Levítico 16 - Kashibo-Kakataibo Biblia

Diosan israel unikama ꞌuchakë anun tërëan nëtë ñuikë bana

¹ Usa ꞌain ka Nukën ꞌIbu Moisésbë banakëxa, Aarónën bëchikë rabë́ axa anuax Nukën ꞌIbubë banati ꞌakë, kataitsi ꞌukëmëu upíira kakë a ꞌuramaira obiani kuanibia ñukë ꞌain.

² Usa ꞌain ka Nukën ꞌIbun Moisés kakëxa: —Min xukë́n Aarón kamina ësokin kati ꞌain, bëtsi nëtë́an uisaxi anu ꞌëx ꞌikë upíira kakë chupa bëpankë a kaxú atsíaxma ꞌinun kanan kamina, bunántisa okin ꞌakë anun mapukë a ꞌurama oxuma ꞌanun kati ꞌain, anu kuaníbi ka bamati ꞌikën; ꞌëx kana aín mapúti ꞌikë anu kuin mëu mërati ꞌain.

³ Aarónën ka upíira kakë anua ꞌëbë banati anu atsínkin achúshi vaca bëna aín ꞌucha kupí buánan achúshi carnero ꞌë rabikin ꞌaímai këñutanun xaroti buánti ꞌikën.

⁴ Usai anu kuankin ka aín tari upíira, sacerdotekaman pañukë chupa lino ꞌakë, ꞌanan ka a ꞌukëmëu pañukë lino ꞌakë a ꞌimainun, anun tsitëkërëkiti ꞌakë anun tsitëkërëkianan aín mañuti akë aribi mañuax kuanti ꞌikën. Ax ka chupa kata upíira a ꞌikën, usa ꞌain ka akama pañunux pain upiti nashiti ꞌikën.

⁵ Usai ꞌitankëxun ka Israel unikama ꞌaxúnti rabë́ chibu bitankëxun Aarónën atun ꞌucha kupí ꞌaxuanan ka achúshi carnero ꞌaímai këñutanun ꞌë xaroxunti ꞌikën.

⁶ ꞌAtankëxun ka vaca bëna bëkë a aín ꞌuchakë kupí xarokësa ꞌinun ꞌanan ka ꞌën aín ꞌuchakëkama mëníonan aín aintsi ꞌibukaman ꞌuchakë kupínribi ꞌati ꞌikën.

⁷ Usakin ꞌatankëxun ka cabra rabë́ aribi, ꞌë ꞌaxunkin anun ꞌëbë mëranani atsínti xubusa okin ꞌakë aín xëkuë ëman ꞌurama anuxun ꞌati ꞌikën;

⁸ ꞌatankëxun ka ñuratsu amo rabë́bi kuënëoxun uimiu kara pakëtia isnuxun anun cabra rabë́ a tanti ꞌikën: Uinu ꞌikë ax kara ꞌënan ꞌiti ꞌikën ꞌimainun kara uinu ꞌikë ax Azazelnan ikë isnuxun tanti ꞌikën.

⁹ Usakin ñuratsukun tankëxa amioi kuënëokë pakëkë ax ka ꞌënan ꞌiti ꞌikën, a ka Aarónën kamabi Israel unikaman ꞌucha kupí xaroti ꞌikën;

¹⁰ aínbi ka ñuratsu ainan ꞌitanun ꞌakë ax amiki pakëkë ax ka Azazelnan ꞌiti ꞌikën. A ka rëkëma asábi anun aín kata itsi upíira anu atsínkianti aín xëkuë a ꞌurama anu bëkë ꞌiti ꞌikën, anu bëkë ꞌain ka atun ꞌuchakama mëníokin anu ꞌaruia ka anu uni ꞌikëma me anua Azazel kakë ñunshin ꞌatima ꞌikë anu atun ꞌuchakama buani kuantanun xuti ꞌikën.

¹¹ Aarónën ka vaca bakë a rëtankëxun ꞌuchakama kupí xaroti ꞌikën, usakin ꞌaia kana aín ꞌucha tërëanan aín aintsi ꞌuchakamaribi tërëxunti ꞌain.

¹² ꞌAtankëxun ka tasunsa okin ꞌakë anu ꞌarukin aín tsi ënxaira a kata itsi upíira anuax Nukën ꞌIbubë banati anua biti ꞌikën, bianan ka aín chimapu sanuira rënkë a mëkën rabë́ okin bixun mëskukin ꞌarubiankin anua kata itsi upíira ꞌikë anun bëpankë chupa ꞌukëmëu anu uanti ꞌikën;

¹³ usakin ꞌaxun ka kata itsi upíira kakë chupa këxtú a rapasu ꞌikë tsísa anu ꞌën istisabi okin uanxun ro sanuira a nanti ꞌikën, usakin anu nankëx aín kuinan tëxëkirukin bunántisa kurin ratakakakin ꞌakë a mapukë ꞌain ka. Aarón ñutima ꞌikën.

¹⁴ Usakin ꞌatankëxun ka vaca bakë imi chukúmashi, aín mëkën mëpukankixun anun bunántisa okin ꞌakë aín mapúti ánskati ꞌikën, ꞌanan ka aín ꞌipitiu ꞌikëishi ñuina imi anun ánskati ꞌikën. ꞌAtankëxun ka mapai achúshi ꞌimainun rabë́ okin ñuina imin aín mapúti aín rëbumi ꞌikë aribi ánskati ꞌikën,

¹⁵ usakin ꞌatankëx anuax chikítankëxun ka chibu aribi Israel unibunën ꞌucha kupí rëti ꞌikën, rëkin aín imi ꞌitsamashi xampami bitankëxun ka kata itsi upíira a ꞌukëmëu ꞌikë chupan bëpankë a kaxú uantakëxun; anun bunántisa okin kurin ratakakakin ꞌakë aín mapúti kaxú ꞌanan aín rëbu vaca bëna imin ꞌakësaribi okin anun ánskati ꞌikën.

¹⁶ Usakian ꞌakëxun ka kata itsi upíira a mëníokin anua ñu upíshi ꞌati ꞌikëbi ꞌaíma ꞌatima ñu ꞌai ꞌuchakin Israel unikaman ꞌakëma ꞌimainun ñunshinakëkin ñu ꞌai ꞌuchakë akama mëníoti ꞌikën. Usaribi okin ka anuax ꞌëbë banati xubusa okin ꞌakë atu nëbëtsi ꞌikë ñu ꞌatima ꞌakëbëtan atun ꞌuchakaman ꞌatimokë ꞌikëbi aribi mëníoti ꞌikën.

¹⁷ Usakin ꞌanun ꞌën kakëxun ꞌaia Aarón kata itsi upíira a ꞌukëmëu ꞌimainun ka ax pain sënë́ntamainun uíxbi xubusa okin ꞌakë anu kuantima ꞌikën. Usakin ꞌakin ain ꞌucha ꞌimainun aín xanu aín bakë bëchikë kamanan ꞌimainun kamabi Israel unikaman ꞌucha mëníotankëx,

¹⁸ chikíkiani kuanxun ka anuxun ñuina ꞌë xaroxunti aribi mëníoti ꞌikën. Vaca bëna aín imi ꞌimainun chibu imi a chukúmashi bitankëxun, ka anun i vaca manchansa okin ꞌakë aribi ꞌanan anuxun ñuina xaroti ꞌakë aribi buinarakin anun shiti ꞌikën,

¹⁹ ꞌanan ka mëkën rëbun imi bikë ami pukatankëxun anun mapai ꞌimainun rabë́ okin anuxun ñuina xaroti a ánskati ꞌikën. Usakin ꞌakin ka ꞌatima ñuishi ꞌakian Israel unikaman tsáimikë a upí ꞌitánun mëníoti ꞌikën.

²⁰ Usakin anuax ꞌëbë banati xubusa okin ꞌakë a mëua ꞌikë upí kakë akëñun anuxun ñuina xaroti akama pain mëníokin sënë́ontankëxuan Aarónën, chibu rëkëma a bitánun kakëxun bitsínkin,

²¹ bëkëbëtan ka ñuinanën maxkánu aín mëkën rabë́ nankin, kamabi Israel unikaman bana kuakinma ñu ꞌatima ꞌakë ꞌimainun atun ꞌuchakama ami chikínati ꞌikën. Usakin ꞌakëx ka chibun maxkánu a ꞌuchakama bërúti ꞌikën, usakin ꞌaxun ka achúshi uni anu uni ꞌikëma menu buanxun ëntanun kati ꞌikën.

²² Kakëxun uanxuan ënkëx anu uni ꞌikëma menuax kuani nëtë́kiankin ka chibu an Israel unikaman ñu ꞌatima ꞌakë anu uni ꞌikëmaira me ruá panákë anuira buánti ꞌikën.

²³ Usakin ꞌatankëx xubusa okin chupa ꞌakë anu atsínuxun ka Aarónën kata itsi upíira kakë anu atsínuxuan pañukë lino ꞌakë aín chupa a pëtankëxun anubi nanti ꞌikën.

²⁴ Usakin ꞌatankëx ka xubusa okin ꞌakë anua ꞌikë ꞌumpax anunbi nashianan aín chupa itsi pañutankëx anuax chikixun aín ñuina a pain aín ꞌucha kupí ꞌatankëxun Israel unikamanan aribi ꞌaxúnti ꞌikën, usakin ꞌakëbë ka ain ꞌuchakama tërëanan Israel unikaman ꞌucharibi tërënxunkë ꞌiti ꞌikën.

²⁵ ꞌImainun ka atun ꞌucha kupí xarokë ñuina aín xëni aribi anuxun ñuina xaroti ꞌakë anuxunbi xaroti ꞌikën;

²⁶ usokin ꞌamainun ka uin kara anu uni ꞌikëma me anua Azazel ꞌikë anu chibu ëbëtsinkë uni axribi aín chupa chukanan upiti nashitankëx anua ꞌikankë anu atsínti ꞌikën.

²⁷ Usakin ꞌatankëxun ka vaca bakë ꞌimainun chibu atun ꞌucha kupí xaronan, aín imi kata itsi upíira kakë anu atun ꞌucha tërënxunun buánkë a, ka bibiankin buánxun anua ꞌikankë a urinxun aín ñukama aín xaká aín puku ꞌimainun aín nami tukapakë a kamabi xaroti ꞌikën.

²⁸ Xarotankëx ka uni an ñuina nami xarokë ax ꞌumpaxan nashianan aín chupa chukatankëx, anua ꞌikankë anu kuantëkënti ꞌikën.

²⁹ Ënëx ka achúshi bana ax kikësabi oi mitsux ꞌiti bana ꞌiti ꞌikën: mapai achúshi ꞌimainun rabë́ ꞌuxë ꞌirukë anúan mapai rabë́ sënë́nkë nëtë anun kamina mitsux ñu pima samáti ꞌain, ꞌimainun kamina mitsun ñu mëtikamaribi a nëtën ꞌatima ꞌain, usakin mitsun ꞌakëbëtan ka axa mitsubë tsókë bëtsi menu ꞌikë unikaman usaribi okin ꞌati ꞌikë,

³⁰ usakin ꞌakëbëtan a nëtënbi mitsun ꞌuchakama ꞌën tërënxunkëbë ka a ñukama mëníokin tërënxukë ꞌaish atux upí ꞌiti ꞌikën.

³¹ Ax ka a ënima xënibua ꞌaínbi ax kikësabi oi ꞌiti bana a ꞌikën: ax ka achúshi nëtë upíira mitsunan anun ñu pima tanti samáti nëtë ꞌiti ꞌikën.

³² Usa ꞌain ka sacerdotenën bëchikë aín papan ꞌakësaribi okin kaísun anëkë an ishi, usakin ꞌati bana kikësabi okinshi atun ꞌatimakëkama tërënxunun ꞌati ꞌikën; ꞌanuxun ka aín chupa lino ꞌakë sacerdotekaman pañukë a pañuti ꞌikën.

³³ Usai mëníokatankëxun ka kata itsi upíira upí kakë a mëníonan xubusa okin chupa ꞌakë aribi ꞌanan anuxun ñuina xarokë aribi mëníoti ꞌikën, ꞌusakin ꞌakëbëtan kana sacerdotenën ꞌatimakëkama ꞌanan kamabi unix ꞌatimakëkama tërënti ꞌain.

³⁴ Ënëx ka uínsaranbi ënimami ax kikësabi oi mitsux ꞌiti achúshi bana ꞌiti ꞌikën: usa ꞌain ka achúshi achúshi baritia ꞌirukëbëtan a sinánkin ënë bana kikësabiokin Israel unikaman aín ꞌucha tërënun ꞌati ꞌikën. Usakin anua Nukën ꞌIbun Moisés kásabiokin ka usakin ꞌakëxa.