Judas 1 - Kashibo-Kakataibo Biblia

Nucën Papa Diosan ainan ꞌinun caíscë unicama Judasnën cuënëoxuan quirica

¹ ꞌËx cana Judas, an Jesucristonën cacësabi oquin ñu ꞌacë ꞌianan Jacobonën xucën, a ꞌain. Mitsúxmi ainan ꞌinun caíscë ꞌicëa Nucën Papa Diosan Jesucristomi cushicë ꞌinun ꞌimicë ꞌicë, cana ënë quirica mitsu cuënëoxunin.

² Nucën Papa Diosan nuibacëxmi mitsun ꞌuchacama tërë́ncë ꞌianan bëtsibë nuibanani chuámarua ꞌaish bucucanti cana cuëënin.

An cëmë bana uni ñuixuncë uni

³ ꞌËn nuibacë xucë́antu, Jesucristomi catamëtia ca mitsun ꞌuchacama tërë́nquin ainan ꞌinun Nucën Papa Diosan mitsu ië́miaxa, ꞌë ꞌacësaribi oquin. Usami ꞌicë cana anun nux ië́ti banacama ñuiquin mitsu cuënëoxunti sinan. Usaquin sinánxunbi cana bëtsi bana pain mitsu buánmin, uni raírinëan Nucën Papa Diosan banamabi ñuicë bana a cuaxunma ꞌanun cananmi, Jesucristo ñui quicë bana, a Nucën Papa Diosan unicaman cuacë, ax ca asérabi ꞌicë quixuan camabi unin ꞌunánun, atu canun cana mitsu ënë quirica buánmin.

⁴ Uni raírinëx ca parani mitsubë timëtia. Mitsubë timë́xunbi ca mitsun sináncësabi oquin sinanima. A unicamax ca ësai quia: Nucën Papa Dios upí ꞌixun ca nux cuëëncësa oquinshi ñu ꞌaiabi nu uisabi oimá. Usaquin sinánquin ca ꞌaisama ñu ꞌaia. ꞌAi ca —ꞌëx cana Nucën Papa Diosnan ꞌai —quibi axëshi nun ꞌIbu, ax cuëëncësabi oi ꞌima. —ꞌËx cana Nucën ꞌIbu Jesucristonan ꞌai —quixunbi ca aín bana quicësabi oquin ꞌaima. Usa uni ñui ca Nucën Papa Diosan bana cuënëo quia, usaía ꞌicë unicamax ca ꞌaisamaira oquin ꞌuchocë ꞌiti ꞌicë quiax.

⁵ Upí oquinmi ꞌunáncëbi cana ënë ñucama mitsu sinánmitëcënin, Nucën ꞌIbu Diosan ca Israel unicama Egipto menua buánxunbi ami catamëtiama oquin raíri cëñuacëxa.

⁶ Angelcama raíri, axa Nucën Papa Diosan nëtënubi ꞌiti ꞌaíshbi anu ꞌiisama tancë cupí chiquía, ax ca anúan an camabi uni isti nëtë utámainuan bëánquibucënu uisatima manë risin tëcërëcacësa ꞌaish, anubi ꞌinun Nucën Papa Diosan ëan ꞌicën.

⁷ A ángelcamaxa abë ꞌiisama tanan Nucën Papa Dios cuëëncësabi oi ꞌiisama tani ꞌiásaribiti ca Sodoma ꞌimainun Gomorra ꞌimainun a ꞌurama ꞌicë ëmacamanu ꞌicë unicamaxribi ꞌiacëxa. Nucën Papa Diosan ca aín xanubëishia ꞌiti uni ꞌanan xanuribi aín bënëbëishia ꞌiti uniocëxa. Usa ꞌaínbi ca a ëmacamanu ꞌicë unicama aín xanuma ꞌaínbi bëtsi xanubë ꞌimainun xanúxribi aín bënëma ꞌaínbi bëtsi unibë ꞌimainun uníxribi xanúxmabi bëtsi unibë ꞌi, ꞌaisamairai ꞌuchacëxa. Usaía ꞌicë ca Nucën Papa Diosan aín ꞌucha cupíbi, manë tsin nëancëxa, xënibua ꞌaínbi ainanma ꞌinun. Usaía ꞌiá a sinani cananuna nuxribi usai ꞌitin rabanan bërúancati ꞌain.

⁸ Usa ꞌaínbi ca axa Sodoma ꞌimainun Gomorranu ꞌicë unicama usai ꞌiá ꞌunanibi, mitsu parani mitsubë timë́cë unicama an, sinánñumasa ꞌaish aín xanuma ꞌaínbi xanubë ꞌianan bana cuacëma ꞌixun, Nucën ꞌIbu Diosmi sinánquinma cushi unicama ꞌimainun uisa cushi cara, ángelcamaribi ꞌatimaquin ñuia.

⁹ Usaría a unicamax quicë ꞌaínbi ca usoquin caquinma ángelcaman cushi, Miguel, an abë banaquin ñunshin ꞌatimanën ꞌapu ꞌatima bana ꞌinánquinma, Moisés bamacë rabanan abë cuëbicanancëxunbi, Miguelnën ñunshin ꞌatimanën ꞌapu ësaquinshi cacëxa: “Nucën ꞌIbu Diosan ca mi ꞌuchoquin ñu cati ꞌicë” quixun.

¹⁰ Usa ꞌaínbi ca a unicama an ꞌunáncëma ñu ñui ꞌatimati banaia. Sinánñuma ꞌixuan ñuinacan uisa cara oia quixun sinánquinmaishi ñu ꞌacësaribi oquin ca a unicaman aín cuëëncësa oquinshi ñu ꞌaia. Usaquin ꞌai ca atúxbi ꞌatimatia.

¹¹ A unicaman ñu ꞌatima ꞌacë cara Nucën Papa Diosan uisoti ꞌicën. Cainan ñu ꞌatima ꞌásaribi oquin ꞌanan ca Balaam an ꞌásaribiquin curíqui biti sinánxun ñu ꞌatima ꞌaia. Coré ax ca Nucën Papa Diosan cacëxuan Moisésnën ñuicë bana cuaisama tanquin, uni raíri Moisésmi nishquin tsuáquirumicë cupí, bamacëxa. Cain, Balaam, Coré, acamaxa ꞌiásaribiti ca a unicama cënúti ꞌicën.

¹² Mitsúxmi Jesucristomi sinánquin pi timë́cë ꞌain atúxribi mitsubë timë́cë ꞌaíshbi ca asérabi mitsúxmi ꞌicësaribiti ꞌima. Usa ꞌaish ca atun cuëëncësabi oquinshi pi rabinima sharati, uni raírimi sinanima. Uni raíri ꞌaquincëma ꞌaish ca ꞌuí ꞌibúnux nëtë bënamëtiabi suñun bëcacëx nëtë́cësa usaribi ꞌicën. ꞌIanan ca anun bimiti nëtëa ucëbëbia i bimicëma usaribi ꞌicën. Bëucutia i aín tapun ëchiquicë, usaribi ca atux ꞌicën.

¹³ Bëchunan tucánquiquin masinu chinan purucësa, usaribi ꞌinun ca aín nuitu upíma ꞌain ꞌatimati bananan ñu upíma ꞌaia. Chiquíquianxa ꞌispa amanu tacúcë, usaribi ca atux ꞌicën. Usa ꞌaish ca atux nëtë́timoi xënibua ꞌaínbi bëánquibucënu ꞌiti ꞌicën.

¹⁴ Ax pain unia nucën rara Adán aín rëbúnqui nucën rara Enoc, ax ca Nucën Papa Diosan sinánmicëx usa uni ñui ësai quiacëxa: “ꞌËn iscëx ca Nucën ꞌIbu Dios camabi ꞌaisamaira aín uni upícaman nëpúamainun uaxa.

¹⁵ Uxun ca camabi uni uisa cara oti ꞌicë quixun isaxa, atúan ñu ꞌacëcama ꞌunánquin. An ñu ꞌatima ꞌacë unicama atun ñu ꞌatima ꞌacë cupí ꞌimainun atun a ñui ꞌatimati banacë a cupíribi, ca Nucën ꞌIbu Diosan ꞌuchoquin uisa cara oti ꞌicë quixun isaxa”.

¹⁶ A unicamax ꞌaisama ꞌixun ca uni raírinën ꞌacë ñu ꞌatimaquin ñuianan atux cuëëncësa oquinshi ꞌanan atux cuëëncësa oíshi ꞌiti sinania. Usa ꞌixun ca atúxbi cërúanan rabiacaquin, aín curíqui ꞌimainun aín ñu biti cupíshi abë upiti banaquinbi uni parania.

Uni itsin paránti rabanan bërúancati bana

¹⁷ ꞌËn nuibacë xucë́antu, a unicamaxa usa ꞌaínbi camina mitsun, Nucën ꞌIbu Jesucristonëan aín bana ñuixunun caíscë unicaman mitsu ñuixuan banacama, a manuquinma sinánti ꞌain,

¹⁸ ësaquian mitsu cacë: Jesucristo utëcënti nëtëa ꞌurama ꞌain ca ꞌitsa unin Nucën Papa Diosan banami cuaiquin, aín sináncësa oquinshi ñu ꞌatima ꞌati ꞌicën.

¹⁹ Usa unicamax ca an ënë nëtënuxun aín cuëëncësa oquin ñu ꞌatishi sináncë a ꞌicën. A unicaman ca uni raírimia nishnun quixun unicama sinanamia. Nucën Papa Diosan Bëru Ñunshin Upitan sinánmicëma ca atux ꞌicën.

²⁰ ꞌËn nuibacë xucë́antu, ami catamëcë ꞌaish camina camabi nëtën asérabi Jesucristomi sinánti ꞌain. Ami sináncëxun ca an mitsu sinánmiti ꞌicën, an sináncësaribi oquinmi sinánun. Aín Bëru Ñunshin Upitan ꞌaquincëx camina Nucën Papa Diosbë banati ꞌain.

²¹ Nucën Papa Diosan mitsu nuibacëx camina ami manutima camabi nëtën ax cuëëncësabi oi ꞌiti ꞌain. ꞌIanan camina a nëtë anuan nuibaquin Nucën ꞌIbu Jesucristonën utëcënquin aín nëtënunu xënibua ꞌaínbi abë ꞌinun nu ꞌimiti, a caínti ꞌain.

²² Caíanan camina —Nucën Papa Diosan bana ca asérabi ꞌicë —quixuan an sináncëma uni a ꞌësëquin —usa ca —quixun upí oquin sinánmiti ꞌain.

²³ Uni raírinëxa aín ñu ꞌatima ꞌacë cupí Nucën Papa Diosnanma ꞌicëbi camina amia sinánun ꞌaquinti ꞌain, tsinuaxa xaráti ꞌicëbi uni bicësaribi oquin. Usaribi oquin camina uni raíriribi nuibaquin upí ꞌinun ꞌaquinquinbi axa ꞌatima ꞌicësaribi ꞌitin rabanan bërúinra oti ꞌain, ax ꞌaisama cupía, aín chupáxbi chuaíracësa ꞌicë timacësa oquin aín ꞌucha timaquin.

Ashiquiana, Nucën Papa Dios rabinun ca

²⁴ An ñu ꞌatima ꞌaxúnmami ꞌanun mitsu bërúanan an iscëxmi upí ꞌaish cuëëni aín nëtënu abë ꞌinun mitsu ꞌimiti, ax ca Nucën Papa Dios ꞌicën.

²⁵ Axëshi Nucën Papa Dios ꞌixun Nucën ꞌIbu Jesucristo cupí nu ainan ꞌinun ië́micë, ax ca cushiira ꞌianan upíira ꞌaish ꞌApuira ꞌicën. Ax uisa ñubi uniocëma pan ꞌaish usabi ꞌiá ꞌaish ca ax usabi ꞌia. Usabi ca ax ꞌicën. Ashi, Judas.