Oseas 2 - Kashibo-Kakataibo Biblia

¹ Usa ꞌain kamina mitsun rarëbakëkama kati ꞌain: “Mitsux kamina Diosan unikama ꞌain.” ꞌImainun ka atun chirabakëkamax “Nuibakin kakë ꞌiti ꞌikën.”

Israel unikama Diosan kakësama oi ꞌikan ñuikë bana

² Ësai ka Israel unikama ñui Dios kiaxa: “¡Mitsun tita kamina min ꞌuchoti ꞌain, ax ka bërí ꞌën xanuma ꞌikën, ꞌimainun kana ꞌëx aín bënëma ꞌain! ¡ꞌIanan ka aín nami ꞌakë xanusa ꞌikëa unin ꞌunánkë a ënti ꞌikën! ¡ꞌIanan ka an ꞌain nami ꞌakë unikamabëa ꞌikë a ënti ꞌikën!

³ Usakin ꞌaiama kana achúshi uni chupañuma ꞌikë usaribi ꞌitánun atiaira ënti ꞌain: usakin ꞌakin kana anuan bakë́an nëtë́a ꞌiásaribitia ꞌinun ꞌimiti ꞌain, ꞌimianan kana anu uni ꞌikëma mesa ꞌinun bëtsiokëbë, aín me ëskinun ꞌimiti ꞌain, usakin ꞌakëbë ka shiman bamati ꞌikën.

⁴ Aín tuákama a nuibati kana nitë́xëtima ꞌain, atux ka unían aín tita nami ꞌakin ami bëchikë tuákamasa ꞌikën.

⁵ Aín titax ka bëtsi bëtsi uni aín nami ꞌamikë ꞌiakëxa; usa ꞌaínbi ka upí sinánñu xanu ꞌikë a nëtë́ti kiakëxa: Abë ꞌëx ꞌikë unikama a kana bari kuanti ꞌain, atun ka ꞌën piti ꞌimainun ꞌumpax, ꞌianan ꞌën pañuti chupa lino ꞌakë a ꞌianan, xëni ꞌimainun a ꞌën xëati akama ꞌë ꞌinania.

⁶ Usa ꞌain kana muxan atun bai bëaranan anu bukukë a bëararamikin achúshi kënë ꞌati ꞌain, usakin ꞌakëxun ka aín baikama a mëratëkënkantima ꞌikën.

⁷ Usai ꞌikin ka ꞌain mërati ꞌikë unikama nuiti ꞌikën, ꞌaínbi ka nukutima ꞌikën; ꞌianan ka barikinbi mëratima ꞌikën. Usakin mërakima tani ka kiti ꞌikën: Ax paían ꞌën bënë ꞌia uni anubi kana kuantëkënti ꞌain, abë kana bërí ꞌëx ꞌikësamai upiti tsóakën.

⁸ Aínbi ka xanun ꞌëx kana an ñu ꞌinánkin trigo, uvas baka vino ꞌakë xëni akama pishínmikinma ꞌinánkëxunbi ꞌën ꞌinánkë ka ax ꞌikë kixun ꞌunánma ꞌikën; ꞌën manë uxua ꞌimainun kuri akama cha ꞌinun ꞌinánkëxunbi ka a rabinuxun ñukama tankin uniokëxa.

⁹ Usa ꞌain kana amiribishi ꞌën ꞌinánkë, trigo ꞌimainun ꞌën uvas baka vino ꞌati, anun atun ñu ꞌapákë aín bimi biti nëtë ꞌikëbëtan bikuantëkënti ꞌain, ꞌanan kana ꞌën anúan rakuti ꞌinánkë chupa lino ꞌakë a bianan, anun mapúti ꞌinánkë chupa aribi biti ꞌain.

¹⁰ Aín bënëan achúshi xanu bëtsi bëtsi unibë ꞌikë abëa ꞌikë unikaman istánun aín chupa biküanxun mëëkë usaribi okin kana Israel unikama an bëtsi bëtsi dioskama rabikë unikaman istánun ꞌati ꞌain. Usakin ꞌaia ka uínbi usakin kamina ꞌatima ꞌai kixun ꞌë katima ꞌikën.

¹¹ ꞌËn kana kuëënkian fiestakama ꞌakë a ꞌimainun ꞌuxë ió ꞌikëbëtan akë akama ꞌianan anun ñu mëëtima nëtë́an timë́kë akama këñuan, kamabi atux a ꞌai timë́kë akamaribi këñuti ꞌain.

¹² Aín uvas ꞌapákëkama ꞌimainun higuera, ꞌapákëkama a ñuia xanu ax ësai kia: Ënëx ka abë ꞌixun bëtsiñu diosmabi rabikë axa ꞌëbë ꞌikë unikaman ꞌë ꞌinan ꞌikë kikë akama kana këñuti ꞌain. Usakin ꞌakëbëtan ka axa me ꞌatima ꞌikëbëtan anua raëkëma ñuinakaman piti ꞌikën.

¹³ Usa ꞌain kana bëráma nëtë inumikin atun bëtsi dioskama rabia a kupín tëmëramiti ꞌain, atun ka bëtsi dioskama a rabikin, mëñusuti ꞌimainun aín tëñuti akama ꞌamiakëxa, usakin ꞌai ka bëtsi ñu diosmabi rabi ꞌëmi manúkankëxa ꞌëx Dios ꞌaish kana ësai kin, kiax Dios Israel unikama ñui kiakëxa.

Diosan kaisa ꞌixun Israel unikama nuiba ñuikë bana

¹⁴ ꞌËn kana Israel unikama mëratiokësa obiankin: anu uni ꞌikëma menu buántënkënti ꞌain, anuxun kana upíokin kakin atu sinánmitëkënti ꞌain, kiax ka Dios kiakëxa.

¹⁵ Usokin ꞌatankëxun kana atun ꞌapá uvakama atu ꞌinántëkënkin, me sapan Acor kakë anua ꞌapákëxa ꞌitsaira bimiñu ꞌinun ꞌimiti ꞌain. Anuxun ka bëná ꞌixuan ꞌasa okin ꞌanan, anúan Egiptonuax chikíkë nëtë anun ꞌasaribiokin ꞌë kati ꞌikën.

¹⁶ Usa ꞌain ka anuxun mix kamina ꞌën bënë ꞌai kixun ꞌë kati ꞌikin, kakin ka Baal mix kamina ꞌën ꞌibu ꞌai kixun katima ꞌikën. ꞌËx Dios ꞌaish kana ësai kin.

¹⁷ Usakin ꞌakin kana amiribishi Baal kaman anë ñui banatëkënun ꞌimitima ꞌain, usakin ꞌakëx ka uínsaranbi amiribishi aín anë ñui banatëkënkantima ꞌikën.

¹⁸ Usa ꞌain kana ꞌën a nëtën Israelkama uisabi oxuma ꞌanun achúshi ñu ñuina raëkëma kamabëtan ꞌakin, manan nuánkë ꞌimainun men niríkë runukama abëtan ꞌati ꞌain. ꞌAnan kana ꞌën unikama upiti bukunun, ënë menua aín kanti ꞌimainun aín manë xëtokë, ꞌianan ꞌakanankë aribi këñuti ꞌain.

¹⁹ ꞌËn kana Israel unikama ꞌën xanusa xënibua ꞌaínbi ꞌinun ꞌimiti ꞌain, usokëx ka asérabi a tanti bana unin ka xanu biti ꞌikë ꞌëx kia usaibi ꞌiti ꞌikën, ꞌën kana a ꞌitsaira nuibatin.

²⁰ ꞌËn kana ꞌën xanusami mitsux ꞌain añu ñubi mitsu ꞌaxuntima ꞌain, usa ꞌikë kamina mitsun ꞌë ꞌëx kana Dios ꞌai kixun ꞌunánti ꞌain.

²¹ ꞌËx Dios ꞌaish kana ësai kin, a nëtëkaman kana ꞌën uni Israelkama ñukákëxun naínuax ꞌibúkian ꞌuñenën me chabónun ꞌamiti ꞌain;

²² usokin ꞌakëbë ka trigo, uvas baka ꞌimainun xëni akamax ꞌitsaira ꞌiti ꞌikën, usa ꞌikë kana Jezreel kakin atu anëti ꞌain.

²³ Usa ꞌain ka ꞌën me ꞌinánkëx anu tsóti ꞌën unikamax ꞌënanshi ꞌiti ꞌikën; usa ꞌain kana mi kana nuibatima kixun kakin ꞌën Lo-ruhama, kakin anëkin Israelkama nuibati ꞌain, ꞌimainun kana. Lo-amí ꞌën unima kamina ꞌai kixun ꞌën kakë Israelkama bërí kamina ꞌën unikama ꞌai kixun kati ꞌain, kakëxun ka atun mix kamina ꞌën Dios ꞌai kixun ꞌë kati ꞌikën. Kiax ka Dios kiakëxa.”