Jueces 14 - Kashibo-Kakataibo Biblia

Sansónnën ain xanu bia ñuikë bana

¹ Achúshi nëtën ka kushiira uni Sansón kakë ax Timnat kakë ëma anu nitsi kuanxun ka achúshi filistea xanu an kuëënkë mërakëxa,

² mërabiani aín xubunu kuanxun ka aín papa ñuixunkin. Ësakin kakëxa: —ꞌË karamina Timnat kakë ëmanua ꞌën isbëtsinkë filistea xanu a ꞌën binun ain aintsikamabëtan mënioxuntima ꞌain.

³ Kixuan kakëxunbi ka aín papan kakëxa: —¿Uisokin sinánxun kaina an Dios ꞌunánkëma filisteo unikamanua min xanu ꞌiti xanu bisatanin? ¿Nun aintsi ꞌibukamanu ꞌianan kara raíri ñaká Israel unikamanuribi ami biti xanu chipash ꞌaíma ꞌik? Kakëxun ka Sansónnën aín papa kakëxa: —A xanu chipash ax ka ꞌën kuëënkë xanu ꞌiaxa, usa ꞌain kana ami ꞌën xanu ꞌiti binun ꞌë mëníoxunti kuëënin.

⁴ Usa ꞌain ka ain papan usaía ꞌikëkama ax ka Nukën ꞌIbunbi ꞌimikë ꞌikë kixun ꞌunánma ꞌikën, usa ꞌain ka uisokin kara filisteo unikama ꞌati ꞌikë kixun Diosan a baritia kaman atu ꞌatimoti ꞌikë kixun bariakëxa.

⁵ Usa ꞌain ka Sansón aín papa kabiani abë Timná kakë ëma anu kuankëxa. Kuanibi ka aín papabë ënanankiani ëma ꞌurama uvas ꞌapákë ꞌikë anúan kuankëbë ka achúshi ꞌinúan në́kë ami në́kuatsini pikatsikiax uakëxa.

⁶ ꞌAiabi ka Nukën ꞌIbun aín bëru ñunshinan Sansón kushiira ꞌinun ꞌimiakëxa, ꞌimikëxun ka anun ꞌati ñu tuinkë ꞌixunmabi aín kushínbi achúshi cabranën tuára ꞌakësokinshi an pikatsikiax ukë ꞌinuan tëtsëkakin bikëxa bamaia tukapakëxa. Usakin ꞌaxunbi ka aín papa usakian ꞌakë a ñuixuanma ꞌikën.

⁷ Usakin ꞌabiani kuanx ka an bisatankë xanu a binux aín aintsikamabë banakëxa.

⁸ Usai banatankëx ka anúan birananti nëtë sënë́nkëbë, Sansón aín xanu bisa kara kixun isi kuankëxa, kuaníbi ka anúan kuankë bai ëbiani anuxua paru ꞌinúan ami në́tia tëtsëkaxun bamaia tukapaxun rakaënxankë a iskatsikiax anu kuankëxa. Kuanxun ꞌurama okin iskëxbi ka paru ꞌinúan bamaëxankë aín naminua bunan kuëxuokë anu ain rëpa ꞌiakëxa.

⁹ Anua ka mëkënan aín kuëxu tukapakin aín rëpa biakëxa. Bixun buna rëpa xëabiani kuankinbi ka aín papa abë mëranankin paná an ribia xëanun ꞌinánkëxa ꞌinánkëxuan. Aiabi ka paru ꞌinúan bamakë aín naminua kana bitsia kixun ñuixuama ꞌikën.

¹⁰ Usa ꞌain ka Sansónnën papa ain bëchikënëan biti xanu chipash a ꞌunani kuankëxa; kuanxun ka filisteo xanu aín papan xubunuxun Sansónnën achúshi fiesta atun ꞌakësabi okin ꞌakëxa.

¹¹ ꞌAínbi ka filisteo unikama ami rakuë́këbëtan an biti xanúan ꞌunánkë treinta uni bënákama uankëxa.

¹² A treinta unikama ka Sansónnën ësokin kakëxa: —ꞌËn kana bërí uisai kikë kara ënë bana ꞌikë kixunmi mitsun ꞌë kanun ënë bana mitsu ñukatin. ꞌËn ꞌakë fiesta ënëxa mapai achúshi ꞌimainun rabë́ nëtë basiti ꞌain kamina mitsun uisai kikë kara ꞌën mitsu kakë bana ꞌikë kixun ñuixunkëxun kana, ꞌën achúshi achúshi anun rakuti lino upiokin ꞌakë chupa ꞌinánan chupa achúshi a pañuax fiestanu kuanti mitsu ꞌinánti ꞌain.

¹³ ꞌAínbi kamina mitsun uisai kikëira kara a bana ꞌikë ꞌë upíokin kakinma mitsu achúshi achúshinën anun rakuti lino upíira ꞌakë chupa ꞌë ꞌinánan aña fiestanu kuanti chupa ꞌë ꞌinánti ꞌain. Ësokin kakëxun ka atun kakëxa: —Nu kamina kamaxunbinu kuanun mix kikë bana a ñuixunti ꞌain.

¹⁴ Kakëxun ka Sansónnën karaisa ax kikë bana ñuikin atun kaia kuanuxun achúshi bana ñukákin ësokin kakëxa: “Ax pianankë anuax kara a ñu piti chikíax; axa kushiira ꞌia anuax kara añu bataira chikíax.” Usakian kakë rabë́ ꞌimainun achúshi nëtë ꞌikëbëtanbi ka atun usai kikë kara a bana ꞌikë kixun ñuixuama ꞌikën;

¹⁵ anúan rabë́ ꞌimainun rabë́ nëtë ꞌikëbëtan ka Sansónnën biti xanu atun kakëxa: —Minmi an mi biti uni kikë bana a uisai kara kia a ñuixunkëxuma kananuna mi ꞌaxun rakanan min papakëñun aín aintsikamaribi ꞌati ꞌain. ¡Mitsun sapi kamina upíokin ꞌakinxumabi nun ñu mëkamati kupíshi nu kuëan!

¹⁶ Usakian kakëx kuanxun ka aín xanun Sansón ami inkin kakëxa: —¡Min kamina ꞌë kuëënima! ¡Mix kamina ꞌëmi nishin! Usa ꞌixun kamina ꞌën aintsikama uisai kikë karaisa a bana ꞌikë iskatsi kixun kan, ꞌaínbi kamina min ꞌëbi uisai kikë kara a bana ꞌikë kixun kakëma ꞌain. Kixuan kakëxun ka Sansónnën kakëxa: —ꞌËn papakëñun ꞌën titabi ñuixukëma ꞌixun karana ꞌën uisaxun a bana mi ñuixuti ꞌain.

¹⁷ Usokin ñukákëxunbia ñuixunkëxma ka a rapasunuax ini mapai achúshi ꞌimainun rabë́ nëtë sënë́nbi fiesta ꞌikë anun iankëxa, usai inkian ꞌurainra ñukákëxun ka mapai ꞌimainun rabë́ nëtë ꞌikë anun usai ka a bana kia kixun ñuixuankëxa. Usakia ñuixunkëx kuanxun ka aín aintsikama ësai ka a bana kia kixun ñuixuankëxa.

¹⁸ Ñuixunkëx ka mapai ꞌimainun rabë́ nëtë sënë́nkë anun bari kuabukëma ꞌaínshi filisteo unikama anu rikianxun Sansón kakëxa: “Buna rëpa batasamaira bëtsi ñu ka ꞌaíma ꞌikën, ꞌimainun ka paru ꞌinúanën kushisamaira bëtsi ñuina ꞌaíma ꞌikën.” Kia kuakin ka Sansónnën atu kakëxa: “ꞌËn kakëxuan ꞌën xanun mitsu ñuixunkë kupinshi kamina uisai kikë kara a bana ꞌikë kixun ꞌunanin.”

¹⁹ Usokin atu kaiashi ka Nukën ꞌIbun Bëru Ñunshinan kushiira uni ꞌinun Sansón ꞌimiakëxa; Usakin ꞌimikëx Ascalón kakë ëmanu kuanxun ka filisteo unikama Sansónnën treinta uni anu ꞌikë rëtëakëxa, rëtëxun ka unikaman chupa bibianxun anunbi an kakë bana ñuixunkë unikama a kupíokin ꞌinánkëxa. Usokin ꞌabiani ka aín papan xubunu bëtsi sinánkëshi ꞌaish kuankëxa,

²⁰ usai kuanxa aín papan xubunu Sansón ꞌain ka an binuxun katakë xanu an ꞌunánkë uni achúshinën aín xanu ꞌiti biakëxa.