Habacuc 3 - Kashibo-Kakataibo Biblia

Habacucnën ashikin Dios ñuká bana

¹ Ënëx ka an Dios kikë bana ñuikë Habacucnën usakin Dios ñuká bana ꞌikën.

² ꞌËn kana kamabi ñu Dios ꞌixunmi ꞌa akama kuan, usa ꞌain kana ꞌitsaira ꞌëx mimi rakuë́tin. Usa ꞌain kamina nux tsókëpan ꞌain bërí bërámami ꞌasaribiokin ñu chaiirabu nunribi ꞌunánun nu ꞌaxunti ꞌain. Usakin ꞌakin kamina mix kamina nishíbi nuibanankë ꞌai kixun nu ꞌunánmiti ꞌain.

³ Dios ka Temán kakë me amiax uanan, Parán kakë menu ꞌikë bashi anuax Dios upíira ax uti ꞌikën. Aín kushin ka naíkamë ꞌëo kamabi pëkaia, usa ꞌikë ka kamabi menu ꞌikë unikaman a rabiti ꞌikën.

⁴ Usa ꞌain ka aín kushi ichu ichukikë anun bëarabuinkësa ꞌixunbi kanákan mëríkin pëkakë usaribi okin aín kushi unë́kësa ꞌikëbi mëramia, aín mëkënuax ka aín kushi an kushiira ꞌitánun pëkakë ax chikiti ꞌikën.

⁵ Usa ꞌain ka axa ukëbë bëtsi bëtsi ꞌinsín chikíkëbë, a kaxú anuan ꞌitsaira uni bamati ꞌitsis kushiira ꞌiti ꞌikën.

⁶ Usa ꞌain ka axa nirakëkëbë me shaíkiti ꞌikën, ꞌimainun ka kamabi menu ꞌikë uni an iskëx ꞌitsaira rakuë́ti ꞌikën, an ka nikama ꞌimainun bashi xënikama rurukubunun ꞌimianan, bërámaira an painra ënënsarama unia nikama këñuti ꞌikën, usaía ñukama ꞌimainun ka Dios ax uínsaranbi uisaibi ꞌikëma ax ꞌiásabi ꞌiti ꞌikën.

⁷ ꞌËn kana Cusánnu ꞌikë unikama kara uisai tsotia isan, atux ka ꞌaisamaira tëmëraia usa ꞌaish ka kini ꞌukëmëu pakëax uni urukasmakë usa ꞌikën, ꞌimainun kana Madiánu tsókë unikamami rakuë́ti matsispukuti ꞌikën.

⁸ ¿Mix karamina Dios ꞌaish bakakamami nishin? ¿Mix ꞌitsaira nishkin karamina parúmpapakama ꞌatima oti ꞌain? ¿Usa ꞌaish karamina min caballonën nikinkë anu ꞌirukiani bëtsi unikama ꞌikësa kiani kuanti ꞌain?

⁹ Min kanti kanukëishi ꞌimainun min piakama mëníokëishi kamina ꞌain. ꞌIanan kamina meribi anua bakakama rakati ꞌimiakën.

¹⁰ Usa ꞌain ka nikamaribi mi isi ꞌikësai shaíkiti ꞌikën. Usai ꞌimainun ka naínuax ꞌuí ꞌitsaira nëtë́timaira ꞌibúti ꞌikën, ꞌimainun ka parúmpapa aín nëmin axribi xukirui aín bëchun chairui banati ꞌikën.

¹¹ ꞌIanan ka bari ꞌimainun ꞌuxë amiaxa urukë anuax uruima anubi nirakëti ꞌikën, usai ꞌikëbë kamina mix pia upíira axa ichúkuatsini ukësa ꞌianan, paka pia axa nikëx mëríkiani kuankë usaribi ꞌain.

¹² Usa ꞌain ka mix nishkë ax kamabi menu kuania, mix ꞌitsaira nishkin kamina mekamanu ꞌikë unikama, ꞌatima okin kuakëmasa oti ꞌain.

¹³ Min unikama ꞌimainun, minbi kaískë ꞌapukama ꞌakinuxun kamina chikínti ꞌain. Min kamina an ñu ꞌatima akë unikaman xubu ꞌatimokin këñuanan, ami birukin atun xubu ꞌakë maparasa ꞌikë aín ꞌapukama aribi masókin këñukin ꞌati ꞌain.

¹⁴ Usakin ꞌanan kamina aín ꞌapukamabi an tuinkë aín pianbi ꞌan, usokëbë ka axa caballonu ꞌikëkama nëtë masá kuatsinkësa ax ꞌëx kana usaira ꞌai kiax kima an ꞌakintiñuma ꞌain, unikaman atu ꞌunánnumaishi unëxun këñukin ꞌati ꞌikën.

¹⁵ Nëtë kuínuax kamina caballonën ꞌikësai parúmpapanu kuani, uinu kara ꞌumpax kuainakëaxa anubi kuanti ꞌain.

¹⁶ Ënëkama ñu ꞌiti kuati kana rakuëan, usai ꞌi kana ꞌën kuëbí bërëkai ꞌian, ꞌianan kana ꞌën kisikama anun nisama ꞌimainun ka ꞌën namikamaribi kushima ꞌiaxa. Usa ꞌixunbi kana bënë́kinma uínsaran nëtën kara Diosan an nu ꞌatimokin ꞌakë unikama masánuitutanun aín suntárukama ꞌimia kaínti ꞌain.

^17-18 Usa ꞌain kana ꞌitsaira kuëënti ꞌain, Diosan ꞌë ië́mikin ꞌakinkëx. ꞌËn kana higuera kakë i uabutima ꞌimainua uvas ꞌapákëkama ꞌianan olivos kakë akama bimima ꞌimainun; naënu ꞌapákëxunbi ñun tuaima ꞌimainunbia; ñuina ꞌarakakëkama ꞌianan ovejakama ꞌimainun vacakama ꞌaíma ꞌinun këñúkë ꞌaia aín kënëishi ꞌaínbi kana ꞌën mishi rabiti ꞌain.

¹⁹ Diosan ka ꞌë kushioia, usakin ꞌakin ka ꞌën kisikama kushi ꞌimikin, chaxu abákësa ꞌinun abati, uinubi kara kuani aín bashinu kuani ië́nun ꞌë ꞌimiti ꞌikën.