31 - Kashibo-Kakataibo Biblia

An ñu mëëti ꞌunán xanu rabi kiti bana

¹⁰ Xanu an ñu ꞌati ꞌunán irakë ax ka ꞌashi buinxun bënë́kinshi mëratisama ꞌikën; ¡usa xanux ka ñu ꞌupíira iskësamaira ꞌikën!

¹¹ Usa xanu ka ain bënën amira sinánkin nuibatia, ꞌianan ka aín xanu ꞌain kuríki kanankë anun uínsaranbi kuríkiñuma ꞌima.

¹² Usa ꞌixun ka a xanun ꞌain bënë ñu chakama kuëënmikin ꞌaxunia, anua ax tsókë nëtëkaman.

¹³ ꞌAnan ka a xëonuxun xapu ꞌakë ñuman baritankëxun maruxun, aín mëkënan anunbi tëkin xëokin añu kara ꞌaisa tania a ꞌaia.

¹⁴ Nunti chaiiran bëkësa usa obëtsinkin ka ꞌain piti ñukama bitsínkin ꞌurakëo bëia.

¹⁵ Pë́karakëma ꞌaínshi nirutankëxun ka aín tuákama ꞌimainun an ñu ꞌaxunkë xanukama piti ꞌaxun pimia.

¹⁶ ꞌIanan ka upiokin pain ñachatankëxun me aín tëkënëan bikë kuríki anun maruia, marutankëxun ka anun kananuxun uvas a menu ꞌapámia.

¹⁷ Usa ꞌain ka kuëënkin ñu mëëia, ñantainshi ꞌapunkin bari kuantamainun ñu mëëia.

¹⁸ Usakin ꞌanan ka ñu maruti nanxun axa upí ꞌiti kuëënkin bërúaia, bërúai ka kamabi imë́ ꞌain ñu ꞌai tëia.

¹⁹ ꞌAnan ka aín mëkënanbi chupa ꞌanan bëtsi ñukamaribi ñuman bixun xëoia.

²⁰ Usakin ꞌakin ka uni ñuñuma kama ꞌimainun, an ñu kuëënkë unikama aribi ñu ꞌinánkin ꞌakinia.

²¹ Usai ꞌianan ka matsi ꞌibúkëbëtan karana añunën ꞌën tuákama rakuti ꞌai kixun sinani bënëtima, aín xubunu ꞌikëkama ax ka matsin ꞌaisama okin chupa ꞌupiokin pañuax ꞌia.

²² ꞌAínbi ka anúan rakuti chupa aín mëkënanbi ꞌaia, ꞌanan ka chupa upíira aín mëkënanbi ꞌakë aribi pañuia.

²³ ꞌImainun ka ꞌain bënë ain ëmanu ꞌikë unikaman kamaxunbi ꞌunánkë ꞌia, usa ꞌaish ka a menu ꞌikë unikaman usa kamina mix ꞌain kixun uínbi kakëma uni ꞌikën.

²⁴ ꞌIanan ka tari ꞌanan anun tsitëkërëkikë akama, ꞌatankëxun an ñu marukë unikama maruia.

²⁵ Usokin ñu ꞌai upiti tsóti ka añu karana, nëtëitsi pëkarakëbëtan ꞌati sinani bënëtima.

²⁶ ꞌIanan ka sinánxira banakin aín tuákama nuibakin upíokin bana ꞌunánmia.

²⁷ Usa ꞌixun ka aín xubunu ꞌikë ñukama upíokin bërúaia, ꞌianan ka an tëxun bikëma ñu uínsaranbi piima.

²⁸ Aín tuákama ꞌimainun ꞌain bënën ka a rabikin ësokin kaia:

²⁹ An upíokin ñu mëëkë xanukama ka ꞌitsaira ꞌikën, ꞌaínbi kamina mixira atusamaira ꞌain.

³⁰ Upíira ñu isími kuëënkë ax ka këmëishi ꞌikën, usa ꞌain ka ñu upíira ax ñankáishi ꞌikën, usa ꞌaínbi ka an Dios rabikë xanu ax kuni usa ka ax ꞌikë kixun rabikë ꞌiti ꞌikën.

³¹ ¡Usa ꞌain ka an ꞌakë ñukama a ꞌunánkin kamabi, ëmanu ꞌikë unikaman rabiti ꞌikën! ¡ꞌAnan ka usakin ñu ꞌaia rabikë ꞌiti ꞌikën!