Jueces 2 - Kashibo-Kakataibo Biblia

Nukën ꞌIbun ángel achúshi Boquim kakë me anuax mërá ñuikë bana

¹ Nukën ꞌIbu ángelnën ka Guilgal kakë anuax kuanxun Boquim kakë me anua Israel unibu ësokin kakëxa: ꞌËn kana mitsu Egipto menua chikínbëtsinkin a ꞌinánuxun mitsun chaitiokëkama ka me ënu bëakën, bëxun kana ësokin kakën: Uinsaranbi kana ꞌën mitsubëtan achúshi ñu ꞌakë a manutima ꞌain,

² usa ꞌain kamina mitsun ënë menu ꞌikë unikamabëtan achúshi ñubi ꞌakatsi atubë kanantima ꞌain, usai ꞌikinma kamina kamabi atun anuxun ñuina xarokëkama a rurupati ꞌain. ꞌAínbi kamina ꞌën kakëxunbi kuaisama tankën, ¡Usa ꞌain kamina añu kaina mitsun ꞌa kixun sinánti ꞌain!

³ Usa ꞌain kana bërí mitsu kain: Ënë ëmanu ꞌikë unikama kana mitsun ismainunbi chikiniman ꞌimainun ka atun rabikë dioskama ax anun mitsu paránti ꞌiti ꞌikën.

⁴ Ësokin atu katankëxa Nukën ꞌIbun ángel sënë́nkëbëishi ka kamabi Israel unikama munuma sharati ini tsuákiruakëxa.

⁵ Usai anuax ꞌikë ka Boquim kakin a me anëakëxa, anuxun ka Israel unikaman anuxunbi ñuina rëxun xaroxunkin Nukën ꞌIbu rabiakëxa.

⁶ Usa ꞌain ka Josuénën ashikin Israel unikama kakë ꞌain, achúshi achúshi unix uinu ꞌikë me kara biti ꞌikë a bitsi kuankankëxa.

⁷ Usa ꞌain ka ax tsókëpan ꞌain Israel unikaman Nukën ꞌIbu rabi tsókankëxa; ꞌimainun ka uni aín tukurikubu axa ñukëmapain ꞌaish bukukë atun Israel unibua Nukën ꞌIbun ñu chaiirabu ꞌaxunkë a iskankëxa.

⁸ ꞌAínbi ka Josué ciento diez baritiañu ꞌaish ñuakëxa,

⁹ ñukë ꞌikë ka aín me Timnat-sérah, kakë aín tsipumia ꞌikë Gaas kakë Efraínën bashikama abu ꞌia anu maíankëxa.

¹⁰ ꞌImainun ka Israelkama axa Josué tsókëpan ꞌain tsóa atúxribi ñuakëxa. Usa ꞌain ka bëría bakënkëkama atun ka uisaxunbi Nukën ꞌIbu ꞌunánan an israel unikama ꞌaxuan ñukama abi ꞌunánma ꞌikën.

Israel unibunën Nukën ꞌIbu rabikinma aín bana manua

¹¹ Usa ꞌaish ka Israel unibunën ꞌakë ñukama Nukën ꞌIbun iskëx Baal rabikin atun pëukin bëtsi bëtsi ñukamaribi rabikë ka ax ꞌaisama ꞌiakëxa.

¹² Usokin bëtsi ñukama ꞌai ka atun chaitiokëkama Egipto menua an chikínbëtsinkin bëa Dios ami manúakëxa, manukian atu rapasu bukukë unikaman rabikë dios ashi rabikëbë ka Nukën ꞌIbu ꞌitsaira xuamati atumi nishakëxa.

¹³ Nukën ꞌIbu rabiti a ënkin ka Baal kakë dios akëñun bëtsi ñukama Astarté kakë dios an isa ꞌakinia kixun sinánkin aribi rabikin pëuxun bëtsi ñukamaribi rabiakëxa,

¹⁴ usokëbë Israel unikamami nishkin ka Nukën ꞌIbun an ñu mëkamakë unikaman atun ñu mëkamanun ꞌamianan, a rapasu ꞌikë unikaman an ꞌakinti ꞌaíma aín kupitanuma ꞌanun ꞌamiakëxa.

¹⁵ Usai ami manuax ꞌikania ka uínsaran kara ꞌakanania anun Nukën ꞌIbun ꞌakiniama abë ꞌakanani kuankë unikaman atu ꞌakëxa, an atu kásabiokin. Usai ꞌiabia Nukën ꞌIbun ꞌakinkëxma ka Israel unibu ꞌaisamaira tëmërakëxa,

¹⁶ ꞌaínbi ka ꞌaisamaira okían an ñu mëkamakë unikaman tëmëramikëbëtanbi an ꞌapu ꞌixun ꞌakinti uni ꞌaíma ꞌaían tëmërakëbëbi atu mi Dios mërakëxa.

¹⁷ ꞌAínbi ka Israel unikaman usai atux ꞌikëbëtan Diosan ax ꞌapu ꞌixun ꞌakinti uni kaisiabi aín bana kuatima ñunshin nakë́kin unikaman bëtsi dioskama rabikin Nukën ꞌIbu Dios rabiama ꞌikën. Atun chaitiokëkamaxa Nukën ꞌIbun bana ax kikësabi oi ꞌiti bana tan ꞌaínbi ka atux, atun chaitiokëkama ꞌiásai ꞌiti sinánma ꞌikën.

¹⁸ Uínsaran kara Nukën ꞌIbu an atu ꞌakinun uni achúshi ꞌapu ꞌimia, anun ka anbi ꞌakiankëxa, ꞌakinia ka Diosan Israel an ꞌakinti kaískë unikaman ami nishkë unikaman ꞌaia nuibakin, ꞌakiankëxa, ꞌakinkin ka a unikama atunua chikínun ꞌamiakëxa.

¹⁹ ꞌAínbi ka an ꞌakinkë ꞌapu ñukëbëtan, amiribishi ñu ꞌatima ꞌatëkënkankëxa, ꞌakin ka atian ira atun chaitiokëkaman ꞌasamaira okin bëtsi dioskama rabikankëxa. Usakin ꞌai ka atun ñu ꞌaisama ꞌakë ëinsama tani atun sinan iruarati sinánñuma uni ꞌikësai ꞌikankëxa.

²⁰ Usai ꞌia isi ka Nukën ꞌIbu Israelkamami xuamati nishi, ësai kiakëxa: “Ënë unikaman ka ësai ꞌikin atun chaitiokëkamabëtan ꞌën achúshi ñu ꞌa ꞌatimokin ꞌaia, usa ꞌixun ka ꞌën kakësa okin ꞌaisamatania.

²¹ Usa ꞌain kana, Josuénën ñukëmapain ꞌixun raíri chikíanan ꞌama ëmakama rairi a chikintima ꞌain.”

²² Ësokin ꞌakin ka Nukën ꞌIbun israel unibunëx kara aín chaitiokëkama ꞌiásai ami sinania kara ami sinanima kixun istisatankëxa.

²³ Usa ꞌain ka Nukën ꞌIbun atu rapasu ꞌikë bëtsi menu ꞌikë unikama a kamaira Josuénën chikínun ꞌamiama ꞌikën, ꞌamikinma ka raíri ëmakama chikinxuma ꞌanun ꞌimiakëxa.