Jeremías 36 - Kashibo-Kakataibo Biblia

Baruc kakë unin kirika tarankë anuxun Dios rabiti xubunuxun isa ñuikë bana

¹ Anúa Josíasnën bakë bëchikë Joaquím ax Judá menu ꞌapu ꞌikë rabë́ ꞌimainun rabë́ baritia ꞌikë ꞌain ka Nukën ꞌIbun an bana ñuikë Jeremías kakëxa:

² “Achúshi kirika tarankë anu kuënëokëma bixun kamina kamabi usaía Israel ꞌimainun Judá menu ꞌikë ꞌimainun bëtsi mekamanu ꞌikë unikama ñuikin ꞌën mi kakë banakama kuënëoti ꞌain, kuënëokin kamina anúan Josías ꞌapu ꞌikë anun kakin pëua ꞌixun bëríbi ꞌën mi kakë banakama a kuënëoti ꞌain.

³ A banakama kuakin sapi ka Judánu ꞌikë unikaman ꞌën atunu ñu ꞌaisama ꞌimiti sinánkë a ꞌunánkin, atuan ñu ꞌatima ꞌati sinánkë a ënti ꞌikën, usakin a banakama kuakin ënia kana atun ñu ꞌatima ꞌai ꞌuchakëkama a mëníoxunti ꞌain.” Kiax ka kiakëxa.

⁴ Usa ꞌain ka Jeremíasnën Baruc Neríasnën bakë bëchikë a kuëankëxa, kuënkë́xa aia ka kamabi usakin Diosan kakë banakama ñuixuankëxa, ñuixunkëxun ka Barucnën achúshi kirika tarankënu a banakama kuënëokëxa.

⁵ Usakin kuënëomitankëxun ka Jeremíasnën Baruc kakëxa: “Ka kuat, ꞌë ka anu kuainsama okin bëarakania usa ꞌain kana anuxun Nukën ꞌIbu rabiti xubunu kuainsa tanibi kuaniman.

⁶ Usa ꞌain kamina mix kuanti ꞌain. Anua piti mëëti nëtë ꞌitëkënkëbë kamina kirika tarankënumi ꞌën kakëxun kuënëokë banakama a anuxun Dios rabiti xubunua timë́kë a ꞌimainun kamabi uni Judá ëma kamanuaxa ënu ukë atun kuanun mitsun ꞌIbun banami kuënëokë ënë min isi kuanti ꞌain.

⁷ Usakin mi ꞌaia kuati sinanakin sapika atun ñu ꞌatima ꞌakëkama Nukën ꞌIbu chikinaxunkin ënti ꞌikën. Usa ꞌain ka Nukën ꞌIbu ꞌitsaira nishaxa, usa ꞌain ka usakin unikama ꞌakatsia kikë ax ꞌaisama ñuira atunu ꞌiti ꞌikën.”

⁸ Usakin an bana ñuikë Jeremíasnën kakëxun ka Barucnën an kakësabiokin kamabi ꞌakëxa: ꞌaika anuxun Dios rabiti xubunu kuanxun kirika tarankënu kuënëokë Nukën ꞌIbu kikë banakama a unikaman kuanun ꞌisi kiakëxa.

⁹ ꞌApu Joaquím Josíasnën bakë bëchikë axa mapai achúshi baritia Judá menu ꞌapu ꞌikë ꞌaían nueve ꞌuxë ꞌirukë anun ka Jerusalénnu tsókë ꞌimainun Judá menu ꞌikë ëmakanuaxa Jerusalénnu ukë akamax ka samákin pikëmëti Nukën ꞌIbu kuëëntanun ꞌai anu ꞌikankëxa.

¹⁰ Usai anu ꞌikankë ꞌain ka anuxun Dios rabiti xubu ꞌukëmëu me mëníokë anun kuanx xëpúti ió kakë anun atsínti anua Israel uni Safán suntárunën kushi aín bëchikë Guemarías ax kirika kuënëoi tëkë manámi anu atsíankëxa, anuxun ka Barucnën kamabi unikaman kuanun kirika tarankënua Jeremíasnën kakëxun kuënëokë banakama a isnun ꞌai kiakëxa.

Baruc kakë unin kirika tarankënua kuënëo bana ꞌapubë tëkë unikaman kuanun isi kia

¹¹ Achúshi uni Micaías kakë Guemaríasnën bakë bëchikë Safánën xuta, an ka Barucnën kirika tarankënua Dios kikë bana kuënëokë a isi kia kuakëxa,

¹² usa ꞌain ka a kuabiani ꞌapun xubu anua an kirika kuënëokë uni tëëkë anu kuankëxa, anu ka kamabi axa ꞌapubë tëkë aín kushikama timë́kë ꞌiakëxa: ax ka Elisamá an kirika kuënëokë a ꞌiakëxa, ꞌimainun ka Delaías Semaíasnën bakë bëchikë, Elnatán Acbornën bakë bëchikë, Guemarías Safánën bakë bëchikë; Sedequías Hananíasnën bakë bëchikë, ꞌimainun ꞌapubë tëkë uni raíri akamaribi ꞌiakëxa.

¹³ Usa ꞌain ka Micaíasnën kamabi unikaman kuamainúa kirika tarankënua isi kia Baruc kuabiankë a ñuixuankëxa.

¹⁴ Ñuixunkëxun kuatankëxun ka ꞌapubë tëkë unikaman Jehudínën papa Netaníasnën bakë bëchikë Selemíasnën papa Cusí aín bakë bëchikë a xuakëxa, xukin ka unikaman ismainunbi isi kikë a kirika uania kuanun Baruc katánun kixun kakëxa. Xukëx kuanxun kakëxun kirika tarankë a bibiani kuanx ka atunu Baruc bëbakëxa,

¹⁵ bëbaia ka atun kakëxa: —Nu rapasu tsóbukin kamina kirika tarankë mi bëkë a nukaman kuanun isi kiti ꞌain. Kakëxun ka Barucnën atu iskin ꞌaxuankëxa,

¹⁶ usokin ꞌaxunkëxun kuatishi ka ꞌitsaira rakuë́ti bëtsibë bëtsibë isánani kanankankëxa. —Ënë banakama kananuna ꞌapu bënë́kin kati ꞌain.

¹⁷ Usai kanantankëxun ka atu achúshinën Baruc kakëxa: —Nukama karamina uisokin ënë banakama kuënëo ñuixunti ꞌain.

¹⁸ Kixun kakëxun ka Barucnën kakëxa: —An bana ñuikë Jeremías anbi ka usokin kuënëonun ꞌë kaxa, kakëxun kana ꞌën mëkënanbi kirika tarankënu kuënëon.

¹⁹ Usa ꞌain ka achúshinën Baruc kakëxa: —¡Mi ꞌimainun Jeremías ka uínbi ꞌunántisamanu unëti kuanti ꞌikën!

ꞌApu Joaquímnën kirika tarankë a xaró ñuikë bana

²⁰ ꞌApubë tëkë unikamax ka anua Elisamá kirika kuënëoi tëkë anubi kirika tarankë a nabiani aín xubu anuabi na kuakë banakama ꞌapu kai rikiankëxa.

²¹ Rikianxun kakëxun ka ꞌapun Jehudí kirika tarankë anua Elisamá kirika kuënëoi tëëkë anua bitánun xuakëxa, xukëx kuaxun bitsínkin bëxun ka Jehudínën ꞌapu ꞌimainun a rapasu ꞌikë aín unikama kuanun isi kiakëxa.

²² A nëtën ka nueve ꞌuxë ꞌirukë anun mita ꞌain xubu panaitsi anua tsi tikakë ꞌiakëxa.

²³ Usa ꞌain ka anuxun Jehudínën iskin rabë́ ꞌimainun achúshi okin ꞌanan rabë́ rabë́ okin anua bana sënë́nkë anu sënë́onkëtibi ka ꞌapun manë xëtokën tëaxun tëaxun tsi rëkirukënu xarátanun ꞌaruakëxa. Usakin ꞌakin ka kirika tarankë kuënëokë a xarokin këñuakëxa.

²⁴ Usokin kamabi kirika iskin ꞌaia kuatíbi ka ꞌapu ꞌimainun aín unikamax rakuëanan masánuituti anun paëama ꞌikën.

²⁵ Usokin ꞌaia ka Elnatán, Delaías a ꞌimainun Guemarías an munuma banakin ꞌapu kirika kuënëokë tarankë a xaroxuma ꞌanun kakëxa, ꞌaínbi ka atun kakëxun ꞌapun kuaisama tankëxa.

²⁶ Kuaisama tankin ka aín aintsi ꞌibuira Jerahmeel a ꞌimainun bëtsi Israel uni ꞌibuirama, Seraías Azrielnën bakë bëchikë a ꞌimainun Selemías Abdeel ain bakë bëchikë akama, an Dios kikë bana ñuikë Jeremías ꞌimainun an kirika kuënëoxunkë Baruc ñatanun kixun kakëxa. ꞌAínbi ka Nukën ꞌIbunbi a uni rabë́ unëkë ꞌiakëxa.

Jeremíasnën amiribishi kirika tarankënu kuënëonun ꞌamitëkëan bana

²⁷ Usakin Jeremíasnën kakëxuan Barucnën kirika tarankë kuënëokë a ꞌapun në́nkë ꞌain ka Diosan, Jeremías kakëxa:

²⁸ “Amiribishi bëtsi kirika tarankë bitëkënxun kamina anu kamabi a painmi kuënëomikë ꞌikëbia ꞌapu Joaquím Judánu ꞌikë an xarokë a banakamabi kuënëonun ꞌamiti ꞌain.

²⁹ Ësokin kamina kati ꞌain: Ësai ka Nukën ꞌIbu kiaxa: Min kamina kirika tarankë a nëëanan Jeremías atima banan uisa kupí anu kuënëokin Babilonianu ꞌikë ꞌapux isa aimama ꞌima, ënë ëma masókin uniñuma ꞌianan ñuinañuma ꞌitánun këñui aia kixun kan.

³⁰ Usa ꞌain kana ꞌëx Dios, ꞌixun ësokin mi kain, Joaquím Judánu ꞌikë ꞌapu, min rëbúnkinëx ka David ꞌiásaribiti ꞌapu ꞌitima ꞌikën. Usa ꞌain ka uínbi mi ñuia mainiama nëtën ëman rakákë bari xanan ꞌabaitia imë́ribi matsi ꞌibúkë anribi min nami ꞌati ꞌikën,

³¹ mi ꞌimainun ka min rëbúnkikama ꞌimainun an mi min xubunuxun ñu mëëxunkë unikama atun ꞌuchakama kupín ꞌatima oti ꞌain. ꞌAnan kana mitsunu ꞌimianan Jerusalénnu tsókë ꞌimainun Judánu tsókë unikamanuribi ñu ꞌaisama ꞌimiti ꞌain ꞌëx kiabimi mitsun kuaisama tankë axa atunu ꞌinun.”

³² Usakin kakëxun ka Jeremíasnën bëtsi kirika tarankë bixun an kirika kuënëoxunkë Baruc a ꞌinánkëxa, ꞌinánkëxun ka Jeremíasnën kamainun Barucnën a paian bëtsi kirika tarankënu kuënëokëbia ꞌapu Joaquímnën xarokë a bana kamabi kuënëokëxa. ꞌAnan ka Jeremíasnën a pain kuënëokë banakama a kuakësabi ꞌitánun amiribishi bëtsi banakamaribi kuënëomiakëxa.