Isaías 5 - Kashibo-Kakataibo Biblia

Uvas tuañuma nikë usaribi ka Judá ꞌikë kixun ñuikë bana

¹ ꞌËx kana ꞌën ꞌunairakë uni an ësai kantanun kakë a sinani kantain, ꞌianan kana aín uvas ꞌapákë a ñuiribi kantati ꞌain. ꞌËn ꞌunánkë uni ax ka uvas ꞌapákëñu ꞌiakëxa, ax ka achúshi me anu upiti ñu koókë anu ꞌiakëxa.

² ꞌAnan ka meribi anu ꞌapáti buinakin anu ꞌikë maxákamaribi timëkin bukuntankëxun, anu ñu bëru upíbu kamaishi ꞌapákëxa. ꞌAtankëxun ka ñu bëru ꞌapákë a nëbëtsi achúshi torre chaiorukin ꞌanan, anuxun uvas ꞌapákë aín baka biti aribi mëníokëxa. ꞌËn ꞌunánkë unin ka an ꞌapákë uvaskama bataira ꞌitánun tuati kaíankëxa, ꞌaínbi ka uvas ꞌapákëkama an aín bimi kacha ꞌinun tuakëxa.

³ Usa ꞌain ka Jerusalénnu ꞌikë ꞌimainun Judánu ꞌikë unikama bërí kiti ꞌikën, uix kara ꞌuchaxa, ꞌën ꞌapákë uvaskama ꞌianan karana ꞌëx ꞌucha kiax kiti ꞌikën.

⁴ ¿Añu ñuribi karana ꞌën ꞌapákë uvaskama ꞌati ꞌain? ¿Anu kara usakin ꞌaisa ꞌikëbi ꞌën ꞌakëma ꞌik? ꞌËn kana ꞌapákë uvaskama bataira ꞌitánun bimiti kainkë ꞌian, ¿Uisa kupín kara uvas kaman kacha ꞌitánun tuax?

⁵ Asábi ka usa ꞌain kana uisakin ꞌën uvas ꞌapákëkama ꞌati karana, bërí sinani a mitsu kati ꞌain: bërí kana anun bëarakin i muxañukama ꞌapákë a anun atsínxun vacan ꞌatima otanun biti ꞌain; bianan kana anun kënëara maxá ꞌakëkama aribi anun atsínxun vacan ꞌaisama okin amátanun amanu amanu kinioti ꞌain;

⁶ usokin ꞌaxun kana rakanti ꞌain. Rakanxun kana chuku ꞌiruiabi mëníokin ëchimitima ꞌain, usokëx ka muxa ꞌirumainun chuku ꞌaisamaribi anu ꞌiruti ꞌikën. Usokin ꞌatankëxun kana nëtë kuínuaxa, ꞌuí a chabói ꞌibúnun ꞌimitima ꞌain.

⁷ Nukën ꞌIbu Dios kamabi kushiñuira an ka aín ꞌapákë uvas ꞌitsaira kuëënia, usaribi ka Israel menua ꞌikë a ꞌimainun, Judá ëmanua bukukë unikama atux ꞌikën. Usa ꞌain ka Nukën ꞌIbun anu tsókë unikama upíokin ñu ꞌaiama aín bana kikësabiokin ꞌati kaíankëxa, usa ꞌain ka unikama bëtsi unikamabë ꞌatima onani; ꞌupiokin ñu ꞌaínmabi; ꞌitsaira paë tani sharatia kuati ꞌikën.