Isaías 31 - Kashibo-Kakataibo Biblia

Egiptonu ꞌikë unikama atun ꞌakinun kixun an barikë unikama ñuikë bana

¹ ¡Uisai kara an Egiptonu ꞌikë unikama ꞌakinun kixun bari kuankë unikama ꞌiti ꞌikën, ꞌimainun kara axa atuinsa aín caballo ꞌitsañu ꞌixun ꞌakinun kixun sinanan, anuaxa ꞌakanankë caballonën nirinkë ꞌitsaira anun, ꞌakianan isa caballonu ꞌiruax kuanti unainrabu suntáru ꞌitsaira an isa ꞌakinti ꞌikë kixun Israel unikaman Dios upíira an ꞌakinun kixun ñukátima!

² Usa ꞌaínbi ka Diosanribi parántisama ꞌixun ñu ꞌatimaribi inúnun ꞌimiti ꞌunánxa, usa ꞌixun ka ñu ꞌakatsikiax kana ꞌaima kítëkënkinma ñu ꞌaia. Usa ain ax uni ꞌatimakama ami ꞌianan, an ꞌatima unikama ꞌakinkë akama ꞌatima oia.

³ Egiptonu ꞌikë unikama ax ka unishi ꞌaish dios kamasama ꞌikën; ꞌianan ka atun caballokama namishi ꞌaish, bëru ñunshinsama ꞌikën. Usa ꞌain ka Nukën ꞌIbun a unikama ꞌain mëkënan ꞌakësokin, atu ꞌatimokin an bërúankë akëñunbi ꞌakëx bamati ꞌikën; usai ꞌika a kamaxi këñukanti ꞌikën.

⁴ Ësokin ka Nukën ꞌIbun ꞌë kaxa: “Achúshi paru ꞌinúanëx ka oveja bixun rëtëax, an ñuina bërúankë unikamami rakuë́tima, ꞌianan ka kamaxi timë́xun, munuma kuënkëni banakinbi ratutima ꞌikën, usaribikin ka Nukën ꞌIbu kamabi kushiñu ax aín unikama Sión kakë bashi anua ꞌakini uti ꞌikën.

⁵ Achúshi ñuina pëchiñunëan anua aín tuá ꞌikë aín na a manámi nuani mañakin bërúankësa, usaribi okin ka Nukën ꞌIbu kamabi kushiñuira, an aín unikama Jerusalén ëmanu ꞌikë akama bërúanan, ië́mikin ñu ꞌatima ꞌinutiabi bëruankin ꞌakinti ꞌikën.”

⁶ Israel unikaman rëbúnki mitsux kamina ꞌatimairai banakin ñuikankë Dios ami sinanatëkënkanti ꞌain.

⁷ Uisa nëtën kaina kamabi mitsun, kuëënkima timakanin unínbia kuri manë uxua ꞌakë akama, mitsun mëkën ꞌuchañu kaman ꞌakë,

⁸ anun ka Asiria ëmanu ꞌikë unikama manë xëtokën ꞌakë ꞌiti ꞌikën. ꞌAínbi ka unin aín kushínbi ꞌakëma ax ꞌiti ꞌikën. Usa ꞌain ka Asirio suntárukamax ꞌakanankënuax abákë ꞌiti ꞌikën, ꞌimainun ka anu ꞌikë uni bënákama ꞌakánanti ꞌunainrabu ax ñatanxun ñu mëëmikin tëmëramikë ꞌiti ꞌikën;

⁹ usakin ꞌakëbëa aín ꞌapu rakuë́ti abákiani chikíkëbë ka aín suntárunën kushikama axribi aín bandera rakanbiani abákanti ꞌikën. Ësai ka Nukën ꞌIbun asérabi kiakëxa, mëníokëxa tsi rëkirukin pëi chushikë pikësa usakin, Jerusalénnu ꞌëx ꞌixun kana anu ꞌikë unikama an ꞌaisatankë ami nishkë unikama ꞌën ꞌatimokin tëmëramiti ꞌain.