Números 12 - Kashibo-Kakataibo Biblia

María ꞌimainun Aarón Moisés ñui ꞌatimati bana

¹ Usa ꞌain ka María aín chirabakë ꞌimainun Aarón aín xukë́n apan Moisésnën etiopi xanua bikë ꞌain, ami ꞌatimakin ñui banakëxa.

² Banai ka ësairibi kikankëxa: “Nukën ꞌIbu ka Moisés bëshi banakëma ꞌikën; nubëribi ka banaxa.” Kikania ka Nukën ꞌIbun kuakëxa.

³ Moisés ax ka upí sinan ñu ꞌaish nishananti sinánkëma uni ënë menu ꞌiakëxa.

⁴ Usa uni ꞌikë iskin ka Nukën ꞌIbun Moisés, Aarón ꞌimainun María akama kakëxa: “Mi achúshi ꞌimainun rabëtax kamina mapánati okin chupa ꞌakë anu timë́ti ꞌakë anu kuanti ꞌain.” Ësai Dios kia kuati ka a kamáxbi anu kuankëxa.

⁵ Kuankëbë ka Nukën ꞌIbun xubusa okin chupa ꞌakë aín xëkuë manámi anu kuin xapu unënkësa ꞌinua këxtuira ꞌinun ꞌibúkë anu ubúakëxa, ubuxuan anuxun kuënkëx ka Aarón ꞌimainun María anu kuankëxa,

⁶ kuania ka Nukën ꞌIbun ësokin kakëxa: “Bërí kana mikama ësokin kain: An ꞌëx kikë bana uni ñuixunkë mitsunu ꞌikë kana ꞌën namámikësokin kanan kana namámikinribi kain;

⁷ usa ꞌaínbi kana ꞌën uni Moisés abëishi usai banaima ꞌëxbi abë banakin kana asérabi kain. Ax ka ꞌën uni raíri ꞌikësai ꞌima ꞌën kakësabi oi ꞌia,

⁸ ꞌimainun kana abë banai an unánkë unibë bësúnax banakësai banain, ꞌimainun kana kuaisabi ꞌitánun abë banakin ꞌënbi kain. ¿Usa ꞌaínbi karamina mitsux a ñui ꞌatimai banain?”