Isaías 58 - Kashibo-Kakataibo BibliaUsakin asérabi Dios kikësabiokin pikëmëti ñuikë bana 1 Nukën ꞌIbun ka ësokin ꞌë kaxa: “Rakuëtimaishi kamina munuma banai kiti ꞌain, usai ꞌi kamina manë banañu banokëx ꞌikësa min bana ꞌinun kushin banati ꞌain; usai ꞌikin kamina ꞌën kaísa unikama atun ꞌakë ꞌatima ñukama ñuikin kati ꞌain, ax ka Jacobnën rëbúnkikama ꞌikën atun ꞌuchakëkamaribi ñuikin kati ꞌain. 2 Kamabi nëtën ka ꞌë baria, usa ꞌixun chuámarua tani ꞌëx kikësoi ꞌikatsi kiax ꞌikin, achúshi ëmanu ꞌikë unikaman ꞌupiokin ꞌakësokin ꞌakin, ꞌën bana kikësama okinma ꞌaia kixun; upíokin ꞌën bana kikësokin ñu ꞌaxúnun ꞌë kaia, usakin ꞌë ñukati ka ꞌëx kikësabi oisa ꞌisatania kiax kuëënkania, 3 usai ꞌibi ka kikania. ¿Uisa kupín karanuna Diosan iskëbëtanmabi pikëmëti ꞌain? ¿Uisa kupín karanuna Diosan ka usai ꞌi tëmëraia kixun ꞌunánkëbëmabi usai ꞌiti ꞌain? Anunmi pikëmëti nëtën kamina mitsun ñukama marutishi ꞌanan, a mitsun ñu mëmikë unikamaribi ꞌatima okanin; 4 anúnmi pikë mëti nëtë anun kamina mitsux ñukanantankëx mëëanankin bëtsi min mëkënanbi mëëxun rëtëkin a nëtë inumikanin. Usa ka anun pikë mëti achúshi nëtë ax ꞌitima ꞌikën, usai ꞌikin ñukákëxunbi kana ꞌën mitsun bana kuatima ꞌain. 5 ¿Mitsun sinánkëx kara usakin piti mëëkin ꞌakë ax anun ꞌëx kuëëntisa ꞌikë uínsaran karamina masá nuituti tëmërakani basi ꞌikësai ñanati, ꞌikin chupa chuakë pañuax chimapunu rakakë ax asabi ꞌiti ꞌik? ¿A kaina mitsun anun pikëmëtisa kanan a nëtën ka Nukën ꞌIbu usakin ꞌakankëbë kuëënia kixun sinánkanin? 6 ꞌAínbi ka usakin ꞌakë ax ꞌën iskëx usama ꞌikën. ꞌËx a isi kuëëntisabi ꞌitánun piti mëti ax ka ësokin ꞌati ꞌikën, bëtsi unikamax ka upíokin nuibakë ꞌiti ꞌikën, usa ꞌaish ka anun uni ñu ꞌatima ꞌakëmabi tëkërëkakë manë risi të́kakë usa ꞌianan, vaca bënë tëatsimixun i anun tëkërëkakë risi churukë usaribi mitsunan ꞌiti ꞌikën; ꞌianan ka bëtsi unin tëmëramikë axribi ñankáishi ꞌitánun këñúkë ꞌiti ꞌikën, usakin ꞌakëx ka ꞌapukamaxa unimi an kuëënkësa okin ꞌakë ax këñúkë ꞌiti ꞌikën; 7 ꞌianan ka uix kara pitiñu ꞌikë an axa ꞌakëñuma nikë uni a aín piti ꞌinánti ꞌikën, ꞌianan kamina mitsun uix kara xubuñuma ꞌikë a min xubunua ꞌinun ꞌimiti ꞌain; ꞌimianan kamina chupañuma ꞌikë bëtsi uni ꞌinánan kamina misaribi uni aribi ꞌakinti ëntima ꞌain. 8 Usa ꞌain ka bëtsi ꞌakinkëbë mitsun tsóti ax barin urukin nëtë pë́kabëtsinkë usaribi ꞌiti ꞌikën, usai ꞌikëbë ka mitsun ñu ꞌatima ꞌakëkama nami tëakë ax bënëtishi mókësaribi ꞌinun mëníokati ꞌikën. Usai ꞌikëbë upiti tsókëbë kana ꞌëx Dios kamabi kushiñu ꞌaish mitsubë ꞌiti ꞌain. 9 Usa ꞌain kana ꞌëmi ñukákëxun, ꞌënribi ënu kana ꞌai kixun mitsu kati ꞌain; ꞌianan kana munuma banakinmi ꞌakinun kixun ñukákëxun ꞌënribi mitsu: Ënu kana mitsu ꞌakinux ꞌai kixun kati ꞌain. Mitsúnmi këmëxun bëtsi ñankabi ꞌatima okë a ëanan, bëtsi ꞌichakin ñuikë ꞌimainun bëtsimi këmëi manánkë akama ënia kana usakin ꞌati ꞌain, 10 ꞌanan kamina mitsun piti binux mi tëkë usaribikin axa pitiñuma ꞌaish ꞌakëñuma unikama ꞌain piti ꞌinanux tëkanti ꞌain, ꞌanan kamina bëtsin ꞌakinti kuëëniabi ꞌakinkëma uni aribi ꞌakinkanti ꞌain, usakin ꞌai mitsux tsókë ax ka tirítan bëánkibukë pëkakë usaribi ꞌiti ꞌikën, ꞌianan ka barin xamarukin ñun tupëonkëkama pëkakë usaribi mitsun tsóti ax ꞌiti ꞌikën. 11 Usokin ꞌaia kana ꞌën ënkinma mitsu kuania buánti ꞌain, anu uni ꞌikëma me anua ꞌumpax ꞌaíma anuxunbi kana ꞌitsaira piti mitsu ꞌinánti ꞌain, mitsu ꞌinánkëxun pi kamina mitsun nami kushiti ꞌain, usai ꞌi kamina unin aín ꞌikë ꞌurama naë chukúma ꞌapáxun chabókë usaribi ꞌianan, xëxá upí aín ꞌumpax uínsaranbi ëskikëma usaribi ꞌikanti ꞌain. 12 Mitsun unikaman ka anun ëma kënëara kënë xëni ꞌikëbia rurupakama a birutëkënti ꞌikën, ꞌanan ka aín tapunkama bërámaira ꞌakan aribi kushiokin ꞌatëkënti ꞌikën. Usokin ꞌakë ka mitsun unikama raíri a bëtsi unikaman, an anun ëma kënëara birutëkënkin mëníokë kakin anëanan, an xubu rurupa ꞌikëbi ꞌatëkënkë kakin anëti ꞌikën. Diosan anun ñu mëëtima nëtën usai ꞌiti ñuikë kia bana 13 Anun ñu mëëtima nëtë ꞌikëbëtan kamina; mitsun maruti ñu marutima ꞌain: ax ka ꞌën nëtë upíira ꞌikën. Usa ꞌain ka a nëtë anun kuëënti nëtë, kakin anëkë ꞌain Nukën ꞌIbun anun rabiti nëtë ꞌain añu ñubi uinu ꞌikë unínbi ꞌatima ꞌikën; usa ꞌain kamina a nëtën mintsun sinánkësa ꞌoíshi bananan, mitsunan ꞌiti ñuishi ꞌanan mitsun ñu marutishi ꞌakantima ꞌain. 14 Ënë bana kikësa okinbi ꞌaia kana ꞌën mitsu kuëënun ꞌimiti ꞌain, ꞌianan kana ꞌën bëtsi menu ꞌikë unikama ꞌakin kanantankëxun atun me ami bëbarukin binun ꞌamiti ꞌain, ꞌimianan mitsun chaitiokë Jacobnën me ꞌia anuami kuëënun mitsu ꞌinánti ꞌain.” Usai ka Nukën ꞌIbu kiaxa. |
© 1978, 1995, 2008, 2022 Wycliffe Bible Translators, Inc. All rights reserved.
Wycliffe Bible Translators, Inc.