Jeremías 52 - Kashibo-Kakataibo Biblia

Sedequías Judá menu ꞌapu ꞌia ñuikë bana

¹ Sedequías an ka veintiún ꞌimainun achúshi baritiañu ꞌixun ꞌapu ꞌikin pëubakëxa, pëua ꞌaish ka mapai rabë́ ꞌimainun achúshi baritia Jerusalénnu ꞌapu ꞌiakëxa. Aín titax ka Hamutal kakin anëkë ꞌiakëxa, ax ka bëtsi Jeremías kakë uni Libná ëmanu tsókë uni aín ini bëchikë xanu ꞌiakëxa.

² ꞌAínbi ka an ꞌakë ñukamax Nukën ꞌIbun iskëx Joaquímnën ꞌasaribiokin ꞌakë ax ꞌaisama ꞌiakëxa.

³ Usokin ꞌakëbë atumi xuamati nishkin ka Nukën ꞌIbun an ꞌinan me Jerusalén ꞌimainun Judá anua atu chikíankëxa. Usokin ꞌatankëxi ka ꞌapu Sedequías Babilonianu ꞌikë ꞌapubë banakë usakinbi ꞌaisama tankëxa.

Jerusalén ëma Babilonianu ꞌikë ꞌapun aín suntárukamabëtan bia ñuikë bana

⁴ Nueve baritia ꞌikëbëa mapai rabë́ nëtë décimo ꞌuxë ax ꞌikëbë ka Sedequías Nabocodonosor aín suntárukamabë Jerusalén ꞌanuxun bëararati kuanx anu bëbaxun atun ëma ꞌurama ꞌikankëxa. Anuxun ka anun ëma kënëara kënë abi mañarakin anun ꞌirukianxun atu ꞌati akama pain ꞌakëxa.

⁵ Usokin atu ꞌanuxun axa atumi nishkë unikaman ëma bëararakë ꞌain ka Sedequkías mapai rabë́ ꞌimainun achúshi baritia sënë́mi ꞌapu ꞌikë ꞌiakëxa.

⁶ Usai ꞌikë ꞌain ka rabë́ ꞌimainun rabë́ ꞌuxë ꞌirukëbë nueve nëtë ꞌikë anun Babilonianu ꞌikë suntárukamax basipain ꞌikëbë anun a piti ñukama këñuakëxa, usai ꞌikëbëa a piti ñu ꞌaimaira ꞌain ka uni numin ꞌitsaira a ëmanuax ꞌikankëxa.

⁷ Usa ꞌain ka anun ëma kënëarakë anu kini achúshi atankëx anun abákankëxa, usa ꞌain ka a ëmanuax a imë́ Babilonianu ꞌikë suntárukaman bëararakë ꞌaínbi aín suntárukamabëbi ꞌapu Sedequías abánëakëxa. Abáti ka kënën bëara rabë́ okë xëkuë anun kuani ꞌapun xubu rapasu ñu ꞌapákë a ratanbiani kuankin bai bibiani Jordán kakë baka me sapan ami kikiani kuankëxa.

⁸ ꞌAínbi ka Babilonianu ꞌikë suntárukaman ꞌapu Sedequías nuibianxun Jericónu ꞌikë me sapan anua nukúkin ñatankin biakëxa. Bitsia ka kamaxunbi aín suntárukaman abati abískin ënkankëxa.

⁹ Usokin ñatanbiankin ka Babilonia suntárukaman ꞌapu Sedequías ꞌimainun aín bakë bëchikëkama Hamat kakë menua ꞌikë ëma Riblá kakë anua Babilonianu ꞌikë ꞌapu kuankë ꞌain anu buánkëxa. Anuxun ka ꞌapu Nabucodonosornën Sedequías mix kamina tëmëramikë ꞌiti ꞌai kixun kakëxa,

¹⁰ usakin ꞌakin ka an ismainunbia aín bëchikë bëbukama tëbískakin ꞌanun ꞌamiakëxa, ꞌamianan ka Judá menua ꞌikë ain aintsi kamaribia ꞌanun ꞌamiakëxa.

¹¹ ꞌAmianan ka Sedequías aín bëru rabë́ ëchítancëxuan manë risin tëkërë kabiankin Babilonia menu anúan bamati nëtë ꞌitámainun sipuanuxun buánkëxa.

Anuxun Dios rabiti xubu në́an ñuikë bana

¹² Nabucodonosornën ka an bërúankë ꞌain suntárunën ꞌapu comandante Nebuzaradán Jerusalénnu xuakëxa, xukëx kuanx ka mapai achúshi ꞌuxë ꞌitankëx mapai achúshi nëtë ꞌikë anun bëbakëxa, anun ka diecinueve baritia ꞌapu ꞌiakëxa,

¹³ an ka Babilonianu ꞌikë suntárukaman anuxun Dios rabiti xubu, ꞌanan anua ꞌapu tsókë aín xubukama ꞌanan kamabi uni ñu ꞌunánkë a ëmanu ꞌikë aín xubukamaribi nëënun ꞌamiakëxa,

¹⁴ usakin ꞌanan ka Babilonianuax kuankë suntárukama anun buinarakin Jerusalén kënëara kënë a rurupakëxa.

¹⁵ Usokin ꞌatankëxun ka Nebuzaradánën aín suntárukamabëtan an ñu ꞌain mëkënanbi unioti ꞌunánkë unikama raíri ꞌimainun, axa Jerusalénnu bërúkë uni raíri ꞌimainun, axa Babilonianu ꞌikë ꞌapumi ꞌinamëti anu kuankë akamakëñun unikama buánkëxa.

¹⁶ Usakin uanan ka uni ñuñumaira akamaishi naëoxun uvas ꞌapáxun mënioi ꞌinun axa ñuñumaira raírishi ënkankëxa.

¹⁷ Usonan ka Babilonianën suntárukaman anuxun Dios rabiti xubunu ꞌikë manë panshian ꞌakë ñukama tukapakëxa: ꞌanan ka ami xubu ꞌati nitsínkë akëñun ami birukin ꞌakë aín tapunkëñunbi chaiira ꞌinúa ami ꞌumpax nanti ꞌakë akamabi tukapakëxa, ꞌanan ka kamabi manë panshian raíri Babilonia ëmanu buánkëxa.

¹⁸ Buanan ka amia chimapu bikë manë xampa, chukúmabu a ꞌimainun anun ñu mëëti ꞌakë manë pará, ꞌimainun manë sani kuënukësa okin ꞌakë a ꞌianan, manë xampakama, cuchara chabu a ꞌimainun, anun Dios rabikin xëati, manë panshian ꞌakë, anuxun Dios rabiti xubunu nankë akama buánkëxa.

¹⁹ Nebuzaradán an ka ꞌain suntárukabëtan kamabi ñu kuri ꞌakë ꞌimainun manë uxua ꞌakë akamabi buánkëxa: buánkin ka ami piti chabukama, a tiríotikama, tasunkama, ami chimapu bikëkama, anu lamparín nantikama, cuchara chabukama ꞌianan a ꞌinainshikë vino baka ami xëati chukúmabu okin ꞌakë akamabi biakëxa.

²⁰ Salomónnën manë panshian anuxun Dios rabiti xubunu ꞌamia ñukama ax ka ꞌiakëxa, ami xubu puruti ꞌirakanti rabë́ ax ka anu ꞌumpax nanti chaiira vaca bënëkama tankin manë panshian, mapai rabë́ ꞌimainun rabë́ tankin ꞌakë a manámi ꞌiakëxa, ax ka uiti ꞌëñëira kara kixun uínbi ꞌunántisama ꞌiakëxa.

²¹ Usa ꞌain ka ami xubu ꞌati nitsínkë rabë́ ax ꞌain chaxkë́ ocho metro inumikin ꞌakë ꞌiakëxa, ꞌimainun ka mapai achúshi metro ꞌimainun rabë́ metrosa inúmikë aín naxba ꞌiakëxa, ꞌianan ꞌukëmëu naxabañu ꞌiakëxa, ꞌimainun ka manë panshian ꞌakë ax siete centímetro aín rastun ꞌakë ꞌiakëxa.

²² Usa ꞌain ka ami birukin ꞌakë achúshi achúshinëx rabë́ metro ꞌakë a manámi inumikin ꞌakë anu manë panshianën ꞌakë ꞌiakëxa, usa ꞌain ka xaban xabanbu ꞌinun buinarakin manë panshianën rokin kaxori bimi tankin, upí ꞌitánun ꞌakë ꞌiakëxa. Usa ꞌaish ka ꞌirakankë rabë́ ax Babilonio unikaman rurupaisama ꞌaish sënë́nbi ꞌitánun ꞌá ꞌiakëxa.

²³ Usa ꞌaish ka xaban xaban ꞌitanuan ꞌakënua kaxori tankin ꞌakë ax cien kaxori bimi tankin ꞌakë ꞌiakëxa, ꞌimainun ka noventa ꞌimainun seis kaxori bimi tankin ꞌakë ax unin kuainkin istisabi okin ëman ꞌakë ꞌiakëxa.

Judá menu tsókë Israel unikama ñatanbiankin Babilonianu ꞌikë unikaman buan ñuikë bana

²⁴ Nebuzaradán comandante suntárunën ꞌapu an ka Seraías sacerdotekaman kushi a ꞌianan, sacerdote Sofonías Seraíasnën kakësabiokin ñu ꞌakë ꞌimainun rabë́ ꞌimainun achúshi uni an anuxun Dios rabiti xubu ꞌain xëkuë bërúankë akama ñatankin biakëxa.

²⁵ Bianan ka a ëmanua suntárunën kushi an nikinkë a bianan mapai achúshi ꞌimainun rabë́ uni abëa ꞌapu nikë ꞌimainun an suntáruti uni bikë akama ꞌimainun sesenta uni ñu ꞌunanbu akamaribi a ëmanua biakëxa.

^26-27 Usokin bitankëxun ka suntárunën kushi Nebuzaradán an atu aín suntárunën kushikamabëtan, kamabi uni ñatankë a Riblá kakë ëma Hamat menu ꞌikë anu ꞌapu ꞌain anu buánkëxa. Anuxun ka ꞌapu Nabucodonosornën ꞌain suntárukaman atu këñunun ꞌamiakëxa. ꞌAmianan ka raíri unikama Judá menua bëkë a atun menu buánkëxa.

²⁸ ꞌApu Nabucodonosornën axa ꞌapu ꞌikë mapai achúshi ꞌimainun rabë́ baritia ꞌain ñatanbiankin Judá menu ꞌikë unikama uanun amia: ax ka tres mil ꞌimainun veintitrés uni ꞌiakëxa;

²⁹ buan ꞌixun ka dieciocho baritia ꞌapu ꞌikin ochocientos treinta ꞌimainun rabë́ unikamaribi Jerusalénnua buánkëxa;

³⁰ usakin ꞌá ꞌain ka veintitrés baritia ꞌapu Nabucodonosor ꞌikëbëtan Nebuzaradán anribi setecientos cuarenta ꞌimainun cinco Judánu ꞌikë unikamaribi buántëkëankëxa, usa ꞌain ka akamabi tupúnkëx cuatro mil seiscientos uni ñatanbiankin buánkë Babilonia menu ꞌiakëxa.

Joaquín ꞌapu itsin sipua ꞌikëbi bëtsi ꞌapun nuibakin chikían ñuikë bana

³¹ Usa ꞌain ka Joaquín kakë ꞌapu Judá menua ꞌikë a bitankëxun Babilonianu ꞌikë ꞌapun treinta ꞌimainun siete baritia sipuakëxa, sipuakë ꞌikëbi ka mapai rabë́ ꞌimainun rabë́ ꞌuxë ꞌikë ꞌaia veinticinco nëtë ꞌikë, anun ꞌapu ꞌikin pëukin achúshi uni Evil-merodac, kakë an nuibakin an bëtsi ꞌapun sipua ꞌikëbi Joaquín chikíankëxa,

³² usakin ꞌanuxun ka upiti abë banakin ñatanbiankin buánkë bëtsi menu ꞌikë ꞌapukama ꞌakësamaira okin Babilonianu ꞌikë ꞌapun abëa ꞌinun ꞌimikin nuibakëxa.

³³ Usakin ꞌakëxun ka Joaquínnën sipunuxun pañukë chupa a pëanan bëtsi chupa pañuakëxa, pañutankëxun ka ꞌapubëtan aín ñuti nëtë ꞌitamainun ꞌapun xubunuxun piakëxa.

³⁴ Usakin ꞌaia ka Joaquín aín ñuti nëtë ꞌitámainun Babilonianu ꞌikë Evil-merodac an nëtë kamabi anúan aín kuëënkë ñu maruti kuríki ꞌinánkëxa.